Etandiha 10
10
Amawanga agaŋwa mu Nuwa
1Bino njʼebiŋamba hu Seemu ni Kaamu ko ni Yafeesi abasaani ba Nuwa, boosi basaala abaana oluvanyuma lwʼamataba.
Abasaani ba Yafeesi
2Abasaani ba Yafeesi baali nje Gomeri ni Magogi ni Madayi ni Yovaani ni Tubbali ni Meseki ko ni Tirasi.
3Abasaani ba Gomeri baali njʼAsukenaazi ni Lifaasi ko ni Togaluma.
4Abasaani ba Yovaani baali njʼElisa ni Talusiisi ni Kitimu ko ni Dodanimu. 5Mu basaani abo njʼomwaŋwa abaatu abamenyanga mu matwale hu bizinga, hiisi baatu nʼolulimi lwawe mu biha nomu mawanga gaawe.
Abasaani ba Kaamu
6Abasaani ba Kaamu, baali nje Kuusi ni Mizulayimu ni Puuti ko ni Kanani.
7Abasaani ba Kuusi, baali nje Seebba ni Kavira ni Sabbuta ni Laama ko ni Sabbuteka. Abasaani ba Laama, baali nje Seebba ko ni Dedani.
8Kuusi gasaala Nimuloodi era Nimuloodi oyo njʼowasooka ohuba omusooli owʼamaani hu hyalo huno. 9Era gaali muŋiimi hu lwʼamaani ga Musengwa. Cʼehifa hiromwa hiiti, “Hya Nimuloodi omuŋiimi owʼamaani olwʼamaani ga Musengwa.” 10Mu husooka, owahabaha buwe waali mu hyalo hyʼe Sinali ni buŋiriramo ebibuga Bbabberi nʼEreeki nʼAkudi ko ni Kalune. 11Ohuŋwa mu hyalo hyʼe Sinali, gatiina e Busuuli ngʼatongola Nineeve ni Lekobbosi Yira ni Kala 12ko ni Leseni ŋagati wa Nineeve ni Kala ehibuga ehibbala.
13Mizulayimu gaali semwana ya Ludimu nʼAnamimu ni Lekabbimu ni Nafutukimu 14ni Pasulusimu ni Kafutooli ni Kasulukimu, omu Bafirisuuti baasibuha.
15Kanani gaali semwana ya Sidoni omudaayi wuwe, ni Keesi 16nʼAbayebbusi nʼAbamooli nʼAbagirugaasi 17nʼAbahiivi nʼAbaluki nʼAbasiini 18nʼAbaluvada nʼAbazemali nʼAbahamasi.
Oluvanyuma, ebiha ebyʼAbakanani nga bisasaana. 19Era esalo eyʼAbakanani yaŋwa e Sidoni ohutiina e Gerali nga yoola e Gaaza nindi nga yitiina e Sodoma ni Gomora nʼAduma ni Zebboyiimu paka e Laasa.
20Abo njʼabasaani ba Kaamu mu biha byawe nomu lulimi lwawe nomu matwale gaawe era nʼegwanga lyawe.
Abasaani ba Seemu
21Era ni Seemu yeesi gasaala abaana. Muhulu ya Seemu gaali nje Yafeesi.#10:21 Yafeesi Ebyaŋandihiwa ebindi biroma biiti Seemu muhulu ya Yafeesi. Seemu gaali nje sehulu yʼabasaani bʼEbberi bosibosi.
22Abasaani ba Seemu baali nje Elamu nʼAsuuli nʼAlupakusaadi ni Luudi ko nʼAlaamu.
23Abasaani bʼAlaamu baali nje Wuuzi ni Kuuli ni Geseri ko ni Miseki.
24Ngʼaŋo Alupakusaadi asaala Seera nga Seera asaala Ebberi.
25NgʼEbberi asaala abaseere babiri. Mulala hu bo gaali nje Peleegi olwohuba mu ndaalo jije, abaatu basasaana. Mugandawe gaali nje Yokutaani.
26Nga Yokutaani asaala Alumodaadi ni Serefu ni Hazalumaveesi ni Yera 27ni Kadolaamu ni Wuzali ni Dikila 28nʼObbali nʼAbbimayeeri ni Seebba 29nʼOfiri ni Kavira ko ni Yobbabbu. Abo bosibosi baali basaani ba Yokutaani.
30Etwale omu bamenyanga lyaŋwanga e Mesa lyatiina e Sefari mu hyalo ehyʼesozi, ebuŋwalyuba.
31Abo njʼabasaani ba Seemu mu biha byawe nomu lulimi lwawe nomu matwale gaawe era nʼegwanga lyawe.
32Ebyo njʼebiha byʼabasaani ba Nuwa, hiisi muutu ngʼolu lulyo lulwe lwali mu mawanga gaawe. Era mu bo pomwaŋwa amawanga agasasaana ehyalo hyosihyosi oluvanyuma lwʼamataba.
Trenutno izabrano:
Etandiha 10: NUJ
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc.