Ad’u Tinda 3
3
Sana mi so vun Alona
1Wani guguina ni ma lem mamba kal azurei suma Ma didina Alona mi lazi petna. Mi de matchad’a ala: Alona mi dagi ala agi tagi vud’agu ma kur asinena pet tuo ni, gagazi zu?
2Atchad’a ti hulong de mi guguina ala: Ami ndak á tami vud’agu ma lara ge pî ma nga kur asinenina, 3wani vud’agu ma nga tchola aduk asinenina, Alona mi dami ala ami tum mbi, ami dom mbuo mi, kayambala ami bomi d’uo d’a.
4 Guguina mi de matchad’a ala: Hawa yak! Agi mba bogi d’i. 5Wani Alona mi wala bur ma agi tuma, iragi mba d’i mal leyo, agi mba mbud’ugi d’igi mam tamba na á we djivid’a ki tchod’a.
6Atchad’a ti wala agu máma mi djivid’a á gola, mi djivid’a á ted’a, mi djivid’a kal á wad’ud’a tetet. Kayam ndata, ti mat abod’u, ti ndot vud’agu máma, ti tumu, ti hum mi ndjuvut ma nga ki sed’etna, mi tum mi. 7Azi djak irazi mal leyo, a we tetet ala azi ni gandilad’a; azi tchil hum tuluma á zlubum ad’uziya.
8Wani sa máma kamamba a hum del Ma didina Alona nga mi tit hur asinena fladege, a ngei tazi avorom aduk agu ma nga hur asinenina. 9Wani Ma didina Alona mi yi sa máma, mi djobom ala: Angî lara ge?
10Sa máma mi hulong dum ala: An humung deleng hur asinena, an le mandarâ, kayam an ni gandilad’a. Kayam ndata, an ngei tan wana.
11Ma didina Alona mi djobom ala: Sama mi dang ala: Angî gandilad’a na ni nge ge? Na ni ang te ni vud’agu ma an dang ala: Ang tum mbuo na zu?
12Sa máma mi hulong dum ala: Natcha d’a ang handji gevenda ba, ti han vud’agu máma, an tumu.
13Ma didina Alona mi djop atchad’a ala: Ni kayam me ba, ndak le hina ge?
Atchad’a ti hulong dum ala: Ni guguina mi lobon ni mam ba, an tumu.
Alona mi ka sariyad’a kaziya
14Ma didina Alona mi de mi guguina ala: Kayamba ang le hina d’a, an nga ni gang vuna aduk d’uwarâ, aduk azureina pet; ang mba tan kä ki hayangû, ang mba tandaga d’a gugud’upa gak mat mangâ. 15An mba ni tin djangûna adigang katchad’a, aduk andjavang kandjavat mi. Mam mba mi mired’eng yang kä; ang mba ed’em dodogasemu.
16Bugola, mi de matchad’a ala: An mba ni hak ndak ka ngola ki wirâ; ndak mba d’i vut grona ni ki ndaka; hina pet pî, min maka mba d’i tchol nata ndjuvugu, mam mba mi te kak mi.
17Bugola, mi de mi Adam ala: Ang hum wa vun amanga, ang te wa vud’agu ma an dang kam ala: Ang tum mbuo na. Kayam ndata, an mba ni gandagad’a vuna ni kayam angû; ni ki ndaka tua ba, ang mba fe ki tena gak mat mangâ. 18Andagad’a mba d’i deyêng aweid’a ki hoholoma; ang mba tahlapma. 19Ni ki ndaka ki zumal la avoronga tua ba, ang mba fe ki tena gak ang mba hulong kä aduk andaga d’a an lang ki d’a. Kayam angî andaga d’a gugud’upa, ang mba hulong kä aduk gugud’up ndata.
20 Adam mi yi simiyê amamba ala Ef#3.20 Simiyê Ef: Ki vun Hebre-na a yat ala Arid’a. Simi máma ni tu kahle suma arina, wani simiyê Ef a humî mandjaf suma; kayam ndat nasu suma arina pet., kayam ndat nasu suma pet. 21Ma didina Alona mi le baka baruna mi Adam kamamba, mi tchuguzizi ataziya.
Alona mi dik Adam ki Ef fei kur Eden
22Ma didina Alona mi dala: Gola! Sana mi mbut ni d’igi ei na á we djivid’a ki tchod’a; ki tchetchemba, ei aram mi mat abom á ndot vud’agu ma he arid’a tala mi tum te ba, mi ar bei matna d’a d’i. 23Kayam ndata, Ma didina Alona mi digim mbei kur asine ma Eden-na, kayam mi zum andaga d’a mi lum ki d’a. 24Kid’a mi digim mbei dad’a, mi tin tcherebêna#3.24 Tcherebêna: Nala, Nandjaf malaikana tu. abo ma yorogona hasine ma Eden-na ki mbigeu d’a fiyak ka siyat ngal d’igi sïna akud’a na d’a á ngom lovot ta i ata agu ma he arid’ina.
Trenutno izabrano:
Ad’u Tinda 3: BA
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Azumeina Bible © Alliance Biblique du Tchad, 1999.