Populära bibelverser från Mat 6

Dela

Koma potatika sakilani Ufumu wa Mulungu, na cilungamo cake, nipo ivi vonse vikayikiliwepo pa mwewo.

Osaŵa na nkhawa pa va mailo, pakuti mailo ikaŵe na nkhawa yake. Nsiku iliyonse ili na matamano ŵake.”

“Ni cikomo cake, nukuwuzyani osacitila nkhawa moyo wanu, kuti mulyenji na kuti mumwenji, keno muŵili wanu, kuti muvwalenji. Pakuti moyo upula cakulya, nipo muŵili upula vovwala.

Koma polomba, ulute mu cipinda cako, novala ciseko, nolomba kwa Awusu wako asawoneka. Tetyo, Awusu wako owona vonse vucitika mu cisinsi akakupe cilambu.

Lombani moteti, ‘Awusu wasu muli Kululu, Zina yanu ituŵishiwe. Ufumu wanu uwele. Kupangwa kwanu kucitiwe pano pansi ngani Kululu.

Mutipe lelo cakulya casu ca lelo.

Mutilekelele viyipa vasu ngani mwatulekelelela otiyifyila.

Musazomezye kuti tiyezyewe. Mutipulumushe kwa Muyipa Wala.’

“Keno mulekelela okuyifyilani, Awusu wanu ŵa Kululu akulekeleleni namwe viyipa vanu.

Wonani vinyoni va mululu; vukomolalini keno kuwezya, keno kuyika mu cimphaka, koma Awusu wanu wa Kululu ovilyesha. Kansi mwewo muvipulalini vinyoni ivi?

“Musaziwunjikile cuma pano pansi, pakuti muswe na nguwe zingaceneke, nipo akawalala angaiŵe. Koma ziwunjikileni cuma Kululu, kuliye muswe na nguwe, na akawalala otyolalini noyiŵa. Pakuti kuli cuma cako, mtima wako soti ukuŵa kwamene uko.”

“Paliye angatweshe kutumikila asikulu aŵili, pakuti keno azeatinkhane na yumo notemwa muyakine wala, keno azeazitwale kwa yumo notafulila muyakine wala. Ungatweshelini kutumikila wonse aŵili, Mulungu na cuma.

Koma keno Mulungu ovwalika uzu wa ku sanga, uli na moyo lelo yeka nipo mailo ukapozewe mu mulilo, kansi mwewo ŵa cicetekelo citontho angakuvwalikenilini?

Koma pakupa wotamana, osati kwanja yanu yakumanzyele iziŵe vayucita kwanja ya kwendi, kuti cawanzi canu ciŵe mu cisinsi. Nipo Awusu wanu, owona vucitika mu cisinsi, akupeni cilambu.”

“Cenjelani kuti musacite nchito zanu za cilungamo pa menso pa ŵanthu, kuti akuwoneni. Keno mucita tetyo, mukapokelelini cilambu kufuma kwa Awusu wanu ŵa Kululu.

“Pamulilesha kulya, osawonesha cinso cokwinyilila ngani mwakucitila wolipazya, woyifya ku menso nowonesha ŵanthu kuti olilesha kulya. Nukuwuzyani vyendi kuti apokelelatu cilambu cawo. Koma pamulilesha kulya, mosamba ku menso nozolela mafuta, kuti ŵanthu asaziŵe kuti mulilesha kulya, koma tyala Awusu wanu, owona vinthu vosawoneka; nipo Awusu wanu owona vucitika mwa cisinsi akakupeni cilambu.”