Populära bibelverser från Filipenses 2

Dela

Ja̧danö, ja̧köbaduwi̧ma, ökwödöda kwemaduwotö jö̧ba̧löma kwisakwaduwoko, ja̧danö ökwödönö tjomukwatoböma, Aaa, bidöma otiwadö jö̧ba̧lö tjomukwatoböma kwisakwaduwoko chömöledö. Jau chömöledö, mikwawadösa jö̧ba̧löma kwomukwataduwoko, ju'wedönöda kwösödaduwo, ötjönötjö bajalekwönönö mikwawadö jö̧ba̧lö. Ja̧danö, kwömöledöduwinö kwomukwataduwo, jobadönö pjakataduwobö. Jau chömöledö, sule ökwödöda jawama omukwatökönaduwi, ju'wedönöbi kwomukwataduwo, jobadönö pjakataduwobö.

Jau chömöledö, Cristo Jesús omukwatinadanö ju'wedönö pjakataduwobö kwomukwataduwo chömöledö. Baikwö jo̧ba omukwatina yötawa

Cristoma itedainobetjö̧ la'akatjöda Diosdainobe, jo̧kwaijayonö Diosdanö ö̧ji̧ 'diinö do̧a̧loböma omukwatinokobe. Jejenö do̧ba̧lökönö, iteda okobe jwiinö ujuna̧li̧ma junibö, usulaso̧ tjömöayo̧danö baibanö ja̧inobe, ja̧danö jojo baibanö öbötjachinobe. Jo̧bama mikwawö̧kö̧ baibanö ja̧inobe, ja̧danö Dios wei̧da ja̧inobe, woenanö kabatö. Jau chömöledö, towisa'onö woawama jwiinö sulijayonö, ökwödönö pjaato jö̧ba̧lö, Cristoma öpöjödökönö mikwawö̧kö̧danö ja̧nö Dios wei̧ ja̧bö midawö woinobe.

Jau chömöledö, Diosma ba̧kwȩlö̧jatebö ökwödönö otido̧, jo̧ba ösödi̧danö kwösödaduwakobetjö̧, ja̧danö jo̧ba ösödi̧danö ja̧köbaduwakobetjö̧.

Jejenö ja̧iniökwe, Diosma Cristonö otiwanö kabebö ujuninobe inesö la'aka luwo̧ baibanö, ja̧danö jo̧banö imi imidinobe, okobe jwiinö ju'wi imitjö bajalekwönönö otiwi̧ imima. Ja̧danö jejenö inesö otiwi̧ imi imidinobetjö̧, Jesús imi a̧ja̧kwö okobe deinö mölejȩbe ju̧kwadöbi, böjȩnö ju̧kwadö ina 'yaba̧ladöbi, wobinadöbi bȩbachibö öwaetjöda yötjawakwedö, Jesucristoma inesö la'aka luwo̧ jö̧ba̧lö, ja̧danö jejenö yötjawi̧ma, öwaetjöda i̧sebakobe, Abe'do Diosma isabenö otiwanö ja̧bo̧ jö̧ba̧lö.

Chömöledö, okobe jwiinö ja̧bö kwö̧jaduwi̧ma, kwo̧'wo̧ sulinö yöa̧lakwawa jwiinö, ja̧danö jwöjwöakwawa jwiinö ja̧bö kwö̧jaduwo, ökwödöma wene jwiinö, ja̧danö sulabe jwiinö böjȩnö kwö̧jaduwakobetjö̧. Jau chömöledö, ökwödöma sulabedö tjö'da̧detjö, jwaikwöda sulabenö ja̧badö tjö'da̧detjö kwö̧jaduwijayonö, Dios i̧tji̧mu sulabe jwibadö kwö̧jaduwo. Jau chömöledö, wanedö yötawa, böjȩ jojodö tjö'da̧de ja̧nö, ökwödöma dejewa'yu̧ ubi̧danö kwidejataduwo

Jo̧kwajabetjö̧ ökwödönö yötawaja̧danö ja̧bö kwö̧jaduwo chösödawö̧ chömöledö. Isabenö belö ökwödökwö chö̧jayima, ötjö yötawi̧danö ja̧bö kwö̧jinaduwobe chömöledö, ja̧danö ja̧tjö bajalekwönönö babe jelobetjö wȩyudö yötawi̧ ja̧bö kwö̧jaduwo chömöledö. Ja̧danö, Diosnö otiwanö yebabinö ösödö, jwaikwöda Duluwo̧ Dios wei̧ ja̧bö kwö̧jaduwo, Dios kwö̧jibaduwinö ja̧ina kwi̧sebaduwakobetjö̧.