Luka 21
21
1Binyibiabia babandulukile, bamwene bampeta abēle milambu yabo mu kilambwilo. 2Bamwene’nyi mukashi-amufwe mulanda badi ēle mwanka makuta abidi. 3N’e bakwile’shi: Binyibinyi nenulungula’shi: uno mukashi-amufwe mulanda bēle bikile boso. 4Mwanda bana boso abēle mu kilambwilo ki ’Efile Mukulu bia ku bintu biabo bikile bungi: anka e bēle bintu bioso biadi nabio bia bulanda bwe.
5Kubadi bangi abakwile mwanda wa ntempelo bu bia yibadi yilengibwe na mabwe ebuwa na bia buntu, bakwile’ shi: 6Ha mwanda wa bino bintu bianubandjila, talai, mafuku akafiki ashyakashala ebwe ditentame ha dingi ebwe dishyadikalamwinwa hashi. 7Abamwihwishe’shi: A Mulambukishi, anka bino bintu abikafiki kihindji kinyi? A nkinyi ankitundwilo kinyi akikekala kwanka ahakafiki yino myanda? 8E bālulwile’shi: Dimukai tanubembulwanga: mwanda bebungi abakafiki mwishina diande’shi: N’ami Kidisitu; na kihindji takidi hehi; biabia tanwibalondanga. 9Anka hanukahusha mwanda wa ngoshi na biakutēkana, tanutshinanga moo! Mwanda yino myanda ayikafiki kwibedi, anka kunfudilo takwi hehi. 10Henyihaha bebalungwile’shi: Mwīlo aukabuku ngoshi na ungi mwilo, na bufumu abukebwela na bungi bufumu: 11Nsenga ayikatenkakana bikata mu bihindji na bihindji, akukekala bihuha bia nsala, na bia masungu, na bia ku sushisha moo, na bitundwilo bikata bia kwiilu. 12Anka kwibedi kwa yino myanda abakenukwata, abakenubinga, na kwinufisha ku bitumbwilo, na mu mashibo a nkano, anukafishwa ku mpala kwa banfumu, na kwi ba bimankinda ha mwanda w’eshina diande. 13Abikenualulukila kwikala bu tumonyi. 14Binyibiabia nyishai mashimb’enu, tanunangushenanga kwibedi mwa kwalulwila. 15Mwanda nankenuha mu kanwa na binangu, kabashyabeuku kwituhishena n’enu sunga kwela mpaka. 16Anukehulukwa kwi benutande, na kwi bakwenu, na kwi bifuko bienu, na bakūku benu; abakehaisha (bangi) b’enu. 17N’anwe anukashikibwa kwi bantu boso ha mwanda w’eshina diande. 18Anka takukashimina sunga ndunyene lwa ku mutwe wenu. 19Mu lwishinko lwa mashimb’enu nyi mwa nukamwena bikudi bienu. 20Binyibiabia hanukamono Yelusalema kwifunyishibwa na basha ngoshi, henyihaha nwiukye’shi, kusadika takwi hehi. 21Henyihaha abo be mu Yudea basukile ku mangulu: N’abo be munkatshi wa ’kio bakatukye, be mu yingi nsenga tabatwelanga mwanka. 22Mwanda ā mafuku nga nkōbola’shi myanda yoso yifundjibwe yikumbashwe. 23Anka mpombo kwi bēmite mafu, na kwi abomesha bana mu aa mafuku! Mwanda akukekala malwa akata ha nsenga, na bukyelo ha bano bantu. 24Abakahono ku bwashi bwa luhete lwa ngoshi, abakaishwa bu buhika ku mīlo yoso: na Yelusalema akāshinwa kwi Badjentaila, mpaa na kukumbasha bihindji bia Badjentaila.
25Henyihaha bitundwilo abikekala mu nguba na mu mweshi, na mu nyenyenyi, na ha nsenga akukekala bishiotshi bia mīlo na mashimba e katshima munda, na kitumo kikata kia mbundambunda ya kalunga ka mema. 26Mashimb’a bantu akahungila na moo, ha mwanda wa kutala ku yaya myanda ayifiki hanohansenga: mwanda bia bukome bia mwiilu abikatenkakana. 27Henyihaha abakamono Mwan’a Muntu afiki mwikumbi na bukome na ntumbo yikata. 28Anka ahakabanga yino myanda kukitshibwa, henyihaha nubandulusha meso, nubandule mitwe yenu: mwanda kikudilo kienu takidi hehi. 29Belele lukindji’shi: Talai mutshi wa kikuku na mitshi yoso, 30Hayishihuka anumono’nwe bana bene, na kwiuka’shi, mpeshi tadi hehi. 31Anka hamune anwe namu hanukamono yino myanda tayifiki, nwiukye’shi, hufumu bw’Efile Mukulu tabudi hehi. 32Binyibinyi nenulungula’shi: Kino kihungilo takikakidi mpaa na hakukumbashwa bioso. 33Eilu na nsenga abikashimina, anka bishima biande tabikashimina ooo.
34Nudimukei anwe bana bene kutshina’shi: tala mashimb’enu akanemenwa na bidiafi na kukolwakolwa, kukalakashwa kwa uno muwa, biabia adi’efuku adikenuhulumukila. 35Mwanda adikafiki bu muteo ha boso bashale hanohansenga hoso. 36Binyibiabia nutengyele na kuteka mafuku oso, bianudia kulombana kuhashibwa ku yaya myanda yoso ayikafiki, na kwimana ku mpala kwa Mwan’a muntu. 37Biabia mafuku oso badi alambukisha mu ntempelo kutoka, na bufuku batukile’enda mu kulala ku ngulu, ayitemunwe bu Olefeta. 38Na bantu boso abafikile na mashik’ēse kwadi mu ntempelo mu kumuhusha.
Nu markerat:
Luka 21: NTLK52
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1952 Alliance Biblique de la République Démocratique du Congo