Lukas 21
21
Tus Pojntsuam Tso Nyiaj
(Malakaus 12:41-44)
1Yexus tsa qhovmuag saib, Nws pom cov neeg npluanuj tabtom tso lawv tej nyiaj rau hauv lub thawv tso nyiaj uas nyob hauv lub Tuamtsev, 2thiab Nws pom ib tug pojntsuam pluag-pluag tabtom tso ob lub nyuag txiaj toog liab me-me rau hauv. 3Yexus hais tias, “Kuv qhia rau nej tias, tus pojntsuam uas pluag-pluag no tso ntau dua lwmtus huv tibsi. 4Rauqhov lwmtus muab tej uas seem ntawm lawv txoj kev npluanuj xwb; tiamsis tus pojniam no txawm yog nws twb pluag npaum li ntawd los nws tseem muab tagnrho qhov nyiaj uas yug nws txojsia tuaj tso.”
Yexus Hais Txog Lub Tuamtsev Yuav Puastsuaj
(Mathais 24:1-2; Malakaus 13:1-2)
5Cov thwjtim qeeleej sibtham txog lub Tuamtsev thiab qhuas qhov uas luag muab tej pobzeb zoo-zoonkauj los ua, thiab tej khoom uas luag coj tuaj fij rau Vajtswv. Yexus hais tias, 6“Tej uas nej pom no, yuav muaj ib lub sijhawm, tej txhibzeb uas luag muab tib ib lub tshooj ib lub ntawd, txhua lub yuav pluam nyias nyob nyias tas huv tibsi.”
Kev Txomnyem Thiab Kev Tsimtxom
(Mathais 24:3-14; Malakaus 13:3-13)
7Lawv nug Yexus hais tias, “Xibhwb, thaum twg mamli muaj tej no? Thiab yuav muaj dabtsi tshwm los qhia rau peb paub tias twb txog lub sijhawm uas muaj tej ntawd lawm?”
8Yexus hais tias, “Nej yuavtsum ceevfaj, tsis txhob cia leejtwg ntxias tau nej yuamkev. Yuav muaj ntau leej tuaj ntawm Kuv lub npe tuaj hais rau nej tias, ‘Kuv yog Nws!’ thiab ‘Lub sijhawm twb los txog lawm!’ Tiamsis nej tsis txhob raws lawv mus. 9Thaum nej hnov txog kev tsov kev rog thiab kev ntxeev teb ntxeev chaw, nej tsis txhob ntshai. Yeej yuav xub muaj tej ntawd uantej, tiamsis tsis tau txhais hais tias twb txog lub sijhawm kawg lawm.”
10Yexus hais tias, “Ib lub tebchaws yuav sawv tawmtsam ib lub tebchaws; ib haivneeg yuav sawv tawmtsam ib haivneeg. 11Yuav muaj av qeeg loj heev, yuav muaj kev tshaib kev nqhis, thiab yuav muaj ntau yam mob kis mus thoobplaws txhua qhov; yuav muaj tej yam txawv-txawv thiab txaus ntshai tshwm saum nruabntug.
12“Tiamsis uantej uas yuav muaj tej ntawd, yuav muaj neeg ntes nej thiab tsimtxom nej; lawv yuav coj nej mus hais plaub hauv tej tsev sablaj thiab muab nej kaw rau hauv tej tsev lojcuj, lawv yuav coj nej mus cuag tej vajntxwv thiab tej nomtswv, vim Kuv. 13Thaum ntawd yog lub sijhawm uas zoo rau nej qhia Txoj Moo Zoo. 14Nej tsis txhob txhawj uantej hais tias nej yuav tivthaiv nej tuskheej licas, 15rauqhov Kuv yuav pub tej lus teb thiab tswvyim rau nej kom nej cov yeebncuab yuav tsis muaj cuabkav teb taus nej lossis tawmtsam tau nej. #Lukas 12:11-12 16Nej niam nej txiv, nej tej kwvtij, tej neejtsa thiab tej phoojywg yuav muab nej coj mus cob rau tej nomtswv, thiab luag yuav muab nej qeeleej tua povtseg. 17Txhua tus yuav ntxub nej vim nej yog cov uas ntseeg Kuv. 18Tiamsis txawm yog ib txoj nyuag plaubhau saum nej lub taubhau los yuav tsis ploj mus. 19Qhov uas nej sawv khovkho ntawd, nej yuav tau txojsia.
Yexus Hais Txog Lub Nroog Yeluxalees Yuav Puastsuaj
(Mathais 24:15-21; Malakaus 13:14-19)
20“Thaum nej pom tej tubrog tuaj vij lub nroog Yeluxalees, ces nej yuav paub tias tsis ntev lub nroog ntawd yuav raug puastsuaj. 21Thaum ntawd cov neeg uas nyob hauv xeev Yudas, yuavtsum khiav mus rau pem tej roob; cov uas nyob hauv nroog ciali khiav tawm, thiab cov uas nyob pem tej yajsab, tsis txhob khiav mus rau hauv nroog. 22Rauqhov lub sijhawm ntawd yog ‘Sijhawm Rautxim,’ kom tiav rawsli txhua nqe uas tau sau cia rau hauv Vajtswv tej Lus lawm. #Hauxe 9:7 23Lub sijhawm ntawd tej pojniam uas suab menyuam thiab tej pojniam uas muaj menyuam mos noj mis yuav txomnyem kawg nkaus li! Lub tebchaws no yuav raug kev txomnyem loj kawg kiag, thiab Vajtswv yuav rautxim rau cov neeg no. 24Ibtxhia yuav tuag rau hniav ntaj hniav riam, thiab ibtxhia yuav raug ntes mus kaw rau txhua lub tebchaws; thiab Lwm Haivneeg yuav tuaj tsuj lub nroog Yeluxalees mus txog rau hnub uas tas lawv lub sijhawm.
Neeg Leejtub Yuav Los
(Mathais 24:29-31; Malakaus 13:24-27)
25“Thaum ntawd yuav muaj tej cim tshwm rau saum lub hnub, lub hli, thiab tej hnubqub. Txhua lub tebchaws hauv ntiajteb no yuav txomnyem heev, thiab yuav ntshai txog tej suab dej hiavtxwv uas ntas thiab nphau. #Yaxaya 13:10; Exek 32:7; Yau 2:31; Tshwm 6:12-13 26Tej neeg yuav ciali tsausmuag vim txoj kev ntshai thiab tosntsoov seb yuav muaj dabtsi los raug lub ntiajteb no, rauqhov tej uas muaj hwjchim saum nruabntug yuav uazog koog. 27Thaum ntawd sawvdaws yuav pom Neeg Leejtub tshwm saum cov huab los, nrog Nws lub hwjchim thiab tus tshwjchim uas ci ntsa-iab. #Dani 7:13; Tshwm 1:7 28Thaum uas tseem tabtom pib muaj tej no, nej ciali sawvntsug thiab tsa taubhau, rauqhov nej txoj kev cawmdim twb los ze lawm.”
Kawm Ntawm Tsob Txiv Ncuavpias
(Mathais 24:32-35; Malakaus 13:28-31)
29Yexus hais zaj lus pivtxwv no rau lawv mloog: “Nej sim saib tsob txiv ncuavpias thiab txhua yam ntoo. 30Thaum nej pom tej ntoo ntawd pib hlav nplooj, nej paub tias twb yuav txog lub caij ntuj kub. 31Ib yam nkaus li ntawd, thaum nej pom tej ntawd tshwmsim, nej yuav paub tias Vajtswv lub Tebchaws twb los ze lawm.
32“Ncontsoov tias txhua yam no yuav tshwmsim uantej cov neeg tiam no tuag tas. 33Lub ntuj thiab lub ntiajteb yuav ploj mus, tiamsis Kuv tej lus qhia yuav tsis ploj kiag li.
Yuavtsum Ceevfaj
34“Nej yuavtsum ceevfaj, tsis txhob cia nej lub siab qaug rau kev noj kev haus, thiab niajhnub txhawjxeeb txog nej lub neej, nyobtsam hnub ntawd ciali los txog rau thaum nej tsis nco ceevfaj 35zoo ib yam li rooj yej. Rauqhov hnub ntawd yuav los raug rau txhua leej txhua tus uas nyob thoobplaws hauv lub ntiajteb no. 36Ncontsoov ceevfaj zov tos txhua lub sijhawm, niajhnub thov Vajtswv pab kom nej muaj peevxwm nyiaj taus txhua yam uas yuav muaj los no, thiab mus sawv taus ntawm Neeg Leejtub lub xubntiag.”
37Yexus niajhnub qhia hauv lub Tuamtsev, tiamsis thaum tsausntuj Nws mus pw pem lub Roob Txiv Ntoo-Roj. #Lukas 19:47 38Txhua tagkis, tej neeg sawvdaws sawvntxov mus mloog Yexus qhuabqhia hauv lub Tuamtsev.
Nu markerat:
Lukas 21: MWW2022
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2022 United Bible Societies. All rights reserved.