Yohani 1
1
Yuyo akitiziwanga ukuti Mazyu akanduka muntu
1Kubwandilo bo ichisu chitapeliwe, yuyo akitiziwanga ukuti Mazyu akabako kale, akaba nu Chala, po sona akaba we Chala. 2Ukwandila ko kubwandilo akaba nu Chala. 3U Chala akapela vyosi ukwendela mumwache, nanti atakabangako, ngali katakabako nakamokamo akapeliwa. 4Mumwache mukaba ubumi,#1.4 Mumwache mukaba ubumi: Pamo Ivintu vyosi vivyo vikapeliwa vikaba nubumi ubwakumamatilana poka na Mazyu. po sona ubumi ubu bukaba lukozyo ulwa bantu. 5Ulukozyo lukulamagha muchisi, loli ichisi ichene chapotwa pakuluzimya ulukozyo lula.
6 #
Mat. 3.1; Mlko. 1.4; Luk. 3.1-2 U Chala akatuma umuntu yumo, yuyo akaba we Yohani. 7Akiza pakubasimikizya abantu nizya lukozyo lula, umwakuti abantu bosi bivwe amazyu nukumusubila. 8U Yohani atakaba we lukozyo, loli akiza bulo pakubabuzya abantu nizya lukozyo lula. 9Ulukozyo ulwanaloli lulo lukubalamila abantu bosi lukizagha muchisu ichapasi.
10Yuyo akitiziwanga ukuti we Mazyu akaba muchisu ichapasi, napapo u Chala akachipela ichisu chapasi ukwendela mumwache, loli ichisu chitakamumanya. 11Akizila abantu abaluko lwache, loli abantu abaluko lwache batakamupokela. 12Loli abantu bosi babo bakamupokela nukumusubila, akabapa ubulaghili pakuba bana aba Chala. 13Pakwanduka bana aba Chala, batakapapiwa ukuyana na mumo abana bakupapiliwa pachifukwa icha bwighane ubwa muntu, loli bakapapiliwa mwa Chala.
14Yuyo akitiziwanga ukuti we Mazyu akanduka muntu nukwikala pakasi papitu. Akizula ni chisa nu bwanaloli. Tukabwennya ubuchindamu bwache, ubuchindamu bubo akapokela ngati we Mwana mwene na mwene uwa Wise.
15U Yohani akanena nizya yuyo nukukolomoka ukuti, “Uyu we yuyo inkamunenagha bo nanena ukuti, ‘Yuyo akwiza pisinda papane we songo nkani ukunchila pakuti akabako kale bo nane intaliko.’ ”
16Pachifukwa icha bukulu ubwa chisa chache, atusayite twebosi pakutupa ulusayo pamwanya pa lwamwabo. 17U Chala akatupa Indaghilo ukwendela mwa Mozesi, loli akatupa ichisa nu bwanaloli ukwendela mwa Yesu Kilisitu. 18Nayumo umuntu yuyo amubonyepo lumo u Chala, loli u Mwana mwene, yuyo we Chala, we yuyo amubonye, sona umughaniwa uwa Wise, we yuyo akatuvumbulila u Chala.
Ulusimikizyo ulwa Yohani Uwalozyo
(Mat. 3.1-12; Mlko. 1.1-8; Luk. 3.1-18)
19Abalaghili aba Chiyuda mu Yelusalemu bakatuma abaputi bamo naba Levi kwa Yohani pakumulalusya ukuti, “Nkimba awe we wenu?”
20U Yohani atakakana pakwamula, loli akanena pabuzelu akati, “Ane inte ne Kilisitu.”
21 #
Ukk. 18.15, 18; Mal. 4.5 Bakalalusya bakati, “Nkimba po we wenu lelo? Nkimba we Eliya?”
U Yohani akamula akati, “Awe, inte nene.”
Bakalalusya bakati, “Nkimba we Mulaghuzi?”#1.21 Mulaghuzi: Umuntu yuyo abantu bakamulindililagha ukuti akwiza pakuboneka nukufumusya nizya kwiza kwa Mupoki umupakiwa uwa Chala.
Akamula akati, “Awe, inte nene.”
22Bakanena bakati, “Po tubuzye ubwanaloli pakuti tukulonda ukuti tubuke tubabuzye babo bakatutuma. Nkimba wemwenecho ukuti we wenu?”
23 #
Yes. 40.3
U Yohani akabamula pakunena zizyo umulaghuzi u Yesaya akasimba ukuti,
“Ane ne lizyu ilya muntu yumo,
yuyo akukolomoka munkolongo ukuti,
‘Yannya umusebo uwa Mwene, gholosya izila ukuti endemo!’ ”
24Intumi zizyo zikatumiwa naba Falisayi, 25zikamulalusya u Yohani zikati, “Nanti awe ute we Kilisitu, pamo ute we Eliya, pamo ute we mulaghuzi, po choni chicho ukozya?”
26U Yohani akabamula akati, “Ane inkozya na mizi, loli pakasi papinyu alimo yumo yuyo amwe mutamumenye. 27Yunuyu we yuyo akwiza pisinda papane, umwakuti ane ntabaghiye napo panandi pakusatula utupinyilo utwa nkwato zyache.”
28Zyosi zinizi zikabombiwa mukaya aka Betaniya kubufumilo ubwa lusoko ulwa Yolodani, kuko u Yohani akozyanga.
U Yesu we Mwana uwa ng'ozi uwa Chala
29Ilyandabi, u Yohani akamwennya u Yesu akwiza kukwache, po akati, “Ennya, u Mwana uwa ng'ozi uwa Chala, yuyo akwefya imbibi izya bantu aba muchisu ichapasi. 30Yunuyu we yuyo namunenagha natinji, ‘Umuntu akwiza pisinda papane, loli mukulu ukunchila pakuti akabako kale bo nane ntaliko.’ 31Nane bulo ntakamumanya, loli ane nkiza pakozya na mizi, umwakuti aba Izilayeli bamumanye.”
32U Yohani akabika ulusimikizyo akati, “Nkennya u Muzimu Umuzelu akwika kumwanya ngati yo nkunda nukwikala papache. 33Pope bulo ntakamanya ukuti we yuyo, loli u Chala yuyo akantuma pakozya na mizi akambuzya akati, ‘Bo ukwennya u Muzimu Umuzelu akwika nukwikala papache, we yuyo akozya nu Muzimu Umuzelu.’ 34Navyennya, po inkusimikizya ukuti yunuyu we yuyo Mwana uwa Chala.”
Abamanyili abakwanda aba Yesu
35Ilyandabi, u Yohani akaba sona na bamanyili bache babili pabuzilo bulabula. 36Bo amwennya u Yesu akwenda palapala, akati, “Ennya u Mwana uwa ng'ozi uwa Chala.”
37Abamanyili babili bakamwivwa akunena zinizi, po bakamukonka u Yesu. 38U Yesu akaghalabuka, akabennya bakumukonka nukubalalusya ukuti, “Nkimba mukulonda ichoni?”
Bakamula bakati, “Wee Labi, ukwikala kwiyi?” (Labi kokuti mumanyisi.)
39U Yesu akabamula akati, “Twende mwennye.” Po bakabuka nawe nukwennya kuko akikalagha, sona bakalinda nawe isiku lyosi lilalila pakuti kakaba kabalilo aka folo koloko pachamabwila. 40Weka uwa bantu babili, yuyo akivwa zizyo u Yohani akanenagha nukumukonka u Yesu akaba we Andeleya, uwamwabo uwa Simoni Pitala. 41Umwalubilolubilo akamwagha uwamwabo u Simoni nukumubuzya ukuti, “Twamwagha u Mesiya.” (Mesiya kokuti Kilisitu.) 42Po akabuka nawe u Simoni kwa Yesu. U Yesu akamwenelezya nukuti, “Itabwa lyako we Simoni umwana uwa Yohani, loli ukwiza pakwitiziwanga Kefa.” (Itabwa ili liyanite bulo nilya Pitala kokuti ilyalabwe).
U Yesu akumwitizya u Filipu nu Nataniyele
43Ilyandabi, u Yesu akinong'ona ukubuka ku Galileya. Akamwagha u Filipu nukumubuzya ukuti, “Nkonka.” 44U Filipu akaba wamu Betisayida, akaya kako u Andeleya nu Pitala bakikalagha. 45U Filipu akamwagha u Nataniyele nukumubuzya ukuti, “Twamwagha yuyo u Mozesi akasimba mwibuku ilya Ndaghilo, sona yuyo abalaghuzi bakasimba ni zyache. We Yesu uwa mu Nazaleti, umwana uwa Yosefu.”
46U Nataniyele akalalusya akati, “Nkimba chingabapo chimo ichiza ichakufuma mu Nazaleti?”
U Filipu akamula akati, “Twende wennye.”
47Bo u Yesu amwennya u Nataniyele akwiza akati, “Uyu we muntu uwa Izilayeli naloli. Mumwache butalimo nabumo-bumo ubumyasi!”
48U Nataniyele akamulalusya akati, “Wamanya buli-buli?”
U Yesu akamwamula akati, “Inkakwennya bo wikaye mukazundila aka ikuyu, bo nu Filipu atakwitizizye.”
49U Nataniyele akamwamula akati, “Wee Mumanyisi, we Mwana uwa Chala! We Mwene uwa ba Izilayeli.”
50U Yesu akati, “Nkimba ukunsubila pachifukwa chakuti inkakubuzya ukuti inkakwennya bo uli mukazundila aka ikuyu? Ukwiza pakwennya ivintu ivikulu ukuchila vinivi.” 51#Ubw. 28.21Akanena nabo akati, “Naloli inkubabuzya ukuti mukwiza pakwennya kumwanya kwighukite, sona abantumi aba Chala aba kumwanya bakukwela nukwika pa Mwana uwa Muntu.”
Nu markerat:
Yohani 1: LMBNT2016
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Lär dig mer om Ulufingo Ulupya