Mateyo 2
2
Watalizi wa ntondwe wamlonda Yesu.
1Yesu akibinda kuvyalwa Betelehemu mwe shi ya Yudeya mishi ya zumbe Helode, ne Yelusalemu kuhoiza watalizi wa ntondwe walawilewo mwe shi ya lwazu lwelawa zuwa. 2Wazauza angwe: Zumbe ywa Wayuda avyelweye mishi inu a kuhi? Hambu tizaona ntondwe yakwe luja lwazu lwelawa zuwa; tizaiza, timgintile mazwi. 3Zumbe Helode akiviiva azashentuka haṅwe na muzi woshe wa Yelusalemu. 4Azaunganyanya wavikizi wakulu na watabaluwangwa woshe wa ija mbalingwa, azawauza, ati ni muhi, ndimo Kilisito avyalwe. 5Wazamγamba: Ni Betelehemu mwe shi ya Yudeya; hambu ne vyegondwa ni mteγanyingwa kuγamba: 6Iwe Betelehemu mwe shi ya Yuda nku mdodo mwe wazumbe wa Yuda, hambu mwako mtazalawila zumbe, ndiye nezealishe mbali yangu ya Isilayeli. 7Ne Helode ahoitanga waja watalizi wa ntondwe he njama, azawauzisha, ati ni mishi ihi, ija ntondwe ilawileho, 8azawatuma Betelehemu angwe: Hitai, mdose mbuli za ako kazana na utanda! Mkikaona uyai, muniγambile, kangwe nami nihite, nimgintile mazwi! 9Wakibinda kuiva mbuli za zumbe wazahita. Wakiolela, iyo ntondwe, waeneyo luja lwazu lwelawa zuwa, izawalongwela, mpaka ikibula sawasawa na muja, kaja kazana kalimo, ne ihoγoloka. 10Wakiona ija ntondwe wazaona nyemi nkulu muno kabisa. 11Wakiingila na muja nyumbai wazaona kaja kazana haṅwe na nine Maliya, wazakina na shi wazakagintila mazwi; vikibinda wazashungula miziγo yawe, wazakaiγaila matulo, zahabu na uvumba na mafutilo ya mluziluzi. 12Wazalaγiliziγwa mwe sozi, washeuye kwa Helode, ne wahoγotoka na sila ntuhu mwe shi yawe.
Yesu anyilishwa na Egiputa.
13Wakibinda kuhita, mlau ywa Zumbe azamlawila Yosefu mwe sozi, azamuti: Inuka, uγuwe ako kazana na nine, unyilike na Egiputa, uhumule γuko, mpaka ndiho nezenikuγambile! Hambu Helode agomba kulonda aka kazana, akakome. 14Yuja azainuka, azaγuwa kaja kazana na nine, 15kuke kilo, azahita Egiputa, azahumula γuko, mpaka Helode akifa, kangwe ibontoke ija mbuli ilongiγweyo ni Zumbe na kanwa cha mteγanyi kuγamba: Egiputa ne nimwitangileko ṅwanangu.
Helode akoma wana.
16Helode akiona, kuti azaufiγwa ni waja watalizi wa ntondwe azakwelwa ni maya mangi, azatuma, azakoma wana woshe we muja Betelehemu na kwe mizi yoshe ye tanga, wabindilewo mavuli maili na waja washiyabindilewo, sa viyaho auzizevyo waja watalizi wa ntondwe mishi ya ija ntondwe. 17Haja hazabontoka iyo mbuli ilongiγweyo ni mteγanyi Yelemiya akiγamba: 18Uko Lama kuzaivika vuzo, kulila na kukema, kangi Laheli alilila wanae, nkakunda kuhembuliziγwa, hambu wazabindiγwa.
Yesu aiγalwa Nazaleti.
19Helode akibinda kufa, mlau ywa Zumbe azamlawila Yosefu mwe sozi uko Egiputa, 20azamuti: Inuka, uγuwe ako kazana na nine uhite mwe shi ya Isilayeli, hambu ndiwo wakilonda kukoma ako kazana wazabinda kufa. 21Yuja azainuka, azaγuwa ako kazana na nine, azahita mwe shi ya Isilayeli. 22Miya akiiva, kuti Alikelawo azamhokela ishe Helode uzumbe wa Yudeya, azaogoha kuhita na kuja; azalaγiliziγwa mwe sozi, azahita lwazu lwa Galileya. 23Akikubula azaikala mwe muzi weitangwa Nazaleti, kangwe ibontoke iyo mbuli ilongiγweyo ni wateγanyingwa kuti: Atazaitangwa Mnazaleti.
Nu markerat:
Mateyo 2: KISHNT05
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
New Testament in Kishambala © Bible Society of Tanzania, 2005.