Tim pa Jomoor 11
11
Petero niaŋo kitipa pa jom'oyeyo ma Yerusalem gim'oneno
1Jomoor kodi wadi jo ma Yuda parom jowinjo ni Jopath bende jojolo wac pa Were. 2Munyo Petero okidho Yerusalem, ji m'onwaŋo joyenyo ni Jopath bende jowothumere jogesa ni, 3“Raŋo wikidho bongi Jopath ma jok'othumere to wicemo kiri gi jo!” 4Gikenyo Petero otito rijo thenethene ma gim'otimere woki i cakirok mere ama: 5“An onwaŋo anitie ikwayo i tindi ma Yopa, to aneno gimoro munyo loro piny wok i polo m'ocalo suka mapando m'icaro piny kareno omaki thenge aŋwen je to tundo bongan. 6Akaŋasa iye maber t'aneno le ma nyatiende aŋwen, kodi ogwaŋe, kodi gigipiny ma mol gi kor gin kodi winyin ma malo. 7Aka awinjo dwondi jo moro m'owaco ran ni, ‘Petero, ay malo, neki jo icami!’ 8To awaco ni, ‘K'ameno Rwoth! Ongoye cemo makicar kosa ma k'olony m'otieko donjo i dhokan.’ 9Dwondi jo m'owok i polo no oluwo kendo ni, ‘Gima Were otieko lonyo, ikir'ilwoŋo ni gima kicar.’ 10Gime otimere didek, aka rumacen oyway t'idwoko i polo. 11I hongo no won ama ji moro adek m'oor bongan wok Kasareya jotundo i ot m'onwaŋo abed'iye. 12Cuny Maleŋ owaco ran ni akidhi gi jono m'ongoye yero. Joma joyeyo aucel me bende jowotho kodan kiri i Kasareya, to wajoje wadonjo i ot pa Kornelio. 13Go owaco riwan paka oneno malaika moro ocungo i ot pere to waco rigo ni, ‘Or dhano Yopa wolwoŋi Simon ma nyinge Petero. 14Go bino kelo riwin wac ma bino miyin kodi jopeco perin je limo both.’ 15Aka munyo acako luwo, Cuny Maleŋ oloro rijo paka cango oloro riwan i kacako. 16Gikenyo apoyo gima Rwoth ndir ca owaco ni, ‘Yohana obatisa win gi pi to wibino limo batisimo ma Cuny Maleŋ.’ 17Onyo k'inen Were omiyo Jopath no bende mic acel ma go omiyo wan munyo wayeyo Rwoth Yesu Kristo, onyo an aŋa, ma d'atem juko Were!”
18Munyo jowinjo gime, joliŋ piem, to jopako Were munyo jowaco ni, “Kere Were otieko miyo Jopath bende hongo ma ŋuto gi bedo gi kwo.”
Kitipa pa jom'oyeyo i Antiok
19 #
Tim 8:1-4
Jom'oyeyo jokedhere ro lweny m'obedo munyo oneki Stefano. Jomegi jokidho kiri yu Fonisia kodi Sipuro kodi Antiok munyo jotito mikwenda ri Joyuda kende. 20Aka jom'oyeyo megi, ji ma jowok Sipuro kodi Sireno jokidho Antiok to jotito ri Jogris mikwenda no bende, munyo jofonjo jo Wac Manyen Maber kwoŋ Rwoth Yesu. 21Cingi Rwoth onwaŋo nigi jo, aka ji mathoth joyeyo to jowire bongi Rwoth.
22Wac me otundo i kitipa pa jom'oyeyo ma Yerusalem to jooro Barinaba yu Antiok. 23Munyo go otundo to neno nema pa Were m'oyido nikenyo, osangala to kwayo joje ni jowobedi gi genirok kodi adieri ruwaŋ Rwoth gi ridho madwoŋ; 24ato Barinaba onwaŋo obedo dhano maber, m'opoŋ gi Cuny Maleŋ kodi yeyo. Aka ji mathoth swa jomedere i kitipa ji pa Rwoth.
25Gikenyo Barinaba okidho Tariso rango Saulo. 26Munyo onwaŋo go, okelo go Antiok. I hongo ma romo oro gipi jario me joromo gi kitipa pa jom'oyeyo, to jofonjo ji madit swa. I Antiok me ama open lwoŋ'iye jofonjirok ni Jokristo.
27I kare no ama jotuci wac Were megi jobin'iye Antiok wok Yerusalem. 28#Tim 21:10Acel kwoŋ jo, ma nyinge Agabo, ocungo malo gi meni pa Cuny Maleŋ, to luwo kwoŋ kec madwoŋ ma bino bedo to swana piny gipi. (Kec no obino i adhum pa Kilaudio.) 29Jofonjirok joridho ni kisi dhano kwoŋ jo ripo dhiro kony ri wadi jo ma Yuda paka go nyalo. 30Jotimo ameno, to jodhiro pesa ri jotel ma kitipa pa jom'oyeyo munyo luwo gi i cingi Barinaba gi Saulo.
Nu markerat:
Tim pa Jomoor 11: DHOPE
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Dhopadhola DC Bible © Bible Society of Uganda, 2018.