Tim pa Jomoor 9
9
Wirok pa Saulo
(Tim 22:6-16; 26:12-18)
1Saulo oyido fodi medere i hongo no gi ywoyo wac ma bwoko gi neko jofonjirok pa Rwoth. Okidho bongi jadwoŋ pa jocway ri Were i wi migam, 2to kwayo balwa ma dhiro go i kalamo pa Joyuda i Damasiko, ni k'onwaŋo joma luwo royo pa Rwoth kenyo, wonyali mako jo, cwo gi mon, to dwoko jo Yerusalem.
3Munyo go fodi oyido ni royo kidho Damasiko, mafodi k'otundo i tindi, lero owok i polo to umo go ni fungu. 4Go ogore piny to winjo dwondi jo ma waco rigo ni, “Saulo Saulo! Raŋo m'ilwenyo kodan?” 5Go openjo ni, “In iŋa, Rwoth?” Dwondi jo no odwoko ni, “An Yesu m'ilwenyo gine. 6To ay malo ikidhi i tindi, kam'ibino waco rin'iye gim'inotimi” 7I hongo no ji m'onwaŋo jowotho gi Saulo oyido jocungo, m'ongoye wac ma jowaco; jowinjo dwondi jo no to jok'oneno nyatoro.
8Saulo oay malo kam'onwaŋo opodh'iye to yawo waŋe, to k'onyalo neno gimoro. Gikenyo jomako cinge to jotero go Damasiko. 9I hongo ma ndelo adek go k'onyalo neno gimoro, aka i hongo no go k'onyalo cemo kosa madho gimoro.
10Onwaŋo nitie i Damasiko jafonjirok moro m'ilwoŋo ni Anania. Ŋato olimo lek ma Rwoth owac'iye rigo ni, “Anania!” Odwoko ni, “Anika, Rwoth.” 11Rwoth owaco rigo ni “Yikere ikidhi i Royo m'ilwoŋo ni Nyatirtir, aka ipenji dhano ma wok Tariso m'ilwoŋo ni Saulo i ot pa Yuda. Go nitie i kwayo pama won me. 12Aka, i lek, go oneno dhano m'ilwoŋo ni Anania munyo donjo to ketho cinge kwoŋe ŋey go wocaki neno kendo.” 13Anania odwoko ni, “Rwoth, kole ji mathoth jotieko luwo ran kwoŋ gigipiny mareco ma ŋato otieko timo ri ji perin maleŋ ma Yerusalem. 14Aka go obino Damasiko gi meni ma jotel pa jocway ri Were i wi migam jomiyo go ma mako nyatoro je ma yeyo i nyingin.” 15Rwoth owaco rigo ni, “Kidhi, rupiri atieko yero go wotiy ran, ma miyo nyingan ŋeyirok bongi Jopath kodi kerin, kodi nyithindho pa Isiraili. 16Aka abino nyutho go paka go ripo candirok ran.”
17Gikenyo Anania okidho, odonjo i ot to ketho cinge kwoŋ Saulo ka waco ni, “Omera Saulo, Rwoth Yesu m'omenyere rin i royo munyo ibino ka, ooran nike inyal neno kendo ipoŋ gi Cuny Maleŋ.” 18Piyo piyo gimoro ma cale magambala ohale wok i waŋe to podho, to go cako neno kendo. Gikenyo go oay malo t'imiyo go batisimo, 19aka munyo otieko cemo, meni pere odwoko.
Saulo fonjo i Damasiko
Saulo obedo ndelo manok gi jofonjirok i Damasiko. 20Go okidho nyatirtir i kalamo pa Joyuda m'omore aka ocako fonjo kwoŋ Yesu ka waco ni, “Yesu obedo Wod Were.” 21Ji je ma jowinjo go jodhier swa, aka wegi jopenjere ni, “Me k'aŋata oneko ji Yerusalem ma jotuco nyingi Yesu? Aka miti go onyo ameno k'obino ka kodi atoŋa ma mako ji ma jotuco nyingi Yesu gi tweyo jo tero jo bongi jotel pa jocway ri Were i wi migam?”
22To fonji pa Saulo omedere bedo gi meni loyo, aka tito pere ni Yesu obedo Kristo obedo m'ocwiny swa ma Joyuda m'oyido jonitie Damasiko jok'onyalo dwoko go. 23#2 Kor 11:32-33Munyo ndelo mathoth okadho, Joyuda jocokere to joyiko paro ma neko Saulo; 24to owaci rigo gim'oyido joyiko timo. Jonago jokuro go i waŋkac ma tindi Wor g'odieceŋ ni jowoneki go. 25To gi wor no, joma luwo Saulo jokwanyo go to jowodho go gi i hoŋ ma kor ot iy'adita m'olier gi thol.
Saulo i Yerusalem
26Saulo okidho Yerusalem to temo makirok kodi jofonjirok to jok'onyalo yeyo nike go pama onyo bende olokere jafonjirok, to joje jolworo go ayino. 27Gikenyo Barinaba obino okwanyo go to tero go bongi jomoor to tito rijo paka Saulo ndir ca oneno Rwoth i royo to Rwoth luwo gine. Go bende owaco rijo paka Saulo ofonjo gi miseni i nyingi Yesu i tindi ma Damasiko. 28Gikenyo Saulo obedo gi jo to wotho Yerusalem parom, munyo fonjo gi miseni i nyingi Rwoth. 29Go bende oluwo aka opiemo kodi Joyuda ma joluwo Dhogrik, to jotemo neko go. 30Munyo jom'oyeyo joŋeyo gino, jotero Saulo yu Kasareya to jodhiro go Tariso.
31Gikenyo kitipa pa jom'oyeyo i Yuda gipi kodi Galili kodi Samaria obedo gi hola ma siem. Jokonyere aka jodongo i welo ro kony pa Cuny Maleŋ, munyo jowotho i kwo ma lworo Were.
Petero i Lida kodi Yopa
32Paka Petero oyido wotho i kabedo m'omore, ndelo moro go okidho liewo ji ma jobedo Lida. 33Kenyo go oromo gi dhano m'ilwoŋo ni Ayineya, m'onwaŋo two nyaŋinya aka k'onyalo ay i kanindo oro aboro. 34Petero owaco rigo ni, “Ayineya, Yesu Kristo bothin. Ay malo iyiki kanindo perin.” Ayineya oay mayot. 35Ji ma jobedo Lida kodi Saron joneno go, to jowire bongi Rwoth.
36I Yopa onwaŋo nitie dhako m'oyeyo m'ilwoŋo ni Tabisa, (Nyinge i Dhogrik obedo Dokas, dwoŋ mere ni amudhe), m'oyido oro hongo pere je ma timo bero gi konyo jocandi. 37I hongo no two omako go to tho. Olwok delkwoŋe to ipielo i ot ma malo. 38Paka Yopa oyido kibor gi Lida, munyo jofonjirok ma Yopa jowinjo ni Petero nitie Lida, jooro j'ario bonge gi mikwenda me, “Mondo redi ibin.” 39Gikenyo Petero oyikere to kidho bongi jo. Munyo go otundo, oter go i ot ma malo. Mon tho je jothoko go munyo joywak aka jonyutho go satere gi k'otere ma Dokas otimo munyo fodi kwo. 40Petero oriemo joje woko, aka oguro conge to kwayo; aka owire kama di jatho to lwoŋo ni, “Tabisa, ay malo!” 41Petero otundo bonge to konyo go gi ay malo. Gikenyo Petero olwoŋo jom'oyeyo kodi mon tho, to cwayo go makwo rijo. 42Wac me onyay i Yopa gipi, aka ji mathoth joyeyo Rwoth. 43Petero obedo Yopa ndelo m'oromo kodi jajwayi piendere m'ilwoŋo ni Simon.
Nu markerat:
Tim pa Jomoor 9: DHOPE
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Dhopadhola DC Bible © Bible Society of Uganda, 2018.