Baɗitari 18
18
Hyel Ku Hara Alkawalər Hamta Ɓzər Aka Ibrahim
1Antə MTHLAKU ku ncantə kərni aka Ibrahim kudzəhə ka kuɓər nfur ok ar Mamre, sakatə Ibrahim andzəndzi anyarmbwar tentərni təpci ata u'ur pci. 2Sakatə Ibrahim haptə ncari təng nggədza mji laga makər athləthlata abwakəmari kudzəha adzə ni. Sakatə tsa wutə ɗa, antə tsa pthli hwi kara mwari adzə ɗa, ka zuzuri ka kəmari ata di, 3ka pəla, “Mthlaku, ma I an ata wutə mdəkur ata nca ga, ga aɗiya təramta kəyir mafar ngə wa. 4Ndzi ka mdə səntə yimi laga raka ka giri kəcimta səla giri kəgari, ka giri ghərəmtaghəra akira nfu ngəni. 5Tsuwa I ata mwari kəi səntə ala giri buradi, ka giri səma ka wutə duna, təng tə giri ku si adzə mafar giri ni. Aghəla nda ka giri ləkəma ka mwar giri.”
Antə da pəla, “Ɓɗaku, mwari ka gə hara apatə gə pəla.”
6Antə Ibrahim thlatə ka huva ka ləkwa tentərni, ka pəla aka Saratu, “Mwa taktar kara kətsə mpu na liktikti tasa makər, kara hərta, ka gə ɓwatə buradi kəgari.” 7Antə Ibrahim hwi mwari akwa ciɓər thla, ka ngkəi ɓzər gyal na təksətəksari lapiya, ka hamta aka buɗarni, na ku hangkər ka ɗəmhə ni. 8Antə Ibrahim ku kətə uwa mumwasu, ka uwa hadlu, ka kum thla tə mdə namtə ni, ka pwi akəma ɗa. Sakatə da ata səm susəm ni antə tsa shaɓəladzi raka ka ndzəndzi akira nfu ni akwa səkə ɗa.
9Antə da pəla alari, “Ama Saratu na mwalankiri ri?”
Antə tsa pəla, “Tsa akwa tent ni.”
10Antə pal akwa nca ɗa pəla, “Apta saka apani I ata ngka, antə Saratu na mwalankiri ata wutə ɓzər sal.”
Tsuwa akwa saka ndaga Saratu anyarmbwar tent abwahilari akwa ngga gari ni. 11Sakanda Ibrahim ka Saratu ku kurtə hali, məva ɗa ku təra ciju. Apani Saratu ku fəi kula wutə kəca na ar mwanki. 12Antə apani Saratu ku kumshi akwa ɗəffari akwa pəla, “Aghəla tə I ku hali, tə salərna tsuwa ku hali, antə yeru ata sə nggatə msərakur pi ata kəma duku ya?”
13Antə MTHLAKU pəla aka Ibrahim abbər, “Kamnyar mi tə Saratu kumshi ka pəla, ‘Har I ata mzhi yaɓəla ɓzər akwa halhalkurərna ni ya’ nə ri? 14Su aɗi na ata mula aka MTHLAKU ya? Apta saka apani I ata ngka, antə Saratu ata wutə ɓzər sal.”
15Amma Saratu ku beɗəmta abbər, “I aɗi kumshi mai,” kamnyar tə tsa akwa thlivəra.
Antə tsa pəla, “Haba, ga ku kumshi ja.”
Ibrahim Ku Kiɗə Kəra Hyel Ata Vəya Sodom
16Antə mji ni thlatə ka mwari akwa vəi tə da ata wulɓəla Sodom. Tsuwa Ibrahim ku mwari ata kəma duku ka da, kamnyar ka tsa pwarɓəla ɗa kasha. 17Antə MTHLAKU pəla akwa ɗəffari abbər, “Ka I ata ɗuwar su tə I akwa bara harari ni aka Ibrahim ya? 18Kamnyar jiri kəkayeri ar Ibrahim ata sə ndzi hang ka ndzi dur na ola. Tsuwa atar ni antə shanga mjir duniya ata sə wutə barka. 19Kamnyar I ku carɓəla ni ka tsa tsawa aka maɗa'ni kəga kutakəyirni ka da ndzi mjir ɓəla lakurna atar hara su kalkal ka ndzi ka jirkur. Kamnyar ka I na MTHLAKU ni nghyaɓəla aka Ibrahim alkawal tə I hara alari ni.”
20Antə MTHLAKU pəla aka Ibrahim, “Təng tə mji hang akwa tuwa kamnyar kəmanggarkur mjir Sodom ka Gomora, tsuwa bikər ɗa ku hara ɗimi kamta ni, 21I ata ləghəi kəi ra nggaɓəla jirkur kurakər tuwa na mzhitə ra ni, ma aɗi jiri wa, kəi sənda.”
22Antə mji ni ku shinar kəma ɗa ka təra mwari təbwar Sodom, amma ar Ibrahim tsa ndzi tsu adzə MTHLAKU. 23Antə Ibrahim shahədzi adzə MTHLAKU ka pəla, “Abbər ga ata ra shamta shanga mji na ɗimi ata kəma duku kəga mji na kula biku, jiri ya? 24Kaha, ma har mda ata wutə mji ntəfkumari na kula biku akwa di ni, tsu ga ata shamta di ni purəm ya? Ga amzhi zhar ni kamnyar mji ngəni ntəfkumari na kula biku akwa ni wa ya? 25Su apani aɗi ata hara Ai! Kamnyar I ku sənda abbər ga aɗi ata hir shamta mji na ɗimi ni ata kəma duku kəga mji na kula biku wa, kamnyar ata namta abbər mji na kula biku ni ku ndzi kalkal ka mji na ɗimi ni. Antə aɗi kalkal ka mdə na ata shariya aka duniya ni hara su na kalkal wa ya?”
26Antə MTHLAKU pəla, “Ma I ku wutə mji na kula biku ntəfkumari akwa Sodom, I ata yafitə bərni ni swakti kamnyar ɗa.”
27Antə Ibrahim pəla, “I ku kurtə kəta ata kəri abbər I ata gari aka MTHLAKU, wala tə I aɗi suma wa, amma bərbər ka pənju daci. 28Amma ma ntəfu ku ləɓəla akwa kuta ntəfkumari ni fa, tsu ga ata shamta di ni kamnyar mji ngəni ntəfu na aɗi wa ni ya?”
Antə tsa pəla, “Ma I ku wutə mji nfwarkumari ka ntəfu anda, I aɗi ata shamta bərni ni wa.”
29Antə Ibrahim jaktə pəla, “Amma ma mdə wutə mji nfwarkumari daci anda fa?”
Antə tsa amsa abbər, “Kamnyar mji ngəni nfwarkumari ni, I aɗi ata harari wa.”
30Antə Ibrahim pəla, “MTHLAKU usa ka ɗəffa gə ɓzi wa, I ata jaktə gari. Amma ma təng mdə wutə mji makkumari daci fa?”
Antə tsa pəla, “Ma I ku wutə mji makkumari anda, I aɗi ata harari wa.”
31Antə Ibrahim jaktə pəla, “MTHLAKU I ku kurtə kəta ata kəri abbər I ata gari ka MTHLAKU. Amma ma təng mdə wutə mji sərkumari daci fa?”
Antə tsa pəla, “Kamnyar mji sərkumari, I aɗi ata shamtari wa.”
32Antə Ibrahim jaktə pəla, “Usa, ɗəffa MTHLAKU aɗiya ɓzi wa, kəi jaktə gari ka duku daci bu. Amma ma təng mdə wutə mji kuma daci fa?”
Antə tsa pəla, “Ma har I ku wutə mji kuma, I aɗi ata sə shamtari wa.”
33Sakatə MTHLAKU ku kuri gari ka Ibrahim, antə tsa təra kazhar ni, antə Ibrahim ku ngka avi.
Nu markerat:
Baɗitari 18: KNB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.