Yahwana 6
6
Yesu Ku Ndlantə Mji Dəpu Ntəfu
(Mat 14:13-21; Mar 6:30-44; Luk 9:10-17)
1Aghəla ngəni, antə Yesu mwari aɓəla bwanda Mandar Galili, na an Mandar Tiberiya. 2Antə dlamar mji ku nu ni, kamnyar tə da ku wutə surndatayeri tə tsa hara atar mbantə mji na nggawa nggawa. 3Antə Yesu mwari ka ndzəndzi ata kəra gar ata kəma duku kəga mjirthlipərni. 4Tsuwa sakar Kucalər Fəlɓəla Kəi ni ku hara kudzəha. 5Sakatə Yesu haptə kərari ka wutə dlamar mji akwa si adzə ni, antə tsa pəla aka Filibus abbər, “Ama antə mburu ata wutə susəma ka mburu mastə na ata mzhi səmər mji nayeri nə ri?” 6Tsa pəla apani ni kamnyar ka tsa ngkərtə Filibus, kamnyar arni tsa səndə su tə tsa ata hara ri.
7Antə Filibus shinau alari abbər, “Ai wala mda an ata kətə kwabar ntər mdər kəthlər vir aru suɗa, aɗi ata mzhi mastə susəma na ata ndlətə waskəi wala raka raka wa.”
8Antə pal akwa nca mjirthlipərni na ka thləmari Andrawus, na ɓzərma' Siman Bitrəs ni pəla, 9“Nggədza ɓzəngkyar laga azi ka kər buradi ntəfu tə mdə ɓwa ka barli, ka tsuwa kəlfa suɗa. Amma ata hara mi aka mji dlama dlama apani ri?”
10Yesu pəla aka mjirthlipərni abbər, “Pəla giri aka mji ni ka da ndzəndzi.” Tsuwa kusar aɗi hang ata vəi nda. Antə mji ni ku ndzəndzi, tsuwa hangkurər ɗa ku mwanta apa dəpu ntəfu. 11Antə Yesu kətə kər buradi ni ka usar Hyel, ka ndəkəmta aka mji na andzəndzi ni, kalkal apatə waskəi akwa turari. Apani tsuwa antə tsa hara ka kəlfayeri ni. 12Sakatə shanga ɗa ku səma ka ndli, antə tsa pəla aka mjirthlipərni abbər, “Tsaptə giri mbilari na ɓushirəmtadzi ni, mda aɗiya bara gyal ka su wa.” 13Antə da tsaptə na ɓushirəmtadzi ni ka nghyantə thlambəl kumnya suɗa kəgari, watau mambila buradi barli tə mji kwasə ka zhari ni.
14Sakatə mji wutə sur ndatə tə Yesu hara ni, antə da pəla, “Jiri, ngəni an Naɓi ni na ata si akwa duniya ni!” 15Sakatə Yesu ku nggaɓəla abbər mji ni abaka si ka da kətə ni ka dunar ɗəva, ka da bartə kərari ka tsa ndzi kuthli, antə tsa jaktə ngka akwa gar tsa shini.
Yesu Ku Mwa Ata Kəra Yimi
(Mat 14:22-23; Mar 6:45-52)
16Sakatə tahaku ku hara, antə mjirthlipər Yesu ləghəi adzə mnya manda, 17ka ləkwa shar kamnyar mwari aɓəla bwanda manda ni akwa mwari abwar Kafarnahum. Tsuwa sakanda kuthlu ku hara, amma Yesu aɗi si adzə ɗa katagu wa. 18Antə yimi ni baɗitə mpa ka duna kamnyar shambar na mwavər akwa fi yimi ni. 19Sakatə da ku mwa ata kəra yimi ni apa mel makər wala nfwar, antə da wutə Yesu akwa mwa ata kəra yimi ni akwa si təbwar shar ni, antə da ku thlivəra. 20Amma Yesu pəla ala ɗa, “Iya! Giri aɗiya thlivər wa!” 21Antə da ku hir ka da dlu ni akwa shar ni ka kucali. Təkəma antə shar ni ku mzhitə vəi tə da akwa bara mwari akwa ni.
Mji Ku Bara Yesu
22Səɓəla ɗəpari, antə mji na mbili aɓəla bwanda manda ni wuta abbər azha hwatu shar duku an si daci. Tsuwa da wuta abbər Yesu aɗi ləkwa shar ni kəga mjirthlipərni wa, amma mjirthlipərni ni təra shiɗa. 23Amma sharayeri laga aɗi na thlata ahar Tiberiya ka si kudzəhə ka vəi tə mji kwasə buradi aghəla tə Mthlaku ku usar Hyel ata kər ni. 24Sakatə mji ni wuta abbər Yesu ka mjirthlipərni aɗi anda kəra wa, antə da ku ləkwa sharayeri nda, ka mwari ahar Kafarnahum akwa pakə Yesu.
Yesu An Buradi Na Ana Hamta Mpika
25Sakatə da wutə Yesu aɓəla bwanda manda ni, antə da pəla alari, “Maləm, nawa antə gə si azi ri?”
26Antə Yesu shinau ala ɗa ka pəla, “I akwa pəla ala giri jirkur, giri aɗi akwa bara ra kamnyar surndatayeri tə giri wutə nə wa, amma kamnyar giri ku səm susəma apatə giri akwa barari. 27Giri aɗiya hara kəthlər kamnyar susəma na ata si hil wa, amma kamnyar susəma na aɗi hil wa, na ata hamta mpikə na akur wa, natə Ɓzər Mda ata sə hamta ala giri. Kamnyar Hyel na Tədda ku hara seɗar mbərsa ata tsa.”
28Antə da pəla alari, “Man tə ka yeru hara, kamnyar ka yeru hara su tə Hyel ata bara ri?”
29Antə Yesu shinau ala ɗa ka pəla, “Su tə Hyel akwa bara ka giri hara an ka giri hamta jiri aka mdə tə tsa thlentə ni.”
30Antə da pəla alari, “Kaha, sur ndatə madi tə ga ata mzhi haratari ka yeru wuta, ka hamta jiri ala gə ri? Man tə ga ata mzhi harari ri? 31Kəkayeri ar yeru ku kwasə manna akwa mtaku, tsu apa tə mdə ku rəbuta akwa kakaɗu abbər, ‘Tsa ku na ala ɗa susəma na thlata amtazi ka da səma.’ ”
32Antə Yesu pəla ala ɗa, “I akwa pəla ala giri jirkur, aɗi Musa an na ala giri buradi na thlata amtazi nə wa, Təddarna an akwa na ala giri buradi na jirari na thlata amtazi. 33Kamnyar buradi tə Hyel hamta ni an tsa na ku thlata amtazi ka səghəi akwa hamta mpika aka duniya ni.” 34Antə da pəla alari, “Mthlaku, na ala yeru buradi ngəni tədəku.”
35Antə Yesu pəla ala ɗa, “I an buradi ar hamta mpikə ni, mdə na ku si adzə ra, tsa aɗi ata nggatə mi kəra wa, tsuwa mdə na ku hamta jiri ali tsa aɗi ata nggatə thləli kəra wa. 36Amma tsu apatə I ku pəla ala giri ni, giri ku wutə ra amma wala apani giri aɗi hamta jiri ali wa. 37Shanga mji tə Tədda ku na ali, da ata si adzə ra. Tsuwa kəlara mdə na ku si adzə ra, I ata kədləmta ni wa. 38Kamnyar I aɗi thlata amtazi ka si abbər kəi hara su tə I hir wa, amma kəi hara su tə mdə na thlentə ra hira. 39Antə ngəni an su tə mdə na ku thlentə ra hir ni, abbər I aɗiya shamta wala duku akwa nca shanga mji tə tsa hamta ali nə wa, amma kəi sə thlentə ɗa ka mpika akwa vir kurər duniya. 40Kamnyar ngəni an su tə Təddarna hira, abbər kəlara mdə na ku wutə Ɓzər ni, ka hamta jiri alari, tsa ata wutə mpikə na akur wa. Tsuwa I ata thlentə ni akwa vir kurər duniya.”
41Antə mjir Yahudi baɗitə nggungguni ata kərari, kamnyar tə tsa pəla abbər, “I an buradi na səghəi akwa kutar amtazi ni.” 42Antə da pəla, “Nənga ngəni aɗi Yesu wa ri, na ɓzər Yusuf? Mdə tə mburu asəndə baba'ni ka mama'ni! Apa madi kulini tsa ata pəla abbər tsa thlata amtazi ri?”
43Antə Yesu shinau ala ɗa ka pəla, “Giri aɗiya nggungguni akwa daɓwa giri wa. 44Mda aɗi na amzhi si adzə ra wa, tar ma Tədda na thlentə ra ni an ndəkərtə ni ali. Antə I ata sə thlentə ni ka mpika akwa vir kurər duniya. 45Mdə ku rəbuta akwa kakaɗu abbər, ‘Hyel ata sə thlipə su aka shanga ɗa.’ Antə kəlara mdə na ku nggatə Tədda ka thliptə su akəla ri, ata si adzə ra. 46Ngəni aɗi abbər mdə aɗi na ku ɗar wutə Tədda wa, tar tsu tsa na thlata adzə Hyel ni an wutə Tədda ni. 47I akwa pəla ala giri jirkur, mdə na ku hamta jiri tsa ka mpikə na akur wa. 48I an buradi ar hamta mpikə ni. 49Kəkayeri ar giri ku kwasə manna akwa mtaku, amma wala apani da ku mtəgəmtadzi. 50Amma ngəni an buradi na thlata amtazi ka səghəi. Kəlara mdə na ata kwasə buradi ngəni ni, tsa aɗi ata mtə wa. 51I an buradi na ka mpika na ku thlata amtazi. Antə kəlara mdə na ku kwasə buradi ngəni, tsa ata ndzi ka mpika ba saka madi. Antə buradi tə I ata hamtari kamnyar ka duniya ndzi ka mpikə ni, an kumər dzi.”
52Antə mjir Yahudi ni baɗitə beɗi akwa daɓwa ɗa, akwa pəla, “Apa madi tə mdə ngəni ata mzhi na ala mburu dzari ka mburu səm ri?”
53Antə Yesu pəla ala ɗa, “I akwa pəla ala giri jirkur, ma giri aɗi səm kumər dza Ɓzər Mda ka sa mamshirni wa, giri aɗi ata ndzi ka mpika akwa dza giri wa. 54Kəlara mdə na ku səm kumər dzi ka sa mamshirna, tsa ata ndzi ka mpikə na akur wa, antə I ata sə thlentə ni akwa vir kurər duniya. 55Kamnyar kumər dzi an susəm na jirari, tsuwa mamshirna an sur sa na jirari. 56Kəlara mdə na ata səm kumər dzi ka sa mamshirna, tsa ata ndzi akwa iya, tsuwa I ata ndzi akwa tsa. 57Apatə Tədda na ka mpika ku thlentə ra, tsuwa atar ni antə I ka mpikə ni, apani tsuwa antə kəlara mdə na ku səm kumər dzi tsa ata ndzi ka mpika atar na. 58Ngəni an buradi na thlata amtazi ni, aɗi jili natə kəkayeri ar giri səma ka jaktə mtə nə wa. Mdə na ku kwasə buradi ngəni, tsa ata ndzi ka mpika ba saka madi.”
59Yesu ku pəla gari ngəni ni sakatə tsa akwa thlipa akwa mbwar vəngkər səli ahar Kafarnahum.
Ndərayeri Ar Mpikə Na Akur Wa
60Sakatə mji hang akwa nca mjirthlipərni ku nggatə gari ni, antə da pəla, “Sur thlipə ngəni an ɓəɓal kamta, wan ata mzhi dluwari ri?”
61Amma təng tə Yesu ku sənda akwa ɗəffari abbər mjirthlipərni akwa nggungguni ata kəra ndər ni, antə tsa pəla ala ɗa, “Ngəni ata ndzi sur tsamta səl ala giri tsu ya? 62Ka shang ma giri an ata wutə Ɓzər Mda akwa ləmtazi akwa vəi tə tsa akwa hwatu ri? 63Mambələr Hyel andər hamta mpika, su aɗi tə dza mda ata mzhi kuriyari wa, dunar mda aɗi mzhi hara su wala raka wa. Ndərayeri tə I pəla ala giri ni an thlata akəla mambəl na ana hamta mpikə ni. 64Amma wala apani mji laga akwa nca giri aɗi hamta jiri wa.” Kamnyar Yesu ku səndə tsu akwa baɗitari, mji na aɗi ata sə hamta jiri wa, ka mdə na ata sə ɓəli ni. 65Antə tsa pəla, “An su na hara tə I pəla ala giri abbər, mda amzhi si adzə ra wa, tar ma Tədda ku hir alari.”
66Aghəla gari ngəni mji hang akwa nca mjir nu Yesu ni ku ngka ka bwahili, tsuwa da aɗi jaktə nu ni kəra wa.
67Antə Yesu pəla aka mjirthlipərni na kumnya suɗə ni abbər, “Wala giri ma, giri akwa bara təra ya?”
68Antə Siman Bitrəs shinau alari ka pəla, “Mthlaku, ka yeru mwari adzə wa damwa ri? Gan ka ndərayeri ar hamta mpikə na akur wa.#Mat 16:16; Mar 8:29; Luk 9:20 69Yeru ku hamta jiri, ka sənda abbər ga an Mdə na Ɓɗakkarkara ar Hyel.”
70Antə Yesu shinau ala ɗa ka pəla, “I ku carɓəla giri kumnya suɗa, nənga wa ri? Amma pal akwa nca giri an Shatan!” 71Yesu akwa gari ata kəra Yahuda na ɓzər Siman Iskariyoti, kamnyar akwa nca mji na kumnya suɗə ni, tsa an ata sə ɓəli ni.
Nu markerat:
Yahwana 6: KNB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
