Luka 10
10
Yesu Ku Thlentə Mji Murfəkumari Ka Suɗa
1Aghəla ngəni antə Mthlaku carɓəla mji damwa murfəkumari ka suɗa, ka thlentə ɗa suɗsuɗa, ka da mwari akəmata tsa akwa kəlara di kəga vəyayeri tə tsa ka kərari ku ɗəmha abbər tsa ata mwari anda. 2Antə tsa pəla ala ɗa, “Sur fakəu ku ya hang, amma mjir kəthlər aɗi hang wa. Antə kiɗə giri kəra Mthlakər fakə ni, ka tsa thlentə mjir kəthlər akwa fakərni. #Mat 9:37-38 3Mwar giri! Nggədza I akwa thlentə giri apa maɗa' təma akwa nca kilamtakayeri. #Mat 10:16 4Giri aɗiya kəl kwaba wa, wala thləvu wa, wala ɓaɓi wa, tsuwa giri aɗiya hara thlawa na saɓəl kəga mji ata laku wa. #Mat 10:7-14; Mar 6:8-11; Luk 9:3-5 5Tsuwa kəlara kəi tə giri ku ləkwa ntangkəma, ka giri pəla, ‘Ka msərakur ndzi akwa kəi ngəni.’ 6Antə ma mda aɗi na hir ndzəndzi msərakur akwa kəi ni, msərakurər giri ata ndzi alari. Amma ma aɗi wa, msərakurər giri ata ngka ala giri. 7Tsuwa ka giri ndzi tsu akwa kəi ndaga, ka giri səm ka sa kəlara su tə da ku mzhi hamta ala giri, kamnyar kalkal ka mdə ntəmta mdər kəthlər watsəɓərni. Giri aɗiya nu ata kəi ata kəi wa. #1 Kor 9:14; 1 Tim 5:18 8Kəlara saka natə giri ku mwari akwa di laga, antə da ku dlu giri, ka giri səma su tə da ku vəi akəma giri. 9Ka giri mbantə mji na nggawa nggawa akwa di nda, ka giri pəla aka mji na anda abbər, ‘Kuthlikurər Hyel ku si kudzəhə ka giri.’ 10Amma kəlara sakatə giri ku ləkwa di laga, antə da aɗi dlu giri wa, ka giri ləɓəla akwa lakur kuta di nda ka giri pəla, #Kəth Apos 13:52 11‘Wala bərbər diyir giri na ku bartə səla yeru, yeru ata ɓumta ala giri sur giri. Amma ka giri sənda abbər kuthlikurər Hyel ku si kudzəhə ka giri!’ 12I akwa pəla ala giri abbər akwa vir shariya, Hyel ata kətadzə mjir Sodom təramta mjir di ndaga.” #Mat 11:24; 10:15
Diyayeri Na Aɗi Tubi Wa
(Mat 11:20-24)
13 “Sha ku wutə nga, Korazin! Sha ku wutə nga, Bethsaida! Kamnyar ma abbər surndatayeri tə mdə hara akwa giri ni, ma mda an hara akwa Taya ka Sidon, sakani mji na anda ku tubi tsu ɗəm, ka hatə dasa ka ndzəndzi akwa! 14Ma vir shariya, Hyel ata kətadzə mjir Taya ka Sidon ta giri. 15Antə gə na Kafarnahum, ga ana wuta apa mda ata sə haptə səliyir nga amtazi ya? Awa, ata vəya ndaga, mda ata psu nga akwa vəi ndzəndziyir mji mtəmta.
16 “Kəlara mdə na ku psi thləm ala giri, tsa ku psi ali. Tsuwa kəlara mdə na ku nggəlar giri, tsa ku nggəlar ra. Kəlara mdə na ku nggəlar ra, tsa ku nggəlar mdə na thlentə ra.” #Mat 10:40; Mar 9:37; Luk 9:48; Yah 13:20
Ngkar Mji Na Murfəkumari Ka Suɗə Ni
17Antə mji na murfəkumari ka suɗə ni ngka ka kucali hang, akwa pəla, “Mthlaku, wala shatanayeri ku kələngkər ala yeru sakatə yeru ku tsawa ala ɗa akwa thləma ga.”
18Antə Yesu shinau ala ɗa ka pəla, “I ku wutə Shatan akwa təri amtazi apa wurka. 19Tsuwa I ku hamta ala giri duna tə giri ata ntsari pwapwayeri ka hiɗayeri, tsuwa giri ata nggyari shanga dawar giri. Tsuwa su aɗi na ata dəkəi giri wa. 20Amma giri aɗiya kucali kamnyar tə mambəlayeri na ɗimi ɗimi akwa kələngkər ala giri wa, amma ka giri hara kucali kamnyar tə mdə ku rəbutə thləma giri amtazi.”
Yesu Ku Hara Kucali
(Mat 11:25-27; 13:16-17)
21Tsu akwa saka nda, sakatə Yesu ku nghyi ka kucali atar Mambəl na Ɓɗakkarkara, antə tsa pəla,
“I akwa usar nga Tədda, gə na Mthlakər vəi na amtazi ka duniya, kamnyar ga ku ɗuwamta suayeri ngəni aka mji na ɗəɗu ka mji na ka səndər su, ka ncaɓəla ɗa aka maɗankyar. Apani tədda, kamnyar ngəni an laku tə gə bara ka tsa hara akwa.”
22 “Təddarna ku hamta ali shanga su, tsuwa mda aɗi na səndə Ɓzər ni wa, tar Tədda ni, tsuwa mda aɗi na səndə Tədda ni wa, tar Ɓzər ni, ka mji natə Ɓzər ni ku carɓəla ka tsa ngkərɓəla ni ala ɗa.” #10:15
23Antə Yesu shinardzi abwar mjir thlipərni ka pəla ala ɗa akwa ɗuwari abbər, “Giri ka barka tə suayeri ngəni akwa hara ata nca giri ni. 24Kamnyar I akwa pəla ala giri abbər naɓiyayeri hang ka kuthlyayeri ku bara ka da wutə su tə giri wutə ni, amma da aɗi wutə wa, wala ka da nggatə su tə giri nggata ni, amma da aɗi nggatə wa.”
Mdər Samariya Na Ka Kətadza
25Antə maləm laga na ana thlipə tsawur Musa thlatə kamnyar ngkərtə Yesu. Tsa yu ni abbər, “Maləm, man su tə kəi hara kəi wutə mpikə na akur wa ri?” #Mat 22:35-40; Mar 12:28-34
26Antə Yesu shinau alari ka pəla, “Man tə mdə rəbuta akwa Tsawa ri? Apa madi tə gə nggaɓəla ni tsu ri?”
27Antə tsa pəla, “Ka gə hir Mthlaku na Hyel ar nga ka ɗəffa gə shang, ka mpika gə shang, ka duna gə shang, ka hangkala gə shang, ka tsuwa ka gə hir ntəwulər nga apatə gə hir kəra ga.”
28Antə Yesu pəla alari, “Ga ku pəla kalkal, ka gə hara ngəni antə ga ata wutə mpika.”
29Amma mdər səndə Tsawu ni akwa bara ncanta abbər tsa tsa kəcəkəcari akwa kəlara bwa, antə tsa yu Yesu abbər, “Wan ntəwulər na nə ri?”
30Antə Yesu pəla alari, “Mdə laga aɗi na ku thlata ahar Urushalima ata ləghəi ahar Yariko, antə da kəɓa kəga mjir thla laku, antə da fəi kari na adzə ni, ka dəkə ni, tə da təra ka zhar ni ata mnya mta. 31Kəɓa ka tsuwa prist laga akwa ləghəi ata laku nda. Amma sakatə tsa wutə mdə ni, antə tsa təramta ka zhar mdə ni abwa duku. 32Apani tsuwa mdər Lawi laga ku si ata vəi ni, sakatə tsa wutə mdə ni, antə tsa təramta ka zhar ni abwa duku. 33Amma mdər Samariya laga aɗi, na akwa lənggu ata laku ndaga tsuwa, sakatə tsa si ata vəi tə mdə ni ata, ka wutə ni, antə tsa kətadzə ni. 34Antə tsa mwari adzə ni ka putə mal ka yimər anap ata mbəlkayeri, ka bartə ka sur mbwa mbəlku na akəlari, ka vətə mdə ni ata hila mwaɓiyirni ni ka mwantə ni akwa kəi fəli laga, ka ɗəmhə ni. 35Səɓəla ɗəpari antə tsa fwaɓəla kwabar adzərfa suɗa ka hamta aka mthlakər kəi fəli ni, ka pəla alari abbər, ka gə wul ni ali, tsuwa kəlara su tə ga ku shamta ata kərari, ma sakatə I ku ngka I ata sə ntəmta ala ga.”
36 “Kulini akwa dzamər nga, madi akwa nca mji ngəni makər ni an ndzi ntəwul na jirari aka mdə natə mjir thla laku dəkə ni nə ri?”
37Antə mdər səndə Tsawu ni pəla, “Tsu mdə na ku ncantə kətadza alari ni.” Antə Yesu pəla alari, “Mwari, ka gə hara tsu apani.”
Yesu Ku Ra Thlawar Marthla ka Maryamu
38Sakatə Yesu ka mjirthlipərni akwa mwa akwa laku, tə tsa si kudzəhə ka di laga, ka ləkwa kuta di ni, antə mwala laga ka thləmari Marthla ku dlu ni akwa kəyirni. #Yah 11:1 39Tsuwa ngkwarma'ni aɗi ka thləmari Maryamu, tə ngkwa ni si ka ndzəndzi adzə Mthlaku akwa ngga thlipərni. 40Amma ar Marthla hangkur kəthlər tə tsa akwa harari ni ku kələmta hangkalari. Antə tsa mwari adzə Yesu ka pəla, “Mthlaku, ga aɗi akwa damitədzi wa ya, tə ngkwarma'na zhar ra shira akwa hara kəthlər ni? Pəla alari ka tsa sə dlar ra bu!”
41Amma Mthlaku shinau alari ka pəla, “Marthla, Marthla ga akwa damitə kər nga ka ndzi ka ɗəffə ɓzəɓza ata kəra suayeri hang, 42amma su duku daci antə kalkal ka mdə damitədzi ata kər. Antə ar Maryamu tsa ku carɓəla bwa na ɓɗakari, tsuwa mdər mzhi dlutsari akəlari aɗi wa.”
Nu markerat:
Luka 10: KNB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.