Markus 11
11
Yesu Ku Ləkwa Urushalima Ka Dunar Kuthlikur
(Mat 21:1-11; Luk 19:28-40; Yah 12:12-19)
1Sakatə Yesu ka mjirthlipərni ku hara kudzəhə ka Urushalima, watau sakatə da mzhitə Bethfaji adzə Gar Zaitun, antə Yesu thlentə mji suɗa akwa nca mjirthlipərni, 2ka pəla ala ɗa, “Mwar giri akwa di na akəma giri ni. Təkəma tə giri ku ləkwa kutadi ni, giri ata wutə ɓzər kwara mbwimbwiyari natə mda aɗi ɗar fəltə ni wa. Mpəli gir ni ka giri səntə ni azi. 3Kəlara mdə na ku yu giri abbər, ‘Kamnyar mi tə giri akwa hara su apani ri?’ Ka giri pəla alari, ‘Mthlaku an akwa barari, tsuwa tsa ata jaktə thlentə ni azi kula shamta saka.’ ”
4Antə da mwari, ka wutə ɓzər kwara ni mbwimbwiyari aɓəla anyarfu, ata mnya laku. Sakatə da akwa mpəli ɓzər kwara ni, 5antə mji na athləthlata anda yu ɗa abbər, “Kamnyar mi tə giri akwa mpəli ɓzər kwara nə ri?”
6Antə da shinau ala ɗa tsu apatə Yesu pəla ala ɗa. Antə mji ni ku zhar ɗa tə da təra ka kwara ni. 7Sakatə da səntə ɓzər kwara ni aka Yesu, ka putə ləptayeri arɗa ata hila ri, antə Yesu fəltə ɓzər kwara ni. 8Mji hang ku pshari ləptayeri arɗa akwa laku, antə bwadukwa mji pwi tsiya nfwayeri na ka thlali tə da nthləgəi akwa fakayeri. 9Antə mji na akəmari ka na aghəlari haptə kuraku akwa pəla,
“Hu gir Hyel!
Ka Hyel vədza barka aka mdə na akwa si
akwa thləma Mthlaku!
10Ka Hyel vədza barka aka kuthlikur
na akwa si ar baba' mburu Dauda!
Hu gir Hyel na akwa vəi na amta ta shang!”
11Sakatə Yesu ku mwari ahar Urushalima, ka ləkwa mbwar vəngkər səli, antə tsa wulhə shanga suayeri na aɗi. Sakatə pci ku təri, antə tsa ləɓəla ka mwari ahar Bethlani ata kəma duku ka mjirthlipərni na kumnya suɗə ni.
Yesu Ku Shiwumta Nfur Kamnda Laga
(Mat 21:18-19)
12Səɓəla ɗəpari, sakatə da akwa zhar Bethlani, antə Yesu baɗitə ngga mi. 13Sakatə tsa tsu ciju antə tsa wutə nfur kamndə laga ka thlali, tə tsa mwari adzə kamndə ni abbər nuhum tsa awutə yar kamndə ni ata. Amma sakatə tsa mzhita, su aɗi tə tsa wuta ata wa, təng thlali daci, kamnyar aɗi sakar yar kamndə wa. 14Antə Yesu pəla aka nfur kamndə ni, “Mda aɗiya sə jaktə səm yar ngə kəra wa.” Tsuwa mjirthlipərni ku nggatə su tə tsa pəla ni.
Yesu Ku Jaktə Ləkwa Mbwar Hyel
(Mat 21:12-17; Luk 19:45-48; Yah 2:13-22)
15Sakatə da ku səkwa Urushalima, antə Yesu ləkwa mbwar vəngkər səli ka baɗitə kədləɓəla mji na akwa ɗəl su, kəga mji na akwa masə su akwa mbwar vəngkər səli ni. Tsa shinamta tebərayeri ar mjir canji kwaba, kəga vəi ndzəndziyir mjir ɗəl kataparayeri. 16Tsuwa tsa aɗi zhari ka wama təra akwa kuta bəbalər mbwar vəngkər səli ka kəlara su madi wa. 17Antə tsa thlipa ala ɗa akwa pəla, “Mdə ku rəbuta akwa Kakaɗər Hyel abbər,
“ ‘Mda ata kəga mbwarna abbər
mbwar adduwa ar shanga mji.’
Amma giri namtə ni
vəi ɗuwar mjir thla laku!”
18Sakatə pristayeri na ol'ola ka maləmayeri ar thlipə tsawur Musa ku nggata ata kəra su ngəni, antə da baɗitə bara lakur tsi Yesu. Kamnyar da akwa thlivər ni, kamnyar tə shanga dlamar mji ku ndatədzi ata kəra surthlipərni. 19Sakatə tahaku ku hara, antə Yesu ka mjirthlipərni ləɓəla kazhar kuta bərni ni.
Nfur Kamnda Tə Yesu Shiwumta Ni Ku Uli
(Mat 21:20-22)
20Səɓəla ɗəpari ɗəɗəpə mbing, sakatə Yesu ka mjirthlipərni akwa təramta akwa laku, antə da ku wutə nfur kamndə nda ku uli har ba akwa nggilangari. 21Antə Bitrəs ɗangta, ka pəla aka Yesu, “Maləm, wul nfur kamndə tə gə shuwumta ni, tsa ku uli!”
22Antə Yesu shinau ala ɗa ka pəla, “Ka giri hamta jiri aka Hyel. 23I akwa pəla ala giri jirkur, kəlara mda ata mzhi pəla aka gar ngəni abbər, ‘Thlata, ka gə ra pwa akwa manda nda,’ ka suari hara. Amma tar ma tsa ku hamta jiri abbər suari ata hara, ka ndzi kula nuhum akwa ɗəffari. #Mat 17:20; 1 Kor 13:2 24Kamnyar ngəni antə I akwa pəla ala giri, kəlara su tə giri ku kiɗa akwa adduwa, ka giri hamta jiri abbər giri ku kurtə dlu suari, antə suari ata ndzi ar giri. 25Tsuwa kəlara sakatə giri ku thləthlatə kamnyar hara adduwa, ma mda aɗi na ku ɓzamtə ɗəffa giri ata kəra kəlara su madi, ka giri yafitə ni, kamnyar ka Təddar giri na amtazi yafitə giri tsuwa.”#Mat 6:14-15 #11:25 Bwadukwa kakaɗayeri na waci tə mdə rəbutə ka tsi ni ka vəras 26, na akwa pəla, “Amma ma giri aɗi tifəmta aka mji bikər ɗa wa, Təddar giri na amtazi aɗi ata tifəmta ala giri bikər giri tsu wa.”
Mji Ku Ndatədzi Ata Kəra Dunar Yesu
(Mat 21:23-27; Luk 20:1-8)
27Antə da jaktə ngka akwa Urushalima. Sakatə Yesu akwa mwa akwa kuta bəbal ar mbwar vəngkər səli ni, antə pristayeri na ol'ola ka maləmayeri ar thlipə tsawur Musa, kəga mji na ol'ola, si adzə ni, 28ka yu ni abbər, “Ka duna na madi antə ga akwa hara suayeri ngəni ri? Tsuwa wan na gə izniyir hara su ngəni ri?”
29Antə Yesu shinau ala ɗa ka pəla, “I ata yu giri su pal. Ni amsari, antə I ata pəla ala giri mdə na ni dunar hara suayeri ngəni ni. 30Yahwana wutə dunar hara baptizma ni akəla Hyel, nənga akəla mdə ri? Ni giri amsa.”
31Antə da kamtadzi ka ɗar wul su ata kər akwa daɓwa ɗa, akwa pəla, “Ma mburu pəla, ‘Thlata akəla Hyel’, tsa ata pəla, ‘To, kamnyar mi tə giri aɗi hamta jiri alari wa ri?’ 32Amma mburu ata mzhi pəla thlata akəla mdə ya?” Da akwa thlivər mji, kamnyar shanga mji ku hamta jiri abbər Yahwana ni naɓi. 33Antə da pəla aka Yesu abbər, “Yeru asəndə wa.”
Antə Yesu pəla ala ɗa, “I ma I aɗi ata pəla ala giri vəi tə I wutə dunar hara suayeri ngəni ni akwa wa.”
Nu markerat:
Markus 11: KNB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.