Markus 16
16
Yesu Ku Thlata Akwa Mtəmta
(Mat 28:1-8; Luk 24:1-12; Yah 20:1-10)
1Sakatə Vir Ghərəmtaghəra ku təramta, antə Maryamu Magdalin, ka Salomi, ka Maryamu na mama' Yakub, ku mastə sur shiwura na msəra kamnyar ka da ra kəkərtə mshiyir Yesu kəgari. 2Ɗəɗəpa mbing vir Laduwa, sakatə pci haɗa səɓəla, antə da ləkwa lakur mwari ata vəi kul ni. 3Sakatə da akwa lakur mwari antə da yu nvwa ɗa abbər, “Wan ata takələmta ala mburu pela na ata mnya kul nə ri?” 4Amma sakatə da haptə kəma ɗa, təng da wuta abbər mdə ku kurtə takələmta pela ni. Tsuwa tsa pela na ol ka duna. 5Antə da ləkwa kuta kul ni, ka wutə ɓzərdakwi laga andzəndzi abwa mazəm, ka ləptu mwapu, antə da ku thlivəra.
6Antə ɓzərdakwi ni pəla ala ɗa, “Giri aɗiya thlivər wa. I ku sənda abbər giri akwa bara Yesu ar Nazareth, tə mdə kukwamta ni. Ai tsa ku thlata! Tsa aɗi azi wa! Wul giri vəi tə mdə peri ni akwa. 7Amma mwar giri, ka giri pəla aka mjirthlipərni, ka Bitrəs, abbər tsa akwa mwari ahar Galili kəmata giri. Anda antə giri ata wutə ni, tsu apatə tsa ku pəla ala giri.” #Mat 26:32; Mar 14:28
8Antə mwanki ni ləɓəla ka hwi, kamnyar da ku yakata ka dza ɗa akwa kədza. Mda aɗi na mzhi pəla su aka wama wa, kamnyar da akwa thlivəra.
Yesu Ku Ncantə Kərni Aka Maryamu Magdalin
(Mat 28:9-10; Yah 20:11-18)
9Aghəla sakatə Yesu ku thlata akwa mtəmta ɗəɗəpə mbing vir Laduwa, natə an vir baɗitər sati, antə tsa ncantə kərni na ntangkəma aka Maryamu Magdalin, mwala tə Yesu ku kədləɓəla shatanayeri murfa akwa dzari ni. 10Antə mwala ni təra ka ra pəla aka mji na ku ndzi ata kəma duku ka tsa, ka mji na ka ɗəffə ɓzəɓza akwa tuwa ni ni. 11Amma sakatə da nggata abbər Yesu ka mpika, ka abbər har mwala ni ku wutə ni ni, da aɗi hamta jiri wa.
Yesu Ku Ncantə Kərni Aka Mjirthlipərni Suɗa
(Luk 24:13-35)
12Aghəla ngəni, antə Yesu ncantə kərni akwa dludzər mdə damwa zum aka mji suɗa akwa nca ɗa sakatə da akwa mwari akwa di laga. 13Antə da ngka ka pəla aka mambila mji, amma da aɗi hamta jiri ala ɗa wa.
Yesu Ku Ncantə Kərni Aka Mjirthlipərni Na Kumkantang
(Mat 28:16-20; Luk 24:36-44; Yah 20:19-23; Kəth Apos 1:6-8)
14Aghəla nda, antə Yesu ncantə kərni aka mjirthlipərni na kum kantang sakatə da akwa səm susəma. Antə tsa ku mnya ala ɗa ata kəra kula hamta jirər ɗa ka ɓəɓalkur ar ɗəffa ɗa. Kamnyar da aɗi hamta jiri aka mji na wutə ni ka mpikə wa. 15Antə tsa pəla ala ɗa, “Mwar giri akwa shanga duniya, ka giri ngkər labar na msəra ni aka shanga mji. #Kəth Apos 1:8 16Mdə na ku hamta jiri ka dlu baptizma tsa ata wutə mbantədzi. Amma mdə na ku nggəlar ta hamta jiri, shariya ata ngkəi ni. 17Tsuwa mji na ku hamta jiri ata ndzi ka dunar hara surndatayeri. Antə da ata kədləɓəla shatanayeri akwa thləmi, ka da gari akwa mnyayeri bilən bilən. 18Da ata fatə pwapwayeri ka tsiya ɗa, tsuwa wala da an sa su na ka gwar na ata tsi mda, su aɗi na ata hara ala ɗa wa. Da ata vəngkər tsiya ɗa ata kəra mji na nggawa nggawa, antə da ata wutə lapiyakur.”
Yesu Ku Ngka Amtazi
(Luk 24:50-53; Kəth Apos 1:9-11)
19Aghəla sakatə Mthlaku Yesu ku gari ala ɗa, antə mdə kətə ni ka ləmtazi ka tsa, tə tsa ndzəndzi abwa mazəma Hyel. #Kəth Apos 1:9-11 20Antə mjirthlipərni ku ləɓəla ka ləkwa ngkər ndərər Hyel akwa kəlara bwa. Tsuwa Mthlaku ku hara kəthlər ka da, ka ncanta abbər labar natə da akwa ngkərari an jiri atar surndatayeri natə da hara ni. Amin.
Nu markerat:
Markus 16: KNB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.