Matius 26
26
Yesus ebe wasuogoluk abok palhukha wene
(Markus 14:1-2; Lukas 22:1-2; Yohanes 11:45-53)
1At Yesus nen wene iti tha'bokhogonat arat yogeisasikhesik nen, yabokane agarumi ane waganhe lagoukha meke emenogo men yogeisasikhe,
2“Niniki pere dogoluk nen pesta Paskah hagasugun iti hit hiniluat o. Itithogon hagakhe korlek, an abat itaklasi agagi etnogo, ap nen yoko lalok it aperek nen o baga meldaniluk nasuagaluk inikimo 'banugun o,” iluk yogeisasikhe. 3Itinem, it ap Allah iteerek meke inougi koktek meke inom, it ap inarluetek emenogo inom, at ap Allah iteerek meke inoe kok etaga Kayafas etnogo aila natogotdiluk nen, 4Yesus inileken wolok limago ha'iluk wasuogoluk abok palhe lagoukha. 5Abok palhe dogolik, men isukha,
“Pesta kok isago nukunem iti, inaneak kogat walunogo nen, ilugun oba weak asinogo hakhigidek dogoluk, o werlekma halok hakhauwok o,” iluk abok isukha.
He ageikhe nen apusu obasi hano meke Yesus ukuloak oba tialogo usa'isikhe wene
(Markus 14:3-9; Yohanes 12:1-8)
6Itithogon isukhasik werek korlek, at Yesus o Betania ap Simon u henako hakene inayuk meke haganeat ebemake welageikhe meke iti aila etoma ukisikhesik werekma, 7he ageikhe apusu obasi hano oko kogat meke oko palogo isoak helekit meke etaga pualam meke hagarek oba akla ukharlogo wolok Yesus hipiri nasinem oba ukisikhesik nen, ukuloak oba tialogo usakhikhe. 8Itithogon usakhikhemo, at Yesus agarumi ane waganhe lagoukha meke emenogo inileken hasukhasik nen,
“Apusu we yugunat alomarogo tialhe yi, nenaluk,” iluk, inakla aga dageiluk, he etnogo wenagakhe dogolik,
9“Apusu iti oko motok kogat meke palogo nen, it inameke dek meke supurisauem,” iluk isukha. 10Itithogon isukhama, at Yesus nen inobabut ekagat hutdisasikhesik nen, men yogeisasikhe,
“He yi nen hano hagatnakhe mekeat he, nenaluk wenagakhe lagap. 11It akhuni inameke dek meke iti hit hinom motok dogogun mekeat he, an anek he, hit ninom motok dogogun dek o. 12At he yi nen apusu tialdanhe iti, an yabokane nakhunem nebe watlasumo, warek thalnabuogoluk watdanu hagat arat watdani aga o. 13Nane eberogonat yokhisak. He yi eberek dogoagaluk, akhuni wene hano wene etnogo, o yi ai ti ai yogeisilik nekhe dogolik,
He iti itithogon hagakhikhe, iluk abok hano ekhe dogogun o,” iluk yogeisasikhe.
Yudas nen Yesus wasuagaluk ap inayoko lageikhe wene
(Markus 14:10-11; Lukas 22:3-6)
14At Yesus nen wene itithogon yogeisasikhemo, at agarumi ane waganhe lagoukha meke inebe 12 emenogo meke, ageikhe etaga Yudas Iskariot etnogo, it ap Allah iteerek meke inougi koktek emenogo inoba lageikhesik nen,
15“An nen Yesus iti wokhisigi halok he, hit nen oko nena meke woknesugun apegep,” iluk yogeisasikhemo, it ap emenogo nen he,
“Oko uang perak meke 30 wokhesugun o,” iluk yogokhukhasik nen, wogokhukha. 16Oko arat wogokhukhama, at Yudas Iskariot etnogo nen, meranem Yesus iti wogeisausak hano iluk akla munini ebekhe lageikhe.
Yesus agarumi inom, pesta Paskah nasukha wene
(Markus 14:12-21; Lukas 22:7-14, 21-23; Yohanes 13:21-30)
17Yudas itithogon akla ebekhe korlek, it akhuni Yahudi meke eken roti hikherek meke akla usakhidek werago nekarek etnogo meke nuogoluk dirlu alebageik nekarek meke nuogoluk hagakhe dogolik, it Yesus agarumi ane waganhe lagoukha meke emenogo oba wagoukhasik, men yogokhukha,
“Noe, Hat domba pesta Paskah hasik nanok nen, nit nen yi meke ti meke o koma karelogo 'bi lausak warlok apegen,” iluk oba hinok waganhukhama, 18at Yesus nen,
“O kota etnogo lalok nen, ap ageikhe etnaga wene men yogotno.
At ninoe wene yakulnisiliogo meke nen he,
An hagasigin meke arat horok asi agama nen, an nagarumi nane waganiogei meke ninom, at aila etoma pesta Paskah werago nuok nen yogosi lani o, iluk yoknisekhemo yokhesi ago, iluk yogotno,” iluk yogeisasikhemo 19it emenogo, at nen isikhe hagat, lagoukhasik nen, yi meke ti meke pesta Paskah etnogo hasik motok nimik-nomokhogon 'bisukha. 20O arat hi ageikhemo, at Yesus agarumi ane waganhe lagoukha meke aperek inom lagoukhasik nen, inebe 12 emenogo inom hurek latluk 21pesta neke dogolik men yogeisasikhe,
“Hit ap ya meke ageikhe nen, an nebe nasuagaluk yoko ligin o, iluk, eberogonat yokhisigi,” iluk yogeisasikhe. 22Itithogon yogeisasikhemo, it emenogo inakla motok weak ageikhesik men yogokhukha,
“Noe! An a? An dek apigi,” iluk, inebe dopok nen ilik lagoukha. 23Itithogon ilik lagoukhama, at Yesus nen he,
“Hat ageikhe an nipisak niniki opakimo piring akla usageik apusu mago noko mene iti nenat nasuagaluk yoko ligin o. 24An abat itaklasi agagi etnogo, hagasigin meke holal waganek werek tak-tagat hagasigin mekeat he, at ap nebe nasuagaluk yoko ligin meke iti anek he, eiye. Motok weagat asigin o. At ap iti itaklatlep dekma, hanoat dogolep meke,” iluk yogeisasikhemo, 25at Yudas, Yesus wasuagaluk yoko lageikhe etnogo nen he,
“Halok he, noe. An a? An dek apigi,” isikhemo at Yesus nen,
“Hat mekeat ekhe lagan,” iluk yogokhikhe.
Yesus agarumi inom roti men, eken apusu men, ilugun oba nasukha wene
(Markus 14:22-26; Lukas 22:15-20; 1 Korintus 11:23-25)
26At Yesus nen wene itithogon yogokhikhesik, hipiri neke dogolik, roti ikimo waganhikhesik nen, Allah heagei warogo, ebe kusogo it agarumi emenogo supurisekhe dogolik, men yogeisasikhe,
“Yi an nebeat o. Waganiluk nen nani o,” iluk yogeisasikhe. 27-28Yogeisasikhesik yabokane isoak anggur eken apusu henago meke ikimo waganhikhesik nen, Allah heagei warogo it emenogo wogeisekhe dogolik, men yogeisasikhe,
“Yi an namebat o. Allah nen wene warogo wokhinabigin isikhe etnogo, an namep ulabogo nasugun iti baga akhuni doalegat yi weak ti weak hagariogei meke thagalogo degetdisagein iti baga ebeat asigin o. Halok he, hinebe tha'bokhogonat nani o. 29Wene ageikhe yi yokhisak. Anggur eken apusu yi nalok, an yabokane ageikhe nikidek dogoluk nen, hurli nopase nen at apma 'bisagein iti hurli hit ninom apusu ket meke nugun o, iluk, eberogonat yokhisigi,” iluk yogeisasikhe.
30Wene itithogon yogeisasikhesik nen, etai Allah etai ageikhe watluk dukhisukhasik nen, tom Zaitun oba dageisukha.
“Hat nen Yesus nokodek, iluk, la'beligin o,” iluk Petrus yogokhikhe wene
(Markus 14:27-31; Lukas 22:31-34; Yohanes 13:36-38)
31 #
Zakharia 13:7
Tom Zaitun oba dageisukhasik, at Yesus nen,
“At Allah nen,
At ap domba therisik welagarek meke iti ebe an nen wakhunem,
domba opakimo natogorlek welagarek meke iti, lo lugun o,
iluk isikhemo, holal waganogo 'bisukhama werek iti nen, yogotak hibako yi, hit tha'bokhogonat an thogotdaniluk lo lugun o. 32Mekeat he, an nakhunem Allah nen yabokane nilugutnakhunem, an tak o Galilea dageiluk hinolokhoma dogogin o,” iluk yogeisasikhemo, 33at Petrus nen he,
“It tha'bokhogonat thogotdageiluk lo lugun halok he, an anek thogotdageiluk lo dukhigin motok dek o,” iluk yogokhikhemo, 34at Yesus nen he,
“Yogotak hibako thue ayam motok ane igidek werek korlek, hat nen he,
Yesus iti nokodek o, iluk, hiki henagan oba la'beligin etnaga o, iluk eberogonat yokhikhi,” iluk yogokhikhemo, 35at Petrus nen he,
“Dek o. An nipisagat ninasumo ninasusagat o. Meke re, an nen,
Hat nokodek o, iluk, la'beligin dek o,” iluk isinem, it Yesus agarumi ane waganhe lagoukha meke emenogo ebetlake tha'bokhogonat nen, itithogonat ilik lagoukha.
Yesus Getsemani yabumo nen Allah ayoko 'bisikhe wene
(Markus 14:32-42; Lukas 22:39-46)
36Itithogon isukhasik nen, at Yesus ebe men, agarumi ane waganhe lagoukha meke emenogo men, inom Getsemani yabumo lagoukhasik agarumi men yogeisasikhe,
“An horok ya lalok sembayan ekhe korlek, hit yoma hurek dogoni o,” iluk yogeisasikhe. 37Itithogon yogeisasikhesik nen, Petrus men, Zebedeus a'buri inebe pere eranogo men, wogosik lageikhesik nen, akla weak atluk etaiken thebelu'buk ageikhemo men yogeisasikhe,
38“An netaiken motok weak agasik watlagsusagat hakene hagatnabiogo. Halok he, hit ya dogolik, ninomat ninobabut hebelogo therogo dogouok,” iluk yogeisasikhesik nen, 39at asokneat negen horogat lageikhesik elokhe thogoumhogon wi lageikhesik nen, Allah ayoko 'bekhe dogolik, men yogokhikhe,
“Nopase o. An weagatnabugun iti tilnabusak halok he, tilnabin o,” iluk u hak,
“Apusu henago noagaluk woknesugun iti, wokhausak halok he, wokhano. Nen, dek halok he, an nakla apigi meke iti dek o. Hat hakla apegen meke itiat hagatnabino o,” iluk sembayan isikhe. 40Sembayan itithogon arat iluk nen agarumi henagan emenogo inoba wageikhe meke, it noge motok isinem, at Petrus men yogokhikhe,
“Hit he, hibako yi satu jam opaki hasigat an ninom thuam wasusak erlok dek a? 41Weak hagasuagaluk hinakla kagalisinogo iluk, hinobabut hebelogo dogolik, sembayanat ekhe dogoni o. Hinakla nen erlok hagasusak iluk apekhe lagap mekeat, hinebe nen itithogon hagasusak erlok dek o,” iluk yogeisasikhesik nen, 42sembayan alebat isikhe hagat, yabokane dagakhogon lageikhesik nen, men isikhe,
“Nopase. An weagatnabugun yi re, tilnabusak erlok dek halok he, hat hakla apegen iti tak-tagat hagatlasuak o,” iluk sembayan isikhe. 43Sembayan iluk yabokane wageikhe meke re, it agarumi emenogo noge inil ageikhemo nen he, noge isinem 'birisa wageikhesik nen 44sembayan alep iki pere baga isikhesik, yabokane ageikhe inom igiluk lageikhesik nen, alebageik isikhe hagat, isikhe. 45Arat iluk nen agarumi inoba wageikhesik men yogeisasikhe,
“Hit thet walogo noge isi motok dogogun a? Lakhani! Ap ageikhe nen ap weak hagakharek meke nen an abat itaklasi agagi etnogo nasuagaluk inikimo 'banigin iti o arat asi aga. 46Halok he, nit luok nen he, hit melatni o. Lakhani! Ap an nasuagaluk yoko laga meke etnogo arat horogat waga ithi o,” iluk yogeisasikhe.
Yesus ebe hakhasukha wene
(Markus 14:43-50; Lukas 22:47-53; Yohanes 18:3-12)
47Yesus nen,
“Horogat waga ithi,” iluk ekhe korlek, eranogoat, at Yudas, ebe Yesus agarumi inebe 12 emenogo meke yoko lageikhemo, it ap Allah iteerek meke inougi koktek emenogo inom, it ap inarluetek emenogo inom nen, it ap inebe doalegat inayoko 'biluk la'isa agoukhama, karok men, payuk men, wolok inebe motok doaldiluk inom wagoukha. 48At Yudas nen Yesus wasuagaluk yoko lageikhe meke etnogo nen, wene men warisasikhesik nen wagoukha,
“Ebe hutdubageik nen he, an tak lalok heagei nape tharluk wakhi halok he, hit nen,
I, ebe itiat higi, iluk, hakha lano,” iluk wene arat warisasikhesikmo nogo nen, iniluat werekma 49at tak Yesus oba wageikhesik nen,
“Noe o,” iluk, ape tharluk heagei wakhunem, 50at Yesus nen,
“Nagot yi! Hat nenaluk wagan,” iluk yogokhikhemo, it ap emenogo Yesus oba wagoukhasik nen, ebe motok hakhasukha. 51Hakhasinem ap ageikhe Yesus inom welagoukha meke etnogo nen karok aika akla uakma nen kigikhogon, ap Allah iteerek inoe kok atuaneke ageikhe asuk motok 'bogokhogon la'isikhe. 52Itithogon la'isikhemo, at Yesus nen,
“Hakarok iti huakma obolukmo ukhasin o. It ap karok oba inakharek oko karok obaat inakharek anek iti o. 53Yogotak an nebe nirlirli woknabuagaluk, nopase kino yogosumo, at nen it malaikat Allah nen pogot oba yoko usa'isa agarek meke emenogo inebe agot dopok 12 oba doaldiluk pererlagat mekeat he, agot dopok motok doaldiluk inayoko 'bumo, tilnabi wisusak erlok dek apegen a? 54Tilnabi wisusak erlok mekeat he, tilnabilepma Allah nen,
Itithogon hagatlasigin, iluk isikhemo holal waganek werek etnogo re, nikithogon tak-tagat atlep apegen. Dek o. Tak-tagat asuagaluk itithogon yogokhidek thogotdigi iti,” iluk yogokhikhesik, 55it ap doalegat wagoukha emenogo men yogeisasikhe,
“Ap iki abusak waganhunem hageinakharek iti hak, hit nen itithogonat an haknabuogoluk, karok men, payuk men, motok wolok wagap yi re! An hibiku-yogoku Allah ai halekma hurek dogolik wene yakulisugunem, hit nen yigithogon haknakhidek welagasibat he, 56it ap Allah ane yogeisekhe lagoukha meke nen holal waganhukha etnogo tak-tagat asuagaluk hagatnakhep o,” iluk yogeisasikhemo, it ap at ane waganhe lagoukha meke emenogo, at ebe thogotdiluk lo motok lagoukha.
Yesus wasuogoluk ukum oba 'bisukha wene
(Markus 14:53-65; Lukas 22:54-55, 63-71; Yohanes 18:13-14, 19-24)
57Lo itithogon lagoukhama nen, at Yesus ebe hakhasukhasik, ap Allah iteerek meke inoe kok etaga Kayafas oba wolok lagoukha. Lagoukhama, etoma it ap Allah ane holal waganek iteerek meke inom, it ap inarluetek inom, natogorlek werekma lagoukha. 58Yesus itithogon wolok laga korlek, at Petrus etnogo yabokane inoporlik huyo'bo laga lageikhesik nen, ap kok Kayafas etnogo agokutlu ukisikhesik,
“Yesus nikithogon hagasugun,” iluk ileken hisagaluk, at ap kok etnogo agarumi Allah ai halek therogo welageikharek meke inom thabakhogon hurek lageikhe.
59Hurek werek korlek, it ap Allah iteerek inougi koktek men, wene Allah hasik erlo pilinekharek meke tha'bokhogonat men, at Yesus wasuogoluk, men isukha,
“Akhuni at weak hagakhunem inileken hega meke uak nen herageinabini,” iluk inekalat wene oba 'buagaluk herageinakhukha meke re, 60inebe doalegat inekalat nen wene oba 'buogoluk wagoukha mekeat he, dek ageikhemo, yabokane ap inebe pere meke wagoukhasik nen,
61“At yi nenat,
Allah ai iti misalogo la'iluk nen, obolukmo, yabokane niki pere baga halhe dogoluk nen niki ageikhe baga yi arat ilugun haligin o, iluk isikhe meke,” isukhama, 62at ap Allah iteerek meke inoe kok etnogo melageikhesik nen,
“It ap yoma wene doalegat hoba 'biliogei yoma, hat nen oko ageikhe yogeisagein dek a? Oko yogeisaumo re,” iluk yogokhikhe mekeat he, 63at Yesus ane igidek thogotdisikhemo, at ap kok Allah iteerek meke etnogo nen he,
“Allah a'but Kristus la'isigin isukha etnogo, ebe hat halok he, yoknisanok iluk, at Allah iluk motok welagarek meke etaga hupuk palogo yokhikhi o,” iluk yogokhikhemo, 64at Yesus nen,
“Hat nen egen itiat o. Meke re, an ageikhe yokhisak. Hurli yogotak nen, an abat itaklasi agagi etnogo, at Allah obatne horleak yi meke ti meke hagasusak anek etnogo nipisak alilu iki ebeke kogat hurek dogoluk nen, yabokane pogot oba etoma nen oisa aklake usa'agunem hinileken neagun o, iluk yokhisigi,” iluk yogokhikhemo, 65it ap Allah iteerek inoe kok etnogo asu li'bilogo la'ekhe dogolik, men yogeisasikhe,
“Allah akla meanetdiluk etaga weagatdekhe iti hegep a? Akhuni nen at weak hagakhunem inileken hega meke wene pakhogon uagaluk nenaluk therisik dogogun. At nen Allah akla meanetdiluk etaga weagatdekhe iti arat hinasuk holhep. 66Halok he, hit nikithogon apekhe lagap,” iluk yogeisasikhemo, it nen he,
“Weak ekhesikmo ebe motogat wasusak o,” iluk yogokhukha. 67Itithogon yogokhukhasik nen, wosi oba suphogon 'bigik, tugi wakhik, iniki agot tugi tamuk-hamukhogon wakhik, hagakhe dogolik,
68“Kristus! Tha nen hakhe nogo. Yoknisan ta,” iluk yogokhe lagoukha.
Petrus nen, “Yesus nokodek o,” iluk la'belhikhe wene
(Markus 14:66-72; Lukas 22:56-62; Yohanes 18:15-18, 25-27)
69Itithogon yogokhe korlek, at Petrus etnogo okutlu holkerlekma hurek werekma, horlak inatuaneke meke ageikhe oba wageikhesik, men yogokhikhe,
“Hat meneke, Yesus Galilea meke iti hinom nekhe lagap meke apigi,” iluk yogokhikhemo nen, 70at Petrus nen akhuni doalegat emenogo inil obaat, men yogokhikhe,
“Hat egen iti an nokodek o,” iluk nen, 71holagape palek dukhegarekma eranogo dukhisigiluk hagakhunem, at horlak atuaneke meke ageikhe ninat meke nen ileken lakhalok, akhuni doalegat emenogo men yogeisasikhe,
“Ap yi Yesus Nazaret meke etnogo inom nekhe lageikha mekeat o,” iluk yogeisasikhemo, 72at Petrus nen alep isikhe hagat, yabokane Allah etaga hupuk palhe dogolik,
“Ap iti an nokodek o,” iluk yogeisasikhesik, 73eranogoat werekma, it ap doalegat emenogo Petrus oba wagoukhasik nen, men yogokhukha,
“Hane ekagat hutdagakhe lago. Hat hebe eberogonat it mekeat o,” iluk yogokhukhama 74at Petrus nen he,
“Ap iti ebe an nokodek o. Nopase Allah oak! Nekalat igi halok, at nen nasuak o,” iluk, hupuk palhe korlek eranogoat thue ayam ane arat isikhe. 75Thue ayam ane arat isikhemo, at Petrus nen,
“I. Yesus nen yoknekhe dogolik,
Thue ayam ane igidek werek korlek, hat nen,
Yesus nokodek o, iluk hiki henagan oba la'beligin, iluk yoknekhe etnogo ebe arat la'belhi yi higi,” iluk, akla ebetdiluk dukhisikhesik nen, etaiken hisogo de ageikhe.
Nu markerat:
Matius 26: LAIDNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in