Mathiu 6
6
1Botnɛ nu kȧmȧ nǝ te yɔ mȧlompi ma nu rodi ka aŋfǝm kȧmȧ aŋ nənk nu. Bepi pǝ yi yaŋ-e, nǝ sɔthɔ hɛ ȧrȧm kǝwur ka ɔKas ka nu ɔwe yi ro riyana.
2Tiyȧŋ ma mǝ nǝ sɔŋ ɛboya-e, te nu fɛŋ kǝthɛma rodi ka nu mɔ mǝ ȧŋmunafȧki mǝ aŋ yɔ ka ɛseth ɛgbanɛ yi ka asoŋ-e, kȧmȧ aŋ sɔthɔ ayiki ka aŋfǝm. Tǝ tɛntɛnɛ i kanɛ nu, aŋ po sɔthɔ ȧŋrȧm ŋaŋ. 3Kɛrɛ ma mǝ mǝ sɔŋ ɛboya-e, te selɔ kȧta ka mu kǝmɛrɔ kǝ tȧrȧ ȧte kȧta ka mu kǝdiyɔ kǝ yɔ; 4kȧmȧ ɛboya ɛ nu ɛ yi rǝ agbundu, ɔwa ɔKas ka nu ɔwe nənk rǝ agbundu ɔ tǝ ram nu gbafǝth.
5Ɔwa ma nǝ ramnɛ-e, te nu yi mɔ ȧŋmunafȧki, kotȧy-e aŋ bɔther kǝtǝma ka ɛseth ɛgbanɛ yi ka asoŋ tǝsakanɛ kȧmȧ aŋfǝm aŋ nənk ŋa. Tɛntɛnɛ i kanɛ nu, aŋ po sɔthɔ ȧŋrȧm ŋaŋ. 6Kɛrɛ munɔŋ, bepi mǝ ramnɛ-e, wɔŋ ka ȧŋkonko a mu, ɔwa ma mǝ po kantha kadare ka mu-e, ramnɛ ka ɔKas ka mu ɔwe yi rǝ ɔmaŋknɛ, ɔwa ɔKas ka mu ɔwe nənk rǝ ɔmaŋknɛ ɔ tǝ ram mu gbafǝth. 7Kɛrɛ ma nǝ ramnɛ-e, te nu fɔf sim tǝgbathi tǝyai, mɔ mǝ tȧbona tǝlɔm mǝ tǝ yɔ; kotȧy-e aŋ nanɛ kǝpa a tǝ tǝla ŋa ta tafɔf taŋ tǝgbathi. 8Tiyȧŋ te nu yi mɔ ŋaŋ, ȧtesoma-e ɔKas ka nu ɔ tȧrȧ ɛyɛt ɛyɛ nǝ yema yeŋka nǝ yif kɔ. 9Tiyȧŋ ramnɛ nu yaŋ; ƆKas kȧsu ɔwe yi ro riyana, kanka ȧŋes a mu aŋ yi ȧsǝm. 10Kaŋkɔ rȧbȧy ra mu rǝ bek. Kaŋkɔ mȧselɔ ma mu mǝ yɔnɛ nɔru mɔ mǝ mǝ yɔnɛ ro riyana. 11Yer su thonɔŋ ɛyɛt ɛdi ɛbeki su. 12Tera su mȧtȧy ma su mǝlǝs, mɔ saŋ mǝ sǝ tera ŋaŋ aŋa yɔ su ɔlǝs. 13Te su wɔŋȧ rǝ tȧy tǝgbɔns kɛrɛ wurɔ su ka mətȧy mǝlǝs; ȧtesoma-e munɔ ba rȧbȧy yi aŋfɔsɔ yi aŋyiki thȧnkȧŋ thǝbana, Amina. 14kotȧy-e, bepi nǝ tera afǝm mȧtȧy maŋ mǝlǝs-e, ɔKas ka nu ro riyana ɔ tǝ tera nu sɔ, 15kɛrɛ bepi nǝ tera hɛ afǝm mȧtȧy maŋ mǝlǝs-e, ɔKas ka nu ɔ ba hɛ kǝtera nu mȧtȧy ma nu mǝlǝs.
16Ɔwa ma pǝ thas ri-e, bepi nǝ wop asum-e, te nu suma mɔ aŋyɔr; kotȧy-e aŋ lǝsǝr aser taŋ kȧmȧ aŋfǝm aŋ nənk kǝpa aŋ wop asum. Tǝ tɛntɛnɛ i kanɛ nu kǝpa aŋ po sɔthɔ ȧŋrȧm ŋaŋ. 17Kɛrɛ munɔŋ, bepi mǝ wop asum, sop rȧbomp ra mu yi mȧro, ɔwa yak ȧder a mu, 18kȧmȧ afǝm aŋ te nənk kǝpa mǝ wop asum-e, kɛrɛ ɔKas ka mu ɔwe yi rǝ ɔmaŋknɛ. Ɔwa ɔKas ka mu ɔwe nənk rǝ agbundu ɔ tǝ ram mu.
19Te nu thoŋklanɛ tɛŋ ka ȧdȧru ro amɔrka yi magbak mȧ mǝ sɔm ti, dɛ yi akey mǝ aŋ bɛs tǝ kǝkeya. 20Thoŋklanɛ nu gbo tɛŋ ro riyana, ro amɔrka yi mǝgbak mǝ gbǝli hɛ sɔm ti, ɔwa ro akey aŋ te bɛs, aŋ keya. 21Ȧtesoma-e ro atɛŋ ta nu tǝ yi-e, rǝ ɛmerȧ ɛ nu ɛ tǝ yi sɔ. 22ȧŋmothȧ ŋa aŋdɛr aŋ yi rafɔr. Tiyȧŋ bepi rafɔr ra mu rǝ yi rǝtempi-e, rǝ tǝ mothǝr aŋdɛr a mu bɛ. 23Kɛrɛ bepi rafɔr ra mu rǝ yi rǝlǝs-e, aŋdɛr a mu bɛ aŋ tǝ la asum. Tiyȧŋ bepi ȧŋmothȧ aŋa yi mu aŋ yi asum-e, ȧŋsum ŋati a bana!
24Wuni o wuni ɔ gbǝli hɛ bȧtho amarki ŋarǝŋ, kotȧy-e ɔ tǝ gbɛŋa ɔkin ɔwa ɔ tǝ bɔthǝr ɔlɔm; thalɔm ɔ tǝ gbapsa ɔkin, ɔwa ɔ tǝ sai ɔlɔm. Nǝ gbǝli hɛ bȧtho Kuru dɛ yi mǝbɔŋɔ. 25Tiyȧŋ i kanɛ nu, te nu ba asoli ta ɛŋesǝm ɛ nu, ta ara mǝ nǝ di-e, thalɔm ta ara mǝ nǝ mun-e, ta a pa ras ta aŋdɛr a nu ta ara mǝ nǝ wɔŋ. Aŋesǝm aŋ thas hɛ yɛt ɛdi-i, ɔwa aŋdɛr aŋ thas hɛ ɛloprȧ-i? 26Kǝli ɛbȧmp rokɔm-a, aŋ sak hɛ, aŋ rɔk hɛ, aŋ thonkla hɛ rǝ tǝfunk: kɛrɛ ɔKas ka nu ro riyana ɔ wɔnthǝr ŋa. Naŋ-e, nǝ thas hɛ ŋa mȧrǝŋ mȧrǝŋ-i? 27Wuni reke kǝtɔŋ kȧnu mǝ gbǝli bȧr alonk ŋin ka kasaŋa kɔŋ, hali ɔ ba ti afela-e? 28Ɔwa kɔyɛŋ nǝ ba asoli ta yɛt ɛloprȧ-e? Tȧmtȧmnɛ tȧyaba ta ro lal ma mǝ tǝ lɔkɔ; tǝ yɔ hɛ mǝpanth, tǝ sǝrǝm hɛ, 29kɛrɛ i kanɛ nu-e, hali Sɔlɔmɔn ka aŋyiki ŋɔŋ bɛ ɔ lopra hɛ mɔ malɛŋi mati ame. 30Ɔwa bepi Kuruȧŋ ɔ lonsǝr akereŋ ka ro lal yaŋ-e, ȧke yi thonɔŋ, ɔwa ninaŋ a fitha ki rǝ nȧnt nǝbana; thamsinɛ naŋ-e, nia afǝm ŋa kǝlanɛ kǝthan.
31Tiyȧŋ te nu soli kǝpa, Ko mǝ sǝ di-e, thalɔm ko mǝ sǝ mun-e, ta a pa ras ko mǝ sǝ wɔŋ-e? 32kotȧy-e ɛyɛt ɛye bɛ-e, yɛ tȧbona tǝlɔm mǝ tǝ thɛns, kɛrɛ ɔKas ka nu ro riyana ɔ tȧrȧ kǝpa nǝ yema ɛyɛt ɛye bɛ. 33Kɛrɛ mɔtha nu thɛns rȧbȧy ra Kuru, dɛ yi mȧlompi mɔŋ, ɔwa ɔ tǝ bȧrȧ nu ɛyɛt ɛye bɛ. 34Tiyȧŋ te nu ba asoli ta ninaŋ, ȧtesoma-e rasɔk ra ninaŋ rǝ tǝ ba aŋsoli ŋati. Mȧlǝs ma ȧŋrey mǝ beki ta ȧŋrey ŋati.
Nu markerat:
Mathiu 6: TMNNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Themne New Testament © The Bible Society of Sierra Leone, 2009.