मत्ती 14
14
युहन्ना डुबकी दैणैं आल़े हत्या
(मरकुस 6:14-29; लुका 9:7-9)
1तिन्नां धैल़ै शूणीं चौथाई देशै राज़ करनै आल़ै हेरोदेस राज़ै ईशूए बारै गल्ला। तेऊ बोलअ आपणैं टैहलू लै इहअ कि 2अह आसा युहन्ना डुबकी दैणैं आल़अ और सह हुअ मरी करै ज़िऊंदअ, तैहीता एऊ का एतरै च़मत्कारे काम हआ प्रगट।
3किल्हैकि हेरोदेस राज़ै पाअ त युहन्ना आपणैं भाई फिलिप्पुसे लाल़ी हेरोदियासा पिछ़ू कैद खानै दी। 4इहअ किअ तेऊ तै कि युहन्ना बोलअ त राज़ै लै इहअ कि आपणैं भाईए बेटल़ी डाही करै किअ तंऐं परमेशरे आछी दी ज़ुल्म। 5हेरोदेस राज़अ ता च़ाहा त युहन्ना मारनअ पर सह डरा त लोगा का तै कि लोग मना तै युहन्ना परमेशरो गूर।
6पर ज़ांऊं हेरोदेस राज़ैओ ज़ल्म धैल़अ आअ, ता हेरोदियासे शोहरी किअ राज़ तेऊ थैरा दी आपणअ नाच़ रहैऊई करै खुश; 7और राज़ै दैनी तेसा लै ज़बान कि ज़ुंण किछ़ बी तूह मांगे, मुंह दैणअ सह ताल्है।
8सह शोहरी ती तेसरी आम्मां डाही दी शकाऊई और तेसा बोलअ राज़ै लै इहअ की मुल्है आण युहन्ना डुबकी दैणैं आल़ैओ मूंड एभी काटी करै। 9राज़अ हेरोदेस पछ़ताअ हेरोदियासे शोहरी लै बैण दैई करै किल्हैकि तिधी बेठै दै सोभी पाहुंणैं बी शूणीं तेऊए तिंयां गल्ला और तेखअ पल़अ तेऊ तिहअ करनअ ज़िहअ तेऊ बोलअ त।
तेखअ दैनअ तेऊ आपणैं टैहलू लै हुकम कि ज़िहअ अह शोहरी बोला तिहअ ई करा। 10ता कैद खानै लै दैनअ आपणैं सपाही लै हुकम कि डेओआ, तेऊओ मूंड आणा काटी करै एभी। 11सपाही आणअ थाल़ा भितरी तेऊओ मूंड संघा दैनअ तेसा शोहरीए हाथै और तेसा निंयं सह आपणीं आम्मां सेटा लै। 12तेखअ निंईं युहन्ने च़ेल्लै तिधा का तेऊए ल्हास संघा डाही तिन्नैं सह घोरी दाबी और तिन्नैं दैनअ इना हुई दी गल्लो समाद ईशू लै बी।
पांज़ा हज़ारा मणछा का रोटी खैऊंणी
(मरकुस 6:30-44; लुका 9:10-17; युहन्ना 6:1-14)
13ज़ांऊं ईशू इहअ शूणअ ता सह नाठअ किश्ती दी बेशी करै एकी कांगनरांगी ज़ैगा लै और इहअ शूणीं करै आऐ नगरी का बडै भारी खास्सै लोग ज़ांघा हांढी तेऊ पिछ़ू तेऊ सेटा लै। 14ईशू भाल़ै कि तिधी आऐ बडै भारी खास्सै लोग और तेऊ फिरी तिन्नां भाल़ी झींण और तेऊ किऐ तिन्नें बमार मणछ हर बमारी का दूर।
15ज़ांऊं सान्ह पल़ी ता तेऊए च़ेल्लै आऐ तेऊ सेटा लै और तिंयां लागै इहअ बोलदै, “अह आसा बडी कराहणीं ज़ैगा और सान्ह बी च़ाल्ली पल़ी, इना लोगा लै बोल ऐबै डेऊणा लै ताकि ईंयां किधी गराऊंऐं आप्पू लै रोटीओ इंतज़ाम करी सके।”
16ईशू बोलअ तिन्नां लै, “इनो डेऊणअ निं ज़रूरी आथी, तम्हैं ई दैआ इना लै रोटी खाणां लै।”
17तिन्नैं च़ेल्लै बोलअ ईशू लै, “हाम्हां सेटा निं इधी पांज़ रोटी और माह्छ़ली छ़ाडी होर किछ़ै आथी।”
18ईशू बोलअ तिन्नां लै, “तिन्नां आणा मुंह सेटा लै।” 19संघा बोलअ तेऊ तिन्नां लै इहअ, “सोभी लोगा बशैल़ा घेहल़ी दी धरनीं घाहा प्रैंदै।” तेखअ ढाकी पांज़ रोटी और दूई माह्छ़ली हाथै, संघा स्वर्गा बाखा भाल़ी करै परमेशरो शूकर किअ और रोटी और माह्छ़ली दैनी चोल़ी-चोल़ी करै च़ेल्लै हाथै। ता तिंयां लागै घेहल़ी लोगा लै बांडदै।
20तिंयां सोभ लोग रज़ै खाई करै और बारा च़ठै भर्हुऐ तिन्नां रोटीए ज़ुंण पिछ़ू बच़ी। 21ता खाणैं आल़ै तै बेटल़ी और माठै छ़ाडी करै कोई पांज़ हज़ार मर्ध ई मर्ध।
ईशूओ पाणीं प्रैंदै हांढणअ
(मरकुस 6:45-52; युहन्ना 6:15-21)
22तेखअ बशैल़ै तेभी ईशू आपणैं च़ेल्लै किश्ती दी ज़ोरा-ज़ोरी कि तम्हैं डेओआ पैहलै समुंदरा पार ज़ेभै तैणीं हुंह इना लोगा छ़ाडी निं लऊं। 23ईशू छ़ाडै तिंयां सोभ लोग घरा लै और आप्पू नाठअ सान्हां एक्कै ज़ण्हअ धारठी प्रैंदा लै प्राथणां करदअ।
24समुंदरै आअ ढिश बागर ता किश्ती लागी समुंदरा मांझ़ै बागरी करै ओरी-पोरी ढुल़दी। 25ईशू आअ राचकै च़ौथै पहरै समुंदरे पाणीं प्रैंदै हांढी तिन्नां सेटा लै। 26च़ेल्लै तेऊ समुंदरा दी हांढदै भाल़ी करै डरै। तिंयां लागै बोलदै कि अह आसा भूत। ता तिन्नैं पाई डरै मारै लैल़ा-पकारा।
27ईशू की तेभी तिन्नां संघै गल्ला, “हैल़अ निं करा हुंह आसा, डरा निं आथी।”
28तेखअ बोलअ पतरसै ईशू लै, “प्रभू, ज़ै तूह ई आसा, तै दै मुल्है पाणीं प्रैंदै हांढी करै एछणें ज़ाज़त।”
29ईशू बोलअ, “एछ”
पतरस किश्ती का होथी करै लागअ ईशू सेटा लै पाणीं प्रैंदै हांढदअ। 30पर पतरस डरअ ढिश बागरी करै, और ज़ांऊं सह पाणीं दी डुबदअ लागअ ता तेऊ पाई लैल़ा “हे प्रभू, मुंह बच़ाऊ हुंह च़ाल्लअ डुबी मुंह बच़ाऊ।”
31ईशू ढाकअ तेभी तेऊओ हाथ और तेऊ लै बोलअ, “हे बैहम करनै आल़ै मणछा, तंऐं बैहम किल्है किअ?”
32ज़ांऊं तिंयां किश्ती दी उखल़ै ता ढिश बागर मुक्की तेभी। 33एसा गल्ला भाल़ी ज़ुंण किश्ती दी तै बेठै दै, तिन्नैं टेक्कअ ईशू सेटा माथअ और बोलअ, “तूह आसा सच्च़ी परमेशरो शोहरू।”
गन्नेसरत समुंदरे बाढै बमार ठीक करनै
(मरकुस 6:53-56)
34तिंयां सोभ पुजै गलील समुंदरा पार डेऊई करै गन्नेसरत समुंदरे बाढै। 35ता तिधे लोगै हेरअ ईशू तेभी बछ़ैणीं, संघा दैनअ तिन्नैं लोगै ओरी-पोरीए नगरी-गराऊंआं दी डेऊई करै होरी सोभी लै समाद, संघा आणै तिन्नैं सोभ बमार मणछ ईशू सेटा लै।
36तेखअ लागै तिंयां ईशू का एही अरज़ करदै “तूह दै हाम्हां च़ाऐ झिकल़ैओ पाल्लअ ई छुंहणैं ताकि हाम्हैं इना बमारी का बच़े।” ज़ेतरै लोगै बी ईशू छ़ुंअ, तिंयां सोभ छ़ुटै हर बमारी का।
Nu markerat:
मत्ती 14: OSJNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
This work is licensed under Creative Commons Attribution-ShareAlike 4.0 License.
