Santia 3
3
Najmi xi mare̱ tsiꞌin najínña
1Tsꞌeña ku ndichjaña xi sꞌejínña Kristo̱, majin nga ngiejeña nga xu̱ta̱ chji̱ne kꞌuyáña, nga̱tꞌa Namiña Diuu̱ ꞌñu tsijére xi tsé mare̱, tukꞌuajíre xu̱ta̱ xi chubátse kju̱a̱kitakun tjínre. 2Ngiejeña nga mare̱ stengi̱ña. ꞌYá tsáni xi ꞌmíre xu̱ta̱ kju̱a̱kitakun, kui xi mare̱ kjiénꞌa najín ku mare̱ kjiénꞌa yajo̱ꞌe.
3Máña nitꞌe ndeje, ku tsiꞌin najmi xi mejénña tsa kicha̱ xi kjiénꞌa faꞌáña tsꞌua. 4Tekuácha ma tsa ngu tsutsu je. Ndatsa ꞌñu jéma ku ꞌñu tjo xi titsingitjí, xu̱ta̱ xi tjítsikangá ngútse tjiuꞌbi chu̱ba̱ tjínre jmá tikjiénꞌa ku tu jma nga mejénre tsikjae. 5Tekuácha ma nga̱tꞌaꞌe najínña. Ngu yajo chubachi xi kjiya ngaya tsꞌuáña, ta̱nga ꞌñu tsé najmi xi mare̱ ñaꞌan. Ngu ndiꞌi chuba̱chi xi mare̱ ꞌbetí ngu ngijñacha teya.
6Én xi nukju̱a̱ña nga nichjénña najínña xukútsa ngu ndiꞌi. Tuxi tsé ngaꞌñu tjínre najínña nga chja̱ ngu én xi ndáji tjin. Máre̱ basen xabáña ngieje ni̱tjin xi tjímaña, ku mare̱ tsa kui nga̱tꞌaꞌe tíña ngakꞌie̱n#3.6 Ngakꞌien ꞌmí ngande jmá nga tí xu̱ta̱ xi jee tjínre..
7Máña nitꞌe ngieje tku̱ya chu xi xaba, máña nitꞌe ni̱se, máña nitꞌe ye̱ kju̱ chu xi tjin ndachakun, 8ta̱nga kje majínña nitꞌe najínña ku te̱ kje majínña nga nukju̱a̱jí én xi tsiꞌonre xu̱ta̱, xukútsa chu xi tꞌejí najínña, najmi xi mare̱ tsitꞌe ku xán xi tsikiénña tjínre.
9-10Najínña nichjénña nga nichakunnéña xu̱ta̱ ku tuku kui nichjénña nga nukju̱a̱taꞌínña. Kui nichjénña nga nitsjuaju̱ña Namiña Diuu̱ xi Nami maña, ku tuku kui nichjénña nga chꞌo ꞌmíña xingiña xi ndsijin asenꞌen Namiña Diuu̱ kichꞌáña, nga̱tꞌa kui xi kuacha kitsindáña. Tsꞌeña ndichjaña, tsubajíre̱ nga kuacha ñaꞌánña.
11Nga ngu ndachꞌin sakujíña ndijua ndá, ndijua tsja ku ndijua ndia̱. 12Tekuácha bajajíre̱ ingo̱ ngu ya aseituna̱, ku tekuácha tsjuájí tu̱ tseje ya ingo̱.
Kju̱a̱kitakun xi tsjuá Namiña Diuu̱
13Tsa tjin xu̱ta̱ xi jña tjímajnu ku ꞌñu makjínre ku tsé kju̱a̱kitakun tjínre, ngataku yajo̱ꞌe ku nima̱kju̱a̱ ngatjabixi. 14Ta̱nga tsa jún tu̱ kju̱a̱chjitakún kutu̱ kju̱a̱chinítse tjinjnu nga ñaꞌánjnu ngu najmi, ngi kꞌu̱e̱májnu, tsjuají kꞌu̱e̱májnu; ngují najmi kꞌuéjnu xi kꞌajin tsikꞌemájnu ku tutjsai nga kju̱a̱ndesu kꞌuenduꞌájnu tsꞌuajun. 15Nga̱tꞌa kui kju̱a̱kitakun tseꞌejí Namiña Diuu̱ jindibá, kju̱a̱kitakun nga̱sunde kikju̱a̱ ku tse̱ꞌe̱ xindajin chja̱, 16ku mare̱ ꞌbatsjé kju̱a̱chini, mare̱ ꞌbatsjé kju̱a̱si, mare̱ ꞌbatsjé kju̱a̱ti, kju̱ ngieje tku̱ya kju̱a̱xaba.
17Ta̱nga xi tjínre kju̱a̱kitakunꞌen Namiña Diuu̱, kju̱a̱xabají inchatsiꞌin; tusáni, inchamangitsjai nga chꞌan kuijñájña, tꞌeꞌén ku tsitjó xikjin, on kutꞌa xu̱ta̱ xi tsé kju̱a̱nima̱ tjíma, ku tutjsái nga najmi xi ndá inchatsiꞌin; ngieje nga ngusún baseñajúnre ku kju̱a̱xikjain nga ndiyáꞌe Namiña Diuu̱ tjima.
18Xi mangitsjai nga ꞌbeña kju̱a̱chꞌan nga tjimáña xi xu̱ta̱ kiꞌmíña, tsjuáre kju̱a̱chꞌan Namiña Diuu̱ ku tsjuáre kju̱a̱ndá.
Nu markerat:
Santia 3: MZI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
México © Sociedad Bíblica de México, A.C. AÑO