Embandizo 2
2
1Nikwo eiguru n'ensi byahoire bityo n'ebikabilimu byona enkuyanja. 2Aha kiro kya mushanju Ruhanga akaba yamazire omulimogwe gwona ogw'okutonda; aho ahumura. 3Ekiro ekyo kya mushanju akiha omugisha, akikuza. Aha rw'okuba nikyo yahumuliireho orwo yamazire omulimogwe gwona ogw'okutonda. 4Egyo niyo baruro y'okutondwa kw'eiguru n'ensi.
Ebaruro ya kabili y'okutonda
Orwo Omukama Ruhanga yatonzire eiguru n'ensi, 5ensi ekaba etainamu bimera. Kandi taliho mbibo zabaire zigimeziremu, aha rw'okuba akaba atakagwisize njura, n'ensi ekaba etakaboine wa kugilima. 6Kyonkai amaizi garuga okuzimu ensi eitikilira.
7Ahanyuma Omukama Ruhanga akwata eitaka alibumbamu omuntu, amuhuha omwoyo gw'oburora omu nyindo, nikwo omuntu kurora. 8Aho Omukama Ruhanga alima ebusitani ya Edeni, mukono gw'oburugaizoba; agitamu omuntu owo yabumbire. 9Ebusitani egyo Omukama Ruhanga agimeza emiti mirungi eya buli ngeli ey'ebiraba by'okulya. Kandi omugati y'ebusitani amezamu omuti gw'oburora, ogw'okumanyisa ebirungi n'ebibi.
10Omuli Edeni hakaba nihatabukwamu omugera, nigwo gwaitiliraga ebusitani. Kagwamaraga kuturuka Edeni gubeganukamu emiga enai. 11Eibara ly'ogwa mbere ni Pishoni; nigwo gugera niguzingora Havila yona, ensi y'ezahabu, 12mara ezahabu y'ensi egyo eba nungi. Ensi egyo ya Havila egira bedola#2:12 Bedola Bedola enshonga telikumanyika, shana nigo mabare g'eiguzi. n'amabare g'eiguzi. 13Eibara ly'omwiga gwa kabili ni Gihoni. Nigwo gugera niguzingora ensi yona ya Kushi. 14Eibara ly'omwiga gwa kashatu ni Tigirisi. Nigwo gugelera oburugaizoba bwa Asiria. Omwiga ogwa kanai ni Efurati.
15Omukama Ruhanga akwata omushaija amuta omu busitani ya Edeni, kugilima n'okugimanya. 16Amuhangira nagamba ati, “Buli muti omu busitani wakugulyaho okwo olikwenda; 17kyonkai aha muti gw'okumanyisa ebirungi n'ebibi, otaligulyaho. Aha rw'okuba kiro ky'oligulyaho, olifa.”
18Ahanyuma ashuba agamba ati, “Ti kurungi muntu kuba wenkai. Ndamuteraho omujuni alikumushusha.” 19Aho akwata eitaka abumba buli nyamaishwa na buli kinyonyi, abiletera omushaija kubona arabyeta atai. Buli okwo omushaija yarukire ekitondwa ekilikurora nilyo lyabaire ibara lyakyo. 20Aruka ebitunganwa byona amabara, n'ebinyonyi, n'enyamaishwa zona; kyonkai omuli ebyo byona tiyaboinemu mujuni alikumushusha. 21Aho Omukama Ruhanga anagiza omushaija ogwo oturo tungi. Kayabaire anagire amwihyamu orubanda rumoi, azibikamu enyama omu mwanya gwarwo. 22Orubanda orwo Omukama Ruhanga yaihire omu mushaija arukoramu omukazi, amumuletera. 23Aho omushaija agamba ati, “Mbwenu aha eli igufa elyaruga omu magufa gange, mara mubili ogwaruga aha mubili gwange. Arayetwaga mukazi aha rw'okuba yaruga aha mushaija.” 24Aha rw'ekyo omushaija arasigahoga ishe na nyina ajwangane na mukaziwe, nabo babe mubili gumoi. 25Omushaija na mukaziwe bombili bakaba bali bushai, kyonkai tibakwetwe nshoni.
Nu markerat:
Embandizo 2: RHAY01
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Ruhaya DC Bible © Bible Society of Tanzania, 2001.