MI ÑAMA 10
10
1Li Miali Diedo den yedi Musa: «Gedi *Falono kani kelima n den teni ke o pali juagi ke o naacenba moko yaa pala juagi, ke n baa teni n sinankeeninba n doagidi bi siiga. 2Li go tie ke a baa togidi a bijua leni a yaabili po min den tieni Ejipiti yaaba leni min den teni ke n sinankeeninba doagidi bi siiga maama. Yeni, yi baa bandi ke n tie Li Miali Diedo.» 3Musa leni Alono den gedi Falono kani ki yedi o: «Li Miali Diedo, Ebilu yaaba Tienu yedi: A baa yiedi ke a kan miini a yuli n nintuali ki pundi u laa yogune? Cedi n niba n gedi ki kpiagi nni. 4A yaa yie ki naa tuo ke n niba n gedi, diidi n baa teni a dondoba n cua saala ki yadi a diema fanma nni kuli. 5Bi baa piini u tingbanu kuli hali ke o nilo kan go le tinga. Bi baa ŋmani yaala n sieni kuli, a tatana n den ŋa yipo yaala. Bi baa ŋmani yaa tiidi n pudi yi kuani nni kuli. 6Bi baa gbieni a diena ki go gbieni a naacenba yaa diena leni Ejipiti yaaba kuli diena. A baanba leni a baanba yaa baanba naa den kpa laa li buolu.» Musa den ñani Falono nintuali ki ban caa.
7Falono naacenba den yedi o: «O naa ja baa tie tipo nani ku diagu ki pundi hali u laa yogunu yo? Cedi laa niba n gedi ki kpiagi Li Miali Diedo, bi Tienu. Ŋaa nua ke Ejipiti diema baa bodi?»
8Bi den teni ke Musa leni Alono guani Falono kani. O den yedi ba: «Gedi mani ki kpiagi Li Miali Diedo yi Tienu. Ŋmenba n tie yaaba n baa gedi?» 9Musa den goa ki yedi: «Ti baa gedi leni ti bila, leni ti nikpela, leni ti bijaba, leni ti bisiaba. Ti go baa taa ti pe leni ti ne kelima li tie tipo mi *jaanma yaama n baa kpiagi Li Miali Diedo.» 10Falono den yedi: «Li Miali Diedo n yaa ye leni yi, kelima n baa cedi yin gedi yinba leni yi bila. Fangi mani yi yula, ke fala ye yi liiga. 11Yen ka, yen ka! Gedi mani yinba bi jaba ki ban kpiagi Li Miali Diedo, kelima lani n tie yin den mia yaala.» Bi den deli ba Falono nintuali.
12Li Miali Diedo den yedi Musa: «Tandi a nuu Ejipiti diema po, ke a dondoba n cua ki yadi Ejipiti diema nni kuli. Ban ŋmani yaala n pudi ki tinga nni kuli, a tatana n den ŋa yaala kuli.» 13Musa den tandi o gbiamu yeni Ejipiti diema po ke Li Miali Diedo den teni ke ku tafaagu ñani puoli po ki figi mi diema po laa daali leni laa ñiagu kuli. Puoli po yaa tafaagu den cuani a dondoba ke li daa faa. 14A dondoba den yadi Ejipiti diema nni kuli ki baa Ejipiti diema tinfanma nni kuli. Bi den yaba hali hali boncianla hali ke bi daa den laa bi buolu hali abada ki kan go le mo. 15Bi den pini u tingbanu kuli, ki tinga den biigi kelima bi yaa po. Bi den ŋmani ki tinga bonpudikaala kuli leni i tiidi bonluonkaala kuli, a tatana n den ŋa yaala kuli. I tiidi leni i kuani naa den sieni leni bonsoangiliba kuli Ejipiti diema nni kuli.#Doa 9.2-3
16Falono den yini Musa leni Alono tontoni ki yedi ba: «N tieni ti *tuonbiadi Li Miali Diedo yi Tienu po leni yinba yiba po kuli. 17Ama yin tieni npo sugili n tuonbiadi po moala ne bebe yaa po goga. Mia Li Miali Diedo yi Tienu npo ke wan tieni n po sugili ki paani npo o naa falaciamo yua kpendinni mi kuuma.» 18Musa den ñani Falono kani ki jaandi Li Miali Diedo. 19Li Miali Diedo den teni ke o tafaaciangu ñani nintuali po ki taa a dondoba kuli ki gedini ki luni ba mi ñincianmoanma nni. Baa dondobiyenli naa den sieni Ejipiti diema nni. 20Ama Li Miali Diedo go den teni ke Falono pali juagi ke o naa tuo Isalele yaaba n gedi.
O fala yialo: Li biigili
21Li Miali Diedo den yedi Musa: «Tandi a nuu tanpoli po ke li *biigili n yaa ye Ejipiti diema nni hali ke nilo n fidi ki sii li.» 22Musa den tandi o nuu tanpoli po ke yaa biigili n kpiagi boncianla den ye Ejipiti diema nni kuli hali damuna taa.#Pis 105.28; Doa 16.10 23Oba naa den nua o yua, oba kuli naa den fidi ki fii o kaanu hali laa dataada kuli. Ama mi yenma den ye Isalele yaaba n den ye yaa kaani nni kuli.
24Falono den yini Musa ki yedi: «Gedi mani ki ban kpiagi Li Miali Diedo. Yi pe leni i ne bebe n baa sieni, yi bila baa fidi ki yegi leni yi.» 25Musa den goa ki yedi o: «A baa teni ti fini aba tin baa kubi yaala ki padi a pada leni a padijuukaana tin baa pa yaala Li Miali Diedo ti Tienu. 26Ti yangola kuli baa yegi leni ti. Li kan sieni baa taawogiyenli kelima ti baa taa ŋani yaa siige ki soani Li Miali Diedo ti Tienu po. Ti yaa pundi li kaanu ti kan bandi tin baa gandi yaala ki pa Li Miali Diedo.»
27Li Miali Diedo go den teni ke Falono pali juagi ke o naa den tuo ban gedi. 28Falono den yedi Musa: «Ña n kani, fangi a yuli ki da go cua n nintuali kelima a yaa cua n nintuali yaa a daali a baa kpe.» 29Musa den goa ki yedi o: «To, fini n yedi la, n kan go cua a nintuali.»
O fala juodika baa cua
Nu markerat:
MI ÑAMA 10: GUX03
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Gulmancema Bible © Bible Society of Burkina Faso, 2003.