MI ÑAMA 2
2
1Lefi buolu ja den taa Lefi buolu bonpuoga. 2Laa pua den punbi ki mali bonjaga. O den laa ke o ŋani bonŋanla ki wuoni o hali ŋmaali taa.#JTT 7.20; Ebl 11.23 3Wan den sua ke o kan go fidi wuoni o, o den taa ku taalibaabuogu ki boali gu leni yaa sinboanma n ñani tiipo leni sintoama. O den kpieni ki biga ku niinni ki bili likuli i taali siiga nni u kpenciamu boanjaali kani. 4Ki biga naataanpuoga den foagidi waamu ki se ki baa le yaala n baa tieni ki biga.
5 *Falono bisalo den gedi u kpenciamu po ki baa wali. O yegininlieba den goadi ki baali u kpenciamu boanjaali. O den laa ku taalibaabuogu i taali siiga ki soani o yualo ke o gedi ki taa gu. 6O den ŋoagidi ki laa ki biga: Li den tie bonjaga ke ki mua. Mi niñima den cuo o opo ke o yedi: «O tie Ebilu yaaba yaa biga.» 7Lanwani ki biga naataanpuoga den yedi Falono bisalo: «Naani a bua min gedi ki ban lingi apo o wubido Ebilu puoba siiga?» 8Falono bisalo den yedi o: «Gedi.» O jafaano den gedi ki ban yini ki biga yeni yaa naa. 9Falono bisalo den yedi o: «Taa ki biga na ki yaa ŋaandi ga npo n baa pa ŋa a panpaani.» O pua den ga ki biga ki ŋaandi ga. 10Wan den fandi yaa yogunu, o den gedini o Falono bisalo kani, ke o tua opo nani o bijua yeni. O den yini o Musa#2.10 Musa yeli naani leni Ebilu maama nni: “Dadi ki ñani, bi dadi ki ñani mi ñima n nni.” kelima o den yedi: «N den ñani o mi ñima nni.»#JTT 7.21
Musa sani ki gedi Madiana diema nni
11Musa n den fandi yaa yogunu ki tua ja, o den gedi o kpiiba kani ki laa bi tuonfala kuli. O den laa ke Ejipiti yua pua o kpiiba Ebilu yaaba siiga yua.#Ebl 11.24 12O den diidi ganu leni jienu ki sua ke nitoa kuli naa kuu likani o den ku Ejipiti yua ki wuoni o mi tanbiima nni. 13Lan den faa, o go den ñani ki goadi ki sua ke Ebilu yaaba niba lie den koani leni biyaba. O den yedi yua n ki pia moani yeni: «Be yaa po ke a pua a lielo?» 14Laa ja den goa ki yedi o: «Ŋme n dini a ke ŋan tua tipo o bado leni o bujialo? A tama ke a baa kpa nni nani ŋan den ku Ejipiti yua maama yeni bi?» Ti jawaandi den cuo Musa ke o yedi o yuli: «Bi ga li bonla yeni laabaalo.»#JTT 7.23-28 15Falono den gbadi yaala n tieni ki lingi ki bua ki kpa Musa. Ama Musa den fii Falono kani ki sani ki gedi hali Madiana yaa diema nni ki pundi ki kali li caali kani.#JTT 7.29; Ebl 11.27 16Madiana diema yaa kopadiciamo den pia bisiaba lele. Bi den cua li caali kani ki baa luuni mi ñima ki gbieni ti dabiadi ki ñuni bi baa yangoli. 17Ama bi yankpaaba den cua ki deli ba. Lanwani Musa den fii ki ga bi koanli ki teni ke bi yangoli ñuni. 18Ban den goa ki kuni bi baa Lewuyeli kani, o den yedi ba: «Be n teni ke yi guani tontoni dinla?» 19Bi den goa ki yedi o: «Ejipiti ja n ga ti bi yankpaaba kani ki go luuni tipo mi ñima ki ñuni li yangoli.» 20O den buali o bisiaba: «O ye le? Be yaa po yo ke yi ŋa laa ja lipo? Yini o mani ke wan cua ki je leni ti.» 21Musa den tuo ke o baa kali leni laa ja. O den puni o o bisalo Sefola ke o tua o pua. 22O den mali bonjaga ke Musa yini o Gelisoma#2.22 Gelisoma yeli naani leni Ebilu maama nni yaala n bua yedi: “O tie caano neponba.” kelima o den yedi: «N tie caano ki kaa mi dielanma nni.»
U Tienu gandi Musa ke wan faabi Isalele yaaba
23Lan den waagi boncianla, Ejipiti bado den ti guani ke Isalele yaaba go den yenbidi kelima bi yonbidi yaa po ki buudi. Bi yonbidi n den teni ke bi buudi yaa bubula den doni hali ki pundi U Tienu kani. 24U Tienu den gbadi bi dunli ki tiadi o *ŋantaado, wan den kuani yua leni Abalahama leni Isaaka leni Jakobo.#Cil 15.13-14 25U Tienu den noanli Isalele yaaba ki gbadi bipo mi niñima.
Nu markerat:
MI ÑAMA 2: GUX03
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Gulmancema Bible © Bible Society of Burkina Faso, 2003.