MI ÑAMA 4
4
1Musa den goa ki yedi: «Diidi, bi kan daani n maama, bi kan cengi n yedima bi baa yedi Li Miali Diedo naa den doagidi apo.» 2Li Miali Diedo den yedi o: «A kubi be a nuu nni?» O go den goa ki yedi: «N kubi u gbiamu.» 3Li Miali Diedo den yedi: «Lu u tiipo.» O den luni u tiipo ke u tua wa. Musa den sani. 4Li Miali Diedo den yedi Musa: «Tandi a nuu ki cuo o juoli.» O den tandi o nuu ki cuo o wa ke o go tua gbiamu o nuu nni. 5Li Miali Diedo den yedi: «Ŋan tieni yeni ke ban daani ke Li Miali Diedo bi baanba yaa Tienu den doagidi a kani, wani yua n tie Abalahama Tienu, Isaaka Tienu leni Jakobo Tienu.» 6Li Miali Diedo go den yedi o: «Kubini a nuu a liadili nni.» O den kubini o nuu o liadili nni. Wan den ñani o nuu o liadili nni o den sua ke mi *gbaadima cuo o nuu ke u pendi paipai nani a tatana yeni.
7Li Miali Diedo den yedi: «Go kubini a nuu a liadili nni.» O go den kubini o nuu o liadili nni ki go ñani ki sua ke u go goa ki tua nani o gbanandi yeni. Li Miali Diedo den yedi o: 8«Bi yaa daani a maama ki naa cengi o sinankeenkpialo, bi baa daani o sinankeenjuodika wani. 9Bi yaa daani baa laa sinankeenliediba kuli ki naa cengi a maama, ŋan ñani u kpenciamu yaa ñima ki wuli tiipo. Ŋan ñani yaa ñima u kpenciamu nni yeni baa tua soama tiipo.»
U Tienu gandi Alono ke wan tua Musa duogili
10Musa den yedi Li Miali Diedo: «O n Diedo mii tie mi maama n dingi yua yaa po. Laa cili wonli bi wonlitunma bi ŋan cili ki maadi leni a naacemo ka, kelima mi maama pa n ñoabu leni n lanbu po.» 11Li Miali Diedo den yedi: «Ŋme n tagi o nisaalo ñoabu. Ŋme n teni ke o nisaalo tie womo bi muulo, bi juamo bi yua n nua? Naani laa tie mini Li Miali Diedo kaa? 12Lanwani gedi n baa ye leni a ŋan maadi yaa yogunu ke n baa bangi a ŋan baa maadi yaala.» 13Musa den yedi: «O n Diedo, ŋan soani ŋan bua ki soani yua.»
14Lani yaa po Li Miali Diedo pali den beni Musa po ke o yedi o: «Naani a kpelo Alono Lefi buolu yua naa ye likani bii? N bani ke wan wani mi maama naa pa opo: Diidi wani n kpendi ki baa tuogi a yeni. O yaa laa ŋa, o pali baa mangi hali boncianla. Ŋan maadi leni o ki tieni mi naa maama o ñoabu nni. Mini, n baa ye leni o ñoabu. Amo baa tie opo nani U Tienu yene. 15A baa maadi ki tieni mi naa maama o ñoabu nni, n mo baa yaa ye leni a ñoabu leni o yaa ñoabu mo. N baa bangi yi yin baa n tieni yaala. 16O baa maadi apo leni li nitaanli. Wani n baa tua apo bu ñoabu, amo n ga opo U Tienu kaanu. 17Taa u naa gbiamu a nuu nni ŋan baa tieni sinankeeni leni yu.»
Musa go guani o niba kani
18Musa den gedi. Wan den kuni ki pundi o cuadibaa Jetilo kani, o den yedi o: «N mia ŋa, cedi min guani ki taani leni n kpiiba, yaaba n ye Ejipiti nni ki ban le bi yaa baa ye.» Jetilo den yedi Musa: «Gedi leni mi yanduanma.» 19Li Miali Diedo den yedi Musa wan ye Madiana diema nni yaa yogunu: «Gedi, guani Ejipiti diema nni kelima yaaba n den bua ki ñani a miali kuli kpe.» 20Musa den taa o pua leni o bijaba ki teni ke bi jagini i ŋunbi ki guani Ejipiti diema nni. O den kubi U Tienu yaa gbiamu o nuu nni. 21Li Miali Diedo den yedi Musa: «A yaa fii ki goa Ejipiti nni yaa yogunu, ŋan diidi min baa tieni a nuu nni yaa bancianma kuli, a baa tieni likuli *Falono nintuali. Ama mini n baa teni o pali n juagi ke o kan tuo bi niba n gedi. 22Ŋan yedi Falono: ‹Li Miali Diedo yedi yaa maama n tie na: Isalele tie n bijua, n bijakpelo. 23N yedi a: Cedi n bijua n gedi ki kpiagi nni. A yaa yie ke o kan gedi, diidi n baa kpa a bijua yua n tie a bijakpelo yeni.› »#Ñam 12.29
24Ban den ye u sanu nni, Musa n den duani ku ñiagu naankani, Li Miali Diedo den cua ki tuogi o ki bua ki kpa o. 25Sefola den taa yaa tanli n mani nani ki juga yeni ki kuani o bijua ku ciagu ki taa ku punjuogu ki luni Musa yaa taana kani ki yedi: «A tie npo mi soama yaa calo yo.» 26Lanwani Li Miali Diedo den cedi Musa. O pua den yedi: «Mi soama calo.» Kelima ku koanciagu yaa po yo.
27Li Miali Diedo den yedi Alono: «Gedi mi fanpienma po ki tuogi Musa.» Alono den fii ki tuogi Musa U Tienu yaa juali kani ki bibi o. 28Musa den teni ke Alono bandi Li Miali Diedo yua n den soani o yaa maama kuli leni wan teni o yaa ñoabonli ke wan tieni mi bancianma kuli mo. 29Musa leni Alono den suagi liiga ki taani Isalele yaaba siiga bi nikpeliba kuli. 30Alono den waani ba Li Miali Diedo n den yedi Musa yaa maama kuli. Musa den tieni o sinankeeninba bi niba kuli nintuali. 31Bi niba den daani o yedima. Bi den bandi ke Li Miali Diedo cua ki goandi Isalele bila ki laa bi falaciamo. Bikuli den gbaani ki pugi o.
Musa leni Alono gedi Falono kani
Nu markerat:
MI ÑAMA 4: GUX03
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Gulmancema Bible © Bible Society of Burkina Faso, 2003.