MI CILIMA 23
23
1Sala yaa miali bina den pundi kobiga n piilie n bina lele. Lani n tie Sala yaa miali dana banlu. 2Sala den kpe Kilijati-Aliba dogu nni, yu n go yi Ebiloni, Kanana diema nni. Abalahama den gedi ki ban ŋanbi Sala kuuma ki mua opo. 3Abalahama den fii ki ŋa o kpiemo Sala ki maadi leni Heta yaa bijaba ki yedi ba: 4«N tie caano ki ye yi siiga. Pa nni mani u kaanu yi siiga a kula po ke min diedi u ki piini n pua ki ñani o n nintuali.»#Ebl 11.9,13; JTT 7.16
5Heta yaa bijaba den goa ki yedi Abalahama: 6«Cengi ti maama ti diedo, a tie U Tienu yaa badija ti siiga. Piini a pua ti yaa kula kani ŋan bua naani kuli. Baa niyendo ti siiga kan yie apo ŋan piini a pua o kuli nni.»
7Abalahama den fii ki labini mi diema yaa niba nintuali, Heta yaa bijaba nintuali, 8ki yedi ba: «Yi yaa baa tuo ke min piini n pua ki ñani o n nintuali yin cengi nni mani. Mia mani npo Tisokala yaa bijua Efilona, 9ke wan pa nni Makipela yaa tanlongu wan die yaagu ke ku ye o kuanu yaa juodima po. Wan pa nni ke min pa o yaa ligi n dagidi ke min yaa pia a kula kaanu yi siiga ki yaa die.»
10Efilona den kaa Heta yaa bijaba yaa siiga. Efilona Heta yua den goa ki maadi Abalahama Heta yaa bijaba nintuali leni yaaba n kua o yaa dogu yaa buliñoabu kani yaa nintuali, 11ki yedi: «Yen ka n diedo cengi nni. N puni a u kuanu ki go puni a yaa tanlongu n ye u niinni. N puni a u n niba yaa bijaba kuli yaa nintuali ŋan piini a pua.»
12Abalahama den labini mi diema yaa niba nintuali. 13O den maadi leni Efilona ki yedi o mi diema yaa niba kuli nintuali: «N mia ŋan cengi nni. N baa pa ŋa u kuanu yaa ligi, ga npo yi, n baa piini n pua likani.»
14Efilona den goa maadi Abalahama ki yedi: 15«N diedo go cengi nni. Baa yaa tinga n pundi sikili kobinaa tie be mini leni fini yaa siiga? Piini a pua.»
16Abalahama den gbadi Efilona maama ki biigi Efilona po wan den maadi yaa ligi bianu Heta yaa bijaba nintuali ke li tie sikili kobinaa nani ki daaga yaa dunga n tie maama. 17Efilona yaa kuanu Makipela kaanu yu n tiegi leni Mamile u kuanu leni yaa tanlongu n ye likani leni yaa tiidi n ye u kuanu po kuli ki go ye u lindima kuli, 18lankuli den tua Abalahama yaa yaala. Li den tieni Heta yaa bijaba leni yaaba n kua o yaa dogu yaa buliñoabu kuli nintuali.
19Lanpendi, Abalahama den piini o pua Sala Makipela yaa tanlongu nni yaagu n tiegi leni Mamile yu n go yi Ebiloni, Kanana yaa diema nni. 20U kuanu leni yaa tanlongu n ye likani den tie Abalahama yaa yaala a kula kaanu yaa po wan den da yu Heta yaa bijaba kani.
Isaaka potaali
Nu markerat:
MI CILIMA 23: GUX03
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Gulmancema Bible © Bible Society of Burkina Faso, 2003.