Ijɔ̍ɔn 21
21
Iji̍sɔ̄ɔsi de iyī nū chabɔ̄ hu̍ a̍chi̍kpo̍ yī nū āchɛ arāapa
1La okwi̍ihi yī ɔla̍ā, Iji̍sɔ̄ɔsi gba̍a de iyī nū chabɔ̄ hu̍ a̍chi̍kpo̍ yī nū abɔ̍ɔ la Li̍hu yī Itayi̍bi̍rīyasi. Lɔkɔ nīi o̍ de iyī nū chabɔ̄ ma̍ hɔ̄ ma̍ a̍nɛ. 2Yɛ̄grāa ɔla̍ā, Isa̍yi̍mɔ̄ɔn Ipi̍ta, ba̍la Itɔ̍mɔ̄ɔsi nīi re̍ka “Ayɛ̍ɛpa” ma̍, ba̍la Inata̍nīyɛli nīi bū la Ike̍na yī Iga̍līli ma̍, ba̍la ayi̍ yī Ijɛ̍bɛ̄di āchɛ ɛpɛpa, ba̍la a̍chi̍kpo̍ yī Iji̍sɔ̄ɔsi āchɛ ɛpa ɛha̍ gblāa abɔ̍ɔ la ɛbɛ ūkpo̍he. 3Isa̍yi̍mɔ̄ɔn Ipi̍ta ka de wa̍ hīka anɔ̍lɔ yɛ gāa wɔtɛ̍ yī yenyi.
Aa̍ āchɛ ehēhī titi ka aɛ̍lɛ ge̍ē yɛ ba̍la ɔ̍lɔ. E̍ wā ge̍ gatū la wɔwu̍ pīya bɛ̍ɛ̄nɛ̄. La otu̍ ɔla̍ā wa̍a̍, e̍ i̍ ku̍ ɔjɔ̄jā ni̍. 4Yɛ̄grāa nīi yɛnɔ yɛ ē bīyɛchɛ ma̍, Iji̍sɔ̄ɔsi bū kpu̍u̍ ge̍ rɛ abɔ̍ɔ la oko̍o yī yenyi. A̍chi̍kpo̍ yī nū i̍ chī jo̍ōkū hīka ɔ̍lɔ - Iji̍sɔ̄ɔsi nɛ ni̍. 5Iji̍sɔ̄ɔsi da wa̍ hīka, “Ayi̍ e̍kre̍biya! Ala̍ ɛlɛjā, ala̍ i̍ ku̍ ɛbɛ̍yēenyi ɔha̍lɔha̍ ni̍ oo?”
E̍ hīya anu̍ ɔkɔ ka ɔjɔ̄jā, aɛ̍lɛ i̍ ku̍ ni̍.
6Iji̍sɔ̄ɔsi da wa̍ hīka, “Ɔ̍lɔma̍, ala̍ ā ta̍ a̍bagalā ga wāā yī abɔ̄ līre̍ yī wɔwu̍ gɛ, ma̍a ala̍ ge̍ē ku̍.” Bɛ̍ɛ̄nɛ̄, e̍ ta̍ a̍bagalā tū gāa. E̍ i̍ pi ɔ̍ ngmɛ̍ɛchɛ mɛ gɛ ni̍, wu̍chē oji̍ nɛ, ɛbɛ̍yēenyi nīi e̍ ta̍kla̍ āā ma̍ de yɛ̍ɛ̄mɛ̄mɛ̄.
7A̍chi̍kpo̍ yī Iji̍sɔ̄ɔsi ɔla̍ā nīi re̍ka ɔhɔtū yī nū ma̍ ka de Ipi̍ta ɔpɔ̄ɔpɛ̄ hīka ɔ̍lɔ - Ādā Iji̍sɔ̄ɔsi nɛ. Isa̍yi̍mɔ̄ɔn Ipi̍ta de po̍ i̍ngɔ̍ɔ hīka ɔ̍lɔ - Ādā Iji̍sɔ̄ɔsi nɛ ma̍, o̍ tū ɔjā otūlibi̍īyē nīi o̍ ē ru la ichō ma̍ mi̍ya tū yɛ̍yɛ̍ bɛ̍ɛ̄nɛ̄; nɛ̄ni̍ o̍ yɛ la ibi̍īyē ɛwɛwa o̍bū. Ipi̍ta hi̍bi gwō yenyi. 8Āchɛ ehēhī ma̍ yɛ la wɔwu̍ ga o̍chi. E̍ pi a̍bagalā ɔla̍ā nīi ɛbɛ̍ mu ɔ̍ omōmu ma̍ ga ɛbɛ nīi e̍ yɛ gāa ma̍. O̍ i̍ lɛ igbi̍gbo̍ hī o̍chi ni̍. O̍ lɛ bāa ikpo̍ ohu igwɛ̍ɛrwɔ̄ ma̍ wā la o̍chi. 9E̍ bīyɛchɛ ga o̍chi ma̍, e̍ ma̍ ɔla̍ nīi e̍ kplatū la ɛhā rɛ abɔ̍ɔ. Ɛbɛ̍yēenyi ba̍la ibrɛ̍ɛdi gblāa abɔ̍ɔ la ɔla̍. 10Iji̍sɔ̄ɔsi da wa̍ hīka ɛ̍lɛ ge̍ bī ɛbɛ̍ ɛha̍ nīi ɛ̍lɛ ku̍ u̍ma̍ama ma̍ wā.
11Isa̍yi̍mɔ̄ɔn Ipi̍ta chɛ̄ ga wɔwu̍ ge̍ pi a̍bagalā ɔla̍ā nīi mōmu la ɛbɛ̍ ɔnɔ̄kɔ̄kū ma̍ wā la o̍chi. E̍ lɛ ɛbɛ̍yēenyi ohu arāapa che igwo̍lɛpa wa̍a̍. E̍ lɔ̄lyɛ̄mɛ̄ nyaa ma̍, a̍bagalā ɔla̍ā i̍ chī hi̍ya mɛ ni̍. 12Iji̍sɔ̄ɔsi da wa̍ hīka ɛ̍lɛ ge̍ pīya ge̍ re̍ ojōre̍. Ɔ̄chɔ̄chɛ lipu̍ yī wā i̍ bɔ̍ɔ̄tū da ɔ̍ hīka, “Awɔ - ɔ̄nyɛ nɛ” ni̍. Wu̍chē oji̍ nɛ, e̍ jo̍ōkū hīka ɔ̍lɔ Ādā Iji̍sɔ̄ɔsi nɛ. 13Iji̍sɔ̄ɔsi gāa ge̍ nāa ibrɛ̍ɛdi ɔla̍ā de de wa̍. O̍ gba̍a nāa ɛbɛ̍yēenyi i̍ngi̍ngɔ̍ɔ de wa̍.
14Onūma̍ tū o̍mgbo̍mɛta̍ nīi Iji̍sɔ̄ɔsi de iyī nū chabɔ̄ hu̍ a̍chi̍kpo̍ yī nū bū la yɛ̄grāa nīi o̍ hye̍ēyī la okū ma̍ a̍nɛ.
Iji̍sɔ̄ɔsi ba̍la Ipi̍ta
15E̍ de ojōre̍ re̍ ma̍, Iji̍sɔ̄ɔsi da Ipi̍ta hīka, “Isa̍yi̍mɔ̄ɔn, ɔyi̍ yī Ijɔ̍ɔn be̍e! A yɔ̍ɔhɔtū yī u gla āchɛ ehēhī nūma̍ ta̍ u̍uma?”
Ipi̍ta ka ɔ̍lɔ ge̍, “Ēē Ādā! Awɔ ɔlɔjā jo̍ōkū hīka amɔ̍lɔ yɔ̍ɔhɔtū yī aɔ̍lɔ.”
Iji̍sɔ̄ɔsi koko̍o de ɔ̍ bɛ̍ɛ̄nɛ̄ hīka, “Ɔ̍lɔma̍, deyīrɛ ayɔ̍ɔ̄nyīyɛrɔ̄ yī u gɛ!” 16O̍mgbo̍mɛpa, Iji̍sɔ̄ɔsi gba̍a da Ipi̍ta hīka, “Isa̍yi̍mɔ̄ɔn ɔyi̍ yī Ijɔ̍ɔn be̍e! A yɔ̍ɔhɔtū yī u?”
Ipi̍ta ka ɔ̍lɔ ge̍, “Ēē Ādā! Awɔ ɔlɔjā jo̍ōkū hīka amɔ̍lɔ yɔ̍ɔhɔtū yī aɔ̍lɔ.”
Iji̍sɔ̄ɔsi koko̍o de ɔ̍ hīka, “Ɔ̍lɔma̍, deyīrɛ anyīyɛrɔ̄ yī u gɛ!” 17O̍mgbo̍mɛta̍, Iji̍sɔ̄ɔsi gba̍a da ɔ̍ hīka, “Isa̍yi̍mɔ̄ɔn, ɔyi̍ yī Ijɔ̍ɔn be̍e! A yɔ̍ɔhɔtū yī u?”
Ipi̍ta de he̍ēyīwɔnɔ wu̍chē lɔkɔ nīi Iji̍sɔ̄ɔsi gba̍a che ɔ̍ ikpo̍ o̍mgbo̍mɛta̍ hīka, “A yɔ̍ɔhɔtū yī u?” ma̍. O̍ da Iji̍sɔ̄ɔsi bɛ̍ɛ̄nɛ̄ hīka, “Ādā, awɔ ɔlɔjā je̍ ɔjāha̍-ɔjāha̍ wa̍a̍! A jo̍ōkū hīka amɔ̍lɔ yɔ̍ɔhɔtū yī aɔ̍lɔ!”
Iji̍sɔ̄ɔsi koko̍o de ɔ̍ hīka, “Ɔ̍lɔma̍, deyīrɛ anyīyɛrɔ̄ yī u gɛ! 18Lēchi̍-lēchi̍, n koko̍o de wɔ! Yɛ̄grāa nīi a hɔ̄ la okro̍biya ma̍, a ē de wɔkpa̍ yī wɔ ē ku̍ owu; a ē yɛɛ ē ga ɛbɛ nīi ku̍ wɔ ɔkɔ ma̍. Yɛ̄grāa nīi a ge̍ē de ē pīya ɔnyāku̍ ma̍, a ge̍ē nā abɔ̄ yī wɔ kpaa nīi ɔ̄chɛ ɔha̍ ē de orī wā wɔ; o̍ ge̍ē bī ɔ̄ ga ɛbɛ nīi a i̍ chikpo̍ ge̍ē yɛ ni̍ ma̍ bɛ̍ɛ̄nɛ̄.” 19Bū la lɛlā nūma̍ nīi Iji̍sɔ̄ɔsi ka ma̍, o̍ yɛ ē chabɔ̄ yī ita yī ɔpīyaku̍ nīi Ipi̍ta ge̍ē ku̍ hɛ̄ɛbɛ ē bī rīgā ɔnɔ̄kɔ̄kū ge̍ē de Ɔwɔ ma̍. Bɛ̍ɛ̄nɛ̄, Iji̍sɔ̄ɔsi koko̍o de Ipi̍ta hīka, “Ku u la u̍tu!”
Iji̍sɔ̄ɔsi ba̍la a̍chi̍kpo̍ yī nū nīi re̍ka Ɔhɔtū yī nū ma̍
20Ipi̍ta pīyeyīhii ma̍ a̍chi̍kpo̍ yī Iji̍sɔ̄ɔsi nīi re̍ka ɔhɔtū yī Iji̍sɔ̄ɔsi ma̍. A̍chi̍kpo̍ yī nū nūma̍, anu̍ gbo chiya Iji̍sɔ̄ɔsi īchāha̍ nīi e̍ gblāa yɛ ē re̍ ojōre̍ ma̍ a̍nɛ. Yɛ̄grāa ɔla̍ā, anu̍ che Iji̍sɔ̄ɔsi ikpo̍ ka ɔ̄nyɛ ɔ̍lɔ ge̍ē chɔ̄ɔwɛ ē tū ɔ̍lɔ ma̍ a̍nɛ. 21Ipi̍ta ma̍ ɔ̄ bɛ̍ɛ̄nɛ̄ ma̍, o̍ che Iji̍sɔ̄ɔsi ikpo̍ hīka, “Ādā be̍e! Anu̍ ɔngrɔ̄ɔ ɔla̍ā bɛ̍ɛ/?”
22Iji̍sɔ̄ɔsi hīya anu̍ ɔkɔ hīka, “N ge̍ chikpo̍ hīka o̍ ge̍ hɔ̄leyī kpɛɛ nīi n ā wā o̍bū ma̍, ɔna̍ - iyī wɔ lipu̍ yī nū ma̍, Ipi̍ta? Ku u la u̍tu!”
23Bū la ɛbɛ ɔla̍ā, wɔ̄kā mīyanya wa̍a̍ nīi alikpɛ̍ɛ yī Iji̍sɔ̄ɔsi de po̍ wa̍a̍ hīka a̍chi̍kpo̍ yī Iji̍sɔ̄ɔsi ɔla̍ā ɔ̍lɔ i̍ ge̍ē pīyaku̍ ni̍. Iji̍sɔ̄ɔsi i̍ chī ka i̍ngɔ̍ɔ hīka, “O̍ i̍ ge̍ē pīyaku̍ ni̍” ni̍. Ɔjā nīi o̍ ka ma̍ re̍ka, “N ge̍ chikpo̍ hīka o̍ ge̍ hɔ̄leyī kpɛɛ nīi n ā wā o̍bū ma̍, ɔna̍ - iyī wɔ lipu̍ yī nū ma̍?”
24Anu̍ a̍chi̍kpo̍ yī Iji̍sɔ̄ɔsi ɔla̍ā nīi kɛlā ku̍ lɛlā nūma̍ wa̍a̍ ma̍, anu̍ pi̍i̍ gba̍a de tɔ̍ɔ̄ta̍ tū la īpū hɔ̄ ma̍ a̍nɛ. Alɔ chī jo̍ōkū hīka lɛlā nīi o̍ ka ma̍ ichɛ̄ɛhi nɛ.
Ɔchlɛhu̍ yī lɛlā
25Lɛlā ɛha̍ hɔ̄ abɔ̍ɔ yɛ̄mɛ̄mɛ̄ nīi Iji̍sɔ̄ɔsi ya̍ ma̍. O̍ ge̍ re̍ka ɔ̄chɛ tɔ̍ɔ̄ta̍ tū la īpū wa̍a̍ lūkpō-lūkpō, n gbɛri̍ya̍ ka lipu̍ yī yɛchɛ nūma̍ wa̍a̍ i̍ ge̍ē bī īpīpū ke̍e̍ nīi lɛlā yī nū ge̍ē tū ma̍ ē mɛ ni̍.
Nu markerat:
Ijɔ̍ɔn 21: YBASR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2020 Bible Society of Nigeria (second edition)
