Ijɔ̍ɔn 6
6
Iji̍sɔ̄ɔsi bī āchɛ u̍nɔ igwo̍lɛpa che āchɛ ohu igwo̍ la ojōre̍
(Ima̍tiyu 14:13-21; Ima̍aki 6:30-44; Ilu̍uku 9:10-17)
1La okwi̍ihi yī ɔla̍ā, Iji̍sɔ̄ɔsi ku̍chē pīya hɛ̍ Li̍hu yī Iga̍līli ārɛ̄ ga oe̍. Li̍hu ɔla̍ā re̍ka “Li̍hu yī Itayi̍bi̍rīyasi” i̍ngi̍ngɔ̍ɔ. 2Āchɛ lyɛ̄mɛ̄ kpɛ̍ɛ nīi pɛ̍ ku ɔ̍ ma̍. Wu̍chē oji̍ nɛ, e̍ ma̍ u̍ku̍rɔ̍ ɔlɛbɛ̍bi̍ ɔla̍ā nīi o̍ yɛ ē ya̍ ē de āchɛ ekwi̍īyē ē nyiya ma̍. 3Iji̍sɔ̄ɔsi pīya ga ichō yī u̍kpo̍chi ɔha̍ ge̍ hyāhɔ̄ abɔ̍ɔ ba̍la a̍chi̍kpo̍ yī nū. 4Yɛ̄grāa ɔla̍ā, Ɔwɔ̄wīyā yī Owu̍lā nīi āchɛ yī Iju̍u ē ya̍ ma̍ hōhī kurɛkurɛ mɛ̍. 5Iji̍sɔ̄ɔsi pīyeyī kpa̍ta̍ ma̍ yɛ̄mɛ̄ yī āchɛ nīi pɛ̍ yɛ amu yewā dikpo̍ba̍ ɔ̄ ma̍, o̍ da Ifi̍līipu hīka, “Aba̍ kpa̍a nīi alɔ ge̍ē ma̍ ojōre̍ ē ra̍ yɛ̍yɛ̍ nīi ge̍ē jɛ̄ āchɛ nūma̍ wa̍a̍ ma̍/?” 6O̍ ka i̍ngɔ̍ɔ ji ma Ifi̍līipu ma̍, nɛ̄ni̍ anu̍ ɔlɔjā je̍ ɔjā nīi o̍ ge̍ē ya̍ ma̍ lɔ̄lā mɛ̍.
7Ifi̍līipu koko̍o de ɔ̍ hīka, “Alɔ ge̍ rɔ̍ɔ̄ra̍ ibrɛ̍ɛdi la idana̍ri ohu igwo̍, irwi-irwi yī nū ɔbɔbɔ i̍ chī yɛ abɔ̍ɔ ge̍ē grāa āchɛ ɛla̍ā wa̍a̍ ē mɛ ni̍!”
8A̍ndru nīi ɔɔ̍nɛ̍ yī Isa̍yi̍mɔ̄ɔn Ipi̍ta ma̍, a̍chi̍kpo̍ yī Iji̍sɔ̄ɔsi i̍ngi̍ngɔ̍ɔ nɛ. 9Anu̍ ka hīka, ɔɔ̍pɛ̄ ɔnɔ̄ngrɔ̄ɔ ɔha̍ ɔ̍lɔ bī ibrɛ̍ɛdi ɔha̍ nīi ɛ̍lɛ ya̍ la igu nīi - ɔ̍lɔ re̍ka iba̍li ma̍, ākpā ɛrwɔ̄ ba̍la ɛbɛ̍yēenyi ɛpa amu. Ɔnɛ̄ɛhɛhi ɔna̍ nīi ojōre̍ ɔla̍ā ɔ̍lɔ chī ge̍ē ya̍ ē de okru̍utu yī āchɛ ɛla̍ā wa̍a̍ mɛ ma̍?
10Iji̍sɔ̄ɔsi da a̍chi̍kpo̍ yī nū ka ɛ̍lɛ ge̍ ya̍ nīi āchɛ ɛla̍ā ɛ̍lɛ ge̍ hyāhɔ̄ wa̍a̍. A̍chi̍ dɔ̄da abɔ̍ɔ la ɛbɛ ɔla̍ā ma̍, āchɛ ɛla̍ā wa̍a̍ pīya hyāhɔ̄. E̍ gbajɛ la āchɛ u̍nɔ igwo̍lɛpa che āchɛ ohu igwo̍. 11Bɛ̍ɛ̄nɛ̄, Iji̍sɔ̄ɔsi nāa ibrɛ̍ɛdi ɛla̍ā bī la abɔ̄, da Ɔwɔ o̍be. O̍ de kɔ̄ de āchɛ ɛla̍ā wa̍a̍ nīi hyāhɔ̄ abɔ̍ɔ ma̍. O̍ gba̍a nāa ɛbɛ̍yēenyi ya̍ i̍ngi̍ngɔ̍ɔ. Aa̍ wa̍a̍ re̍ lɔkɔkɔ nīi ɔnyɔnyɛ chikpo̍ ma̍. 12O̍ de jɛ̄ wā wa̍a̍ ma̍, Iji̍sɔ̄ɔsi da a̍chi̍kpo̍ yī nū hīka, “Ala̍ ā kpo̍ irwi yī ojōre̍ ɔla̍ā wa̍a̍ hā. Ala̍ ā tu̍ hī ɔha̍lɔha̍ chāajɛ ni̍.” 13E̍ de wa̍ kpo̍ hā tū cha̍cha̍. E̍ kpo̍ irwi yī ibrɛ̍ɛdi ākpā ɛrwɔ̄ ɔla̍ā nīi e̍ re̍ jɛ̄ wā hōhī ma̍ tū la obri̍bri̍ igwo̍lɛpa mōmu-mōmu.
14Āchɛ ɛla̍ā wa̍a̍ gblāa abɔ̍ɔ ma̍ u̍ku̍rɔ̍ ɔlɛbɛ̍bi̍ nūma̍ nīi Iji̍sɔ̄ɔsi ya̍ ma̍, e̍ ka bɛ̍ɛ̄nɛ̄ hīka ɔ̍lɔ ge̍ lēchi̍, Ɔ̄chɛ Ɔkɛrɔ̄ yī Ɔwɔ nīi ɔ̍lɔ ge̍ē wā la yɛchɛ ma̍ ɔ̍lɔ hɔ̄ ma̍ a̍nɛ. 15Iji̍sɔ̄ɔsi de jo̍ōkū ka ɛ̍lɛ yɛ abɔ̍ɔ ge̍ē ku̍ anu̍, hɛ̄ɛbɛ ge̍ē de anu̍ re̍ ɔchwɔ̄lɛ̍ wɔhu̍-wɔhu̍. Wu̍chē yī ɔla̍ā, o̍ pīya hī wā ga u̍kpo̍chi ɔha̍, anu̍ lōri̍īnū.
Iji̍sɔ̄ɔsi yɛɛ la ichō yī yenyi ke̍e̍
(Ima̍tiyu 14:22-33; Ima̍aki 6:45-52)
16Ɔ̄nɛ̄ wā ge̍ de gbo ma̍, a̍chi̍kpo̍ yī nū pīya ga oko̍o yī li̍hu. 17E̍ gatū la wɔwu̍, pīya hɛ̍ li̍hu ārɛ̄ yɛ gāa Ikapa̍num. Otu̍ de bī mɛ̍; Iji̍sɔ̄ɔsi i̍ chī gba̍a cha wā abɔ̍ɔ dikpo̍ba̍ wā we̍ ni̍. 18Yɛ̄grāa ɔla̍ā, ahuhu ɔnɔ̄kɔ̄kū ɔha̍ yɛ abɔ̍ɔ ē gwō kpɛ̍ɛ ē ti̍ya yenyi ē tū. 19A̍chi̍kpo̍ yī nū pɛ̍ wɔwu̍ yɛ la yenyi gbajɛ la ina̍aba ɛta̍ kɛ̄ɛ ɛnɛ mɛ̍. Yɛ̄grāa ɔla̍ā, e̍ ma̍ Iji̍sɔ̄ɔsi nīi o̍ yɛɛ ke̍e̍ la ichō yī yenyi yɛ ē tu̍ bla̍a wɔwu̍ ma̍, aa̍ wa̍a̍ de kpo̍ tūuhwi ɔlamu-ɔlamu. 20Iji̍sɔ̄ɔsi ka grāa aa̍ hīka, “Ala̍ e̍e tūuhwi ni̍, ma̍a ami nɛ.” 21O̍ lɛ wa̍ wɔnyɔnyɛ la ɔnāa anu̍ tū ga wɔwu̍ ɔpɔ̄ɔpɛ̄. Ɔpɔ̄ɔpɛ̄, wɔwu̍ yɛ gāa ge̍ ku̍ lɛga la ɛbɛ nīi e̍ pīyeyīta̍ yɛ gāa ma̍.
Āchɛ ɛla̍ā gāla̍ Iji̍sɔ̄ɔsi
22Ɔ̄chī ɔ̍mɛpa, yɛ̄mɛ̄ yī āchɛ ɛla̍ā nīi de chɔ̄chā la oe̍ ɔla̍nū yī li̍hu ma̍ ma̍ hīka wɔwu̍ ūkpo̍he ɔ̍lɔ lā abɔ̍ɔ bɛ̍ɛ̄nɛ̄ a̍nɛ. Aa̍ wa̍a̍ chī jo̍ōkū hīka Iji̍sɔ̄ɔsi ɔ̍lɔ i̍ tū wɔwu̍ ba̍la a̍chi̍kpo̍ yī ɔ̍lɔ ni̍. E̍ jo̍ōkū hīka ɛ̍lɛ pīya hī ɔ̍lɔ. 23Alwɔwu̍ ɛha̍ bū la Itayi̍bi̍rīyasi ga abɔ̍ɔ ga ɛbɛ nīi yɛ̄mɛ̄ yī āchɛ ɛla̍ā re̍ ibrɛ̍ɛdi nīi Ādā Iji̍sɔ̄ɔsi ya̍ ɔpiyɛ yī nū o̍bū ma̍. 24Āchɛ ɛla̍ā ma̍ hīka Iji̍sɔ̄ɔsi ɔ̍lɔ i̍ hɔ̄ abɔ̍ɔ ba̍la a̍chi̍kpo̍ yī ɔ̍lɔ gɛ ni̍ ma̍, e̍ gatū la wɔwu̍ ɛla̍ā, pīya ga ɔgāla̍ Iji̍sɔ̄ɔsi ga Ikapa̍num.
Iji̍sɔ̄ɔsi re̍ka ibrɛ̍ɛdi ode ɔhɔ̄leyī de ɔ̄chɛ a̍nɛ
25Āchɛ ɛla̍ā gāa ge̍ ma̍ Iji̍sɔ̄ɔsi abɔ̍ɔ la oe̍ ɔmɛpa yī li̍hu ma̍, e̍ da ɔ̍ hīka, “Ɔngūlɛ̄lā be̍e! Olo̍ ɔna̍ nīi a ga wā amu u̍ma̍ ma̍?”
26Iji̍sɔ̄ɔsi hīya aa̍ ɔkɔ hīka, “Lēchi̍-lēchi̍, n koko̍o de ala̍! Wu̍chē lɔkɔ nīi ala̍ re̍ ibrɛ̍ɛdi nīi ku̍ ala̍ ɔkɔ ma̍ - ohu̍ nīi ala̍ yɛ ē gāla̍ u a̍nɛ. I̍ lɛlā ɔlɛbɛ̍bi̍ ɔla̍ā nīi ala̍ yɛ ē po̍ ochi̍chi̍ yī nū ma̍ - ohu̍ nīi ala̍ ē gāla̍ u a̍ni̍. 27Ala̍ e̍e ya̍ u̍ku̍rɔ̍ yī ojōre̍ nīi ē bɔ̄bīya ē mɛ ma̍ ni̍. Ala̍ ā ya̍ u̍ku̍rɔ̍ yī ojōre̍ nīi ē hɔ̄ kpɛɛ ē gbo̍ ɔhɔ̄leyī i̍mɔ̄mɛni̍ ma̍. Ojōre̍ ɔla̍ā nīi Ɔyi̍ yī Ɔngrɔ̄ɔ ge̍ē de ē de ala̍ a̍nɛ. Wu̍chē oji̍ nɛ, Ɔwɔ A̍dā chɛ̄ku ɔ̍ de ɛ̍na yī anu̍ ɔlɔjā pi ɔ̍ mɛ̍.”
28Bū la ɛbɛ ɔla̍ā, e̍ che ɔ̍ ikpo̍ bɛ̍ɛ̄nɛ̄ hīka, “Kana̍ nīi alɔ ge̍ē ya̍ o̍bū nīi alɔ ge̍ē ya̍ u̍ku̍rɔ̍ nīi Ɔwɔ chikpo̍ ma̍?”
29Iji̍sɔ̄ɔsi koko̍o de wa̍ hīka, “Ala̍ ma̍ ko̍ō! U̍ku̍rɔ̍ nīi Ɔwɔ chikpo̍ ka ala̍ ɔ̍lɔ ge̍ ya̍ ma̍ re̍ka ɔchɛ̄ ku ɔ̄chɛ nīi Ɔwɔ ɔlɔjā de tɛ̄rɔ̄ wā ma̍.”
30E̍ gba̍a da Iji̍sɔ̄ɔsi hīka, “Lɛlā ɔlɛbɛ̍bi̍ ɔna̍ nīi a ge̍ē ya̍ ē chabɔ̄ hu alɔ hɛ̄ɛbɛ nīi alɔ ge̍ē chɛ̄ku wɔ ma̍? Oji̍ nīi a ge̍ē ya̍ ma̍? 31Aa̍ ɔ̍kɔ̄kū yī alɔ re̍ ojōre̍ ɔha̍ nīi re̍ka ima̍na ma̍ i̍chɔ̍lɔ lipu̍ a̍chi̍ chukuru. O̍ de lɛ ke̍e̍ lɔkɔ nīi Īpū yī Ɔwɔ ka ma̍, ‘O̍ de ojōre̍ de wa̍ bū la ichō nīi e̍ re̍.’ ”
32Iji̍sɔ̄ɔsi ka de wa̍ bɛ̍ɛ̄nɛ̄ hīka, “Lēchi̍-lēchi̍, n ā koko̍o de ala̍! Ɔjā nīi Imo̍sīisi de de ala̍ ma̍, i̍ anu̍ re̍ka ojōre̍ nīi bū la ichō a̍ni̍. A̍dā yī u ē de ojōre̍ olēchi̍ lēchi̍ ɔla̍ā nīi bū la ichō ma̍ de ala̍ a̍nɛ. 33Ɔ̄chɛ nīi bū abɔ̍ɔ la ichō wā ge̍ē de ɔhɔ̄leyī de yɛchɛ ma̍, anu̍ - ojōre̍ ɔla̍ā nīi bū la ichō ma̍ a̍nɛ.”
34Āchɛ ɛla̍ā de ɔ̍ ka ɔ̍lɔ ge̍ chu̍chu̍u ādā! Ɔ̍lɔ ge̍ de ojōre̍ ɔla̍ā de aa̍ myɛ̄grāa-myɛ̄grāa gɛ!
35Iji̍sɔ̄ɔsi koko̍o de wa̍ hīka, “Ami - ojōre̍ nīi ē de ɔhɔ̄leyī de ɔ̄chɛ ma̍ a̍nɛ. Ɔ̄chɛ nīi ge̍ wā dikpo̍ba̍ u, ɔlɔjā i̍ ge̍ē ku̍ lɛmiyɛ ge̍ē gbo̍ gɛ ni̍. Ɔ̄chɛ nīi ge̍ de ɔtū che u, ɔlɔjā i̍ ge̍ē ku̍ odīyenyi ge̍ē gbo̍ gɛ ni̍. 36Lɔkɔ nīi n ka de ala̍ o̍bū ma̍! Ala̍ de u ma̍ mɛ̍, ala̍ i̍ chī yɛ abɔ̍ɔ ge̍ē chɛ̄ku u ni̍. 37Āchɛ wa̍a̍ nīi A̍dā yī u de de u ma̍ ge̍ē wā dikpo̍ba̍ u. Ɔ̄chaha̍-ɔ̄chaha̍ nīi ge̍ wā dikpo̍ba̍ u, n i̍ ge̍ē nū ɔ̄ pīya ge̍ē gbo̍ ni̍. 38Wu̍chē oji̍ nɛ, n bū la ichō wā ge̍ē ya̍ ɔjā nīi ɔ̄chɛ nīi de u tɛ̄rɔ̄ ma̍ chikpo̍ ma̍. N i̍ ya̍ lɔkɔ nīi ami ɔlɔjā chikpo̍ ma̍ ni̍. 39Ɔjā nīi ɔ̄chɛ nīi de u tɛ̄rɔ̄ wā ma̍ chikpo̍ ka amɔ̍lɔ ge̍ ya̍ ma̍ hɔ̄ ma̍ a̍nɛ: Amɔ̍lɔ ge̍ e̍e de ɔ̄chɔ̄chɛ lipu̍ yī āchɛ nīi anɔ̍lɔ de de amɔ̍lɔ ma̍ pīyabi̍ ni̍. Amɔ̍lɔ ge̍ de ɛ̍lɛ hye̍ēyī wa̍a̍ wā la ɔhɔ̄leyī la ɔ̄chī ɔkwɛ̍ɛjī. 40Wu̍chē oji̍ nɛ, ɔjā nūma̍ i̍ngɛ̍ɛ̄nɛ̄ nīi A̍dā yī u chikpo̍ a̍nɛ: Āchɛ wa̍a̍ nīi - ɛ̍lɛ ge̍ ma̍ Ɔyi̍ yī Ɔwɔ chɛ̄ku ɔ̍lɔ, ɛlɛjā ɛ̍lɛ ge̍ē lɛ ɔhɔ̄leyī i̍mɔ̄mɛni̍. N chī ge̍ē de wa̍ ē hye̍ēyī la okū la ɔ̄chī ɔkwɛ̍ɛjī.”
41Āchɛ yī Iju̍u gblāa abɔ̍ɔ ē ta̍ Iji̍sɔ̄ɔsi iru wu̍chē yī lɛlā nīi o̍ ka hīka anɔ̍lɔ - ojōre̍ nīi - ɔ̍lɔ bū la ichō wā la ajɛ a̍nɛ ma̍. 42Wu̍chē yī ɔla̍ā, e̍ ka bɛ̍ɛ̄nɛ̄ hīka, “Je̍ka ɔngrɔ̄ɔ nūma̍ re̍ka Iji̍sɔ̄ɔsi a̍nɛ? Je̍ka aa̍ anu̍ - ɔyi̍ yī Ijo̍sɛ̄ɛfu a̍nɛ? Ɔ̄chɛ nīi alɔ je̍ a̍dā yī nū ba̍la ɛ̍nɛ̍ yī nū ma̍/. Kana̍ nīi o̍ chōo̍chē ge̍ē ka hīka anɔ̍lɔ bū la ichō wā la ajɛ ma̍?”
43Iji̍sɔ̄ɔsi da wa̍ hīka, “Ala̍ ā cho̍cho̍ la i̍ngwrī nīi ala̍ gblāa aa̍ ē gwo̍ ma̍! 44Ɔ̄chɔ̄chɛ i̍ ge̍ē wā dikpo̍ba̍ u ē mɛ ni̍, ɔ̍chi̍kpa̍kpa̍ Ɔwɔ A̍dā nīi de u tɛ̄rɔ̄ ma̍ pi ɔlɔjā bla̍a ami o̍bū. N chī ge̍ē de ɔlɔjā hye̍ēyī wā la ɔhɔ̄leyī la ɔ̄chī ɔkwɛ̍ɛjī. 45Āchɛ ɔkɛrɔ̄ yī Ɔwɔ ka i̍ngɔ̍ɔ: Ɔwɔ ɔ̍lɔ ē ngū āchɛ wa̍a̍ lɛlā a̍nɛ. Ɔ̄chɛmɔ̄chɛ nīi ge̍ pɔ̍ɔkɔ yī Ɔwɔ A̍dā, ngū lɛlā bū la abɔ̄ yī nū ma̍; o̍ ē wā dikpo̍ba̍ u. 46Ɔla̍ā i̍ re̍ka ɔ̄chɛ ɔha̍ ma̍ Ɔwɔ A̍dā la eyī je̍ ni̍. Ɔ̍chi̍kpa̍kpa̍ ɔ̄chɛ nīi bū ba̍la Ɔwɔ ma̍, anu̍ ma̍ Ɔwɔ A̍dā a̍nɛ. 47Lēchi̍-lēchi̍, n ā koko̍o de ala̍! Ɔ̄chɛ nīi ge̍ de ɔtū che u, ɔlɔjā ge̍ē lɛ ɔhɔ̄leyī i̍mɔ̄mɛni̍. 48Ami - ojōre̍ yī ɔhɔ̄leyī a̍nɛ. 49Aa̍ ɔ̍kɔ̄kū yī ala̍ nīi re̍ ima̍na i̍chɔ̍lɔ lipu̍ a̍chi̍ ma̍ pīyaku̍ kpɔ̍ɔ̍. 50Ita yī ojōre̍ nūma̍ nīi bū la ichō wā ma̍, ɔ̄chɛ nīi ge̍ re̍, ɔlɔjā i̍ ge̍ē ko̍ōku̍ ge̍ē gbo̍ ni̍. 51Ami re̍ka ojōre̍ yī ɔhɔ̄leyī ɔla̍ā nīi bū la ichō wā ma̍ a̍nɛ. Ɔ̄chɛ nīi ge̍ re̍ ojōre̍ nūma̍, ɔlɔjā ge̍ē hɔ̄leyī ku yɛ̄grāa i̍kwɛ̍ɛjī oko̍ōku̍ ni̍. Ojōre̍ ɔla̍ā nīi n ge̍ē de ē de ɔlɔjā ma̍ - ɛbɛ̍ yī ibi̍īyē yī u nɛ. Anu̍ nīi n ge̍ē de hɛ̄ɛbɛ nīi yɛchɛ wa̍a̍ ē de ē wōwi a̍nɛ.”
52Lɛlā nūma̍ nīi Iji̍sɔ̄ɔsi ka ma̍ ya̍ nīi Iju̍u ɛla̍ā wa̍a̍ kū la ahu̍ ɔta̍ iyī wā ɔtɔ̍ɔ̄ta̍ bāa ochi̍chi̍ ma̍: Kana̍ nīi ɔngrɔ̄ɔ nūma̍ ɔ̍lɔ u̍tu ge̍ē de ɛbɛ̍ yī ibi̍īyē yī ɔ̍lɔ ē de aa̍ ka aɛ̍lɛ ge̍ re̍ ma̍/?
53Iji̍sɔ̄ɔsi ka de wa̍ hīka, “Lēchi̍-lēchi̍, n ā koko̍o de ala̍! Ala̍ i̍ ge̍ re̍ ɛbɛ̍ yī ibi̍īyē yī Ɔyi̍ yī Ɔngrɔ̄ɔ gba̍a gwa̍ yeyī yī nū ni̍, ala̍ i̍ ge̍ē lɛ ɔhɔ̄leyī lipu̍ yī ibi̍īyē yī ala̍ ni̍. 54Ɔ̄chɛ nīi ge̍ē re̍ ɛbɛ̍ yī ibi̍īyē yī u gba̍a gwa̍ yeyī yī u, ɔlɔjā ge̍ē lɛ ɔhɔ̄leyī i̍mɔ̄mɛni̍. N chī ge̍ē de ɔlɔjā hye̍ēyī wā la ɔhɔ̄leyī la ɔ̄chī ɔkwɛ̍ɛjī. 55Wu̍chē oji̍ nɛ, ɛbɛ̍ yī ibi̍īyē yī u - ojōre̍ lēchi̍ lēchi̍ nɛ. Yeyī yī u chī - ɔjā ɔgwɔ̍ɔ̄gwa̍ lēchi̍ lēchi̍ nɛ! 56Ɔ̄chɛ nīi ge̍ re̍ ɛbɛ̍ yī ibi̍īyē yī u gba̍a gwa̍ yeyī yī u, o̍ re̍ka ɔlɔjā hɔ̄ la ami, ami titi hɔ̄ la ɔ̄chɛ ɔlɔjā. 57Ɔwɔ A̍dā nīi hɔ̄leyī ma̍ de u tɛ̄rɔ̄ a̍nɛ. Anu̍ chī ohu̍ nīi ami hɔ̄leyī i̍ngi̍ngɔ̍ɔ a̍nɛ. Ɔ̄chɛ nīi ge̍ re̍ ɛbɛ̍ yī ibi̍īyē yī u, i̍ngi̍ngɔ̍ɔ nīi ɔlɔjā ge̍ē hɔ̄leyī wu̍chē yī u a̍nɛ. 58Onūma̍, anu̍ re̍ka ojōre̍ nīi bū la ichō wā la ajɛ a̍nɛ. O̍ i̍ lɛ bāa ojōre̍ ɔla̍ā nīi aa̍ ɔ̍kɔ̄kū yī ala̍ re̍ o̍bū gba̍a pīyaku̍ mɛ ma̍ ni̍. Onūma̍ ma̍, ɔ̄chɛ nīi ge̍ re̍, ɔlɔjā ge̍ē hɔ̄leyī kpɛɛ ē ku yɛ̄grāa ɔha̍lɔha̍.”
59Iji̍sɔ̄ɔsi kɛlā nūma̍ yɛ̄grāa nīi o̍ yɛ ē ngū āchɛ lɛlā abɔ̍ɔ la u̍nu̍ ogrēeyī la Ikapa̍num ma̍.
Lɛlā yī ɔhɔ̄leyī i̍mɔ̄mɛni̍
60Āchɛ yɛ̄mɛ̄mɛ̄ nīi - a̍chi̍kpo̍ yī Iji̍sɔ̄ɔsi gblāa abɔ̍ɔ plɛ̍ɛ̄lā nūma̍ ma̍ ka hīka lɛlā iyi̍ ɔ̍lɔ lichi̍ i̍ngɔ̍ɔ nīi ɔ̍lɔ ē ngū āchɛ ma̍/? Ɔ̄nyɛ ɔ̍lɔ ge̍ē chɛ̄ darɔ̄ku ita yī lɛlā nūma̍ ē po̍ ɔ̍lɔ ē mɛ ma̍?
61Ɔ̄chɔ̄chɛ i̍ kɔ̄ka de Iji̍sɔ̄ɔsi o̍bū ni̍, o̍ de jo̍ōkū ɔpɔ̄ɔpɛ̄ hīka ɛ̍lɛ yɛ ē gwo̍ i̍ngwrī wu̍chē lɛlā ɔla̍ā. Wu̍chē yī ɔla̍ā, o̍ da a̍chi̍kpo̍ yī nū hīka, “O̍ re̍ka ūkpɔ̄tū ti̍ya ala̍ tū wu̍chē yī lɛlā nūma̍? 62O̍ ge̍ re̍ka ala̍ ma̍ Ɔyi̍ yī Ɔngrɔ̄ɔ nīi o̍ ku̍chē pīya yɛ gāa ɛbɛ nīi o̍ hɔ̄ o̍bū ma̍ bɛ̍ɛ? 63Ala̍ ma̍ ko̍ō! Uhu yī Ɔwɔ ē de ɔhɔ̄leyī a̍nɛ. Wɔhu̍ yī ɔ̄chɛ̄ɛchɛ i̍ tū ɛpiyabuna ɔha̍lɔha̍ ni̍. Lɛlā ɔla̍ā nīi n ka de ala̍ ma̍ - Uhu yī Ɔwɔ ba̍la ɔhɔ̄leyī ke̍e̍ nɛ. 64Ala̍ āchɛ ɛha̍ chī gba̍a chɛ̄ku u ni̍ kpɔ̍ɔ̍.” Iji̍sɔ̄ɔsi ɔlɔjā je̍ āchɛ wa̍a̍ nīi i̍ ge̍ē chɛ̄ku ɔ̍ ni̍ ma̍ bū la owu̍tu. O̍ je̍ ɔ̄chɛ nīi ge̍ē chɔ̄ɔwɛ ē tū ɔ̄ ma̍ lɔ̄lā mɛ̍. 65O̍ gba̍a ka bɛ̍ɛ̄nɛ̄ hīka, “Wu̍chē yī lɛlā nūma̍, anu̍ - ohu̍ nīi n koko̍o de ala̍ a̍nɛ: Ɔ̄chɔ̄chɛ i̍ ge̍ē wā dikpo̍ ē ba̍ u ē mɛ ni̍, ɔ̍chi̍kpa̍kpa̍ Ɔwɔ A̍dā ge̍ē ya̍ nīi o̍ ē wā mɛ a̍nɛ.”
66Wu̍chē yī lɛlā nūma̍, alikpɛ̍ɛ yī nū yɛ̄mɛ̄mɛ̄ pīya okwi̍ihi ta̍ ɔ̄. E̍ i̍ chɛ̄ yɛ ba̍la anu̍ gɛ ni̍. 67Bū la ɛbɛ ɔla̍ā, Iji̍sɔ̄ɔsi che a̍chi̍kpo̍ yī nū ikpo̍ hīka, “Ala̍ titi, ala̍ chikpo̍ ge̍ē pīya ē hī u i̍ngi̍ngɔ̍ɔ?”
68Isa̍yi̍mɔ̄ɔn Ipi̍ta hīya anu̍ ɔkɔ hīka, “Ādā, ɔ̄nyɛ nīi alɔ ge̍ē gba̍a ē pīya ē dikpo̍ ē ba̍ ɔ̄ ma̍? Awɔ chī - lɛlā ɔla̍ā nīi ē de ɔhɔ̄leyī i̍mɔ̄mɛni̍ ē de ɔ̄chɛ a̍nɛ. 69U̍ma̍ama, alɔ chī jo̍ōkū de chɛ̄ku wɔ mɛ̍ hīka awɔ re̍ka Ɔ̄chɛ Ɔnɛ̄ɛhɛhi Ɔla̍ā nīi bū la abɔ̄ yī Ɔwɔ ma̍ a̍nɛ.”
70Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Je̍ka n hu ala̍ āchɛ igwo̍lɛpa ohōhu? Ɔ̄chɛ ūkpo̍he lipu̍ yī ala̍ chī - Ɔngūwɛ̄gā i̍ngɔ̍ɔ ke̍e̍ nɛ.” 71Lɛlā yī Iju̍dasi ɔyi̍ yī Isa̍yi̍mɔ̄ɔn Isikɛ̍rīyɔti nīi Iji̍sɔ̄ɔsi yɛ ē ka a̍nɛ. Iju̍dasi - ɔ̄chɛ ɔha̍ lipu̍ yī āchɛ igwo̍lɛpa ɛla̍ā nɛ; o̍ chī yɛ abɔ̍ɔ ge̍ē chɔ̄ɔwɛ ē tū abā yī nū kpɔ̍ɔ̍.
Nu markerat:
Ijɔ̍ɔn 6: YBASR
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2020 Bible Society of Nigeria (second edition)
