Keriekitho 8
8
Dzüdi Tseiketa
1Siro Kepenuopfüe Noah mu puo ze rou nu ketuo nhachüko pete, perinuo pete rükralie sidi puo teikhrie puo chüpie kijüu gei rükhrie vorshü tse dzüu rükre keta. 2Kijüu gei dzüluo kesouko mu teigei dzü khirkiko khawata. Tei rei rü sa mota. 3Süsie zha krie puo di hiepengou sie dzüu rükre miemie tsuta. 4Sidi khrü thenieu khrü zha kerethenie nhie rouu tsu Ararat kijüthou ro-u gei kijüthou puo gei bata. 5Mu khrü ker-u ketso dzüu rükre miemiezhü, sidi khrü ker-u khrü zha puo nhie kijüthou züko ngu parta.
6Zha hiedia thela ki Noah rouu gei keziekou puo khrüshü, 7di shüzha puo pepruoshü mu dzüu kijü gei rükre tseita kemochie pruo rühou tuota. 8Süsie Noah-e kijü zieu gei dzüu sotazhü mo mo shikecü mehoketuo la mekhru puo pepruo lashü. 9Derei dzüko kijüko zepfü ba zokecü la mekhruu ba thusekelie chü ngulie mo di pruo la puo ki rouu pfhü vorta. Süla puoe puo dzie yhase pra mekhruu pielie di se puo ki rouu nu lerta. 10Puo zha thenie ge ba di rouu geinu mekhruu pepruo lashü. 11Mu harie, sünhie thevatie mekhruue oliv nyü kerhei puo medupie puo ki vor. Süla Noah-e dzüu kijü nunu sotakezhü silie. 12Puoe zha thenie ba lalie di mekhruu ketse lashü, ru süu la puo ki vor mota.
13Noah-e cie krie sorou di puo keta ki thekhrü kerieu nu zha puo nhie kijüu gei dzüko sota. Sitse Noah-e rou keyau biewa, di mha mehoshü, ru kijüu sotazhükecü ngulie. 14Khrü kenieu khrü zha mepfüethenie nhie kijüu sota. 15Sitse Ukepenuopfüe Noah ki, 16“N kimia, n nuonuoko mu uko nupfünuoko ze di rouu nunu tuo pralie. 17N ze ketuo kerheiro kenyi khe mu kijü gei gou ketuo khe ze parlie, uko bu kijüu gei kruolie mu kralieketuo la.” 18Sitse Noah-e rouu nunu puo kimia, puo nuonuoko mu uko nupfünuoko ze parlie. 19Khunuo pete kijü gei gou ketuo khe mu perako pete kijü nu mele tuoyakezha khe u thuo u kro-u ze phre di rouu nunu chazou prata.
Noah Ruosuo Chükeshü
20Sitse Noah-e Jihova la ruosuoba puo chülie, sidi nhachü mu pera kemesa kheko nunu se vo ruosuobau geinu kethe ruosuo chüshü. 21Jihovae ruosuo re keviu puo neilie di puo nou nu, “Cüsie a themia la kijüu rüse sa lhote, puo sü puo nhicu nunu puo noudoko suo zeru. Mhakipuorei a tsieu va chükeshü tuoi kerheiro pete peka salie lhote.
22“Kijüu keba chie,
tsiacie mu lieyie tei ba zotuo.
Kemeku mu kele, teile tsiu teisei,
teiso mu teizei bu jütalie lho.”
Nu markerat:
Keriekitho 8: ANBRBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
The Bible Society of India
© 2023, Used by permission. All rights reserved. More