ᤕᤢᤜᤢᤴᤏᤠ 6
6
ᤕᤧᤛᤢᤖᤧ ᤜᤧᤴᤇᤡᤱ ᤅᤠᤛᤡ ᤔᤏᤠᤜᤠ᤹ ᤆᤠᤈᤠ᤺ᤳᤋᤢᤛᤡ᤹
(ᤔᤳᤋᤡ ᥇᥊:᥇᥉-᥈᥇; ᤔᤷᤁᤢ ᥌:᥉᥆-᥊᥊; ᤗᤢᤁᤠ ᥏:᥇᥆-᥇᥍)
1ᤕᤠᤱᤛᤡ ᤕᤧᤛᤢᤴ ᤃᤠᤗᤡᤗ ᤘᤠᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤐᤣ॥ (ᤂᤧᤱᤃ ᤋᤡᤒᤣᤖᤡᤕᤛ ᤘᤠᤖᤰᤁᤠᤱ ᤔᤧᤔᤧᤳᤋᤢᤖᤥ॥) 2ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤍᤢᤰᤐᤠᤜᤠ᤹ ᤘᤣ᤺ᤴᤍᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤔᤧᤏᤡᤛᤢᤀᤠᤱ ᤔᤧᤘᤕᤧᤖᤥ॥ 3ᤕᤧᤛᤢᤴ ᤌᤥ ᤁᤥ᤺ᤰᤔᤠᤀᤥ ᤐᤣ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤢᤱᤛᤡᤱᤗᤥ॥ 4ᤂᤧᤴ ᤕᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧ ᤆᤢᤖᤧᤀᤠᤱ ᤘᤕᤧᤖᤥ॥
5ᤜᤧᤰᤁᤩᤠᤱ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤔᤧᤎᤠᤅᤧᤖ ᤔᤧᤒᤳᤇᤧᤒᤠ ᤕᤧᤛᤢᤖᤧ ᤏᤡᤛᤢᤛᤡᤀᤠᤱ ᤑᤡᤗᤡᤵᤐᤧᤴ ᤛᤣ᤺ᤴᤍᤥᤛᤢ. “ᤀᤠᤸᤗ ᤀᤠᤳᤋᤡᤏᤢ ᤂᤖᤧ᤺ᤱᤅᤡᤴ ᤀᤠᤀᤡᤅᤢᤶᤔᤠᤱ ᤁᤴ ᤔᤏᤠᤜᤠ᤹ ᤀᤠᤈᤠ᤺ᤳᤋᤢᤶᤛᤡᤶᤒᤠᤒᤣ᥅” 6ᤂᤢᤏᤧ᤹ ᤑᤡᤗᤡᤵᤐᤧᤴ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤑᤠ᤹ᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤒᤠᤖᤥ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤌᤣ ᤆᤥᤃᤢᤱ ᤁᤧᤗ᤹ᤒᤠᤴ ᤋᤃᤡᤛᤠ ᤁᤢᤏᤡᤱᤘᤠ᤹ᤀᤥ ᤘᤕᤧᤖᤥ॥
7ᤑᤡᤗᤡᤐᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡ᤹ᤃ ᤁᤡᤵ ᤏᤧᤳᤇᤡ (᥈᥆᥆) ᤕᤠᤱᤗᤧ#᥌:᥍ ᤃᤪᤡᤁ ᤐᤠ᤺ᤴᤍᤠᤱᤅᤥ ᤁᤡᤵ ᤏᤧᤳᤇᤡ (᥈᥆᥆) ᤍᤡᤏᤠᤖᤡ ᤐᤥᤱᤗᤥ॥ ᤂᤧᤴ ᤑᤠ᤹ᤀᤡᤴ ᤌᤡᤰᤐᤠᤖᤧ ᤕᤧᤳᤇᤡ (᥎) ᤗᤠᤀᤥ ᤌᤃᤢᤒᤠ ᤕᤠᤱ ᤕᤠᤖᤡᤰ ᤐᤥᤱᤗᤥ॥ ᤌᤡᤰ ᤍᤡᤏᤠᤖᤡ ᤑᤠ᤹ᤀᤡᤴ ᤌᤡᤰ ᤕᤢᤵᤐᤠ ᤕᤠᤅᤡᤳᤇᤡ ᤐᤥᤱᤗᤥ॥ ᤂᤖᤧ᤺ᤱ ᤀᤠᤀᤡᤅᤢᤶᤔᤠᤱ ᤁᤴ ᤔᤏᤠᤜᤠ᤹ᤃ ᤆᤩ᤹ ᤆᤩ᤹ᤖᤰ ᤀᤠᤒᤡᤖᤢᤶᤛᤡᤶᤛᤠᤱ ᤀᤠᤴᤕᤥᤛᤢᤶᤛᤡᤶᤔᤡᤴᤗᤥ॥”
8ᤜᤧᤰᤁᤩᤠᤱ ᤕᤧᤛᤢᤖᤧ ᤘᤣ᤹ᤛᤔᤠ ᤁᤢᤜᤢ᤹ᤛᤠᤶᤒᤠ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. 9“ᤁᤵᤔᤥ ᤆᤢᤰᤐᤠᤎᤡᤰᤗᤧ ᤅᤠᤛᤡ ᤜ᤺ᤰᤛᤡ᤺ ᤂᤖᤧ᤺ᤱ ᤏᤢ ᤏᤧᤳᤇᤡ ᤅᤠᤛᤠ ᤁᤳᤋᤢ᤹. ᤁᤖ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤕᤥᤔᤠᤛᤡᤒᤣ᥅”
10ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤢᤖᤠ ᤔᤧᤳᤋᤢᤛᤡ. “ᤁᤧᤖᤧᤰ ᤔᤏᤠᤜᤠ᤹ ᤕᤢᤱ ᤐᤠᤱᤄᤧᤶᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤡᤰ ᤕᤠᤴ ᤁᤧᤕᤢᤱᤒᤠ ᤏᤧᤏᤧᤒᤠ ᤋᤧᤴᤏᤥ ᤕᤢᤱᤔᤧᤒᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤵᤔᤥ ᤔᤧᤴᤇᤢᤔᤠ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤅᤠᤛᤡ (᥋.᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥ 11ᤕᤧᤛᤢᤖᤧ ᤂᤧᤴ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤜᤠ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤅᤠᤛᤠ᤺ᤴᤏᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤡ᤹ ᤕᤥᤕᤥ ᤜᤠ᤺ᤳᤋᤢᤛᤡᤖᤥ॥
12ᤂᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤛᤢᤵᤛᤧᤶᤔᤧ᤹ᤀᤥ. ᤁᤢᤈᤡᤌᤡᤰᤁᤠᤱ ᤆᤠᤔᤧᤛᤥ᤺ᤰᤏᤧᤴᤗᤖᤥ॥” 13ᤜᤧᤰᤁᤩᤠᤱ ᤂᤧᤴ ᤅᤠᤛᤡ ᤜ᤺ᤰᤛᤡ ᤂᤖᤧ᤺ᤱᤜᤠ᤹ ᤔᤏᤠᤜᤠ᤹ᤖᤧ ᤔᤧᤈᤀᤠᤱ ᤁᤢᤈᤡ ᤁᤧᤏᤶᤒᤠ ᤂᤖᤧ᤺ᤱᤜᤠ᤹ ᤔᤧᤛᤢᤵᤛᤢᤸᤗᤧᤃ ᤌᤡᤰ-ᤏᤧᤳ ᤏᤀᤡᤔᤠᤏᤧ ᤋᤡᤶᤛᤧ᥄
14ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤔᤧᤏᤡᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ ᤗ᤹ᤖᤡᤰ ᤏᤡᤱᤛᤠᤱ ᤆᤥ᤺ᤰᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤱᤃ ᤛᤧᤰᤂᤠᤛᤠᤱ ᤂᤢᤏᤧ᤹ᤀᤣᤖᤥ॥” 15ᤔᤏᤠᤜᤠ᤹ᤖᤧ ᤛᤠᤰᤁᤧᤸᤗᤧᤰᤁᤠᤱ ᤂᤢᤏᤡ᤹ ᤜᤠᤱᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤢᤏᤧ᤹ ᤀᤧᤰᤗᤣ᤺ᤰ ᤌᤥ ᤁᤥ᤺ᤰᤔᤠᤀᤥ ᤐᤣᤖᤥ॥
ᤕᤧᤛᤢᤴ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣ᤺ᤰ
(ᤔᤳᤋᤡ ᥇᥊:᥈᥈-᥉᥉; ᤔᤷᤁᤢ ᥌:᥊᥋-᥋᥈)
16ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤴ ᤁᤥ᤺ᤰᤔᤠᤀᤥᤗᤠᤶ ᤕᤥ ᤔᤧᤎᤩᤧᤀᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤧᤛᤢᤴ ᤔᤧᤜᤠᤱᤄᤢᤖᤥ॥ 17ᤁᤖ ᤂᤠᤍᤠᤔᤧᤛᤠᤱ ᤂᤢᤏᤧ᤹ ᤂᤧᤵᤔᤥ ᤔᤧᤕᤧᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤔᤧᤗᤠᤛᤧᤀᤠᤱ ᤏᤠᤜᤠᤱᤍᤠᤱ ᤁᤐᤷᤏᤜᤢᤔ ᤐᤠᤱᤈᤢᤶ ᤗᤧᤵᤔᤠᤱ ᤔᤧᤎᤠᤛᤡᤱᤗᤥ॥ 18ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤘᤖᤰᤁᤥ ᤁᤡᤵᤔᤠ ᤁᤧᤄᤢᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤐᤥᤃᤧᤖᤥ॥ 19ᤂᤧᤱᤜᤠ᤹ ᤅᤠᤛᤡ-ᤋᤢᤰᤛᤡ (᥋-᥌) ᤁᤡᤗᤥᤔᤡᤋᤖ ᤔᤧᤒᤣᤀᤠᤱ ᤔᤧᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤜᤰᤆᤄᤳ ᤕᤧᤛᤢᤴ ᤆᤫᤠ᤺ᤳᤋᤥ ᤗᤠᤱᤄᤣᤃᤧᤖ ᤂᤢᤏᤡ᤹ ᤐᤣᤛᤠᤱ ᤑᤧᤖᤧᤖ ᤐᤳᤇᤧᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥ 20ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤕᤣᤛᤢᤀᤠ. ᤔᤧᤃᤡᤛᤧᤶᤔᤡᤴᤏᤧ᤹॥”
21ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤛ᤺ᤳᤋᤧᤖ ᤂᤢᤏᤧ᤹ ᤂ᤺ᤱᤒᤣᤀᤥ ᤔᤧᤕᤢᤰᤂᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤒᤠ ᤋᤧᤴᤏᤥ ᤂᤡᤔᤥ ᤂᤢᤏᤡ᤹ ᤂ᤺ᤱᤒᤣᤴ ᤁᤧᤖᤧᤖᤥ॥
ᤜᤡᤱᤔᤴᤗᤧᤴ ᤂᤖᤧ᤺ᤱ
22ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤌᤡᤰᤗᤰ ᤂ᤺ᤱᤒᤣᤴ ᤏᤧᤛ᤻ᤛᤧᤒᤠ ᤔᤧᤏᤡᤛᤢ ᤜᤧᤰᤁᤩᤠᤱ ᤕᤧᤛᤢᤴ ᤂ᤺ᤱᤒᤣᤀᤥ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤔᤧᤗᤠᤛᤧᤶᤒᤠ ᤁᤖ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤰ ᤔᤧᤒᤣᤒᤠ ᤐᤠ᤺ᤴᤏᤡᤴ ᤁᤢᤍᤠ᤺ᤴᤍᤡᤰᤔᤠᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ॥ 23ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤏᤥᤃᤧᤴ ᤐᤡᤖᤢᤀᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤂᤖᤧ᤺ᤱᤜᤠ᤹ ᤔᤧᤈᤒᤠ ᤋᤧᤴᤏᤡᤸᤗᤧ ᤁᤢᤒᤣᤛᤠᤱ ᤋᤡᤒᤣᤖᤡᤕᤛ ᤕᤧᤰᤕᤰᤁᤥᤏᤢ ᤁᤢᤓᤠ ᤂ᤺ᤱᤒᤣᤜᤠ᤹ ᤂᤧᤵᤔᤥ ᤔᤧᤃᤧᤖᤧ॥ 24ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤜᤥᤵ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤕᤠᤶᤔᤥ ᤂᤧᤴ ᤔᤏᤠᤜᤠ᤹ ᤂᤧᤴ ᤂ᤺ᤱᤒᤣᤜᤠ᤹ᤀᤥ ᤔᤧᤗᤠᤛᤧᤀᤠᤱ ᤏᤠᤜᤠᤱᤍᤠᤱ ᤁᤐᤷᤏᤜᤢᤶᤔᤥ ᤕᤧᤛᤢᤖᤧ ᤁᤢᤃᤥ᤺ᤳᤇᤧ ᤔᤧᤒᤣᤖᤥ॥
25ᤂᤧᤱᤜᤠ᤹ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤧᤖᤧᤸᤗᤧ ᤕᤧᤛᤢᤴ ᤔᤧᤍᤢᤔᤢᤀᤠᤱ ᤛᤣ᤺ᤴᤔᤧᤍᤥᤛᤢ “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤵᤑᤠᤸᤗᤧ ᤁᤵᤔᤥ ᤁᤧᤓᤧᤖᤧᤒᤣ᥅”
26ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤁᤧᤏᤡᤛᤢᤶᤔᤠᤱ ᤔᤣ᤺ᤴ. ᤁᤖ ᤂᤠᤄᤠ ᤂᤖᤧ᤺ᤱᤅᤡᤴ ᤁᤧᤈᤠᤶᤔᤠᤱᤏᤧ ᤕᤠᤵᤔᤡ ᤁᤧᤃᤥ᤺ᤳᤋᤡᤒᤠᤖᤥ॥ 27ᤂᤡᤏᤡ᤹ ᤆᤠᤃᤧᤛᤥ᤺ᤰᤐᤠᤀᤠᤱ ᤁᤧᤒᤣ᤺ᤰᤐᤠ ᤁᤢᤈᤠᤖᤧ ᤗᤠᤃᤡ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤐᤡᤏᤡᤱᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤌᤠᤖᤡᤰ ᤁᤧᤎ᤺ᤵᤐᤠ ᤁᤢᤈᤠᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠᤜᤧᤰᤁᤣ ᤆᤥ᤺ᤰᤛᤧᤀᤣ ᤀᤡᤱᤃᤠ᤹ ᤕᤢᤰ ᤐᤡᤖᤠᤱᤅᤠᤱ ᤘᤠ᤹ᤖᤥ॥
28ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤌᤣ ᤆᤥᤃᤢᤶᤒᤧᤒᤠ ᤏᤡᤱᤘᤠ᤹ ᤀᤡᤋᤢᤒᤣ᥅”
29ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤱᤃ ᤂᤢᤏᤧ᤹ ᤐᤠᤱᤄᤢᤒᤠ ᤔᤏᤠᤴ ᤏᤛᤠᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢ᤹ᤖᤥ॥”
30ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤀᤠᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤁᤧᤈᤥᤃᤢᤀᤠᤱ ᤀᤠᤏᤡᤃᤣ ᤏᤛᤠᤴ ᤆᤥ᤺ᤰᤁᤠᤛᤡᤃᤧᤒᤠᤒᤣ᥅ ᤀᤠᤏᤡᤃᤣ ᤗᤠᤃᤡ ᤂᤧᤏᤧ᤹ ᤌᤣ ᤁᤧᤈᤥᤃᤢᤒᤣ᥅ 31ᤀᤠᤏᤡᤃᤣ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧᤃ ᤕᤧ᤺ᤱᤄᤠᤍᤧᤴᤏᤥ ᤔᤴᤏᤠ᤺ᤴ ᤔᤧᤈ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤖᤧ᤺ᤱᤅᤡᤴ ᤆᤠᤔᤠ ᤐᤡᤖᤢᤛᤡᤖᤥ॥’”#᥌:᥉᥇ ᤗᤠ ᥇᥌:᥊. ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ ᥍᥎:᥈᥊ ᤀᤥ ᤀᤥᤔᤧᤳᤋᤧ᤹॥ ᤔᤡᤛᤪᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤁᤏᤠᤏ ᤗᤧᤵᤔᤠᤱ ᤗᤠᤶᤍᤡᤰ ᤔᤧᤈᤥᤃᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤧ᤺ᤱᤄᤠᤍᤧᤴᤏᤥ ᤛᤠᤱᤃᤪᤠᤶᤐᤣᤍᤠᤱᤗᤠᤶ “ᤔᤴᤏᤠ” ᤔᤧᤵᤔᤏᤠᤒᤠ ᤁᤢᤈᤠ ᤌᤠᤛᤢ ᤐᤡᤖᤢᤛᤡᤖᤥ॥
32ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤥᤛᤠᤖᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤂᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤣ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤴ ᤛᤧᤰᤂᤠᤒᤠ ᤂᤖᤧ᤺ᤱᤅᤡᤴ ᤐᤠᤏᤢᤍᤡᤱ ᤀᤠᤶᤒᤠᤖᤧᤏᤧ ᤁᤧᤒᤡᤖᤡᤒᤠᤖᤥ॥#᥌:᥉᥈ ᤕᤜᤢᤍᤡᤜᤠ᤹ᤖᤧ ᤗᤠᤃᤡ ᤁᤠᤰᤏᤢ ᤁᤧᤕᤧᤰᤐᤠ ᤆᤠᤔᤠ ᤁᤢᤈᤠ ᤂᤖᤧ᤺ᤱ ᤘᤕᤧ॥ ᤔᤥᤛᤠᤖᤧ ᤐᤡᤖᤢᤛᤡᤒᤠ ᤂᤖᤧ᤺ᤱᤅᤡᤴ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤗᤠᤃᤡ ᤘᤕᤧ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤂᤖᤧ᤺ᤱᤅᤡᤱᤃ ᤕᤧᤛᤢᤴ ᤗᤥ॥ 33ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤁᤢᤄᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢᤒᤠᤀᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠᤴᤏᤣᤖᤥ॥”
34ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤴ ᤂᤖᤧ᤺ᤱᤅᤡᤴ ᤛᤍᤠᤍᤡᤱ ᤕᤠᤵᤔᤡ ᤀᤠᤒᤡᤖᤧ᤹ᤀᤥ॥”
35ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ. ᤀᤡᤱᤃᤠ᤹ᤀᤥ ᤁᤧᤍᤠᤒᤠᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤛᤧᤳᤔᤧᤗᤠ᤺ᤰᤏᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥᤰᤐᤧᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴᤗᤥ॥ 36ᤁᤖ ᤀᤡᤱᤃᤠ᤹ ᤕᤠᤵᤔᤡ ᤀᤠᤃᤧᤏᤡ᤺ᤛᤡᤛᤠᤱ ᤏᤛᤠᤴ ᤀᤠᤃᤧᤴᤈᤥᤃᤡᤴ ᤑᤠ᤹ᤀᤠᤱ ᤛᤧᤰᤂᤠᤀᤣ ᤔᤧᤳᤏᤡᤱᤅᤠᤱ ᤘᤠ᤹ᤖᤥ॥ 37ᤐᤠᤏᤢᤍᤡᤱ ᤐᤠ᤺ᤸᤗᤧ ᤐᤡᤀᤠᤒᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤔᤧᤍᤠ᤹᤺. ᤜᤧᤰᤁᤩᤠᤱ ᤀᤠᤳᤋᤡᤴ ᤀᤡᤱᤃᤠ᤹ᤀᤥ ᤋᤠ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤢᤱᤅᤡᤴᤗᤥ॥ 38ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤠᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤛᤧ ᤔᤧᤴᤍᤠᤒᤧᤴᤗᤥ ᤁᤖ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥ᤺ᤰᤛᤧ ᤐᤠᤱᤄᤠᤱᤅᤠᤱ ᤋᤩᤠᤱᤒᤠᤖᤥ॥ 39ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤡᤖᤠᤱᤒᤠ ᤗᤳᤌᤡᤰᤁᤠᤱ ᤔᤧᤶᤔᤠᤀᤣ ᤁᤳᤋᤢᤱᤛᤡᤱᤗ ᤜᤧᤰᤁᤩᤠᤱ ᤁᤢᤏᤢᤵᤔᤠ ᤕᤧᤴᤏᤥ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗ ᤁᤧᤗ᤹ᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ 40ᤌᤣᤀᤠᤱᤓᤧᤸᤗᤧ ᤁᤢᤛ᤻ᤛᤠᤴ ᤁᤧᤏᤡᤒᤠᤀᤠᤱ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥᤛᤢᤖ ᤁᤧᤗ᤹ᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ ᤜᤧᤰᤁᤩᤠᤱ ᤁᤢᤏᤢᤵᤔᤠ ᤕᤧᤴᤏᤥ ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗᤥ॥”
41ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ᤖᤧ “‘ᤕᤧᤛᤢᤖᤧ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢᤒᤠ ᤂᤖᤧ᤺ᤱᤀᤠ’” ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤩᤧᤏᤧᤴᤏᤠᤱ ᤔᤢᤏᤢᤰᤏᤢᤰ ᤗ᤹ᤔᤠ ᤔᤧᤜᤣ᤺ᤰᤋᤧᤖᤥ॥ 42ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤁᤴ ᤕᤢᤛᤢᤑᤖᤧ ᤁᤢᤛ᤻ᤛᤠ ᤕᤧᤛᤢᤴ ᤔᤣ᤺ᤶᤒᤡ᥅ ᤁᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤀᤠᤏᤡ᤹ ᤁᤢᤛᤡᤱ ᤀᤠᤴᤏᤡ᤺ᤳᤋᤢᤶᤛᤡᤶᤔᤡᤶᤒᤡ᥅ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤀᤠᤱ ᤂᤧᤸᤗᤧ ‘ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤋᤩᤠᤱᤒᤠ’ ᤐᤠ᤺ᤵᤔᤠ ᤛᤢᤰᤋᤢᤒᤠᤒᤣ᥅”
43ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤔᤢᤏᤢᤰᤏᤢᤰ ᤔᤧᤗ᤹ᤖᤧᤶᤔᤡᤴᤏᤧ᤹. 44ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤔᤏᤠᤜᤠ᤹ ᤀᤡᤱᤃᤠ᤹ᤀᤥ ᤋᤠᤔᤠ ᤏᤡᤱᤘᤠ᤹ ᤔᤧᤒᤡᤖᤢᤴᤛᤡᤴᤗ ᤌᤠᤖᤡᤰ ᤀᤠᤳᤋᤡᤴᤏᤠᤱ ᤀᤡᤱᤃᤠ᤹ᤀᤥ ᤋᤠᤔᤠ ᤔᤧᤴᤇᤢᤰᤏᤧᤴᤗᤥ॥ ᤂᤧᤱᤜᤠ᤹ ᤔᤧᤍᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤁᤢᤏᤢᤵᤔᤠ ᤕᤧᤴᤏᤥ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗᤥ॥ 45ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤛᤠᤵᤐᤴᤏᤥ ᤀᤰᤂᤣᤗ᤹ᤖᤡᤰ ᤔᤧᤛᤠᤵᤋᤢᤀᤠᤱ ᤐᤳ. ‘ᤂᤧᤱᤜᤠ᤹ᤃ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤢ᤹ᤖᤢᤛᤡᤒᤠ ᤔᤧᤒᤥᤱᤗᤥ॥’#ᤕᤛᤤ ᥋᥊:᥇᥉ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤒᤠᤴ ᤁᤧᤄᤧᤶᤒᤠᤜᤠ᤹ ᤏᤢ ᤂᤢᤏᤧ᤹ᤗᤠᤶᤒᤠ ᤁᤧᤜᤢ᤹ᤛᤡᤱᤒᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤔᤧᤍᤠᤖᤥ॥ 46ᤀᤠᤳᤋᤡᤸᤗᤧᤀᤠᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤏᤡᤀᤣ ᤘᤠ᤹ᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠᤒᤠᤸᤗᤧᤖᤰ ᤏᤡᤛᤢᤀᤠᤱ ᤘᤠ᤹ᤖᤥ॥ 47ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤏᤛᤠᤴ ᤁᤧᤈᤥ᤺ᤰᤐᤧᤴᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤘᤠ᤹ᤖᤥ॥ 48ᤀᤡᤱᤃᤠ᤹ᤀᤣ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥ 49ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤕᤧ᤺ᤱᤄᤠᤍᤧᤴᤏᤥ ᤔᤴᤏᤠ ᤔᤧᤈᤛᤠᤱ ᤔᤧᤛᤩᤧᤖᤥ॥ 50ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤂᤖᤧ᤺ᤱᤅᤡᤴ ᤁᤵᤔᤥ ᤘᤠ᤹ᤖᤥ. ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤴ ᤆ᤺ ᤂᤧᤴ ᤔᤧᤛᤡᤏᤧᤴᤗᤥ॥ 51ᤀᤡᤱᤃᤠ᤹ᤀᤣ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥ ᤜᤠ᤺ᤳᤗᤧ ᤁᤴ ᤂᤖᤧ᤺ᤱᤅᤡᤴ ᤆ᤹᤺ ᤂᤧᤱᤃ ᤛᤍᤠᤍᤡᤱ ᤜᤡᤱᤗᤥ॥ ᤁᤴ ᤂᤖᤧ᤺ᤱᤅᤡᤱᤃ ᤏᤠᤛᤡᤱᤃᤧᤴ ᤀᤠᤎᤰᤁᤡᤴᤏᤣᤖᤥ॥#᥌:᥋᥇.᥋᥈-᥋᥍ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤀᤠᤏᤧᤰᤛᤠ” ᤛᤠᤵᤋᤧᤀᤠᤱ ᤐᤳᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤁᤴᤏᤡᤴ ᤐᤡᤖᤢᤱᤛᤡᤱᤗᤥ॥”
52ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤗᤢᤶᤔᤥ “ᤁᤴ ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰᤁᤠᤱ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤆᤠᤔᤠ ᤑᤠ᤹ᤀᤠᤱ ᤐᤡᤔᤠ ᤀᤠᤛᤢᤰᤐᤠᤒᤣ᥅” ᤔᤧᤒᤠ᤺ᤳᤋᤢᤖ ᤐᤠ᤺ᤴᤎᤱ ᤆᤥ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥
53ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤧᤴᤇᤠᤶᤛᤠ᤺ᤸᤗᤧ ᤁᤢᤎᤰᤁᤡᤴ ᤔᤧᤴᤈᤠᤀᤣ ᤏᤢ ᤁᤢᤔᤠᤰᤂᤡ᤹ᤀᤡᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤂᤡᤏᤡ᤹ᤀᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤘᤠ᤹ᤏᤧᤴᤗᤥ॥ 54ᤁᤖ ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠ ᤏᤢ ᤀᤠᤔᤠᤰᤂᤡ᤹ ᤁᤧᤎᤢᤱᤒᤠᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤁᤢᤏᤢᤵᤔᤠ ᤕᤧᤴᤏᤥ ᤀᤡᤱᤃᤠ᤹ ᤁᤢᤜᤡᤱᤘᤧᤳ ᤆᤥᤃᤢᤱᤗᤥ॥ 55ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤎᤰᤁᤡᤴ ᤜᤧᤰᤁᤩᤠᤱ ᤀᤠᤔᤠᤰᤂᤡ᤹ᤀᤡᤴ ᤛᤧᤰᤂᤠᤒᤠ ᤆᤠᤔᤠ ᤌᤢᤱᤔᤠ ᤆᤠᤖᤥ॥ 56ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠᤴ ᤏᤢ ᤀᤠᤔᤠᤰᤂᤡ᤹ ᤁᤧᤎᤢᤱᤒᤠᤴ ᤀᤡᤱᤃᤠ᤹ᤀᤥ ᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤧ᤹ᤀᤥ ᤘᤠ᤹ᤀᤠᤖᤥ॥ 57ᤜᤡᤱᤔᤴᤍᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤐᤠᤱᤄᤠᤱ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤸᤗᤧ ᤜᤡᤱᤅᤠᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠᤴᤏᤠᤱ ᤀᤡᤱᤃᤠ᤹ ᤆᤥᤃᤢᤱᤅᤡᤸᤗᤧ ᤜᤡᤱᤗᤥ॥ 58ᤁᤴ ᤀᤠᤎᤰᤁᤡᤴᤏᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤂᤖᤧ᤺ᤱᤗᤥ॥ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤔᤴᤏᤠ᤺ᤴ ᤔᤧᤈᤀᤠᤱ ᤔᤧᤛᤩᤧ ᤁᤖ ᤁᤴ ᤂᤖᤧ᤺ᤱᤅᤡᤴ ᤁᤧᤈᤠᤒᤠᤱᤃ ᤛᤍᤠᤍᤡᤱ ᤜᤡᤱᤗᤥ॥” 59ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤁᤐᤷᤏᤜᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤜᤢ᤹ᤖᤢᤛᤡᤸᤗᤧ ᤐᤠ᤺ᤳᤋᤢᤒᤠᤖᤥ॥
ᤕᤖᤡᤰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤋᤡᤶᤔᤠ ᤔᤧᤗᤧᤖᤢ᤹
60ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤖᤡᤰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤐᤠ᤺ᤴᤏᤡᤱᤃ ᤁᤧᤛᤠᤰᤐᤠ ᤏᤡᤛᤠᤶᤗᤥ॥ ᤁᤴ ᤜᤠ᤺ᤳᤗᤧ ᤏᤠ᤺ᤵᤔᤠ ᤛᤢᤰᤋᤢᤒᤣ᥅”#᥌:᥌᥆ ᤕᤜᤢᤍᤡ ᤛᤠᤶᤕᤥᤌᤡᤶᤔᤥ ᤔᤠᤰᤂᤡ᤹ ᤆᤠᤔᤠ ᤔᤧᤴᤏᤢ᤹ᤔᤏᤠ ᤌᤡᤶ ᤘᤕᤧ. ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥
61ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤢᤏᤢᤰᤏᤢᤰ ᤔᤧᤗ᤹ᤖᤧᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤂᤛᤢᤒᤡ᥅ 62ᤔᤧᤴᤇᤠᤶᤛᤠᤴ ᤋᤃᤡ ᤀᤠᤳᤋᤡ ᤘᤕᤧ ᤂᤧᤵᤔᤥᤀᤣ ᤕᤠᤶᤔᤥ ᤏᤢ᤺ᤱ ᤐᤣ᤺ᤰᤐᤠ ᤂᤡᤏᤡ᤹ ᤁᤧᤏᤡᤛᤢᤶᤔᤡᤸᤗᤧ ᤀᤠᤰᤂᤣ ᤁᤧᤒᤠ᤺ᤳᤋᤢᤶᤒᤣ᥅ 63ᤛᤣᤛᤣᤔᤠᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤀᤠᤒᤡ᤹ᤖᤥ. ᤁᤖ ᤔᤧᤴᤇᤠᤶ ᤌᤢᤶᤔᤡᤸᤗᤧ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤐᤠ᤺ᤴᤈᤠᤰᤜᤠ᤹ ᤕᤠᤶᤛᤠᤶ ᤏᤢ ᤜᤡᤱᤔᤴᤗᤥ॥ 64ᤁᤖ ᤂᤡᤏᤡ᤹ᤀᤥ ᤁᤢᤓᤠᤖᤧ ᤀᤡᤱᤃᤠ᤹ ᤏᤛᤠᤴ ᤀᤠᤃᤧᤴᤈᤥᤃᤡᤴ॥” (ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤁᤢᤜᤣ᤺ᤰᤛᤡᤱᤔᤥᤏᤢᤀᤣ ᤀᤠᤳᤋᤡᤴᤜᤠ᤹ᤖᤧ ᤂᤢᤏᤧ᤹ ᤏᤛᤠᤴ ᤔᤧᤴᤈᤥᤃᤢᤴ ᤜᤧᤰᤁᤩᤠᤱ ᤜᤠ᤺ᤳᤗᤧ ᤂᤢᤏᤧ᤹ ᤀᤡᤱᤗᤧᤰᤋᤢ᤹ ᤁᤧᤗ᤹ᤒᤠᤴ ᤏᤡᤛᤢᤀᤠᤱ ᤘᤕᤧᤖᤥ॥) 65ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤂᤧᤸᤗᤧᤆᤥᤃᤢᤸᤗᤧᤀᤣ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤔᤧᤶᤒᤡᤀᤣ ᤌᤠᤖᤡᤰ ᤀᤡᤱᤃᤠ᤹ᤀᤥ ᤋᤠᤔᤠ ᤔᤧᤴᤇᤢᤰᤏᤧᤴᤗᤥ ᤗ᤹ᤖᤡᤰ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤒᤠ ᤂᤧᤴᤗᤥ॥”
66ᤁᤴ ᤕᤧᤶᤔᤠᤱᤎᤥ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤐᤰᤔᤧᤎ᤺ᤀᤠᤱ ᤔᤧᤒᤣᤖᤥ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤕᤠᤶᤔᤥ ᤗᤠᤱᤔᤧᤱᤄᤣ᤺ᤃᤧᤴᤗᤥ॥
67ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ᤀᤠᤱ ᤕᤠᤵᤔᤡ ᤀᤠᤃᤧᤗᤧᤖᤡ᤹ᤀᤠᤱ ᤁᤧᤒᤣᤃᤡᤒᤠᤒᤡ᥅”
68ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤜᤠ᤺ᤳᤗᤥ ᤐᤣᤃᤡᤃᤧᤒᤠᤒᤣ᥅ ᤂᤧᤏᤧ᤹ᤖᤰ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤐᤠ᤺ᤴᤈᤠᤰᤁᤡᤴ ᤁᤧᤃᤳᤋᤢ᤹ᤖᤥ॥ 69ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠᤱᤄᤧᤒᤠ ᤛᤣᤛᤣ ᤁᤢᤔᤏᤠ᤺ᤴᤏᤧ᤹ ᤑᤠ᤹ᤀᤠᤱ ᤀᤠᤏᤡᤃᤣ ᤏᤡᤛᤢᤶᤒᤧ ᤜᤧᤰᤁᤩᤠᤱ ᤏᤛᤠᤴ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥”
70ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤡᤏᤡ᤹ ᤌᤡᤰᤏᤧᤳᤜᤠ᤹ ᤛᤣ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ. ᤁᤖ ᤂᤡᤏᤡ᤹ᤀᤥ ᤌᤡᤰᤁᤡᤴ ᤔᤠᤑᤧᤴᤛᤠᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥” 71(ᤕᤧᤛᤢᤖᤧ ᤌᤡᤰ-ᤏᤧᤳ ᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤛᤡᤔᤥᤏ ᤀᤡᤛ᤻ᤁᤖᤡᤕᤥᤋᤖᤧ ᤁᤢᤛ᤻ᤛᤠ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤀᤠᤱ ᤘᤕᤧ॥ ᤂᤧᤸᤗᤧ ᤋᤠ᤺ᤴᤍᤡ ᤂᤢᤏᤧ᤹ ᤀᤡᤱᤗᤧᤰᤋᤢ᤹ᤖᤥ॥)
Nu markerat:
ᤕᤢᤜᤢᤴᤏᤠ 6: LIFOTNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2009, 2023, Wycliffe Bible Translators, Inc. All rights reserved.
