1Akabambu Akolongu 1
1
Bambu nkolongu Daudi mu useja waki
1Kipindi hesi Bambu nkolongu Daudi jwabiya nseja ngani, akatumisi baki bunhyekalia kwi libulangeti, lakini hata hela ngase jwawesa kupata lyotu. 2Ndienu atumisi baki bumpwagila, “Wabambu nkolongu witu, nambanga tugutaputi kamwali jwangakuwai kugone na mwanalomi jugutumakia nukugutunza, jugonila pulutengu jaku ili guwesa kupata lyotu.” 3Ndipala bataputa kamwali jojunyambiki kati ja bandu Aizilaeli boti, jwapatikana kamwali jumwa jojunyambiki joankemika Abishagi, kuhuma ku musi uku Shunami, nabombi bumpelika kwaka bambu nkolongu. 4Kamwali hoju, jwanyambiki ngamaa. Ndienu jwatumbulia kuntumaki nukuntunza bambu nkolongu, lakini bambu nkolongu ngase jwagoni naku.
Adoniya jupala kuba bambu nkolongu
5Kipindi hesi, Adonia mwana waka Daudi, jojuwe anyongo baki baakemika Hagiti, jatumbulia kuligamba sukupwaga, “Nepeni ndi nenibiya bambu nkolongu.” Ndienu, jiliandalia magali gukuhutwa na falasi na bandu baakwelale falasi pamu na bandu hamusini babundongulia koni ajombateka. 6Lakini atati baki ngase bawaiki kundosa mwanamundu, “Boo, ndaba jaki guhengiki hela”? Adoniya jwabii nkombu jojunyambiki ngani, na jabiya nnuna waka Abisalumu. 7Adoniya jalongila majambu na Yoabu mwana waka Seluya, nu nngolu Abiatali, nabombi bajetakiya kunnzangati. 8Lakini nngolu Sadoki na Benaya mwana waka Yehoyada, na nndota Nasani na Shimei na Lei pamu na akalonda baka Daudi ngasebabi pamu na Adoniya.
9Lisoba limu Adoniya jwapiya litambiku lilikondoo, na ng'ombi na matoli gagakendiki ku lilibu la Zoheleti, pambipi na pandu papatimbilikana masi pabapakema Enilogeli. Jaakoka akalongu baki boti baka bambu nkolongu Daudi, na akanalomi boti buku Yuda bababiya akakilongosi baka bambu nkolongu. 10Lakini Adoniya ngaseakokiki, nndota Nasani na Benaya na akalonda baka bambu akolongu na Solomoni nndongu waki.
Solomoni anhimika kuba bambu nkolongu
11Ndienu, Nasani jajenda kwaka Batisheba amabu baka Solomoni, andalukia, boo, ngase gujowini kubanga Adoniya mwana waka Hagiti, jilihengiti kuba bambu nkolongo na bambu witu Daudi ngasejumanyiki lijambu hele? 12Henu anagupala kulilamisa kutama kwaku wamweti nukulamisa kutama kwaka mwana waku Solomoni, guhenga ana, 13Gujenda kwaka bambu nkolongu Daudi, gukundalukiya ana, wabambu nkolongu wangu, ngase wanapi nepani nutumisi waku kupwaga, “Mwana waku Solomoni jwiilongusa badala jangune na jwiitama panani jikiteu sangu su ulongose.” Enukubii bolee mbona Adoniya julihengiki kuba bambu nkolongu badala jangu nepane? 14Na ewibiya wakona gulonge na bambu nkolongu, “Nepani niijingala nukupwaga gajulongi haga ga sakaka.”
15Ndienu, Batisheba jajenda kusumba jaka bambu nkolongu. Kipindi sesela bambu nkolongu jwabii nseja ngani, najombi Abishagi kamwali jwa musi uku Shunami jwabia jutenda kuntunza. 16Batisheba jwajinama, nukungungamali bambu nkolongu, najombi bambu nkolongu andalukia, “Gupala kyane?”
17Batisheba jwajibua, “Wabambu wangu wanapila nepani nutumisi waku palongi jaka Bambu Sapanga waku, kupwaga, ‘Mwana waku Solomoni jwiilongusa badala jangune na jwiitama panani jikiteu sangu su ubambu ukolongu.’ 18Henu gulinga, Adoniya jutenda kulongosa hata ngati wehapa wabambu nkolongu witu ngasegumanyiki majambu haga. 19Jupiiki matambiku ga ng'ombi, na makondoo gingi na matoli gagakendiki, na jwaakokiki bana boti baka bambu nkolongu, nngolu Abiatali, na Yoabu nu nkolongu jwa akaalonda, lakini ntumisi waku Solomoni ngaseakokiki. 20Henu sajenu wabambu nkolongu wangu, Aizilaeli boti atenda kugulendale, ili waapwagila nya jojibia bambu nkolongu badala jako wabambu nkolongu wangu. 21Anangahela, kipindi pe wabambu nkolongu wangu pawikuwa, nepani pamu na mwana wangu Solomoni batubalanga kuba tubii na makosa.”
22Kipindi Batisheba pajwabiya julongee na bambu nkolongu, nndota Nasani jwajingala mu nyumba jaka bambu nkolongu. 23Nabombi bandu bumpwagila bambu nkolongu, “Nndota Nasani jubii pamba.” Najwombi Nasani pabunhikila bambu nkolongu, japega magoti nukujinama mbaka pai. 24Ndienu Nasani japwaga, “Boo wabambu nkolongu wangu, watangasa lee, Adoniya ndi jwiibiya bambu nkolongu badala jaku nukubanga jwiitama pikiteu saku su ubambu ukolongo? 25Ndaba lelenu juheli nukupia matambiku ga ng'ombi na makondoo gingi na matoli gagakendiki na jwaakemiki bana baku boti akanalomi, Yoabu nkolongu wa akalonda na nngolu Abiatali. Ndienu, akula na kunywa palongi jaki, koni apwaaga, ‘Gutama masoba gingi wabambu nkolongu Adoniya!’ 26Lakini ngasejwangokiki nepani, nuntumisi waku wala nngolu Sadoki wala Benaya mwana uka Yehoyada wala mwana waku Solomoni. 27Boo, goti aga ugahengiki wehapa wabambu wangu, bambu nkolongu, sanga kwaapwagi akatumisi baku mundu jojitama pikiteu saku su ubambu ukolongu bambu wangu badala jako?”
28Najombi bambu nkolongu Daudi jwajibua, “Nngemila Batisheba.” Batisheba jwahika kuka bambu nkolongu nukujema palongi jaki. 29Ndipala bambu nkolongu jwapwaaga, “Napa kwaka Bambu Sapanga jojahokwi womi wangu kuhuma mu mang'aliku goti ganaketangini naku mu kutama kwangu, 30sakaka isinhenga lelenu sela senugulapila palongi jaka Bambu Sapanga, Sapanga jwa bandu Aizilaeli napwaga, ‘Mwana waku Solomoni jwiilongusa badala jangu nepani, na jwiitama pikiteu sangu su ubambu badala jangu paniikuwa.’”
31Ndipala Batisheba japega magoti nukujinama mbaka pai, angungamalia bambu nkolongu, nu kupwaga “Wabambu wangu, bambu nkolongu Daudi, gutama masoba goti!”
32Ndienu bambu nkolongu Daudi jwapaga, “Ngemila nngolu Sadoki nu nndota Nasani na Benaya mwana uka Yehoyada.” Nabombi bahika kwaka bambu nkolongu. 33Najombi bambu nkolongu jwaapwagila, “Mwaajukua atumisi baka bambu nkolongu winu na mukunkwelisa mwana wangu Solomoni panani ja falasi mukahelala naku mbaka pandu papatimbilikana masi ku Gihoni. 34Hoku nngolu Sadoki nu nndota Nasani bukunnzakania mahuta ili kunhimika jubiya bambu nkolongu juku Izilaeli, mwenikatai mwiijemba imbata nukupwaga, ‘Bambu nkolongu Solomoni jutama masoba goti!’ 35Ndienu mwiikwela naku, najombi jiihika nukutama pikiteu sangu su ubambu ukolongu nukulongosa badala jangu. Hoju ndi jonunhagwi jwaalongusa bandu Aizilaeli na bandu buku Yuda.”
36Ndienu Benaya mwana waka Yehoyada pajunzibua bambu nkolongu, “Henaa! Bambu Sapanga waka bambu nkolongu wangu juhenga ngati hegupwagiki. 37Ngati Bambu Sapanga ejabii pamu na bambu nkolongu wangu, jubiya kabee na Solomoni, na juguhenga ubambu waki ubiya na makili nu jubiya bambu nkolongu kupeta wehapa wa bambu nkolongu wangu Daudi.”
38Ndienu nngolu Sadoki, nndota Nasani na Benaya mwana waka Yehoyada, na Wakelesi na Apelesi bababi alonda baka bambu nkolongu Daudi, bunkwelisa Solomoni mu falasi jaka bambu nkolongu Daudi, nukunhindaki mbaka ku pandu papatimbilikana masi ku Gihoni. 39Ndienu nngolu Sadoki jajukua linyelu lelibii na mahuta kuhuma mu Lihema la Sapi nukunzakanii mahuta Solomoni ili jubiya bambu nkolongu. Ndipala bajemba imbata, na bandu boti bapwaga, “Jutama masoba gingi bambu nkolongu Solomoni!” 40Ndienu bandu boti bakwela bumpwata koni ajemba pelemba nukutogule ngamaa, mbaka nndema watenda kubagaja kwa sauti jabu.
41Henu Adoniya pamu na ageni baki bajabii nabu bijijowana sauti heji pababiya ajomule matola gabu. Ebajowana sauti ji imbata, Yoabu jwalalukia, “Keleli yoti ayee yeijowaneka kumusi mana jaki kike?” 42Ejabiya jakona julongela, kumbi Yonasani mwana uku nngolu Abiasali jatenda kuhika. Ndienu Adoniya jwapwaga, “Jingala nkati, ndaba wehapa wa mundu waamboni na guleta majambu gaamboni.”
43Ndipala Yonasani anzibua Adoniya, “Ngahela ndaba bambu nkolongu Daudi anhimiki Solomoni kuba bambu nkolongu. 44Najombi bambu nkolongu antuma pamu na nngolu Sadoki nu nndota Nasani na Benaya mwana waka Yehoyada na makundi mabeli ga alonda baka bambu nkolongu, bunkwelisi mu falasi jaka bambu nkolongu, 45nu nngolu Sadoki nu nndota Nasani bunzakani mahuta Solomoni pandu papatimbilikana masi ku Gihoni ili jubiya bambu nkolongu. Baboka pala koni atogule ndi ndaba gujowana sauti heji. 46Sajenu Solomoni ndi bambu nkolongu. 47Kabee akatumisi baka bambu nkolongu bahika kunhupa bambu witu Daudi koni apwaga, ‘Sapanga waku jwilihenga lihina laka Solomoni kuba likolongu kupeta lihina laku, na kabee jwikikwea kiteu su ulongosi kupeta kiteu saku.’ Najombi bambu nkolongu Daudi jajinama nukulumbali pikitanda saki, 48nu kuloba koni jupwaga, ‘Julumbalika Sapanga jwa Aizilaeli, joanhengiki mwana wangu jwikibeleku sangu kuba bambu nkolongu badala jangu, na jojunhengiki ndama mbaka nagabona aga.’ ”
49Ndienu ageni boti baka Adoniya babiya nulujogopu ngani, na batenda kupesangana. 50Najombi Adoniya kwa ndaba anzogopa Solomoni, jwatilila ku Lihema laka Bambu Sapanga jakakamula kona ja mesa ja malibu jukupiiki matambiku ili juwesa kulama. 51Bambu nkolongu Solomoni bumpwagila kubanga Adoniya jutili ku lihema la Sapi na jukamwi mu manyelu ja mesa ja malibu ju kupiiki matambiku koni jupwaga, “Ngamoki pani mbaka bambu Solomoni pajwinapila kubanga ngajaapwagi bandu angoma.”
52Bambu Solomoni jwapwaga, “Ananumbweni kuba jwanga na makosa, ngajipati mang'aliku gokape. Lakini ananumbweni kubanga jubii ni kihakau, kupalika jwiikuwa.” 53Ndienu, bambu nkolongu Solomoni jwalagalakia bukunkema Adoniya kuhuma mu Lihema la Sapi jujenda kwaki. Adoniya jwahika palongi jaka bambu nkolongu, jwajinama kwi isima. Bambu nkolongu ampwagila, “Gujenda kunyumba jaku.”
Nu markerat:
1Akabambu Akolongu 1: MaBV
Märk
Dela
Jämför
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in Matengo Language ©The Word for the World International and Matengo Language Translation, 2020. All rights reserved.