1Akabambu Akolongu 2
2
Daudi ampekee Solomoni malobi ga mwisu
1Daudi pajabiya pambipi na kuwa, ankema mwanamundu Solomoni, andagalakia malobi kupwaga, 2“Mwana wangu ngati ekuyobaliki ihumbi yoti itenda kuwa, masoba gangu gajomwike. Gubiya nganganganga na weguwesa. 3Guhenga malagalaki gala goti gaguge Bambu Sapanga, Sapanga waku, gajugulagalaki guhenga, wagajetakiya malagalaki gaki goti ni mihilu jaki joti ngati ejuandiki mu kitabu Musa ili majambu gugujendila sapi nukuwesa mu kila lihengu leguhenga na kokapi kowijenda, 4ili Bambu Sapanga juwesa kutimisa lilagi laki lejambwagila kubanga, ana bandu bi kibeleku sangu bagajetakia malagalaki gaki nukuntumaki sanga kuhenga ubaja kwa mwoju wabu woti, ngajwikosikani mundu kati jabu kwaalongosa bandu buku Izilaeli mu ipindi yote.
5“Kupeta haga, wehapa gumanyiki gajandendila Yoabu, mwana waka Seluya, namuna ejwaatendila akaakolongu ba alonda abeli buku Izalaeli, Abineli mwana uka Neli na Amasa mwana waka Yesili. Jwaakoma kipindi bandu atama sulukwali, ili kulepesa kisasi kwa ndaba ja majambu gagapiti kipindi sa ngondu. Jwaakoma bandu banga na makosa, henu ng'alika kwa ndaba ja majambu gajahengiki. 6Ndienu, henga sewikibona ndi sa sapi kuhenga lakini wanndekaa jusejika na kuwa su lukwali.
7“Lakini waatendila saamboni bana baka Balizilai mundu juku Gileadi, na waabeka abiya akula pamesa, ndaba banhengi gaamboni panuntila mmbeli waku Abisolomu.
8“Kabee, jubii Shimei mwana waka Gela wi likabila laka Benjamini kuhuma ku Bahulimu, jojuwe jwanapila mbamba nukundondo ngamaa panajenda ku Mahanaimu. Lakini pajahika kumbengana ku losi lwa Yoludani, nundapila ku lihina laka Bambu Sapanga numpwagila, ‘Nganugukomi sukutumi upanga.’ 9Lakini wehapa wandeka sanga kumpekee azabu. Wehapa gubii na malangu na wiimanya sewanhengila, nkoma hata jukubi nseja.”
Daudi jutenda kuwa
10Daudi jwatenda kuwa na buntaga ku musi gobugukema musi waka Daudi. 11Jalongusa nndema uku Izilaeli kwa yaka alubaini. Yaka saba jalongusa pajabii kumusi uku Hebuloni na yaka selasini ni mitatu jalongusa pajabii ku Yelusalemu. 12Ndienu, Solomoni jwatamila kiteu su ubambu badala ja atati baki Daudi nu ubambu ukolongu waki wabiya na makili.
Adoniya jutenda kuwa
13Mwenikatai, Adoniya mwana waka Hagiti, jwajenda kuka Batisheba, babube ndi amabu baka Solomoni. Batisheba andalukia, “Boo, guhikiki sulukwale?”
Adoniya jwajibua, “Henaa, nhikiki su lukwali, 14lakini, mi ni lijambu limu pena lukugupwagila.”
Batisheba apwagila, “Gupwaga pena.”
15Adoniya ampwagila, “Gumanyiki kubanga nepani nakabiya mi bambu nkolongu, hata bandu buku Izilaeli boti bahobalia nguba bambu nkolongu. Lakini, majambu gatenda kung'anambuka nu nndongu wangu jwabiya bambu nkolongu kulengana na ejapala Bambu Sapanga. 16Henu mi ni lilobi limwa pena noba wiinganila.”
Batisheba ampwagila, “Pwaga pena.”
17Najombi jwapwaga, “Gupepa koku nuguloba gunndoba bambu nkolongu Solomoni juneka nuntola Abishagi mmbomba juku Shunami, ili jubiya nhwanu wangu kwa ndaba manyiki ngajwagukani wehapa.”
18Batisheba ampwagila, “Hena, niilongila na bambu nkolongu kwa ndaba jaku.”
19Ndienu, Batisheba jwajenda kwaka bambu nkolongu Solomoni ili kulonge naku kwa ndaba jaka Adoniya. Bambu nkolongu jwajumuka nukujenda kwapengana amabaki, jwaajinamia nu kutama pikiteu saki su ulongosi. Jwalagalakia aleta kiteu sengi su ubambu kwa ndaba jukutami amabaki na bombi batama upandi ukumalele waka bambu nkolongu. 20Batisheba jwapwaga, “Mii nililobi lisokopi gupepa koku gulijetakia nuguloba wiinganila.”
Bambu nkolongu apwagila, “Gulongilaje lilobi lako anyongo bangu, ndaba nganukanile.”
21Nabombi amabu baki bapwaga, “Gundeka nndogu waku Adoniya antola Abishagi, mmbomba juku Shunami hojo.”
22Bambu nkolongu Solomoni jwaalalukia amabaki, “Ndaba ja kike gupala numpekia Abishagi? Hoku mbona kulengana pena nukuloba ubambu ukolongu wango! Kupeta hagaa jwombi ndi mmbeli wangu, na gukombuka kubanga nngolu Abiatali nu nkolongu jwa akomana ngondu Yoabu mwana waka Seluya abii upandi wake!” 23Pala ndi bambu nkolongu Solomoni jwalapa kwi lihina laka Bambu Sapanga, kupwaga, “Sapanga jungomila kutali ana Adoniya ngajwiikuwi kwa ndaba jukuloba lilobi ale! 24Henu, kwi lihina laka Bambu Sapanga jojubii mwomii, jojumei nukuhenga miya na makili mu ubambu ukolongu gwa atati bangu Daudi na jojatimisa malagi gaki jwambekia ubambu ukolongu nepani na bandu bikibeleku sangu, napa kubanga lelenu Adoniya kupalika jukuwa!”
25Ndipala bambu nkolongu Solomoni andagalakia Benaya mwana uka Yehoyada najombi jwajenda kuka Adoniya nunkukoma.
Yoabu atenda kunkoma
26Bambu nkolongu Solomoni ampwagila nngolu Abiatali, “Guboka gujenda ku nngonda waku ku Anatoti, wehapa gupalika guwaa! Lakini sajenu, nganugukomi kwa ndaba watotwi Lisanduku li Lilaganu laka Bambu Sapanga pawabii na atati bangu Adaudi, wang'alika pamu na bombi.” 27Ndienu, bambu nkolongu Solomoni ambenga Abiatali jwiikuba nngolu uka Bambu Sapanga, nukutimisa lilobi lejapwaga Bambu Sapanga ku Shilu, lelalongalia nyumba jaka Eli ni kibeleku saki.
28Yoabu ejapata majambu haga jwatilila ku Lihema laka Bambu Sapanga nu kukamulaki nkona ja mesa ja malibu jukupiiki matambiku, kwa ndaba jajongini na Adoniya lakini ngaseampwatiki Abisalomu. 29Bambu nkolongu Solomoni ejajowana kubanga Yoabu jubii mu Lihema laka Bambu Sapanga na jukamulaki nkona ja mesa ja malibu jukupiiki matambiku, antuma Benaya mwana uka Yehoyada, nukumpwagi, “Jenda ukunkoma.” 30Ndipala Benaya jwajingala mu Lihema laka Bambu Sapanga, apwagila Yoabu, “Bambu nkolongu julagalaki gupita kunza.”
Yoabu jwajibua, “Nepani ngamoke, isinguwa pambane.”
Benaya jwakelabuka nukundandi bambu nkolongu gajapwaga Yoabu.
31Solomoni japwaaga, “Henga ngati ejupwagiki, gunkoma nukuntaga ili jumokia nepani na nyumba jangu mahakau ga mwai gwanga na makosa sukwakoma bandu banga na makosa. 32Bambu Sapanga ampekia azabu Yoabu kwa ndaba jakakoma bandu sanga atati bangu kumanya majambu haga. Jwaatukalia bandu abeli nakwakoma, sukutumi upanga, boti Abineli mwana waka Neli jojwabii kilongosi jwa akomana ngondu buku Izilaeli, na Amasa mwana uka Yeteli kilongosi wa akomana ngondu buku Yuda, bandu haba babiya bamboni na baajetakeka palongi jaka Bambu Sapanga kupeta jwombi. 33Makosa gukwakoma hoku gibiya panani jaka Yoabu ni kibeleku saki yaka yoti. Lakini kwaka Daudi ni ibeleku yaki, nyumba jaki ni kiteu saki su ubambu, kwiibiya nu lukwali yaka yoti.”
34Ndienu, Benaya mwana waka Yehoyada, jwajenda ku Lihema, nukunkoma Yoabu nukuntaga ku nnyumba jakii, kunyumba jaki jejabii kulungwenza. 35Bambu nkolongu ambeka Benaya mwana uka Yehoyada, kuba kilongosi jwa akomana ngondu badala jaka Yoabu, na ambeka Sodoki jwabiya nngolu badala jaka Abiatali.
Shimei jutenda kuwa
36Ndienu bambu nkolongu jwalagalakia bunkema Shimei, ampwagila, “Gulisengila nyumba mombo mu musi uku Yelusalemu, gutama pamba sanga kujenda pandu pangi pokapi. 37Lisoba lewiboka nukuloboka kalosi ka Kidiloni, nukupwagi kyee wiitenda kuwa, kuwa kwaku kwiibiya sukupala wamweti.”
38Shimei jwajibua, “Sapi bambu nkolongu wangu. Ngiti nhenga ngati egupwaga.” Ntumisi waku jiihenga ngati wa bambu wangu nkolongu egupwagiki, jombi jwatama ku musi uku Yelusalemu kipindi kilasu.
39Lakini eyapeta yaka itatu, atumwa abeli baka Shimei batenda kutila, bajenda kuka Akishi mwana waka Maaka, bambu nkolongu juku Gati. Hejwamanyaa kubanga abii ku musi uku Gati, 40Shimei jwakwela piliponda laki, jwajenda hoku ili kwaataputa, kuka bambu nkolongu Akishi. Ndipala jwahika nukwabona jwaakelabua kunyumba. 41Bambu nkolongu Solomoni hebumpwagila kubanga Shimei juboi mu musi uku Yelusalemu nu kujenda ku musi uku Gati, nu kukelabuka, 42ankema Shimei nu kundalukia, “Boo, ngasenugulapisi kwi lihina laka Bambu Sapanga kubanga ngawiboki kumusi uku Yelusalemu, ngase nugupwagi kubanga, sakaka wiitenda kuwa lisoba lewiboka kujenda pokape? Nawe watenda kujetake, wambwagila, ‘Niihenga ngati egupwagiki wa bambu nkolongu wangu.’ 43Mbona henu ngasegukamwi segunndapila Bambu Sapanga na ngase gupwatiki malagalaki ganugupekyaje?” 44Bambu nkolongu jwaendalia kumpwagi Shimei, “Wamweti ugamanyiki mabaja gagugahenga kwa atati bangu Daudi ndi kwa ndaba ja haga, Bambu Sapanga jwagupekia wehapa azabu. 45Lakini bambu nkolongu Solomoni isijutenda kumbenge, ni kiteu su ubambu siihendalia kuba na makili palongi jaka Bambu Sapanga yaka yoti.”
46Ndipala, bambu nkolongu anndagalakia Benaya mwana waka Yehoyada, najombi jwajenda kundimanga nukunkoma Shimei. Ndienu ubambu ukolongu wabiya na makili ngani mu ulongosi uka Solomoni.
Nu markerat:
1Akabambu Akolongu 2: MaBV
Märk
Dela
Jämför
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in Matengo Language ©The Word for the World International and Matengo Language Translation, 2020. All rights reserved.