1Akabambu Akolongu 7
7
Nyumba jaka bambu Solomoni
1Solomoni julisengila nyumba jaki, na batumia yaka komi na tatu mbaka kujomoka. 2Ndienu jwasenga nyumba jejijikema Kitengu suku Lebanoni. Ulasu waki wabiya meta alubaini nu nsesi na nusu, nu upana waki wabiya meta ishilini na mbili na lobu, nu ulasu waki gukujenda kunani wabiya meta komi na tatu na nusu. Jabii ni misitali nnsesi yi mikongu ji mielezi, mipengu jejakamulakia maboliti gi mikongu ji mielezi ku upandi uku nani. 3Kila safu jabiya ni mipengu komi nu nhwanu, ndienu mipengu joti pamu jabiya alubaini nu nhwanu. Yumba yejasengiki kunani ji ligolu, jakomangaliya mipengu ji mikongu mielezi mipendi kumi nu nhwanu kwa kila safu jimu. 4Kwabiya na safu itatu ya mandilisa gagabia galingalani. 5Milyangu joti jabiya ja kona nsesi na pelemu ya mandilisa yabiya ni ipemu yeilengana pandi yoti.
6Jwasenga sengu sukutumi mipengu, jejuje ulasu waki wabiya meta ishilini na mbili na lobu nu upana waki wabiya meta komi na tatu na nusu. Palongi ja nyumba heji pabii na sengu. Palongi ja sengu kwabii ni mipendi na palongi ji mipengu papitila kapagaa kasoku.
7Solomoni jwasenga sengu ji Kiteu su ulongosi momuje ndi jwabia jutemuli magambu ga bandu. Heji ndi bijikema Sengu ju Kutemulila. Jabiya bijipambiki kwi imbau yi mikongu ji mielezi kutumbuli pai mbaka kunani kukipagaa.
8Nyumba jaki jukutama mweni jabii kunyuma ja Sengu ju Kutemulila, jabiya jisengiki ngati yengi yela. Kabee Solomoni jasenga nyumba ngati sengu kwa ndaba jaka kamwali waka Falau, jojuwe jwabia annzukwi.
9Nyumba heyi yoti yabiya isengikwi kwa malibu ga bei ngolongu tumbuka pai mbaka kunani, malibu gehaga gabiya bagabasiki kwi ipemu yeipalika, nukusekuliwa kwa pukuswanzi upandi wa kunza nu nkati. 10Misingi ja nyumba heyi jabiya bijisengiki kwa malibu ga bei ngolongu na makolongu gagabi nu ulasu wa meta itatu na nusu nu upana wa meta nsesi na nusu. 11Pandu pupanani basengiki sukutumi malibu ga sapi ngani gabugabasiki kwi ipemu yeipalika, na kwi imbau yi mielezi. 12Sengu ju nkati ja nyumba jaka bambu nkolongu jela jabiya na safu itatu ja malibu gabugabasiki na lumatu lwi imbau yi mikongu ji mielezi, ngati ejabii sengu ju nkati ja nyumba jaka Bambu Sapanga.
Mahengu gaka Hilamu
2Majambu gi Ipindi 2:13-14
13Ndienu bambu nkolongu Solomoni jaatuma bandu ku Tilu kunkema Hilamu, jojuwe jabiya pundi jukulenganake hindu ya madini ga shaba. 14Hilamu hoju jwabiya mwana waka mmbomba joawii alomi baki kuhuma ku likabila la Dani na atati baka Hilamu babiya bukuhumi ku Tilu, kabee babiya baaponda hindu ya shaba. Hilamu jabiya jubiii nu umanyi ngani pamu na malangu nu upundi, jojuwesa ngani kuponda hindu yokapi ya shaba. Ndienu jwahika kuka bambu nkolongu Solomoni, nu kunhenge mahengu gaki goti.
Mipengu mibeli ja shaba
2Majambu gi Ipindi 3:15-17
15Hilamu jalenganakia mipengu jibeli ja shaba, kila lupendi lumwa lwabiya nu ulasu wa meta tisa nu uneni waki wabiya meta sita. Nkati labiya lihotu lelule uneni wa pandi yaki wabiya sentimita ibeli. 16Jalenganakia kabee mataji mabeli ga shaba sukuhugati ili kugabeka panani ji mipengu heji, kila litaji labiya nu ulasu wa meta ibeli na lobu kujenda kunani. 17Ndienu jalenganakiya wapu gu mikupu jibeli jejilengini, joti heji jabiya kwa ndaba jukupambi mataji ga shaba gabagabei mu mipengu jela. 18Kabee jalenganakia safu ibeli ya hindu yeilengana na makomamanga sukutumii shaba, nukugapanga safu ibeli kuyongalota mataji gala panani ja kila mpengu.
19Mataji haga gabiya panani ji mipengu palongi ja sengu, bijipambiki maua ga gagalengana na maua ga mapesuka, ulasu waki kujenda kunani wabiya meta ibeli. 20Mataji haga gabii panani ji mipengu jibeli heji, na kabee gabiya panani ja pandu papabii ni liumbu ngati la bakuli pambipi na wapu gola. Kabee kwabii na maumbu mia mbili gagalengana na makomamanga mu safu ibeli kuyongalota kila kimutu simu su mpengu.
21Hilamu jajemika mpengu pa sengu ja Nyumba jaka Sapanga. Mpengu gu upandi uku kasikazini jugukema liina Yakini, nu mpengu gojwajemika upandi ukusini jugukema Boazi. 22Mataji gagabii panani jaki gabiya na maumbu ga maua gagalengini na maua ga mapesuka.
Enu lihengu lukulenganake mipengu gatenda kujomoka.
Nndundu wa shaba
2Majambu gi Ipindi 4:2-5
23Hilamu jalenganakia nndundu nkolongu wa Shaba. Wabiya gunnyongulate upana waki ndi wabiya meta nsesi na nusu kuhumi ako mbaka ako, nu ulasu waki meta ibeli na lobu nu uyongulate waki wabiya meta komi na tatu na nusu. 24Pai junkenga waki, kuyongalota nndundu hogu wabiya na safu ibeli yi itamiku yealenganaki sukuponda yeilengini ni ikoi, ikoi komi kila meta jimu. Itamiku yi ikoi heyi yabiya ilenganakiwi kipindi aselase sebalenganakia nndundu hogu. 25Nndundu hogu bugubeka panani ji imong'u mong'u ya mapongu ga ng'ombi komi na mabeli, imong'u mong'u itatu yalingalia upandi uku kasikazini ni itatu upandi golijingi lyoba ni itatu upandi ukusini ni itatu upandi golipita lyoba. Nndundu hogu bugubeka panani ji imong'u mong'u ya mapongu ga ng'ombi heyi nu upandi waki uku nyuma watenda kulingalani. 26Unene undundu hogu wabiya sentimita saba na nusu. Nkenge waki walengana nu nnkenga ukikombi, na walengana ni liua lelilengana na maua ga mapesuka gagajanduli. Nndundu hogu guwesa kutwele masi lita elupu alubaini.
Itamiku ya shaba
27Hilamu kabee jwalenganakia itamiku komi ya shaba, kila kitami sabiya nu ulasu wa meta jimu na lobo tatu nu upana wa meta jimu na lobo tatu nu ulasu waki kujenda kunani wabiya meta jimu na lobu. 28Ndi itamiku heyi jwalenganakia ana, kwabiya na mabamba gikisomasoma gagabiya gakamulaki mu mitalimbu. Panani ja mabamba haga gagakamulakiwi ni mitalimbu, 29Panani ja mabamba haga kwabiya ni imong'umong'u ya mahimba naya mapongu ga ng'ombi ni iumbi yeibii na mapapati. Imong'umong'u heyi yabiya iyekaliwi na biibei mapambu gaalokiki sapi. 30Kila kitamiku sabiya na mataili nsesi ga shaba ni isoma soma yukutonge mataili ga shaba. Munkona nsesi ju nndundu kwabiya ni ipungu ya shaba kwa ndaba ju nndundu hogu. Kila kipungu babeka mapambu ga maua gaalokiki. 31Nkati ji kitamiku kwabiya na napwasi jejabiya juyongulake jejabii nu uneni wa nusu mita. Kuyongolota nndomu waki basoliki misolu ni itamiku heyi yabiya pandi yoti ilengini wala nga yunyongolake. 32Mataili nsesi haga gabiya pai ja mabamba gala, isoma soma yipikilanda yukulongulake mataili yabiya iunganiki ni kitamiku seni, ulasu ukujenda kunani wa mataili haga ndi sentimeta sitini na sita. 33Mataili haga galenganakiwa ngati mataili ga magali gukuhutwa na falasi, ni isomasoma yaki yukutonge mataili na malingi gaki ni sipoku yaki na belingi yaki, yoti yabiya yukuponda. 34Pai ja kila kitamiku sabiya na hindu yukukamulaki nsesi mu kona yaki, nayombi yabiya ikamulakiwi ni kitamiku. 35Na panani ja kila kitamiku kwabiya na sindu sekiyongalwiti upana waki wabiya sentimita ishilini na mbili, ikamulaki na mabamba gagabiya upandi wa panani gakamulana ni kitamiku seni. 36Pandu papabii na napwasi mu ipungu na mu mabamba na kila mukitamiku, Hilamu jasola micholu ji iumbi yeibii na mapapati na gi lihimba na gi mikongu gi mitendi, jayongulakia na mataji ga mapambu. 37Hela ndi Hilamu hejalenganakiya itamiku komi yukuhugati ku kutumii madini ga shaba, yoti yabiya ilengini kwi ipemu na maumbu.
38Hilamu kabee jwalenganakia mindundu komi ja shaba, nndundu gumu kwa kila kitamiku. Kila nndundu wabiya nu upana wa meta jimwa na lobo tatu na lawesa kutoto masi lita mia nani na semanini. 39Jabeka itamiku nhwanu upandi ukusini wa nyumba ni mindundu nhwanu upandi uku kasikazini, nu nndundu gola jugubeka mu kona ju upandi ukusini wa Nyumba jaka Sapanga.
Hindu yu Nyumba jaka Sapanga
2Majambu gi Ipindi 4:11-5:1
40Hilamu jalenganakia kabee ibega na sepetu na nndundo. Ndienu Hilamu jajomula lihengu leandagalakia bambu nkolongu Solomoni juhenga hindu yu munyumba jaka Bambu Sapanga. 41Hilamu kabee jalenganakiya mipengu jibeli ni mindundu jibeli mataji gaabei panani ji mipengu mibeli na wapu ibeli kwa ndaba jukuyekale mataji mabeli haga, 42malenganu gi mikomamanga mia nsesi kwa ndaba ja wapu ibeli yela, safu ibeli ja makomamanga kwa kila wapu ili kupambi mataji gabeli gala gagabii panani ji mipengu. 43Kabee jalenganakia itamiku komi, ni ikamulaki komi mu itamiku heyi, 44nu ndundu gumu gola ni imong'umong'u ya mapongu ga ng'ombi komi na mabeli, pai ju nndundu hogu. 45Nakabee ibega na sepetu ni mindundu, yombu yoti heyi yabiya mu nyumba jaka Bambu Sapanga yeyuye Hilamu jundenganakia bambu nkolongu Solomoni, yabiya ya shaba jejing'anyiki. 46Hindu heyi yoti bambu nkolongu Solomoni jwalagalakia ilenganakiwa sukuhugati ku Yoludani, pandu puluhombi lu kitopi ku Sukoti na Saletani. 47Solomoni ngasejwaipemiki ukolongu wa hindu heyi ndaba yabii hingi ngani, na kwa ndaba ukolongu wa shaba ngasewamanyikini.
48Solomoni jwalenganakia hindu yoti yeyapalika mu nyumba jaka Bambu Sapanga. Mesa ja zahabu jukupiiki matambiku madini ga zahabu mesa ja madini ga zahabu kwa ndaba ja mabumunda gukubeka palongi jaka Sapanga, 49hindu yukubeke taa yealenganaki kwa madini ga zahabu sapi yebabeka palongi ja sumba su nkati, nhwanu upandi ukusini nu nhwanu upandi uku kasikazini, na maua na taa na koleu, yoti yabiya ya zahabu, 50masinia ga zahabu ni mikasi jukusekuli mitambi ji mishumaa, na mabakuli ni imbani yukubekee ubani na mbundi yukujokule mwotu, yoti yabiya ya zahabu sapi, bawabu i milyangu ja pandu pu nkati ngani ja nyumba na bawabu i milyangu ja sengu jukuhenge ulumbi wi Nyumba jaka Sapanga yabiya ya zahabu.
51Ndienu, bambu nkolongu Solomoni jwajomula lihengu loti yumu Nyumba jaka Bambu Sapanga, ndi Solomoni jwaleta mali goti gaguge atati baki Adaudi babiya bagabei palongi jaka Sapanga, ndi yabiya madini ga feza na zahabu na yombu, jwiibeka mu kikoku sa Nyumba jaka Sapanga.
Nu markerat:
1Akabambu Akolongu 7: MaBV
Märk
Dela
Jämför
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in Matengo Language ©The Word for the World International and Matengo Language Translation, 2020. All rights reserved.