1Akabambu Akolongu 8
8
Lisanduku li Lilaganu liletwa ku Nyumba jaka Sapanga
2Majambu gi Ipindi 5:2-6:2
1Ndienu, bambu nkolongu Solomoni jwaakema palongi ku Yelusalemu akaseja na akakikolongosi boti ba makabila na akikilongosi bu lukolo lwa Aizilaeli ahika palongi jaki, ili kuliboa Lisanduku li Lilaganu laka Bambu Sapanga mu musi uku Siyoni, goguwe ndi musi uka Daudi. 2Kipindi sa matola ga mwei wa Etanimu, goguwe ndi mwei wa saba kulengana na eabalanga Aizilaeli, ndi bandu haba boti bahikaniya palongi jaka bambu nkolongu Solomoni. 3Kipindi akaseja boti buku Izilaeli pababiya ahikiki, akagolu batotula Lisanduku li Lilaganu, 4Alawi na Agolu bilihamisa Lisanduku li Lilaganu ni Lihema la Sapi lu Kuketangane, na yombu yaki ya Sapi yoti yeyabi mu Lihema heli. 5Bambu nkolongu Solomoni na bandu boti Aizilaeli bahikaniya palongi ji Lisanduku li Lilaganu, nukupiya matambiku ga makondoo na ng'ombi yanga kubalangika. 6Ndienu akagolu bilijingia Lisanduku li Lilaganu laka Bambu Sapanga pandu paki, mu sumba su nkati sa Nyumba jaka Bambu Sapanga, Pandu pa Sapi Ngani, kui ja mapapati gi ihumbi yebiikema makelubi. 7Ihumbi yeibii na mapapati yabiya ihatambwi mapapati gaki pandu paabekiki Lisanduku li Lilaganu, henu Lisanduku ni mikongu jaki jukutotulela jabiya jiyekaliwi na mapapati. 8Mikongu heji jabii milasu ngani kona yaki yawesa kubonikana kuhuma pa sengu, lakini ngasejawesa kubonikana kuhuma upandi wa kunza. Mikongu heji jakona jibii pandu hapa mbaka lelenu. 9Ngase sabii sindu nkati ji Lisanduku li Lilaganu ila pe ibau ibeli ya malibu yeyuye Musa jwiibeka homu ebabii kukitombi suku Holebu, pandu papupe Bambu Sapanga jwahenga lilaganu na bandu buku Izilaeli pabahuma ku nndema uku Misili.
10Agolu pababoka Pandu pa Sapi Ngani, unang'anu watwelala mu Nyumba jaka Bambu Sapanga. 11Nabombi agolu basindwa kuhenga lihengu labu kwa ndaba jukung'anya kwaka Bambu Sapanga kwabia kutweli Nyumba jaka Bambu Sapanga.
12Ndienu Solomoni japwaaga,
“Bambu Sapanga japwaga kubanga,
jwiitama pandu papabii na lwii ndekindeki
13Sakaka nugusengi Nyumba jukutama,
pandu pawitama masoba ganga na mwisu.”
Malobi gaka Solomoni kwa bandu Izilaeli
2Majambu gi Ipindi 6:3-11
14Ndienu Solomoni jaang'anumbukia bandu boti buku Izilaeli ndi jatenda kwaapenge, 15jaapwaga, “Julumbalika Bambu Sapanga, Sapanga jwa Aizilaeli, ndaba kwa makili gaki jutimisi lilagi laki lejaalagila atati bangu Adaudi, koni jukapwaga, 16‘Tumbuka panaaboa bandu bamba ku nndema uku Misili, ngasenanhagwi musi wokapi mu makabila ga Aizilaeli ili anzengila nyumba jukunumbalila, ila pe nuhagwi Daudi, jwaalongusa bandu bangu Aizilaeli.’ ”
17Solomoni jwaendalia kupwaga, atati bangu bapala kunsenge nyumba ju kunndumbalia Bambu Sapanga, Sapanga jwa Aizilaeli. 18Lakini Bambu Sapanga jaapwagila atati bangu Adaudi ana, Guwasali sapi mu mwoju waku kupala kunzenge nyumba. 19Hata hela, ngawehapa wewinzengila nyumba, ila mwana waku jowampapa ndi jojwiinzengila nyumba heji.
20Enu sajenu, Bambu Sapanga jutimisi lilagi laki, ndi sajenu mi bambu nkolongu badala pa atati bangu Adaudi, nukutami kiteu su ulongosi sa Izilaeli ngati Bambu Sapanga ejalagila, kabee nzengiki nyumba jukundumbali Bambu Sapanga, Sapanga jwa Aizilaeli. 21Kabee napahengiki pandu pukubeka Lisanduku li Lilaganu lelule nkati jaki libii lilaganu lejwahenga Bambu Sapanga na akahoku bitu, kipindi pajwapia mu nndema uku Misili.
Kuloba kwaka Solomoni
2Majambu gi Ipindi 6:12-42
22Ndienu Solomoni jwajema palongi ja pandu pukupiiki matambiki paka Bambu Sapanga, koni bandu boti buku Izilaeli abii papu, jwatondabiya maboku gaki kunani, 23jwapwaga, “Mwaa Bambu Sapanga, Sapanga jwa bandu Aizilaeli, nga Sapanga jongi kabete jojubii ngati wenga, kunani wala pai punndema, wehapa ndi weguhobaleka, ndaba gutimisi lilagi laku nu kwaalangi upali waku wanga na mwisu atumisi baku baatama koni bugujetakye kwa mwoju wabu woti. 24Gutimisi lilagi laku legundagila ntumisi waku Daudi ndi atati bangu ku nndomu waku, ena, gawalongila gala ugahengiki lelenu kuuwesu waku wamwete. 25Enu sajenu mwaa Bambu Sapanga, Sapanga jwa Aizilaeli, nuguloba kabee gutimisa lilagi lela lewaalagila atati bangu Adaudi pawapwaga, ‘Mu masoba goti ngjwiikosikani mundu mu ukuu waku jojiitama pikiteu su ubambu ukolongu wa Aizilaeli, ana bandu bikibeleku saku biihangalia kuhenga gagapalika palongi jangu ngati eguhengiki wehapa palongi jangu.’ 26Henu, Mwaa Sapanga wa Izilaeli, nuguloba ugatimisa haga goti, gagundagila ntumisi waku Daudi, babube ndi atati bangu.
27“Henu, mwaa Sapanga, sakaka wiitama pu nndema? Mbona hata kunani kwaka Sapanga kweni nu kunani kwaka Sapanga ngani ngasekugutosa, jagutosa boo, nyumba jenze jenzengike? 28Hata hela, mwaa Bambu Sapanga, Sapanga wangu, ne nuntumisi waku nuguloba gunyowania nepani nu gumbekiya goti ganuguloba lelenu. 29Gujilonda nyumba jenze ikilu na muhi, pandu pagupwagiki kubanga, ‘Pamba ndi bandu pabagulumbaliya,’ ili gunyoaninya kila enihika pandu pamba kuloba. 30Gunyowanakia kuloba kwangu nepani ntumisi waku nu kuloba kwa bandu baku Aizilaeli pabiiloba koni alingali pandu pamba. Gujowanakia kuloba kwabu kuhumi kunani kwaka Sapanga hoku, na ewibiya gujowani, watulekakia.
31“Ana mundu ankosi nzaki nukupalika kulapa, anajuhikiki nukulapa palongi ja mesa ja malibu jukupiiki litambiku nkati ja nyumba jenze, 32nala, wehapa wanzowania kuhuma kunani kwaku hoku, waatemula akatumisi baku. Jojubii na makosa wandapula kulengana na makosa gaki, na jwanga na makosa wiitangasa kubanga ngasejubii na makosa.
33“Ana bandu baku Aizilaeli atei kusindwa palongi ja abaja babu, kwa ndaba ju kuguhenge mahakau, na bombi anaahikiki kuloba kulekakewa mahakau nu kulijetake lihina laku nu sukulihulu mu Nyumba jenze, 34ndienu waajowania kuhuma kunani hoku, na kwaalekake mahakau bandu baku Aizilaeli nakwakelabu mu nndema gowapekia akahoku babu.
35“Iyula ana ngasejikuniki kwa ndaba bukutendi mahakau wehapa, ana ahikiki pandu pamba nukuloba kulekakewa nu kulijetake lihina laku, na kugaleka mahakau gabu pawalakaliya, 36ndienu, wajowanakia kuhuma kunani hoku, nu kwaalekake mahakau gaka atumisi baku, bandu buku Izilaeli, koni wabola kupwata indela ja sakaka, wagukunila iyula nndema gongo goguwe waapekiya bandu baku gubiya gwabu.
37“Ngati anajibii inzala mu nndema au tauni au kusindwa kukuna iyula au ugonzu wi mimea, halwa au mengwa au ana akabaja baayongalwiti mu musi wabu wokapi gola, au ana jijingi homa jokapi, 38gujowana kuloba kukapi kobiiloba bandu baku Aizilaeli, au kojwiiloba mundu jokapi au bandu baku boti buku Izilaeli, kila mundu ana jumanyiki mang'aliku gu mwoju jaki, ana jugulobiki koni jutondabii maboku gaki kulangi mu nyumba jenze, 39ujowana kuhuma kunani hoku kogutama, wandekakia mahakau nukuhenge ngati ekupalika, wanhengila kila mundu ngati mwoju waki egupala, ndaba wehapa kanzika jaku wegumanya mawasu ga mioju ja bandu boti, 40ili bandu baku bugujetakia kipindi soti paatama punndema gowapekia akahoku bitu.
41“Kabee kipindi nngeni jojuwe ngajumu ja bandu baku Aizilaeli ana ahikiki kuhuma ku nndema ukutali kwa ndaba jukugulumbali wehapa, 42ndaba bandu bi milema jengi biijowana kulumbalika kwaku na namuna egubii na makili nu uwesu waku goguwe wahengi bandu baku, mundu hoju ana juhikiki kuloba mu nyumba jenzeni, 43nuguloba wanzowana kuhuma kunani hoku kogutama, na wanhengila goti gajulobiki, ili bandu boti punndema woti awesa kulimanya lihina laku nukuwesa kugujetake ngati eahenga bandu baku Aizilaeli, na awesa kumanya kubanga Nyumba jenze jenzengiki, ndi pandu pukugulumbali wehapa.
44“Bandu baku anaapiti kungondu kukomana na akabaja babu kokapi kola kowaapelika, nabombi ana alobiki kulangi musi gouguhagwi na Nyumba jenzengiki jenze kwa ndaba jukugulumbali, 45nuguloba gujowana kuhuma kunani hoku kogutama, kusali kwabu nu kuloba kwabu na wahengila ngati ekupalika.
46“Ana buguhengi mahakau wehapa, ndaba ngasejubii mundu jwanga kuhenga mahakau, nawe kwaayome nukwaaleka baalapula kungondu hata kwaaleka ajukulika na mu utumwa mbaka kunndema wa akabaja babu gogubii kutali au pambipi, 47ebikuba ku ugeni hoku ngati ana bilikelabwi mu mioju jabu sukuloba kulekakewa mahakau koni apwaaga, ‘Tuhengiki mahakau, tuhobiki nukuhenga kihakau,’ 48kabee pabiikuba mu nndema wa akabaja babu hogu, ana alobiki kulekakewa kwa mwoju wabu woti na kwa loho jabu joti, ana baguloba sukulangi nndema wabu gowapekia akatati babu, nu kulangi musi gongo gouguhagwi na nyumba jenze jenzengiki kwa ndaba jukugulumbali wehapa, 49henu, ukujowania kusali kwabu nuku kuloba kwabu kuhuma kunani hoku, waahengila ngati ekupalika. 50Waalekakia bandu baku mahakau gabuguhengi nukugukana kwabu, waabonila ikia palongi ja abaja babu, ili nabombi awesa kwaabone ikia, 51ndaba haba ndi bandu baku, na mali gaku, bandu bawapiiki kuhuma ku nndema uku Misili kobabia apata mang'aliku.
52“Gulingalia kuloba kuku ntumisi waku, nu kuloba kwa bandu baku Aizilaeli, waajowania kila paaloba. 53Ndaba, mwaa Bambu Sapanga waatengiki na bandu banga Ayaudi ili abiya mali gaku ngati ewatangasa kupete Musa, ntumisi waku, kipindi sewaaboa akahoku bitu mu nndema uku Misili.”
Kuloba kwa mwisu
54Solomoni pajwajomula kusali sala heji joti nu kundoba kwaki Bambu Sapanga, jwajumuka kuhuma palongi ja mesa ja malibu jukupiiki matambiku, pandu pajwabiya jupegiki magoti koni maboku gaki jutondabii kunani. 55Jwajemaa na kwaapenge bandu boti Aizilaeli bababiya akusanyiki pala, japwaga kwa sauti ngolongu, 56“Julumbalika Bambu Sapanga jojaapeki laha bandu baki Aizilaeli, kulengana na malagi gaki. Jutimisi malagi gaki goti gaamboni gajalagila kupete ntumisi waki Musa. 57Bambu Sapanga, Sapanga witu, jubiya pamu na twepani, ngati ejwabiya na akahoku bitu, tunndoba jwatuleka, wala jwatuleke. 58Jombi jujing'anambua mioju jitu, ili tuwesa kupwata indela jaki, koni tupwatiki mihilu jaki, kulongo kwaki na malagalaki gaki gajwaapekia akahoku bitu. 59Ndienu, malobi gangu aga gaguge ndi kuloba kwangu palongi jaka Bambu Sapanga, gabiya pambipi na Bambu Sapanga, Sapanga witu, muwi ni ikilu, najombi anhengila gaamboni ntumisi waki, na bandu baki Aizilaeli, ili awesa kwaajangati mu kila sindu seapala kila masoba. 60Ili bandu boti punndema poti biiwesa kumanya kubanga sakaka Bambu Sapanga ndi Sapanga, wala nga jongi kabete. 61Nanamu mmbiya mwabandu bukuhobaleka kwaka Bambu Sapanga, Sapanga witu, koni mpwata mihilu jaki nu kujetakee malagalaki gaki goti ngati enhenga lelenu.”
Kujipia Nyumba kwaka Bambu Sapanga
2Majambu gi Ipindi 7:4-10
62Ndienu, bambu nkolongu Solomoni na Aizilaeli boti bababiya pamu na jombi bumpikia Bambu Sapanga inyama kuba matambiku kwaka Sapanga. 63Najombi Solomoni ampikia Bambu Sapanga matambiku gu lukwali ganga, ng'ombi elupu ishilini na mbili na makondoo laki jimu ni ishilini. Ndienu bambu nkolongu na bandu boti buku Izilaeli ebijipia Nyumba kwaka Bambu Sapanga. 64Lisoba lelale bambu nkolongu Solomoni ampikia Sapanga pandu pikilanda ja sumba sa palongi ja Nyumba jaka Bambu, ndaba hapa ndi pajwapiikia matambiku gukutinia, na matambiku gi ilebi na matambiku ga mahuta gu lukwali. Ndaba pandu pukupiiki matambiku papalenganikiwi kwa shaba pala ngasepatosiki kubeka matambiku haga goti.
65Najombi Solomoni jwahenga matola gi Indamba masoba saba na masoba saba gangi kabee, pamu na Aizilaeli boti. Bombi baboka kuhuma pandu pukujingali upandi uku kasikazini ku Hamati mbaka kumpaka uku kusini wa losi luku Misili. 66Mu Lisoba la nani, jwaatabuka bandu, nabombi bumpengila bambu nkolongu, babujania kwabu koni ahinani nu kutogule mioju jabu kwa ndaba Bambu Sapanga anhengi majambu gaamboni ntumisi waki Daudi, na kwa bandu baki Aizilaeli.
Nu markerat:
1Akabambu Akolongu 8: MaBV
Märk
Dela
Jämför
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in Matengo Language ©The Word for the World International and Matengo Language Translation, 2020. All rights reserved.