1Akabambu Akolongu 9
9
Sapanga ampiti kabee Solomoni
2Majambu gi Ipindi 7:11-22
1Bambu nkolongu Solomoni ejajomula kusenga Nyumba jaka Bambu Sapanga, nu kusenga nyumba jaki na hindu yengi yoti yejapala kuhenga, 2Bambu Sapanga ampitila kabee ngati eampitila ku Gibeoni kola. 3Bambu Sapanga ampwagila bambu nkolongu Solomoni kubanga, “Nyowini kusali kwaku nukuloba kwaku. Nijijetaki nu kujihenga jibia jangu Nyumba jegunzengi ili bandu bililumbalia lihina langu pamba masoba goti. Najilonda nu kujipala kipindi soti. 4Wehapa ana gubii mwoju wasapi kwangu na kuba woguhobaleka ngati atati baku Adaudi, nu gujetaki mihilu jangu nu kuhenga goti ganugulagalaki, 5nepani nagugangamalisa ulongosi waku kwa bandu buku Izilaeli masoba ganga na mwisu, ngati enaalagila atati baku Adaudi, napwaga, ngawikosi mundu jukulongosa mu ubambu uku Izilaeli. 6Lakini wehapa au bana baku anaang'anambwiki nu kukotoka kumbwata nu kujileka mihilu na malagalaki gangu ganumpekia nu kujenda kuitumaki isapanga yengi nu kuilumbali, 7ndienu, naahamisa bandu bangu, Aizilaeli, kuhuma munndema gongo gonumpeki, nu kujikana Nyumba jenze jenijijetakia kuba jangu, najilekalia kutali na nepani najihenga kuba sindu siking'ang'a nu kujitondo palongi ja bandu banga Aizilaeli boti. 8Hata ngati nyumba jenze jinyambiki ngani sajenu, jiibombuka na kuba mang'oba, na kila jojipeta pambipi jitenda kusituka nu kunyua kimutu, nu kulaluki, ‘Ndaba jakii Bambu Sapanga juhengiki ana, mu nndema ago na mu nyumba ajeje?’ 9Bandu biijibua, ‘Ndaba bunndei Bambu Sapanga wabu, jojaapia akahoku babu ku nndema uku Misili, nu kuipwata isapanga yengi, biigungamalia nu kuitumakia, ndienu Bambu Sapanga jwaleti mag'aliku haga goti.’ ”
Kujetangane kwaka Solomoni na bambu nkolongu Hilamu
2Majambu gi Ipindi 8:1-2
10Eyapeta yaka ishilini, yeyuye bambu nkolongu Solomoni jwasengiki nyumba ibeli, yani nyumba jaka Bambu Sapanga na nyumba jaki, 11bambu nkolongu Solomoni ampekia bambu nkolongu Hilamu juku Tilu misi ishilini, mu nkoa uku Galilaya kwa ndaba bambu Hilamu jabiya jumpelaki Solomoni imbau yimikongu mielezi ni miboleshi, na zahabu yejapala. 12Lakini bambu Hilamu ejahika kuhuma ku Tilu nukujibona misi heji jejabiya ampeki ngasejujipaile. 13Ndienu, bambu nkolongu Hilamu andalukia bambu nkolongo Solomoni, “Nndongu wango misi boo, jegumbeki?” Najwombi Hilamu jujikema misi heji Kabuli, manajaki misi janga na mana, lihina heli libii mbaka lelenu. 14Bambu nkolongu Hilamu jabiya ampelaki bambu nkolongu Solomoni zahabu kilu elupu itatu na mia sita.
Mahengu gangi gaka Solomoni
2Majambu gi Ipindi 8:3-18
15Mahengu gaka bambu Solomoni gajaapekiya bandu ahenga sakwaalasimisa ndi ganga, jasenga Nyumba jaka Bambu Sapanga, na nyumba jaki, na ngomi ja Milo, nu lumatu luku Yelusalemu, nu kusenga kabee misi juku Hazoli na Megido na Gezeli, 16Gezeli ndi musi gojwabiya jugukamwi bambu nkolongu juku Misili, jwabiya jugukamwi nu kugujosa mwotu na kwaakoma Akaanani bandu baabiya atama homu. Monikatai, bambu nkolongu Solomoni pajwabia antoi kamwali waka Falau, bambu nkolongu Falau ampekia musi hogu kamwali waki kuba nhupi ja ndoa jaki. 17Ndienu bambu nkolongu Solomoni jugusenga maa musi wa Gezeli, na kabee jugusenga musi uku Beti Holoni wa pai, 18na misi juku Balati nuku Tamali musi gowabii kulungweza mu nndema uku Yuda, 19kabee na misi joti jijihenga kuba ikoku, kwa ndaba ja falasi yaki na magali gaki gukugahuta, kabee jasenga sindu sokapi sejwapala mu musi uku Yelusalemu, nuku Lebanoni au kongi kokapi mu ubambu ukulongu waki. 20Bandu bangi babahigaliya bababi nga Aizilaeli ndi babiya, Aamoli na Ahiti na Apelizi na Ahivi na Ayebusi, 21pamu ni ibeleku yabu yeyuye Aizilaeli ngasebawesiki kwaakoma, bambu nkolongu Solomoni jwaahenga abiya atumwa mbaka lelenu. 22Lakini Solomoni ngasejwaanhengiki kuba atumwa bandu bokapi buku Izilaeli, bombi ndi babiya akomana ngondu baki, na akatumisi baki na akakilongosi baakomana ngondu baki, akaakomana ngondu ba magali gaki gukugahuta, na baakwelale falasi.
23Kabee babia akakilongosi akolongu babajemale mahengu gukusenga gaka Solomoni, kabee kwabiya na akakilongosi mia nhwanu na hamusini, bababiya baajemalia bandu baahenga mahengu.
24Kamwali waka Falau pa juguhama musi waka Daudi, nukujenda kunyumba jaki jikibambu, jejuje Solomoni jatenda kunsenge, ndienu Solomoni jwasenga ngomi ja Milo.
25Solomoni jwabia jupia matambiku gukutini na matambiku gu lukwali panani ja mesa jamalibu jukupiiki matambiku mala pa tatu mu kila saka pandu pansengi Bambu Sapanga, nu kumpogale ubani, ndienu jajomuliya kusenga Nyumba jaka Sapanga. 26Bambu nkolongu Solomoni jwalenganakia meli hingi ku misi ja Esioni Gebeli, pambipi na musi uku Eloti gowabii ku nnkenga ju nhanga nkolongu wa Shamu, mu nndema uku Edomu. 27Najombi bambu nkolongu Hilamu jwaatuma aka kilongosi baki na nabombi bahenga lihengu mu meli pamu na atumisi baka Solomoni. 28Bajenda mbaka ku nndema uku Ofili, nu kujuku zahabu kilu elupu komi nu nsesi, nu kundete bambu nkolongu Solomoni.
Nu markerat:
1Akabambu Akolongu 9: MaBV
Märk
Dela
Jämför
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in Matengo Language ©The Word for the World International and Matengo Language Translation, 2020. All rights reserved.