Maleko 1
1
I — KO TE TEUTEU O TE GAUE A SESU
Ko te akonaki a Soane Patita
1Ko te kamataaga o te Logo Lelei, o uhiga mo Sesu Kilisito, te Alo o te Atua. 2O hage ko te mea kua tohi i te polofeta ko Isaia: Koeni e au fekaui taku tagata fagono-gono, i ou mua, ke ina teuteui tou ala. 3E tagi he kalaga: Teuteu, i te toafa, te haeleaga o te Aliki, fakatokatoka ona ala. 4Nee ha ia Soane Patita i te toafa, o akonaki te papitema o te fakahemala moo fakamolemole te u agahala. 5Pea nee alu‐age kia te ia te hahai katoa o te fenua ko Sutea pea mo natou fuli nee nonofo i Selusalemi pea nee natou tali mai ia te ia te papitema i te vai o Soletane, i tanatou vete anatou agahala.
6Nee kofuaki e Soane te kili‐i‐kamelo; nee ina mea kai aki te u hee mo te meli vao. Pea nee ina fakaha i ana akonaki: 7“Koeni e muli‐mai ia ae e malohi‐age ia te au; e molemo au aoga ki te punou‐ifo ki ona vae moo veteki te u hai o ona taka. 8Ko au nee au papitemai koutou aki te vai, kae ko ia e ina papitemai anai koutou aki te Laumalie Maonioni.”
Ko te papitema o Sesu
9I te temi aia, nee haele‐age ia Sesu mai Nasaleti i Kalilea, pea nee ina tali te papitema mai ia Soane, i Soletane. 10I te lakaga tonu nee alu‐ake ai mai te vai, nee sio ia ki te lagi kua ava, pea mo te Laumalie Maonioni nee hage he lupe, nee haele‐ifo kia te ia, 11pea nee logo, mai selo, he leo nee ui maana: “Ko koe ko toku Alo ofaina, e ia te koe oku ofa fuli.”
Ko te fakahala i te toafa
12I te hili o mea aia, nee haga te Laumalie Maonioni o fakalotoi ke alu ia ki te toafa. 13Pea nee nofo i ai aho e fagofulu, o hoko ai kia te ia te u fakahala a Satana. Pea nee nofo iai fakatahi mo te u manu vao pea nee tauhi kia te ia e te kau aselo.
II — KO TE GAUE A SESU I KALILEA
Ko Sesu e ina kamata tana fai akonaki
14I te osi o te pilisoni o Soane, nee haele‐age ia Sesu ki Kalilea. Nee ina fakaha leo lahi i ai te Logo Lelei nee mau mai te Atua, aki tana folafola aeni: 15“Kua hoko te temi, pea ko te Puleaga o te Atua e ovi‐mai: ke koutou fakahemala pea mo koutou tui ki te Logo Lelei aia.”
Ko te paui o te u uluaki tisipulo e tokofa
16I tana haele‐age ovi ki te tai o Kalilea, nee iloi e Sesu ia Simone mo Atelea tona tehina, nee na lolotoga aau tona kupega i te tai, he ko naua ko te u tagata tautai. 17Pea nee folafola e Sesu kia naua: “Koulua mulimuli‐mai kia te au pea e au fakaliliu koulua ko te u tautai tagata.” 18Pea nee na tuku‐atu aipe ona kupega o mulimuli kia te ia. 19Pea i tana laka siisii age nee sio ia kia Sakopo, foha o Sepeteo, pea mo Soane, tona tehina, nee nonofo foki mo naua i tona vaka, o monomono ona kupega, pea nee paui‐atu aipe ia kia naua. 20Pea nee na tukupe tana tamai i te vaka mo ana tagata gaue totogi, pea nee na mulimuli kia te ia.
Ko Sesu e fai akonaki i Kafanaume mo ina fakamalolo te tagata nee ulu sino ki ai he laumalie kovi
21Nee natou hu ki Kafanaume. Pea i te hoko o te aho sapato, nee hu ia Sesu ki te sinakoka, o kamata‐atu aipe tana fai akonaki. 22Pea nee punamauli aupito te hahai i tana akonaki aia, koteuhi nee lea ia kia natou o hage he tagata e ia te ia pule, kae mole o hage ko te mea nee tautau fai e te kau sekelipa.
23I te temi aia nee nofo i tonatou sinakoka he tagata nee ulu sino ki ai he laumalie kovi, pea nee kalaga‐ake ia o fenei: 24“Kotea e ke hau ai kia matou, e Sesu mai Nasaleti? Pe kua ke hau o fakapulihi matou? E au iloi pe koai ia koe: ko te Maonioni o te Atua.” 25Kae ko Sesu nee ina fakamatakui ia, aki tana lea aeni: “Fakalogologo, pea ke ke mavae mai te tagata‐nei.” 26Pea ko te laumalie kovi nee ina lulu malohi te tagata, pea nee mavae mai ia te ia, mo kalaga malohi. 27Pea ko natou fuli nee natou sio ki te mea aia nee punamauli, o natou fehuiaki: “Kotea te uhiga o te mea aia? Koena he akonaki foou e fai aki te malohi o te pule totonu. E ina fekauipe lava ki te u laumalie kovi pea e natou fakalogo kia te ia.” 28Pea nee logologona ia Sesu i te u koga fenua kehekehe o Kalilea.
Ko te fakamalolo o te fae a te ohoana o Simone
29Pea, i tana hoki mavae mai te sinakoka, nee alu ia ki te fale o Simone mo Atelea, fakatahi mo Sakopo mo Soane. 30Kae ko te fae a te ohoana o Simone nee takoto ia ko te fiva, pea nee fai‐atu aipe kia Sesu te talanoa o uhiga mo ia. 31Pea nee fakaovi ki ai ia Sesu o kapa ki tona nima mo fekau ke tuu mo ia. Pea nee mavae‐atu aipe te fiva mai ia te ia pea nee tauhi e ia kia natou.
Ko niihi fakamalolo
32I te afiafi, i te osi to o te laa, nee aumai kia te ia te u mahaki fuli, pea mo natou nee ulu sino ki ai te u laumalie kovi, 33pea ko te kolo katoa nee nonofo fakatahi i te mua matapa. 34Pea nee ina fakamalolo te u mahaki tokolahi nee maua i te u mahaki kehekehe, pea nee ina kapu te u temonio tokolahi ka nee ina tapui te lea a te u temonio, koteuhi kua natou iloi pe koai ia.
E mavae fakafufu ia Sesu mai Kafanaume pea e fealuaki ia i Kalilea
35I te pogipogi uhu, kae kei hegihegi, nee tuu ia Sesu o alu ki tua, pea fagona ia ki he potu lavaki, pea faikole i ai. 36Pea nee olo ia Simone mo ona kaumea o kumi ia. 37Pea i tanatou mau ia, nee natou ui‐age ki ai: “Ko te hahai fuli e natou kumi ia koe.” 38Pea nee tali‐age e Sesu kia natou: “Tou olo kehe, ki te u kolo e ovi mai, koteuhi kau akonaki ai, he ko te tupuaga aia o taku alu ki tua.” 39Pea nee fealuaki ia i Kalilea katoa o akonaki i onatou sinakoka, pea mo kapu te u temonio.
Ko te fakamalolo o he tagata kilia
40Nee hau kia Sesu he tagata kilia, o kole mamahi kia te ia pea mo tuutuli o ui maana: “Kapau e ke finegalo ki ai, e ke lavai tau fakamalolo au.” 41Nee ofa mamahi ki ai ia Sesu pea nee ina fafao tona nima pea kapa ki ai mo ui: “E au loto ki ai, ke ke malolo.” 42Pea i te lakaga tonu aia nee mavae te kilia mai ia te ia, pea nee malolo lelei ia. 43Kae nee haga ia Sesu o lea fefeka ki ai pea nee ina kapu, 44mo ui‐age ki ai: “Aua naa ke fakaha te mea‐nei ki he tahi; kae ke ke alu o fakaha ia koe ki te matua‐tauhi, pea ke ke fai o uhiga mo tou malolo te molaga nee fakatotonu e Moisese moo fakamooni kia natou.” 45Kae, ko ia, i tana kua osi mavae, nee ina lau o leo lahi, mo ina fakamafola te logo aia, o mole kei lava te hu faitaliha a Sesu ki he kolo, ka nee nofo leva i tua, i ni potu lavaki, pea nee omai te hahai kia te ia, mai ia potu fuli.
Nu markerat:
Maleko 1: WLS1971
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Published by the Bible Society in New Zealand 1971