Gén 2
2
1Wak'alh pule lhäy'e honhat, lhäy'e nilhokej m'ak tä iche, 2wet fwala siete Dios lhay'up'at tä ihämet nilhokej lechumet. 3Wet takäpfwayeje m'ak tä is häp fwala siete wet yen häpeya n'ot'amajchet. Tsi tä lham yenlhi nilhokej m'ak tä iche, wet tä nichäte p'ante fwalatso iwo t'elakw'eta.
4Mälhyej p'antetso pule lhäy'e honhat lhäy'e m'ayhay tä iche tä y'aw'en tä Dios yenlhi p'ante.
Hin'o lhäy'e atsinha ihi p'ante Edén
Tä Lhawuk Dios yenlhi p'ante pule lhäy'e honhat, 5kamaj ihichet'a p'ante hal'äy wet kamaj tek tälh hon'al tä i'pe honhat. Tsi kamaj Dios tek iwo pelhaya yämthilek nitsäype honhat, wet äpte newache hin'o yämthilek tachumlhi. 6Mat iche t'at ayas tä tälho honhat wet ipumyen. 7Wet Lhawuk Dios tachuma lhip honhat wet yenlhi tä yen hin'oya. Wet yafwutche lenhus wet hiw'enho lew'atshancheyaj. Wet mälhyej p'antetso tä iwo tesa tä iche hin'o.
8Tä tajyäme täjtso, Lhawuk Dios itihi honhat tä Edén yachuyajw'et, häp lhip tä tumej hichä, wet häp tä itihi p'ante hin'o tä lham lhenek. 9Wet Dios yok:
–Is chik tälh hal'äy tä wuj tä isis tä w'enhahiche yämthilek iwoye lhay tä n'olhäk.
Häte itihi lechowej häp yachuyajw'ettso hal'ä tä n'ow'atshancheyaj,#Apoc 2.7; 22.2,14 lhäy'e hal'ä tä itäfwnhatej hin'o m'ak tä is lhäy'e m'ak tä ni'isa.
10Iche tewok tä tälho t'at Edén yämthilek ipumyen yachuyajw'ettso. Wet häp tewoktso lhaich'esajen wet iche cuatro tewok lhayis tä lhachal. 11Elh tä ichun lhey Pisón, wet häp tä ilunej imälhewek honhat tä lhey Havila, häp honhat tä oro ihi. 12Orotso lhäy'e lhip tä is, häte iche hal'ä lhits'i tä wuj tä is, lhäy'e tuntey tä laha ihi tä lhey ónice. 13Wet tewok elh lhey Gihón, wet häp tä ilunej imälhewek honhat tä lhey Cus. 14Wet tewok elh lhey Tigris, wet häp tä tiyäjche honhat tä Asiria lhip tä tumej hichä. Wet tewok elh lhey Éufrates.
15Wet Lhawuk Dios itihi p'ante hin'o häp Edén yämthilek tachumlhi wet t'uye. 16Wet hiw'enho lhämetna wet yok:
–Tufw t'at lhay tä ihi nilhokej hal'äy tä ihi yachuyajw'etna. 17Mat häp hal'ä tä itäfwnhatej hin'o m'ak tä is lhäy'e m'ak tä ni'isa, häp tä yej letufwa lhay. Tsi chik letufwla, let'inla t'at.
18Wet nech'e Lhawuk Dios yok:
–Isit'a tä ts'ilak hin'o. Oyenhihoplhila elh tä t'unfwa wet tach'othiyela.
19-20Wet Lhawuk Dios tachuma honhat, wet yenejlhi nilhokej itshätäy lhäy'e afwenchey, wet ihäne hin'o yämthilek iwo lheyisa. Wet hin'o iwo lheyisa nilhokej itshätäy tä n'oläy, lhäy'e afwenchey, lhäy'e itshätäy tä iche tayhi, wet lheyis tä itiyejen häpe t'at tä iyej. Mat niwohit elh itshätäytso chik hin'o lech'otfwa wet isej. 21Tä mälhyejtso, Lhawuk Dios ithatpe hin'o nahati tä wuj wet imä. Wet Dios ilanhi lesij lhile elh, tä ileyej wet yachajwek t'isan. 22Wet hin'o sij lhiletso Lhawuk Dios yen atsinhaya, wet ipäyne hin'o. 23Tä iyahin, wet yok:
–Täja häp tä olhip t'at, tsi tälho ot'isan wet tälho olhiley. Tä mälhyejtso, lheyla atsinha, tsi Dios itälhtho hin'o.#2.23 Häp n'olhämet p'ante yok, Atsinha, lhimphaj tä hätet iwoye n'olhämet p'ante yok, Hin'o.
24Häp tä tamenej tä hin'o yikch'oye lajcha lhäy'e lako wet lhaip'ajtej lech'efwa, wet lhamel täkwfwasna hätet iwoyek hätefwajni.#Mat 19.4-6; 1~Cor 6.16; Ef 5.28-31
25Wet häp hin'o lhäy'e atsinha lhamel ts'ilakchehen p'ante, mat newache len'äfwlhi.
Nu markerat:
Gén 2: WCHB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Biblia Wichí, Dios Lhämtes tä Matchehen © Sociedad Bíblica Argentina, 2002.