Juan 12
12
Lázaro lechita María itsäype Jesús lepach'ol hal'ä t'i tä lenij akäjche
(Mat 26.6-13; Mar 14.3-9)
1Tatäy p'ante seis ifwalas che nichäte lewhäy Pascua, wet Jesús ihoye Betania, hupuy tä Lázaro lew'et, häp hin'o tä pajche Jesús inuhatphä tä tälho lep'itsek. 2Wet õyenhoplhi lhäk Jesús, wet Marta lhayen lewoyayej nilhokej lhamel tä t'ekhen, wet Lázaro iyej t'at lhamel. 3Wet nech'e María ichäj medio litro hal'ä t'i tä wuj laha, wet itsäype Jesús lepach'ol wet äp ilejej lew'ole. Wet lenij tä akäjche tapoyejej häp hup tä lhamel ichufwi.
4Mat Jesús lechufwenkay elh tä lhey Judas Iscariote, elh tä yachajila Jesús, lham yok:
5–¿Chipte tä õkniw'enaho hin'o che ichäj hal'ä t'ina wet õ'tihi laha tä wuj, yämlek õhch'otyeneje wichi tä p'elitses?
6Mat tä iwoynejetso lhämet, hip'altsenhit'a wichi tä p'elitses, mat häpe t'at etantsaj. Tsi tä lham tä t'uye chinaj t'äj lehi, t'etanepej lhip häp m'ak tä õ'thatho.
7Wet Jesús tahuyej wet yok:
–Ch'anlhaye atsinha, tsi iwaklhat n'oyej che onchäthiyela ifwala che õtjänlä op'itsek. 8Wichi tä p'elitses ipej amejen, mat olham pitajit'a tä oi'amejen.
Sacerdotes tä len'ohyajay ihiche t'uhläk ilän Lázaro
9Tä Judío lhayis ihanch'oye tä Jesús ihi Betania, wujpe lhamel tä yikhen tä ihoye hupuytso. Ts'ilakhit'a Jesús tä lhamel t'uhläk hiw'en, mat häte Lázaro, häp hin'o tä Jesús inuhatphä tä tälho lep'itsek. 10-11Wet tä sacerdotes tä len'ohyajay ihiche, hiw'en tä Lázaro tä tamenej tä wujpe Judío lhayis ileyej lhamel wet nech'e ichaye Jesús, lhamel yok:
–Is che häte õ'län häp Lázaro.
Jesús nichätho Jerusalén wet wichi iwujyen
(Mat 21.1-11; Mar 11.1-11; Luc 19.28-40)
12-19Tä ifwala elh p'ante, tä wujpe wichi pajche ihoye Jerusalén tä lhaihute n'okäjyaj tä Pascua, Jesús i'pe asnofwaj wet häte lham ihoho hupuytso. Wet wichi tä iyejnaj lham häp ifwala tä t'äne Lázaro tä ihi lep'itsekw'et tä inuhatphä tä tälho lep'itsek, lhamel ifwenhomche iyhäj häp m'ak tä hiw'enej tä Jesús yenlhi. Wet häp tä tamenej tä wichi, tä ihanch'oye tä Jesús eyte nämhiho Jerusalén, lhamel yisthen fwitsuk w'oley wet ihohlä, wet t'änwethä tä yok:
–¡Lewujyaj ihi! ¡Is che Lhawuk itiyej lakäpfwayaj tä is häp hin'o tä näm tä Lhawuk lhämetej, häp Israel lhayis laka Niyat!#Sal 118.25-26
Mälhyej iwoye Dios lhämet tä ihi Lehi tä yok:
“Wichi tä Sión lheley, yej lenoway.
Lhek yahinya aka Niyat,
lham i'pe asnofwaj tä näm.”#Zac 9.9
Mat tä ichun lechufwenkay ihanhiyejt'a m'ayhaytso. Mat tä paj tä Jesús nichätho lewujyaj, nech'e lhamel lehusekch'oye tä nilhokej m'ayhay tä õ'woyejetso häpe t'at m'ak tä pajche Dios lhämet tä ihi Lehi yämeje häp lham.
Mat häp Fariseo lhayis, tä hiw'en m'ayhaytso, yämwethä lhamhomche wet yok:
–¡Lhek yahinya, tek wo m'ak che y'akalhi! ¡Tsi lew'en tä nilhokej wichi tä yikche t'at häp lham!
Elhpej wichi tä kahäpeya Judío lhayis t'ukwe Jesús
20Iche p'ante elhpej wichi tä kahäpeya Judío lhayis tä lhayej wichi tä ihoye Jerusalén häp fwalas tä n'okäjyaj, yämthilek iwo len'okhayaja. 21Wet häp wichitso tä kahäpeya Judío lhayis, lhamel ihoye Felipe, häp Jesús lechufwenkay elh tä lew'et hupuy tä lhey Betsaida tä ihi Galilea. Wet lhamel tahuyej tä yok:
–Olhaip'altsen ame, olhamel ot'uhläk ow'en Jesús.
22Wet Felipe yik tä ifwenho Andrés, wet lhamel yikhen tä ihoye Jesús wet ifwenho. 23Tä Jesús iläte lhamel, wet yok:
–Nech'e nichäte lewhäy wet lhain'älthila häp Hin'o Lhäs lewujyaj. 24Matche, matche tä ofwel amhohen, Che trigo lhofwaj nichätaho honhat yämthilek y'il, kamaj tefwaj'atni. Mat che y'il, häpkhilek wuj lhay tä iwoye. 25Wet elh che häpe che ihumin lew'atshancheyaj, tatäyhla. Mat elh che yen w'et m'ayeka lew'atshancheyaj tä ihonhatena, häpe elh tä t'amajej at lhamho lew'atshancheyaj tä t'un.#Mar 8.34-35 26Wet elh che häpe che t'uhläk tachumlhi n'oho, is tä nek n'okwe. Wet lhip che oihi, häte elh tä tachumlhi n'oho ihihila. Wet elh tä tachumlhi n'oho, Ojcha iwujyenla t'at.
Jesús yen lhämeta lham t'ilek
27Wet Jesús äp yok:
–Athana ohusek nilhak'alhi. Mat ¿atsi olhämet tä owoye? ¿Hä oyohlak, “Ijcha, fwayhat n'oyej lewhäyna”? Kha, tsi häpe t'at tä oneke täjtso. 28Ijcha, ¡wunit ey!
Häpet tä iwoyetso, iche n'opak tä tumho pule tä yok:
–Pajche owunit, wet äp oyachajihola tä owunit.
29Häp wichi tä iwhäye iläte n'opaktso wet fwetaj pelhay tä y'ip. Mat iche iyhäj tä yok:
–Häpkhit'a pelhay, ángel tä tahuyej.
30Jesús ifwenho lhamel wet yok:
–Häp n'opaktso olhamhit'ak oisej. Amel t'at tä aisayej. 31Nech'e nichäte t'at lewhäy athana n'okalelhthayaj tä õ'tiyej honhatna, wet õ'tihiyeja kanhi laka niyat. 32Wet che õ'neyhthiphälan'o tä otälh honhatena,#Juan 3.14; 8.28 otonla lhame nilhokej wichi.
33Tä yäme täjtso, itäfwnhatej lhamel häp m'ak che õ'woynhiyejela che õ'län. 34Wichi nichulho wet yok:
–Dios lhämtes p'ante ihi Lehi yäme tä N'ofwayhthi tä Lechenek iläyhla yämlek tiyäj'attsiy.#Sal 110.4; Isa 9.7; Ezeq 37.25; Dan 7.14 Wet ¿chipte tä am lhok, “Õ'neyhthiphäla Hin'o Lhäs”? ¿Atsi tä häpe Hin'o Lhäs tä lhämetso?
35Jesús ifwenho lhamel wet yok:
–Lhimphaj lewhäy tä kamaj ihla amejen isi. Nuyaykwe n'äyij tä kamaj isi hin'älitche, häpkhilek honataj akniselkatahen che näm. Tsi elh tä ilunhilhi honataj hiw'enhichet'a n'äyij. 36Tä kamaj isi i'amejen, ekhayaye, häpkhilek ahäpehen isi leles.
Tä Jesús ileyej tä yäme m'ayhaytso, yik wet lhaiskatho wichi.
M'ak tä tamenej tä Judío lhayis nit'ekhayaye Jesús
37Tej tä Jesús yenlhi wujpe m'ayhay tä n'otetnhay tä Judío lhayis hiw'en, mat lhamel t'ekhahiyet'a häp lham. 38Häp tä mälhyejtso yämthilek lhayäm matche profeta Isaías lhämet p'ante yok:
“Iwuk, ¿atsi tä t'ekhaye m'ak tä olhamel owo silätayej?
¿Wet atsi elh tä Dios hin'älteji lakhajyhayaj?”#Isa 53.1; Rom 10.16
39M'ak tä tamenej tä wichi nikalhahi che t'ekhaye, ihi Isaías lhämet elh p'ante tä äp yok:
40“Dios hip'okwe'pe tatelhoy
häpkhilek asnamis t'at,
wet äp hit'unthen lehusey
häpkhilek tek ihanche honhatej,
yämthilek niwohit lehusey iyhäja
wet äp n'am chesthihen t'at, yokwe Dios.”#Isa 6.10; Mat 13.14-15; Ap.Lh 28.26-27
41Yokwe lhämet häp Isaías tsi hiw'en t'at Jesús lewujyaj wet yen lhämeta.
42Matkat wujpe Judío lhayis tä len'ohyajay ihi t'ekhaye Jesús. Mat lhamel weskatej t'at, häp tä nowaye Fariseo lhayis che n'äyejo che fwetaj ihoye Dios laka wichi tä lhaihutwek. 43Tsi häp tä lhamel ihumin tä wichi iwujyenhen, wet tek itetshan yämlek Dios iwujyenhen.
Jesús lhämtes häp tä itiyej wichi letes
44Jesús ifwitsenej lechos wet yok:
–Elh che häpe che t'ekha n'oye, ts'ilakhit'a olham tä t'ekha n'oye, mat häte t'ekhaye t'at Ojcha tä lechenekn'o. 45Wet elh tä hiw'enn'o, häte hiw'en t'at häp Elh tä lechenekn'o. 46Olham tä ohäpe isi onek honhatena häpkhilek wichi tä t'ekha n'oye nemla ihi honataj.
47“Wet häp elh tä iläte olhämtes mat niwoyaye, olhamhit'ak otiyej letes. Tsi tä onek, ot'uhläk ofwayhthen wichi, häpkhit'ak otiyej letes. 48Mat häp elh tä nitchuma n'ohlä wet nitch'ahuyaye m'ak tä oyäme, iche t'at elh tä itiyej letes. Häpe t'at olhämtes tä owoye, häp tä itihiyeja letes che nichäte ifwala tä lepes. 49Tsi oyämhiyet'a m'ak tä olham tä olewuk, mat häp m'ak tä Ojcha tä lechenekn'o ne'tek oyen lhämeta, häp tä oyäme. 50Wet ohanej, häp Ojcha lhämet tä ne'tek owoye, häpkhilek ichätyene wichi häp lew'atshancheyaj tä t'un. Wet mälhyej'attso, häp m'ak tä Ojcha ne'tek oyäme, oyäme t'at.”
Nu markerat:
Juan 12: WCHB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Biblia Wichí, Dios Lhämtes tä Matchehen © Sociedad Bíblica Argentina, 2002.
