Juan 18
18
Õ'tsoklhi Jesús
(Mat 26.47-56; Mar 14.43-50; Luc 22.47-53)
1Tä Jesús ileyej t'alhyaj tä iwoye, yik lhäy'e lechufwenkay wet ihoye lhip elh häp tewok lhäsaj tä lhey Cedrón, wet tiyäjo n'olafwek tä ihi lhiptso. 2Wet Judas, häp elh tä yachaj Lewuk, lham nitäfwelej lhiptso, tsi Jesús lhäy'e lechufwenkay ihoyepej.
3Tä mälhyejtso, näm Judas lhäy'e wujpe sip'äl, lhäy'e hin'ol tä t'uye Dios Lew'et, tä lhamel tälhe sacerdotes tä len'ohyajay ihiche lhäy'e Fariseo lhayis. Lhamel iwo takwelheleya wet ichäjwethä n'ochäkwis. 4Matkat Jesús pajche ihanej t'at nilhokej m'ak tä lewit'äyhyajla. Tä hiw'enlä lhamel, yik tä ihohlä wet tay'ätshane tä yok:
–¿Atsi tä let'uyaykwe?
5Lhamel nichulho wet yok:
–Ot'ukwe Nazaret lhele tä lhey Jesús.
Jesús yok:
–Ohäpe t'at.
Wet Judas, häp hin'o tä yachaj Lewuk, iyej t'at lhamel. 6Tä Jesús yok, “Ohäpe”, lhamel lhayämtejche kanhi wet nichätche katsi. 7Wet Jesús yachajo tä tay'ätshane lhamel wet yok:
–¿Atsi tä let'uyaykwe?
Lhamel nichulho wet yok:
–Ot'ukwe Nazaret lhele tä lhey Jesús.
8Jesús yok:
–Pajchene ofwel amhohen tä oyok, “Ohäpe t'at.” Tä olham tä let'uyay n'okwe, ch'anlhaye ot'unfwasna tä yikhen.
9Täjtso häp tä lhayäm matche Jesús lhämet tä yok, “Ijcha, häp lhamel tä lew'en n'oho niwohit elh che tatäy.”#Juan 17.2
10Wet häp Simón Pedro lefwajnhat iyej t'at, wet itonhi wet ifwajej Sacerdote tä Lhamya lakawo tä lhey Malco, wet ilanhi lech'ote tä tumej lefwomkat. 11Mat Jesús tahuyej Pedro wet yok:
–¡Achajo lehi afwajnhat! Che Ojcha iyäyen n'oyej olhät tä tapayna tä häpe oteläythayaj, oyähiyeja t'at.#Mat 26.39
Jesús ihi tä Anás tatache
(Mat 26.57-58; Mar 14.53-54; Luc 22.54)
12Häp sip'äl lhäy'e laka niyat, lhäy'e hin'ol tä t'uye Dios Lew'et, lhamel itsoklhi Jesús wet yäyitlhi. 13Wet ichunkat tä ihäne Anás tä häpe Caifás lakachäti, lham tä häpe Sacerdote tä Lhamya häp nekchämtso. 14Caifás häpe t'at hin'o tä ifwenho n'aji niyatey tä Judío lhayis iyhäj tä yok, “Is che hin'o tefwajni tä õ'länpe wichi.”#Juan 11.49-50
Pedro fwetaj nitäfwelayejpa Jesús
(Mat 26.69-70; Mar 14.66-68; Luc 22.55-57)
15Wet Simón Pedro lhäy'e elh Jesús lechufwenek lhamel imälheche len'äyij häp Lewuk tä õ'häne Sacerdote tä Lhamya lewukwe. Wet Jesús lechufwenek elh häpe t'at Sacerdote tä Lhamya letäfwlek. Tä mälhyejtso, õ'wahnej tä yikche Jesús tä tiyäj lech'oye, 16mat Pedro imälhe alhoye tä iwhäye lepe. Häp tä tamenej tä elh tä n'otäfwlek ihoye atsinha tä lepewo wet yok:
–Is che lewahnej hin'otsi yämlek yäm lech'oye.
17Wet atsinhatso tay'ätshane Pedro wet yok:
–¿Hä akahäpeya elh lechufwenkay hin'otso?
Pedro nichulho wet yok:
–Kha, ohäpkhit'a.
18Wet tä techäjche, häp n'okawos lhäy'e hin'ol tä t'uye Dios Lew'et lhamel ilhänhi fwiyhol wet tatayho. Wet Pedro häte iyej t'at lhamel tä lhamtej tatayho itäj.
Sacerdote tä Lhamya tay'ätshane Jesús
(Mat 26.59-66; Mar 14.55-64; Luc 22.66-71)
19Wet häp Sacerdote tä Lhamya tay'ätshaneje Jesús häp lechufwenkay lhäy'e m'ak tä lham yen lechufwenyaja. 20Jesús nichulho wet yok:
–Oweskathiyejt'a tä oyämlhi, oihipej tä nilhokej wichi tatache wet owopej ochufwenyaja tä oihi Dios Lew'et lhäy'e n'ohusew'etes, häp lhipey tä wujpe Judío lhayis lhaihuthipejwek. Wet niwohit m'ak che oweskatej tä oyäme. 21¿Chipte tä letay'ätshan n'oye? Ätshane wichi tä ilätpej n'oye wet lhamel ifwenla amho m'ak tä ofwenhopej. Tsi lhamel ihanej t'at m'ak tä oyämepej.
22Tä Jesús iwoyetso, wet elh hin'ol tä t'uye Dios Lew'et inhäpäj wet yok:
–¿Hä lewoynejetso ämet tä lechulho Sacerdote tä Lhamya?
23Jesús nichulho wet yok:
–Che ni'isan'e olhämet, äme m'ak tä häpen'e. Wok che isn'e olhämet, ¿chipte tä lenhäpäjn'o?
24Tä Anás iläte, wet ne'tek õyikchufwi tä t'akay ihi t'at yämlek õ'häne Caifás, häp Sacerdote tä Lhamya.
Äp yachajo tä Pedro fwetaj nitäfwelayej Jesús
(Mat 26.71-75; Mar 14.69-72; Luc 22.58-62)
25Wet Pedro kamaj i'alhoye tä tatayho itäj. Wet iyhäj tä lham iyej tay'ätshane wet yok:
–¿Hä akahäpeya elh lechufwenkay hin'otso?
Mat Pedro lhaifwon wet yok:
–Kha, ohäpkhit'a.
26Wet iche häp Sacerdote tä Lhamya lakawo tä elh t'at Malco tä pajche Pedro ilanhi lech'ote. Lham iyej iyhäj wet ifwenho Pedro tä yok:
–Olham tä oahiw'en mathi tä lhewej Jesús tä lhehi n'olafwek.
27Mat Pedro yachajo tä ikachu. Häpet tä mälhyejtso, nech'e y'ip ho'o.#Juan 13.38
Jesús ihi tä Pilato tatache
(Mat 27.1-2,11-14; Mar 15.1-5; Luc 23.1-5)
28Tä nech'e noj t'at honatsi wet n'älpe honhat, õyikchufwi Jesús tä tälho Caifás lew'et wet õ'häne n'oniyatyajw'et tä gobernador tä Romano ihi. Mat tä Judío lhayis nowaye che inäk'äs lhamel lhämet p'ante yok, “Elh che ihochufwi hin'o tä kahäpeya Judío lew'et, nech'e häpe t'at elh tä kok'aye wet õn'äyejo che tuj lhäk tä Pascua”, tä mälhyejtso, lhamel ihohit'achufwi gobernador lew'et. 29Häp tä tamenej tä gobernador, tä lhey Pilato, inuyejphä häp lhamel wet tahuyej tä yok:
–¿Atsi m'ak tä lhenay letesa häp hin'ona?
30Lhamel nichulho wet yok:
–Che hin'otsi niwohiye m'ak tä ni'isa, wet tek olhamel oyachajin'e ame.
31Wet Pilato yok:
–Chumaye amel wet kalelhätay m'ak tä letes, mälhyej m'ak tä amel aka ley ne'tek lewoyeje.
Mat lhamel nichulho wet yok:
–Häp olhamel tä ohäpehen Judío lhayis amel lewahinhit'a n'oyejen che olän elh che häpe.
32Tä lhamel iwoyetso, nech'e kalelhäj m'ak tä õ'woynhiyejela tä õ'län, mälhyej tä lham Jesús pajche yäme.#Juan 3.14; 12.32-33
33Wet Pilato yäpilchufwi lew'et wet t'äne Jesús, wet tay'ätshane tä yok:
–¿Hä ahäpe Judío lhayis Kaniyat?
34Jesús nichulho wet yok:
–¿Hä am t'at tä atichunhayaj täjtso, wok iche iyhäj tä yäm n'oye wet ifwel amho?
35Pilato yok:
–¿Hä ohäpe Judío tä lewoyetso? Lhamel tä haw'etfwas lhäy'e sacerdotes tä len'ohyajay ihiche, häp tä ne'tek oaitsoklhi. Wet ¿atsi m'ak tä lewoye n'aji?
36Jesús nichulho wet yok:
–Olham Oniyatyaj tälhiyet'a honhatna. Tsi che tälhiye honhat, ihichen'e lhamel tä ihänn'o tä iwohin'e laka'tshayaja n'o'pe wet tek õyachajin'e n'oye häp Judío lhayis. Mat Oniyatyaj tälhit'a kana.
37Tä Pilato iläte, wet yok:
–Tä mälhyejtso, n'äl tä ahäpe t'at niyat.
Jesús nichulho wet yok:
–Am t'at tä lhäme tä ohäpe niyat. Olham onek wet onchäthihchä honhatna yämthilek oyäme m'ak tä häpe m'ak tä matche. Wet nilhokej lhamel tä ihumin m'ak tä matche, häp tä tach'ahu n'oye.
38Wet Pilato äp yok:
–¿Atsi tä häpe m'ak tä matche?
Pilato t'uhläk inuhatphä Jesús, mat Judío lhayis tach'anlhahiyet'a
Tä Pilato ileyej tä tay'ätshane Jesús, yachajo tä inuphä wet tahuyej Judío lhayis tä yok:
–Ow'enhit'a m'ak tä letes häp hin'ona. 39Mat iche amel akey tä nichätepej akäjyaj tä Pascua wet amel let'alhe che onuhatphä n'op'ok tefwaji. Tä mälhyejtso, ¿hä lehumin che onuhatphä amel tä Judío lhayis aka Niyat?
40Mat nilhokej lhamel t'änhen wet yok:
–¡Kha! ¡Yej nuhatphä lham, nuhatphä Barrabás!
Häp lham Barrabás häpe elh tä anikoy.
Nu markerat:
Juan 18: WCHB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Biblia Wichí, Dios Lhämtes tä Matchehen © Sociedad Bíblica Argentina, 2002.
