Juan 5
5
Jesús ichesat k'efwitas länek tä iwhäye n'onayhthi tä lhey Betzata
1Tä tajyäme ifwalas iyhäj, Jesús yäple Jerusalén häp lewhäy tä Judío lhayis iwo lakäjyaja. 2Wet iche n'onayhthi tä wuj, tä Hebreo lhämet yok Betzata, tä tott'aho lepe tä lhey Tson'atas Lepe. Wet iche cinco lew'etes tä iwhäye n'onayhthitso, 3wet wujpe wichi tä t'inhayaj länhay tä iyej, asnamis, tsufwlas, lhäy'e iyhäj tä t'isanis tamchäy, lhamel imäkwetpe honhat.#5.3 Häp lhip 3 lepes lhäy'e lhip 4 ihihit'a n'otkwey lesaynhay p'ante lhamenya. Yok: Lhamel tataye chik w'ahuye inät. 4 Tsi ichepej lewhäy tä inuhchä ángel wet hiw'ahhate inät, wet elh chik häpe chik ichun tä tiyäjo, iches, noj t'inhayaj at chik häpe tä ilän. 5Wet iche elh tä treinta y ocho nekchämes tä t'inhayaj ihi. 6Tä Jesús hiw'en tä imä katsi, wet ihanej tä pitaj lewhäy tä mälhyeja, wet tay'ätshane tä yok:
–¿Hä let'uhläk leches?
7Hin'o tä t'inhayaj länek nichulho wet yok:
–Iwuk, tä nichätepej lewhäy tä w'ahuye inät, ihichet'a elh chik ithat n'oye. Tä ot'upejläk otiyäjo, mat ichepej elh tä ichun n'ohlä wet tiyäjo.
8Jesús yok:
–Nephä, chuma ahowet wet mäh.
9Häpet tä mälhyejtso, wet hin'otso iches, wet tachuma lehowet wet nech'e iwo tesa tä ilunlhi.
Mat ifwalatso häpe ifwala tä n'ot'elakw'et, 10wet tä Judío lhayis hiw'ene hin'o tä nech'e iches, lhamel ihoye wet tahuyej tä yok:
–Lhek yahinya, ifwalana häpe n'ot'elakw'et. Õ'wahnhit'a amej chik lechäj ahowet.
11Mat hin'o nichulho wet yok:
–Häp hin'o tä ichesatn'o, häp tä ifwelne n'oho tä yok, “Chuma ahowet wet mäh.”
12Lhamel tay'ätshane wet yok:
–¿Atsin'e hin'o tä häpe?
13Mat hin'o tä iches nitäfwenhiyejt'a elh tä häpe tä ichesat, tsi Jesús lhayej t'at wichi tä wuj tä ihi lhiptso.
14Mat tä paj Jesús hiw'en hin'o tä ihi Dios Lew'et, wet tahuyej tä yok:
–Lhek yahinya, tä nech'e leches athana, yej lhachajo hach'isukyajay häpkhilek nichäta ame m'ak tä hich'atej tä ni'isa.
15Wet hin'otso yik wet ifwenho Judío lhayis tä yok:
–Häpen'e Jesús tä ichesatn'o.
16Häp tä tamenej tä Judío lhayis yen tayhfwaya Jesús, tä lham iwoye m'ayhay tä mälhyejentso häp ifwala tä n'ot'elakw'et.
17Mat Jesús ifwenho lhamel wet yok:
–Ojcha ilehiyejt'a tä tachumlhi, wet häte olham otchumlhi t'at.
18Tä Judío lhayis iläte, hich'atej tä lhamel t'uhläk ilän. Ts'ilakhit'a tä lham inäk'äs n'olhämet tä yäme häp ifwala tä n'ot'elakw'et tä tamenej, mat häte tä yäm lhame tä Lajcha Dios, wet äp lhaitech'aynej t'at Dios.#Juan 10.30-38
Dios hiw'enho lakhajyhayaj Lhäs yämlek iläythen wichi wet ikalelhthen
19Jesús tahuyej lhamel wet yok:
–Matche, matche tä ofwel amhohen, Dios Lhäs yenhilhit'a m'ak chik häpe, tajlhama yenlhi m'ak tä hiw'en tä Lajcha yenlhi. Nilhokej m'ak tä Lajcha yenlhi, häte Lhäs yenlhi t'at. 20Tsi Lajcha ihumin Lhäs wet ipäyne nilhokej m'ak tä yenlhi. Wet äp ipäynhiyela m'ayhay tä inu'pe m'ayhay tä yenlhi athana, häpkhilek amel wuj tä leseltejen. 21Tsi mälhyej tä Lajcha inuhatchephä n'op'itseyhay wet hiw'enhomche lew'atshancheyaj, wet häte Lhäs hiw'enhomche lew'atshancheyaj häp iyhäj tä lham t'uhläk hiw'enhomche. 22Wet Lajcha tek ikalelhät elh chik häpe, mat yachaje Lhäs häp lakhajyhayaj tä imälhewek yämthilek lham t'at tä iwo lakalelhthayaja, 23häpkhilek nilhokej wichi iwunit häp Lhäs, hätet iwoye tä iwunit Lajcha. Elh at chik häpe chik niwunita Lhäs, häte tek iwunit Lajcha tä lechenek.
24“Matche, matche tä ofwel amhohen, Häp elh chik tach'ahuye olhämet wet ichaye Elh tä lechenekn'o, ikatej lew'atshancheyaj tä t'un. Tek õ'tihiyeja letes, tsi tafwayej t'at t'ilek wet nichätho lew'atshancheyaj. 25Matche, matche tä ofwel amhohen, Nek lewhäy, wet häpe t'at athana, tä n'op'itseyhay iläthiyela Dios Lhäs lechos, wet lhamel tä iläte iläyhihena. 26Tsi mälhyet iwoye tä häpe Lajcha tä n'ow'atshancheyaj tälho, häte hiw'enho Lhäs lakhajyhayaj yämthilek hiw'enhomche lew'atshancheyaj wichi. 27Wet äp hiw'enho len'ohyaj yämthilek ikalelhthen lhamel, tsi lham häpe t'at Hin'o Lhäs.
28“Yej seltej tä oyäme tä nämla lewhäy tä nilhokhiyeja n'op'itseyhay iläthiyela lechos 29wet inuhikwephäla tä tälhomche lep'itsekhis. Wet lhamel tä iwoye p'ante m'ak tä is, inuhikwephäla yämthilek nichätho lew'atshancheyaj. Mat lhamel tä iwoye p'ante m'ak tä ni'isa, inuhikwephäla yämthilek nichätho letäyhyaj.”#Dan 12.2
Häp m'ayhay tä ikalelhät tä Jesús len'ohyaj iyej
30Wet Jesús äp yok:
–Olham oyenhilhit'a m'ak chik häpe. Owo okalelhthayaja mälhyej tä Ojcha ne'tek owoye, wet is alhoho okalelhthayaj, tsi owohiyet'a m'ak tä olham t'at tä onech'ethayaj, mat owoye lenech'ethayaj häp Elh tä lechenekn'o.
31“Chik oyäm lhame, lajit lahaya olhämet. 32Mat iche Elh tä yäm n'oye, häpe Ojcha, wet lhämet tä yäm n'oye matche t'at.
33“Amel lewoyayn'aj achenekaye Juan, wet tä nichulhn'aj amhohen tä yäm n'oye, matche t'at.#Juan 1.19-27; 3.27-30 34Mat oyok, häpkhit'a hin'o chik häpe lhämet chik yäm n'oye chik oisej, tajlhama tä oyäme täjtso häpkhilek letafwayhen. 35Juan hätet iwoye n'ochäkw tä y'uho wet ihutunpe honhat, wet amel lehuminay ayej isi tä häpe lhämtes. 36Mat iche m'ak elh tä inu'pe Juan tä yäm n'oye, häpe t'at m'ak tä oyenlhi. Tsi oyenlhi m'ak tä Ojcha ne'tek oyenlhi, wet häp tä ikalelhät tä matche tä Ojcha tä lechenekn'o.
37“Wet Ojcha tä lechenekn'o häte yäm n'oye. Mat amel ihichet'ak lelätaye lechos, wok lew'en, 38wet lhämet iwohit'a w'eta amhiche, tsi tek let'ekhayache olhämtes tä owoye tä Ojcha lechenekn'o. 39Wuj tä alechufwenayej Dios lhämtes tä ihi Lehi, tsi lefwetajay häp tä aisej yämthilek lechäte haw'atshancheyaj tä t'un. Matkat tej tä Dios lhämtestso yäm at n'oye thayej, 40amel tek let'uhläk leho n'oye yämthilek i'amejen haw'atshancheyajtso.
41“Chik wichi fwetaj iwujyenn'o, tek otchumlä. 42Ontäfwel at amejen, wet ohanej tä lehuminhit'a Dios. 43Olham onämej kana Ojcha lhämet, wet amel tek letachumay n'ohlä. Mat chik elh chik häpe nämej kana lham lhämet, letachumay'atlä. 44¿Chip iwoyek amel let'ekhaye m'ak tä oyäme, chik alewujyenhen at amel wet tek let'uyaykwe yämthilek Dios tä weihalha iti amejen awujyaj?
45“Mat yej fwetajay olhamlak oti amejen ates tä lheyayhi tä Ojcha tatache. Häp elh tä iti amejen ates häpe t'at Moisés, häp lham tä amel aniwhayaj iyeji. 46Tsi chik let'ekhahiche m'ak tä Moisés yäme, häte let'ekhahiche m'ak tä olham oyäme, tsi Moisés lesaynhay p'ante häp tä yäm n'oye. 47Mat tä lekachuyay häp lham lesaynhay, ¿chip iwoyek let'ekhayache m'ak tä olham oyäme?”
Nu markerat:
Juan 5: WCHB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Biblia Wichí, Dios Lhämtes tä Matchehen © Sociedad Bíblica Argentina, 2002.
