Chivkeeb Lus Tawqhia
Lus Tawqhia
Lub npe Chivkeeb no txhais hais tias “txawmkeeb.” Phau ntawv no yog qhia txog kev tsim lub ntuj thiab lub ntiajteb, kev txawmkeeb ntawm neeg, kev txhaum thiab kev txomnyem pib muaj los rau hauv lub ntiajteb, thiab hais txog Vajtswv kev ua haujlwm nrog rau neeg. Phau Chivkeeb no muab faib ua ob ntus loj li no:
(1) Tshooj 1-11 yog hais txog kev tsim muaj lub ntiajteb thiab keebkwm thaum ub uas chiv muaj neeg los. Ntu no yog hais txog tej tiam neeg, xwsli, Adas thiab Evas, Ka-ees thiab Anpees, Nau-as thiab dej nyab ntiajteb, thiab tus Pejthuam hauv tebchaws Npanpiloos.
(2) Tshooj 12-50 yog hais txog cov Yixalayees cov yawgkoob thaum ub lub neej. Thawjtug yog Anplahas, uas sawvdaws paub txog nws txoj kev ntseeg thiab kev mloog Vajtswv lus. Dhau ntawd yog hais txog nws tus tub Ixaj thiab nws tus xeebntxwv Yakhauj (uas muaj dua ib lub npe hu ua Yixalayees), thiab Yakhauj kaum-ob tug tub uas chiv muaj kaum-ob xeem rau hauv haivneeg Yixalayees. Ib qho tshwjxeeb yog hais txog Yauxej uas yog Yakhauj ib tug tub, thiab tej xwmtxheej uas tshwm muaj es ua rau Yakhauj thiaj coj nws cov tub khiav mus nyob rau tebchaws Iziv.
Uantej phau ntawv no hais txog neeg, mas twb xub hais txog tej uas Vajtswv tau ua tag los lawm. Nws pib ntawm qhov kev qhia uas muaj tseeb hais tias Vajtswv tsim lub ntiajteb lub ntuj, thiab mus xaus rau ntawm Vajtswv cov lus cogtseg hais tias Nws yuav hlub thiab tabncuab Nws haivneeg mus li. Thoobplaws phau ntawv no, Vajtswv yog tus tseemceeb tshaj; Nws yog tus uas rautxim thiab txiavtxim rau cov neeg uas ua txhaum, yog tus coj thiab pab Nws haivneeg, thiab yog tus uas teeb lawv tej keebkwm. Phau chivkeeb no yog sau txog ib haivneeg txoj kev ntseeg thiab pab kom txoj kev ntseeg ntawd ciajsia.
Txheejtxheem
Tsim ntiajteb thiab neeg (1:1—2:25)
Chiv muaj kev txhaum thiab kev txomnyem (3:1-24)
Txij Adas mus txog rau Nau-as (4:1—5:32)
Nau-as thiab dej nyab ntiajteb (6:1—10:32)
Tus pejthuam hauv Npanpiloos (11:1-9)
Txij Semas mus txog rau Anplas (11:10-32)
Cov yawgkoob: Anplahas, Ixaj, Yakhauj (12:1—35:29)
Exaus cov xeebntxwv (36:1-43)
Yauxej thiab nws cov tijlaug (37:1—45:28)
Cov Yixalayees nyob hauv tebchaws Iziv (46:1—50:26)
Iliyochaguliwa sasa
Chivkeeb Lus Tawqhia: MWW2022
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2022 United Bible Societies. All rights reserved.