Hosea 5
5
Hukumu dhidi ya Israeli
1“Sikieni hili, enyi makuhani!
Kuweni wasikivu, enyi Waisraeli!
Sikieni, ee nyumba ya mfalme!
Hukumu hii ni dhidi yenu:
Mmekuwa mtego huko Mispa,
wavu uliotandwa juu ya Tabori.
2Waasi wamezidisha sana mauaji.
Mimi nitawatiisha wote.
3Ninajua yote kuhusu Efraimu,
Israeli hukufichika kwangu.
Efraimu, sasa umegeukia ukahaba,
Israeli amenajisika.
4“Matendo yao hayawaachii
kurudi kwa Mungu wao.
Roho ya ukahaba iko ndani ya mioyo yao,
hawamkubali Mwenyezi Mungu.
5Kiburi cha Israeli kinashuhudia dhidi yao;
Waisraeli, hata Efraimu,
wanajikwaa katika dhambi zao;
pia Yuda atajikwaa pamoja nao.
6Wanapoenda na makundi yao ya kondoo na ng’ombe
kumtafuta Mwenyezi Mungu,
hawatampata;
yeye amejiondoa kutoka kwao.
7Wao si waaminifu kwa Mwenyezi Mungu;
wamezaa watoto haramu.
Sasa sikukuu zao za Mwandamo wa Mwezi
zitawaangamiza wao
pamoja na mashamba yao.
8“Pigeni tarumbeta huko Gibea,
na baragumu huko Rama.
Pazeni kelele za vita huko Beth-Aveni#5:8 maana yake Nyumba ya Ubatili (au Uovu); yaani Betheli kwa dhihaka;
ongoza, ee Benyamini.
9Efraimu ataachwa ukiwa
katika siku ya kuadhibiwa.
Miongoni mwa makabila ya Israeli
ninatangaza lile ambalo halina budi kutukia.
10Viongozi wa Yuda ni kama wale
wanaosogeza mawe ya mpaka.
Nitamwaga ghadhabu yangu juu yao
kama mafuriko ya maji.
11Efraimu amedhulumiwa,
amekanyagwa katika hukumu
kwa kuwa amekusudia kufuatia sanamu.
12Mimi ni kama nondo kwa Efraimu,
na kama uozo kwa watu wa Yuda.
13“Efraimu alipoona ugonjwa wake,
naye Yuda vidonda vyake,
ndipo Efraimu aligeukia Ashuru,
na kuomba msaada kwa mfalme mkuu.
Lakini hawezi kukuponya,
hawezi kukuponya vidonda vyako.
14Kwa maana nitakuwa kama simba kwa Efraimu,
kama simba mkubwa kwa Yuda.
Nitawararua vipande vipande na kuondoka;
nitawachukua mbali,
na hakuna wa kuwaokoa.
15Kisha nitarudi mahali pangu
hadi watakapokubali kosa lao.
Nao watautafuta uso wangu;
katika taabu yao watanitafuta kwa bidii.”
Iliyochaguliwa sasa
Hosea 5: NENO
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Neno: Maandiko Matakatifu™ NMM™
Hakimiliki © 2018, 2024 na Biblica, Inc.
Imetumiwa kwa ruhusa.
Haki zote zimehifadhiwa duniani kote.
Kiswahili Contemporary Scriptures™
Copyright © 2018, 2024 by Biblica, Inc.
Used with permission. All rights reserved worldwide.