Zaburi 98

Mwenyezi Mungu Mtawala wa dunia

Zaburi.

1Mwimbieni Mwenyezi Mungu wimbo mpya,

kwa maana ametenda mambo ya ajabu;

kitanga chake cha kuume na mkono wake mtakatifu

umemfanyia wokovu.

2Mwenyezi Mungu ameufanya wokovu wake ujulikane

na amedhihirisha haki yake kwa mataifa.

3Ameukumbuka upendo wake

na uaminifu wake kwa nyumba ya Israeli;

miisho yote ya dunia imeuona

wokovu wa Mungu wetu.

4Mpigieni Mwenyezi Mungu kelele za shangwe, dunia yote,

ipaze sauti kwa nyimbo za shangwe na vinanda;

5mwimbieni Mwenyezi Mungu kwa kinubi,

kwa kinubi na sauti za kuimba,

6kwa tarumbeta na mvumo wa baragumu za pembe za kondoo dume:

shangilieni kwa furaha mbele za Mwenyezi Mungu, aliye Mfalme.

7Bahari na ivume na kila kilicho ndani yake,

dunia na wote wanaoishi ndani yake.

8Mito na ipige makofi,

milima na iimbe pamoja kwa furaha,

9vyote na viimbe mbele za Mwenyezi Mungu,

kwa maana yuaja kuhukumu dunia.

Atahukumu dunia kwa haki

na mataifa kwa haki.

Iliyochaguliwa sasa

Zaburi 98: NENO

Kuonyesha

Shirikisha

Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia

Neno: Maandiko Matakatifu™ NMM™

Imetumiwa kwa ruhusa.

Haki zote zimehifadhiwa duniani kote.

Kiswahili Contemporary Scriptures™

Jifunze Mengi Kuhusu Neno: Maandiko Matakatifu 2024