Lukahtar 6
6
O Isuso čačarel o ćhinipe e gjivehko thaj o sastaripe e manušehko e šuće vastehko subotaha, savatone. Ćidipe e dešudone apostolongo. E vorba pe plajin.
1Ande anglutni subota pala o dujto djive e Pashako nakhela o Isuso maškar e umalja, a lehće amala phagarena thaj ćhindjarena o gjiv, o kućalo, thaj morena leande burnekha thaj h̄ana le.
2A varesave katar e lilvarne mothode lengje: Sohće gova ćeren so si nahasili thaj niči tromajvol te ćerdol subotone.
3Thaj dindo vorba o Isuso phendah lengje. Zar niči arakhlen ande lila gova so ćerdah o Davido kana bokhaljaha, vov thaj sa gola save seha leha.
4Sar dijah ande Devlehko ćher thaj sar lijah e thodine Devlehće marne thaj h̄alah len, a dijah lendar vi golende save seha leha, a gova niči tromala niko te h̄al, osim e lilvarnendar.
5Thaj phendah lengje: O čhavo e manušehko si o šorutno vi e subotako.
6A avere subotako dijah vov ande khangjiri thaj sikavela, thaj saha gothe jekh manuš savehko sah o čačo va šuko.
7E sikavde thaj e lilvarne, e čhorvale, dikhena pala lehte, niči li subotaha sastarela le te došaren le, te čingarden le.
8A vov džanglah so ićarena von ande pi godji thaj phendah gov manušehće kaj sah lehko va šućilo: Ušti thaj ači po maškar! A vov uštilah thaj ačhilo tar.
9A o Isuso phendah lengje: Te phučav tumen, so si hasili subotaha te ćerel pe, lačhipe jali džungalipe, te ćereh lačhe pala odji jali džungalimaha te h̄asareh le. Pe gova von ačhile e vorbaha.
10Thaj dikhindo pe lende, savor̄ende, phendah lehće: Inzar ćo va, a vov ćerdah gadija. Thaj lehko va ačhilah sasto sar vi okova aver.
11A von saijekh h̄oljalje thaj pherdile bigodjaverimaha thaj dije vorba jekh avrehće so kam ćeren e Isusohtar.
12Gole djivesengo iklistah vov upre pe plajin te moli pe e Devlehće, thaj sor̄o e jrat molisaljah e Devlehće.
13Thaj kana djivesaljah, akhardah pehte thaj ćidijah pe amalen, a maškar lende alosardah, lijah dešudo dženen, savengje thodah anav: Apostolujra.
14E Simono savehće dijah anav Petre, thaj lehće phrale, e Andrija, e Jakovo tbaj e Jovano, e Filipo thaj e Vartolomije.
15E Mateje thaj e Toma, e Jakovo e Alfejehćere thaj e Simono, dine muj Ziloto.
16E Juda Jakovohćere thaj e Juda Iskarioto savo h̄oh̄amne dijah leh ke lehće dušmaja.
17Thaj inklistah lenca thaj ačhilah pe jekh šukar than, a leha but lehće amala. Thaj but manuša avile andar sa e Judeja thaj andar o Jerusalimo thaj andar e Tirohko thaj e Sidonohko them ozo paj.
18Save avile te ašunen le thaj te saston pire nasvalimahtar thaj gola save seha len ande e melale duhujra thaj ićarena len. Thaj von sastile.
19Thaj sa e džene mangena te astardon pala lehte, kaj andar le iklela o zuralipe thaj sastardah saijekhe, savor̄en.
20Thaj vov vazdindo pe jakha pe pe amala dijah vorba: Bah̄tale sen tumen, čor̄ale e duhoha, kaj tumaro si o Devlikano thagaripe.
21Bah̄tale sen tumen save bokhaljen akana, kaj kam čaljon. Bah̄taće sen tumen, save roven akana, kaj maj palal kam asan.
22Bah̄talipe avel tumee kana e manuša pe tumende avena h̄oljariki thaj kana kamen te ulaven tumen te kaljaren tumen, sikavindo tumaro anav sar džungalo, sar rzgome, zbog e čhavehtar e manušećirehtar.
23Aven bah̄tale thaj ćhelen gov djive, kaj, eke dikhenta, baro si tumaro poćinipe po del. Kaj gadija ćerde e prorokongje lengje dada.
24A pharipe kam avel tumengje, lovale barvalengje, kaj tumen lijen tumaro poćinipe.
25Pharipe avel tumengje, e akanutne ÄŤaljengje, kaj kam tumen bokhajvon. Phare te avel tumare odjengje, save akana asan, kaj kam maj palal rovljardon thaj kam ÄŤhoren asva.
26Bibah̄ kam avel tumee, kana lena savor̄e te šukare den vorba pala tumende, kaj gadija ćerde vi e h̄oh̄amne, bipaćivaće, prorokongje lengje dada.
27A akana mothovav tumee save ašunen ma: Čumiden tumare dušmanon thaj ćeren lačhipe vi golengje e jakhalengje save si h̄oljariki pe tumende.
28Blagoslovisaren golen save den tumen armaja, thaj molisajvon e Devlehće pala gola save dukhaven tumen.
29Kana čalavela tu vareko pe jekh čham, tu sikav lehće vi e aver čham, e aver falka, a ko kamel te huljarel thaj te del mrtik tutar ći kavadji, de lehće vi ćo gad.
30De svakone manušehće savo khanči mangela tutar, a golehtar na mang palpale, savo lijah neso ćiro.
31Thaj sar kamen te ćeren tumengje e manuša, gadija ćeren vi tumen e manušengje.
32Thaj te čumidena golen save tumen čumiden, savo lačhipe si tumengje golehtar? Kaj vi e došale manuša čumiden golen save len volin, čumiden.
33Thaj te ćerena lačhipe golengje save tumee ćeren lačhipe, so si tumee golehtar? Vi e bangjimahće, došamne džene ćeren gadija.
34Thaj te dena udžile golengje savendar džanen kaj kam irin tumengje, a tumen kam len palpale, so si tumen golehtar? Kaj vi e došale, bezeh̄ale manuša den e avere došalen udžilipe te pale len egaći palpale.
35Trubun te volisaren tumare dušmanon thaj te ćeren lačhipe thaj te den udžilipe, a na te nadisajvon nisohće golendar save udžilinajvon, thaj kam avel tumengje baro poćinipe thaj kam aven e čhave e Maj Barederehćere, kaj vov si lačho vi e bilačhengje thaj e džungalengje.
36Aven kovle odjehće sar vi tumaro dad kaj si kovle, putarde ilehko.
37Thaj na khanikah te sudisaren thaj niči kam sudi pe ni tumengje. Na den nikah armaja thaj niči kam ni tumen del khonik r̄omaja. Muken e doša, o bangjipe thaj kam vi tumee mukel pe.
38Den thaj kam del pe tumengje. Lačhi mera, ćićidini, ćinome thaj lačhe pherdini kam del pe tumee an tumare brekha, angalja, kaj save vasoha den, gole vasoha kam iri pe tumee.
39Thaj mothodah vov lengje gaja paramiči: Da li šaj o kor̄o phiravel jekhe avere kor̄e, da li kam liduj džene peren ande h̄îv.
40Našti avel o čhavor̄o upral pire sikamnehtar, a kana vov maj lačhe sićola, avela gadija godjaver sar vi lehko sikamno.
41A sar šaj dikheh o bur̄or̄o ande će phralehći jakh, a e phal niči haćareh ande ćiri jakh.
42Thaj sar šaj pheneh će phralehće: Phrala! Ači te ikalav o bur̄or̄o savo si ande ći jakh. A tu korkor̄e niči dikheh gabor phal ande ći jakh. Halh̄aneja, m’ anglal ikal e phal andar ći jakh, pa kam dikheh vi o bur̄or̄o te ikaleh andar će phralehći jakh.
43Kaj naj nijekh lačho kaš savo kam bijanel bilačhe, a nijekh bilačho kaš savo kam bijanel lačhe.
44Kaj svako kaš pindžardol pe piro bijanipe: Niči ćidinajvon e smočine katar o karno, a e drakh katar e kalkalin, e r̄ugujra.
45Lačho manuš andar e lačhi rig pire ilehko ikalel hasilipe, a o džungalo manuš andar e džungali rig pire ilehtar ćerel džungalipe, kaj lehko muj maj but del vorba egolehtar soha si pherdino lehko odji.
46A sohće phenen mae: Bareja! Bareja! A niči kanden gova so me vaćarav tumee.
47Me mothovava tumee sohko si saijekh gova savo džal pala mande thaj thovel kan me alava thaj ćerel prema lende.
48Vov si sar jekh manuš savo ćerel pehće jeh ćher thaj hanavel but thaj h̄anduk, pa tala o ćher thovel bar̄a. A kana katar e bršinda avile e paja, dijah e len pe gova ćher thaj našti miškosardah leh nisar, našti vazdijah leh e thanethar, kaj o ćher sah ćerdino po bar̄.
49A gova savo ašunel, a niči kandel, vov si sar jekh manuš savo ćerel pehće o ćher pe phuv kovli bi e bar̄engo, pa kana del e len jekhvaratar eravel leh thaj o ćher perindo sigo uladol thaj rispi pe ande kotoror̄a.
Iliyochaguliwa sasa
Lukahtar 6: GURB1938
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Englezongo thaj avere Themengo Biblijako Amalipe 1938.