A:imo 8
8
Mukusadana adamite dowatiliyana ele ka:isa gi
1Ma:ma enoba Sidinapa LODote na: ituna:miyana gi, adami ele ka:isa. 2Obate anate tiliyana, A:imos a: powa tilaloya.
Na: gilala wisa layamana, na: adami ele ka:isa tilelowa.
LOD amalena: dima layana, a:yatanapa tepa a saowena na:dowali Islael lumadima.#8:2 Ibulu gilala gobala adami gagita:a:yata gilalata: kekeda:minanona gilala enoba menagi. Na: obaimunu sosawe gima obai pa:pa na:sa:da:minamalowa.
3 LOD Godote lalelo, na: enoba Sidinapa LODote lalelowa, a:ma kadepala balelamina genamana dilite sabe dilima leleda:madili. Lumumunu kaokoda:na obebe waelabeyagaite wa kabigibegale dowatelamadili. Iwiya awana.
4Aitapadilina luma a:ima etoda:minenewamena luma da: ma:ma gilala enamada:la,
a:pite ma:ma wa gobala aitapadilina luma ilapala da:minenewamena luma,
5de latedelewa,
samoso kanika:napa poko gi powa tepala a:yata saolamaleloya
se sa:dowali totoda:minimana kon ewadelamada:le,
a:pite Sabadi kadepa awana gi powa tepala a:yatamaleloya
se ewa sasabale kon ewadelamada:le,
a:pite nana ulama kowabi
ameta wisa sidila ewadelamada:le
a:pite sewatana awapamina lopalale wisa alilamadili,
6se lopala binina wisale alelamada:le
a:pite lopala iwida:mininina luma ameta a:i lopalale alelamada:le,
kon kakapa nana ulamada ewadelamada:le.
7 LOD enoba Islael lumumunu Godote lalelo, na: obaite a:na:da:miniyana gi pa:pa kobele eda:malowa.
8Ma:ma gima waima:te a:ma wa gagagamunamalelo,
a:pite a:ma wala edelina lumate sabedelamadili.
Nael wasewanapa wi a:na:pi a:ma wate patamalelo
obate toteketate dite a:pite gwama wima manamalelo
Isipt wanapa Nael wasewa a:na:pi.
9 LOD Godote lalelo, na: enoba Sidinapa LODote lalelowa, a:ma kadepala
na: wa debe palala bapile wa debeminamalowa
a:pite kadepa tepa bapile wa iti kanabi minamalowa.
10Na: a:dowali awanana pokopoko gi ameta lumagite kaowela sasala edelewamena tepama leleda:minamalowa
a:pite da:dowali sa:kela dili siya ameta sabema leleda:minamalowa.
Na: de esesewalida:na kakana lopala kakamina gima da: auwada:minamalowa
a:pite na: da:dowali ganabina tita galada:minamalowa.
Ya:ma tepa enoba susa:gite obape pulagi menagite kaowela gwanasaweda:le sabelamlelona tepa minamalowa
a:pite a:mape a:yata enoba sokamanapa kadepa elamalelo.
11 LOD Godote lalelo, na: enoba Sidinapa LODote lalelowa, kadepate saolamalelo
ne baya bini gi ma:ma wa kabigibegama auwaminamalowamena,
pa: baya bini gita: gwama wi iyawa gita:,
ameta LODope gilala enamada: gi iyawate obai dapolamalelo.
12Dalate eta wasewale eta wasewama dagadagale na:da:tedelamadili
a:pite Wawi ya:dela gwama Tawa di palama na:da:tedelamadili,
obaite LODope gilala uwalelamadili
ameta pa:pa tilamadili.
13A:ma kadepala
sa:sa:lena apeda: kanika:da:na aminata: kakamalina apeda: kanika:dana kakasita:
obaite wi iyawa gile kaokolamadili.
14Samaliya wanapa ididalagida gi mengimite edilina luma,
gwama Da:n wanapa god eolage latedilina luma,
gwama Beyasiba wanapa god eolage latedilina lumate,
nisislete kaokolamadili,
obai pa:pa gwama patimada:madili.
Iliyochaguliwa sasa
A:imo 8: GBOTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gogodala Bible Translation Project © Bible Society of Papua New Guinea, 2016.