A:ig 1
1
LODote balelamina genama a:na:mina gima gilala layana gi.
1Kanaba Daliyus obate sakinapa gogola kanaba eloyana tepala, enoba 6 samoso lopanapa kadepala, Selubabel enoba Sa:eltielepe pulagi Yuda wala gabamani eloyana. A:pite Yosuwa enoba Yeyosadakape pulagi, Sidinapa guwali dalagi eloyana. Amale Godote obape wala gilala lada:napa dalagi A:igaite obai sakidima gwalemonoyana.
2Ma:ma enoba LOD Kamalinapate lalelona gilala. Ma:mai lumate ladili, LOD balelamina genama a:na:mina tepa pa: saolanapa.
3 LODote obape wala gilala lada:napa dalagipe magatale lumadima gwalemonoyana. 4Obate a:negelayana, de da:dowali sa:sa:lena gegenamale edelemela, ameta na:pe balelamina genamate sosawe dola elelo.
5Ma:ma enoba LOD Kamalinapate lalelona gilala. Da: de a:ta:pi eda: edelewamena gi gobala da: ya:ma gi sa:lele iwalelamadelewa. 6Da: egada lopala waelabeyagai tolamadelewamena, ameta nana ulama patila tepala menagigida: bapi patiletedelewa. Da: baya kabigibega nanelewa, ameta da:dowali gwana pa:pa ida:te edili. Da: wi kabigibega nideletedelewa, ameta wi iyawa gite da:dile pa:pa binilelo. Da: kipale gosama oko a:na:minenewa, ameta da: ya:ma kipale gosa golo tataleda:na ka:ikisa gobama aliletedelewa. Da: kaka gulada:mina gima kakana lopala waelabega kakaminenewa, ameta kaka pa:pa gula eda:tedili.
7Ma:ma enoba LOD Kamalinapate lalelona gilala, de edelewamena kanika:wa gobala ma:ma gi sa:lele iwaledelamadelewa. 8Da: sakama dida:te i lapolete alete kola:te balelamina genama ana:minamadelewa, ne a:ma gima sa:kelata: ewameta: alela gima, LODote lalelo. 9Da: nana ulama kabigida:beyagai alelamada:le iwida:minamadelewa ameta da: tila, ya:mai gite da:pe iwida:mina gida pa:pa awapa eda:te, nana ulama ameta kokowabi bapi eda:tedili. De gegenamama alete pa:da:tedelewamena egada gobana nana ulamadana lopala, ne na:dowali ipopona:da:le wama paiwada:minamalowa. Powa gi asele ya:ma gi a:na:pi dola eleloya. Gi ase LOD Kamalinapate lalelo, da: na:dowali balelamina genama sosawe dola elelola ameta da:dowali gegenama gi kabigibegale iwaleda:dele a:mai gegenama sa:leda:minenewa. 10Enobala sawisakala mimida:bite kola:te a:i baumiwila, lopala sa:lele apeda: gi a ekemiwame. 11Ne kadepa bega gi da:pe wata: sakata: dima dapuloyamana. Ama kadepa ilate de toleyamana lopala sosaweda:miyana enobai, witita: biniyadita: olibita: gwama eta:mi egadana lopalata:. A:ma kadepa ilate lumata: anekekeyapota: atida:yana, a:pite a:pe lopala waelabeyagaite seseda:le sesediyana.
12Enobala Selubabel enoba Sa:eltielepe matata:, a:pite Yosuwa enoba Yeyosadakape mata, oba enoba sidinapa guwali dalagi, gwama Islael luma waelabegada obaimunu LOD Godope gilala lada:napa dalagi A:igayate gwalemonoyana gilalama gima kamidiyana, gi ase A:igai enoba obaimunu LOD Godote auwamiyana dalagi. Enobala obaite LOD emodiliyana.
13Amale LODope gilala lada:napa dalagi A:igai obate ma:ma LODope gilala obai danayana. LODote lalelo, na: da:da elomina tepala elamalowa, ma:ma enoba gibalama gi kakalaminadele gima kamina bata gi. 14Amale LODote Yuda wanapa gabamani dalagi Seluba:bel Sa:elitielepe pulagita:, a:pite sidinapa guwali dalagi Yosuwa Yeyosadakape pulagita:, gwama Islael luma waelabeyagimunu gwana gobanapa limo gi iwalela daloda:miyana. Obaite pa:da:te obaimunu Kamalinapa LODope genama a:na:mina gi asemiyana. 15Enoba kanaba Dalius obate sakinapa gogo gobala wa tiloyana tepala, enoba naba 6 napa samosope naba 24 napa kadepala.
Iliyochaguliwa sasa
A:ig 1: GBOTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gogodala Bible Translation Project © Bible Society of Papua New Guinea, 2016.