Nayu 1
1
1Ma:ma enoba Elikosonapa dalagi Nayumate taote opa:ya ediyala tida:yana gi, Godote Niniba baiga gima ma:ma gi oba itumiyana.
LODote Niniba baigadima ga:oloyana gi
2 LOD enoba sosawe gima nugu elotanapa God, LOD wisa eladele kabigibegale ga:olotelelo.
LOD oba dima giwa:la edelina lumadima wisa dapulotelelo,
a:pite obate obape giwa:lanadima ga:olamunotelelo.
3 LOD pa: sela ga:otanapa, obape kamali kabigibega,
LODote sosawenage layana luma pa:pa wisa bini a: na:sa:da:minamalelo.
Obate waminanona nabidi paiwa ganabita: gogota:te wamidilina gi a:na:pi,
a:pite iti enobai obape a:i pulu.
4Oba wasewa anadolote wi apada:munotelelo,
Wasewa waelabega gobana wi obate apada:mitelelo.
Basan wata: Ka:mel wata:la apedilina lopala waelabeyagai sesedili,
Lebanon wana ikala iya:ta: sesedili.
5A:pite saka sisidina gagaga edelamadili obape sosoko palala,
gwama a:i saka ka:ekelete binida:madili.
Obate pa:lelola a:ite gaga elamalelo
a:pite a:ibaigata: gwama a:mala edelina luma waelabegata: sasiwadelamadili.
6Obate ga:olamalelona powate lelolamaleloya.
Obate kabigibegale ga:olamalelona tepala powate elamaleloya.
Obape ga:o gi enoba ila a:na:pi, obate a:na:minamalelo,
obape lopa palala ba:kele babasa:mida:madili.
7 LOD enoba sa:lebapi,
gite menebega etelelona tepala oba enoba a:wa saba.
Obape a:wa sabale edelina luma obate sa:lele iwa:la elotelelo,
8wi ganabile obate,
giwa:lana dapolale dapolamalelo,
a:pite obate giwa:lana iti kanabi gobama datawamunamalelo.
9Obai LODdima sosawe a:na:mina gi iwalelamadilina,
LODote ya:ma gi ekeminamalelo.
A:pite obai pa:pa gwama patimada:te oba asakamainamadili.
10Tokobe olate obai papada:minamadili.
Sika nidelete daledale edelina luma a:na:pi obai daledale edeli,
ilate tila oloda:lona gi a:na:pi obai binida:minamadili.
11Nineba baiga, a: gobala
LODdima sosawe gi a:na:mina nabidi uwalolona lumagi a kekeyana,
obate sosawe a:na:da:mina gi luma ituda:minano.
12Ma:ma enoba LODote lalelona gilala.
Oba a:negelalelo, obai amowada:na luma waelabega a:meta,
ameta giwa:lanate obai dapoliwila obai wama kaokolamadili.
Yuda, na: a: dima alikikimina a atayamana,
ameta amapulala na: pa:pa gwama a: dima alikikimina atamalowa.
13Obaite a:dowali madama kamiyana lopala na: amapulala ka:minamalowa,
obaite auli taole a: papamiyana, enoba tao na: ta:mite wama milamalowa.
14Nineba baiga, LOD a: gima gilala a lawena.
Oba a:negelalelo, a:dowali gagida:na luma, enobai a:dowali a:iwani, bini balama eda:madili.
Obaite maile ukuluta: aulita:le a:na:da:miniyana ididali,
enoba a:dowali awanana gegenama gobala dowatilina lopala,
na: ka:ka:munamalowa.
A:dowali olawa a:idoba tute a: gima sa:leminamalowa, gi ase a: sosawe gi a a:na:da:munoyana.
15 #
Ais 52:7
Tila, podo sidila pa:lelona dalagi sa:lenapa gilala egete pa:lelo,
a:pite gela gilala ladolo
nagala apila gima.
Yuda a:dowali awanana poko gi sa:leda:mu,
e gibapile ladoloyana gilala a: a:na:da:mu.
Sosawena lumate pa:pa gwama a:dowali wa gobama pa:da:madili,
obai a dapolale dapote binida:miyana.
Iliyochaguliwa sasa
Nayu 1: GBOTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gogodala Bible Translation Project © Bible Society of Papua New Guinea, 2016.