Sekal 12
12
Yelusalem baigape giwa:lana dapolale dapolamadilina gi Gododile pa:yana gi
1Ma:ma enoba LOD, sawisaka gigimite, a:ibaiga sokate toda:te, lumagipe limo oba gobama toda:yana LODote Islaelana luma gima lalelona gilala. 2Obate lalelo, na: Yelusalem kabuwa a:na:pi minamalowa, obate ebatana baigabaigana luma sika nida:na luma a:na:pi da:minamalelo. Yudata: Yelusalemata: giwa:lanate tanamada:minamadili. 3Ya:ma kadepala, enoba a:ibaigana luma waelabeyagaite oba dima giwa:la edelamada:le pa:da:madilina, na: waelabega baigabaigadima Yelusalem kalekalenapa ba:kele minamalowa. Obaite wama galaminamada:le a:pidelamadilina tepala ameta obaiya obai galabe da:minamadili.
4Ya:ma kadepla na: os waelabega emo gi datate a:pite osole wamidelatana dala waelabega daledale gi datamalowa, LODote lalelo. Na: tao ilamale Yuda wa sa:lele tilamalowa, ameta na: baigabaiga waelabeyagimunu osomunu tao kaokoda:munamalowa. 5Enoba kadepala Yuda wana kabigida:na dalate obaimunu gwana gobala a:negelalamadili, Yelusalem baigana luma a kakamalibega ediwina, gi ase LOD Kamalinapa obaimunu God elelo.
6Ya:ma kadepala na: Yuda wana kabigida:na dala ila tilimina gobama toda:napa olololona sosopane a:na:pi minamalowa, gwama teya papamina gobanapa ila awa a:na:pi. A:na:pile obaite ya:deta: ya:deta:la edelina luma dapolale dapolamadili, ameta Yelusalem obape sabale sa:lele elamalelo.
7 LODote lope Yuda wana lumumunu galabe pawamidamamalelo, a:pite Da:ibidipe lumata: Yelusalem baigana lumata: obaimunu kamali gite Yuda wana lumumunu kamali gi pa:pa giwitilamalelo. 8Ya:ma kadepala LODote Yelusalemala edelina lumumunu galabe pawada:minanapa elamalelo, a:pite oba gobanapa bonogowanapa lumagi Da:ibid a:na:pi elamalelo, gwama Da:ibidipe luma God a:na:pi edelamadili, a:na:pi LODope pa:li lumagite obai lopadamate welelona gi a:na:pi. 9Ya:ma kadepala na: Yelusalem baigama giwa:la edelina luma waelabega dapolale dapolamalale welamalowa.
Luma obaite kotomiyana lumagi gima sabediliyana gi
10A:pite na: Da:ibidipe lumata: Yelusalem baigana lumata: dima awe nagala limota: timo eda: limota: saminamalowa. Obaitena: dima lotobadelamadili, enoba obaite kotomiyana lumagi, a:pite dalagite obape mata menagi sabeminanona gi a:na:pi, obaina: dima sabedelamadili, a:pite lumagite obape mata menagi sabeminamalelona gi a:na:pi obai sabedelamadili. 11Ya:ma kadepala Yelusalem baiga gobala kabigibegale sabedelamadili, Adad Limonite Megido wala sabeloyana gi a:na:pi. 12Yelusalem wana luma waelabega sabedelamadili, eta udaga eta udaga opa:ya, obaite obaimunu atoda obai kopa sabedelamadili, Da:ibidipe udagana luma obaimunu atoda sabedelamadili, Na:itenepe udagana luma obaimunu atoda sabedelamadili, 13Libaipe udagana luma obaimunu atoda sabedelamadili, Simeipe udagana luma obaimunu atoda sabedelamadili, 14eta:mi udagana luma waelabega obaimunu atoda sabedelamadili.
Iliyochaguliwa sasa
Sekal 12: GBOTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gogodala Bible Translation Project © Bible Society of Papua New Guinea, 2016.