Sekal 14
14
LODote pa:te kanaba elamalelona gi
1 LODope kadepa pa:lelo enoba kadepala de giwa:la gobala aleleyamana lopala lumate iwatedelamadili.
2Na: baiga waelabeyagai Yelusalem baigama gaogoda:munamalowa oba dima giwa:la edelamada:le, obai baiga egete, gegenama gobana lopala alelete, a:pite ato waelabega sosawe da:minamadili. Giwa:lanate luma pala dibulama alete na:da:madili, ameta luma pala obai baiga gobale pa:pa wama alete na:da:madili.
3Amale LODote ya:mai baiga baigana dima giwa:la elamalelo, obate giwa:la elotolona gi a:na:pi. 4Ya:ma kadepala obape a:ite Olib sakama lelamalelo, Olib saka Yelusalem baiga lopa palale dololo enoba kadepate pulelona palale. Amale oba Olib sakama lelawela Olib saka baelamalelo. Ya:ma baela kadepate pulelona palale asemite siliminanona palama welamalelo. Olib saka baewela tepa gobala kabiginapa golo saolamalelo, a:pite saka ya:dete wawi ya:dema galelamalelo, a:pite ya:dete Siyale palama galelamalelo. 5Da: enobai na:dowali saka golo gobale wama gugugla:madelewa, gi ase ya:ma baela A:isiel baigama wete saolamalelo. Da: Yudanapa kanaba Usayate eloyana tepala waima: emoda:te wama guguliyana gi a:na:pi wama gugula:madelewa. Amale God na:dowali LOD, a:pite waelabega awanana luma obada pa:da:madili.
6Ya:ma kadepala wa pa:pa lulilamalelo, itilanapa itite wa itiminamalelo. 7Ya:ma kadepala gi opa:ya bapi elamalelo, kadepata: isata: bini, LODote ya:ma kadepa gi itawa elelo. Wa debelalola luililate dololamalelo.
8Ya:ma kadepala kanika:wa wite Yelusalem baigala wama saolamalelo, a:ma wi palate kadepate pulelona palanapa wasewama pelolamalelo, a:pite wi pala kadepate silimina:nona palanapa wasewama pelolamalelo. Ga:ga: tepata: ila tepata:le wi pelola gi pa:pa ekelamalelo.
9A:ibaiga kabigibegale LODote kanaba elamalelo. Ya:ma kadepala menagi LODote elamalelo, a:pite obape gagi menagi.
10Wa kabigibegala, Geba baigale wete Yelusalemape siyale palale dololona baiga Limon baigama saolamalelona, opa:ya elamalelo, A:la:b wa a:na:pi. Ameta Yelusalem sidima patate obape sabala dololamalelo, Beniyamin ogosale asemite lopanapa ogosale wete sokotanapa ogosama wete, Ananel sidinapa genamama wete kanaba dalagipe adami etoda:mina gegenamama welamalelo. 11#Eka 22:3Lumate Yelusalem baigala edelamadili, ya:mala eta sosawenapa gite pa:pa dololamalelo. Yelusalem oba sa:lele dololamalelo.
12Yelusalem baigama giwa:la edelamadilina baiga LODote ma:ma gite tila gile obai dapolamalelo. Obai obaimunu a:ile litatilila ameta obaimunu sesepo baubulamadili, tao lapipilate obaimunu sasabale dowatate baubulamadili, a:pite ma:la:pilate magata gobala dowatate baubulamadili. 13Ya:ma kadepala LODote kabiginapa emo gile luma dapolamalelo. Dala waelabega etape mai gwalita, ameta giwa:lamite ameta giwa:lamite edelamadili. 14Yuda iya:ta: Yelusalem baigama giwa:la elamalelo. Obai ebatala edelina baigabaiga napimunu lopala alelamadili, golodota: silibata: kalikota: waelabega obaite alelamadili. 15A:na:pinapa gite tila gite obaimunu eda: sabala osota: ka:molota: donikita: gwama anekekeyapo waelabeyagaita: dapolamalelo.
16 #
Leb 23:39-43
A:pite Yelusalemadima giwa:la edelina baiga eta:mi menagigida: pa:pa kaokolamadilina, obaite gogo waelabegala dida:ta edelamadili Yelusalem baigama Kanaba LOD Kamalinapa balelaminamada:le, gwama bikiwa poko a:na:minetedelamada:le. 17A:i baigana luma eta:mite Yelusalemama pa:pa dida:te Kanaba LOD Kamalinapa balelaminetedelamadilina, gwite obaimunu wala pa:pa ononamalelo. 18Isipt wana lumate pa:pa dida:te balelaminamadilina, obai iya:ta: gwi bini edelamadili. Bikiwa poko a:na:da:minamada:le pa:pa dida:madilina luma LODote eta:mi baiga dapoyana gitetila gi menagile obai dapolamalelo, obaite bikiwa poko gima pa:pa dida:madilina tepala. 19Bikiwa poko aseminamada:le pa:pa dida:madilina lumata: Isiptina lumata: enoba wisa egelamadili.
20Ya:ma kadepala LOD AWANA GILALA osomunu belema alilamadili, LODope genama gobana lopala olola kakabuwate, awana ba:kele genamala lopala alila sabana awanana kakabuwa a:na:pi edelamadili. 21Yelusalem baigata: Yuda baigata: gobana sosopena waelabeyagai LOD Kamalinapape awanana lopala edelamadili, a:pite dapoda:na anekekeyapo alete pa:da:madilina luma waelabeyagai enobai kakabuwa alete lopala ololamadili. A:pite ya:ma kadepala Ka:inan baiganapa lumagi mengi LOD Kamalinapape genamala pa:pa elamalelo.
Iliyochaguliwa sasa
Sekal 14: GBOTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gogodala Bible Translation Project © Bible Society of Papua New Guinea, 2016.