Sekal 4
4
Golod waikita: Olib I saki gi
1A:pite na:da gwalemonoyana pa:li lumagi gwama pa:te na: ipa:lana:miyana, tenelalona lumagi ipa:laminamalelona gi a:na:pi. 2Oba na: nanate tiliyana, a: powa tilaloya. Na: ameta a:nege layamana. Na: golod waiki sokate tilalowa. A:ma sidila kabuwate dololo, a:pite 7 waiki a:mala pa:ipilili a:pite 7 siwi a:meta a:mai waikima dowatili. 3#Eka 11:4Gwama waiki ebatala Olib i saki a:meta, eta kabuwa mimiti ya:dela a:pite eta kabuwa pele ya:dela litilili.
4Na:da gwalemonoyana pa:li lumagi anate tiliyamana, lod, ma:mai lopala powaya.
5Oba ameta a:negelayana, mamai lopala gi a: pa: itawata. Na: ameta a:nege layamana, lod, na: pa: itawa.
6Enobala obana: dima a:negelayana, ma:ma enoba LODote Selubabel dima lalelona gilala. Pa: kamalile, pa: pa:nipa:nile ameta na:dowali limole a:na:minamadili. Ma:ma enoba LOD Kamalinapate lalelona gilala.
7Kalekalenapa saka, a: powa lopalaya. Selubabelepe sosoko palala a: wa alapolagabanapa wa elamalelo. A:pite oba genama sidinapa ba:kele egete milelola lumate mamamida:te begale a:nege lalamadili, God ewamena, God ewamena.
8Amale LODope gilalana: dima pa:yana, 9Selubabelepe maite ma:ma balelamina genama sokate miyana. Obape maite a:na:mina gi guminamalelo. Enoba tepala a: LOD Kamalinapate a: dima na: auna:miwina gi itawa elamalelo.
10 #
Ese 5:2
#
Eka 5:6
Powate lumagite kokowabina gi pa: gige laleloya. Lumate tao awapamina Selubabelepe mai gobala dololamalelona gi tilite sa:keladelamadili. Ma:ma 7 tao enobai LODope taote a:i baiga kabigibega gobala tida:da wamidili.
11 #
Eka 11:4
Amale na: pa:li lumagi anate tiliyamana, waiki mimiti ya:deta: pele ya:deta:la litatilina Olib I saki a:ta:piya.
12Na: gwama oba anate tiliyamana, ma:mai Olib i tata saki sape sasamininina golod paipo saki ebatala litatilina, obaimunu gi a:ta:piya.
13Oba ameta a:negelayana, ma:mai lopalaimunu gi a: pa: itawata.
Na: a:nege layamana, lod na: pa: itawa.
14Enobala oba a:negelayana. Ma:mai enobai mai etapada:mida:na dala saki, obaite a:i baigala kabiginapa LOD dima gisaola elili.
Iliyochaguliwa sasa
Sekal 4: GBOTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gogodala Bible Translation Project © Bible Society of Papua New Guinea, 2016.