Sekal 7
7
Godote sewatale baya awanale timo eda: gi sosawege layana gi
1Kanaba Daliyusite naba 4 gogola kanaba eloyana tepala, naba 9 napa Kisleb samosola naba 4 napa kadepala, LODope gilalate Sekalaya dima pa:yana. 2Betel baigana lumate Selesata: Legem, Meleketa: obaimunu dalada a auwada:miyana LOD anate tilamada:le. 3Obate LOD Kamalinapape genama gobala oko a:miniyana guwali dalata: gwama wala gilala lada:na dalata: danate tiliyana, na: gogo waelabega gobala maigula samosola adimada:le baya awana elotolamalowata ne a lope a:munoyamana gi a:na:pi.
4Enoba tepala LOD Kamalinapape gilalana: dima pa:yana. 5Oba a:negelayana, a:ibaigana luma waelabegata: guwali dalata: danate ti, da: maigula samosota: 7 samosota: a:pite a pa:nidiyana 70 gogo gobala baya awana eda:te edeleyamana tepala da: pa:pa na:gima ya:ma gi a:na:mineyamana. 6Da: da:ya da:pe gi sa:ledeminamada:le bayata: wita: edeleyamana. 7Ma:mai enobai LODote lope tepana wala gilala lada:na dalimunu magatale ladoloyana gilala, Yelusalemata: gwama oba ebatana baigabaigata: lopalada gelada eda:liyala Negebata: kadepate siliminanona ya:dena sakata:la luma eda:liyala obai ma:mai gilala ladiliyana.
8A:pite LODope gilalate gwama Sekalayadima pa:yana. 9Oba a:negelayana, enoba LOD Kamalinapate lalelona gilala. Gi sogolale babamina, awe nagala gita: ameta amowata gita: kekeda:mina. 10Gaigiyanata: salipanata: atakabinata: lopala bininata:dima menemenena gi ege dapila. Da:dowali gwana gobala ege etate etadima sosawe gi iwaledela.
11Ameta obai gima kamida: gi pa:pa iwiminadele, gwana goba gi kakaleda:mite baiga dapote igibi tauda:miyana. 12Obaimunu gwana goba ba:kele a:na:pi kalekaleda:minete kakami gilalata: LOD Kamalinapate lope tepana wala gilala lada:na dalimunu magatale ladoloyana gilalata: enamada: gima pa:pa iwiminiyana. Enobala LOD Kamalinapa kabigibegale ga:oloyana.
13Na: obai awada:minoyamana tepala, obai pa:pa enamadiyana. Enobala obaite na: awana:miyana tepala, na: obaimunu gilala pa:pa enamayamana, LOD Kamalinapate lalelo. 14Na: paiwa ganabi laoda:le pa: obaite itawa wama auda:miyamana, obaite a:mala edelamada:le, obai amale atakabina edeliyana. A:ma wa a lumate sosawe bapi miyana, a:pite lumate a:ma wala pa:pa sa:eda:te saoda:te ediliyana. A:pite lumate iwiminiyana wa a luma bininapa wa eyana.
Iliyochaguliwa sasa
Sekal 7: GBOTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Gogodala Bible Translation Project © Bible Society of Papua New Guinea, 2016.