Piligu 12
12
Naawuni boli Ibram
1 #
Tuma 7.2-3; Hib 11.8 Ka Yawɛ daa ti yɛli Ibram, “Yim’ a ya ŋɔ min’ a ba yiŋa ni a dɔɣiriba ŋɔ sani n-chaŋ tiŋgbɔn shɛl’ ni n ni yɛn wuh’ a. 2N ni chɛ ka a zuliya galisi pam. N ni niŋ alibarika niŋ a ni, ka chɛ ka a yuli du pam, ka chɛ ka ninvuɣ’ shɛb’ gba ti nya alibarika a zuɣu.
3 #
Gal 3.8
Ninvuɣ’ shɛb’ bɛn niŋ alibarika niŋ a ni,
n gba ni niŋ alibarika niŋ bɛ ni.
Ka ninvuɣ’ shɛb’ bɛn yɛli noli ti a,
n gba ni yɛli noli ti ba.
Ka dunia ŋɔ zuliya kam zaa
ni ti nya alibarika a zuɣu.”
4Ka Ibram daa yiɣisi chaŋ kaman Yawɛ ni daa yɛl’ o ni o niŋ shɛm maa. Ka Lɔt daa dol’ o chaŋ. Ibram daa nyɛla yuun’ pisopɔinnaanu nira saha shɛl’ o ni daa yiɣisi Haran maa. 5Ibram daa zaŋla o paɣ’ Zarai min’ o tizo Haran bia Lɔt, ka bɛ daa laɣim bɛ ni mali binshɛlikam zaa zaŋ tabili bɛ ni mali ninvuɣ’ shɛb’ Haran tiŋgbɔŋ maa ni n-yiɣisi kuli Keenan tiŋgbɔŋ ni.
Bɛ ni daa paai Keenan tiŋgbɔŋ maa ni, 6ka Ibram daa yi nimaani n-chaŋ Shɛkɛm ti ʒini Mɔre oki tia gbini. Keenannima n-daa be di tiŋgbɔŋ maa ni di saha maa. 7#Tuma 7.5; Gal 3.16 Ka Yawɛ daa ka Ibram sanna ti yɛl’ o, “N ni zaŋ tiŋgbɔŋ ŋɔ ti a zuliya.” Di saha ka Ibram daa me sara maligu bimbini nimaani zali Yawɛ ŋun daa ka o sani maa na. 8Ka Ibram daa yiɣisi nimaani n-chaŋ ti ti o suɣili Bɛtɛl wulimpuhili polo zoli zuɣu ʒini; ka chɛ Bɛtɛl bahi wulinluhili polo, ka chɛ Ai mi bahi wulimpuhili polo. Ka o daa me sara maligu bimbini zali Yawɛ nimaani gba n-jɛmd’ o di gbini. 9Ka Ibram daa lan gbaai chandi zaŋ kpa Nɛgɛb polo.
Ibram chaŋ Ijipti
10Ka kum daa ti lu bɛ tiŋgbɔŋ maa ni. Ka Ibram daa yiɣisi chaŋ Ijipti ni o ti ʒini nimaani n-niŋ daba ayi, dama kum maa daa miiya pam bɛ tiŋgbɔŋ maa ni. 11O ni daa ti yɛn kpe Ijipti saha shɛli ka o yɛl’ o paɣ’ Zarai, “M mi ni a nyɛla paɣ’ viɛlli, ka a lihibu mali kɔre. 12Ka Ijiptinim’ yi ti nya a, bɛ ni yɛli, ‘O paɣa m-bala’, ka ku ma ka chɛ a. 13#Pil 20.2; 26.7 Yɛlim’ ba ni a nyɛla n tizɔpaɣa, ka bɛ niŋ ma nirilim a zuɣu, ka tiligi n nyɛvili a zuɣu.” 14Ka Ibram ni daa ti kpe Ijipti, Ijiptinim’ daa shiri nyaya ka paɣ’ maa nyɛla paɣ’ viɛlli. 15Firawuna kpambaliba ni daa nya o, bɛ daa paɣ’ o pam Firawuna sani. Ka bɛ daa zaŋ o tahi Firawuna yiŋa. 16Ka Firawuna daa niŋ Ibram nirilim viɛnyɛliŋga Zarai zuɣu. O daa ti Ibram piɛri mini buhi ni niɣi ni bundibisi ni bunnyama ni daba bɛn nyɛ dɔbba mini paɣiba ni laakumnima.
17Amaa ka Yawɛ daa chɛ ka alɔbo dɔriti gbaai Firawuna min’ o yiŋnima, Ibram paɣ’ Zarai maa zuɣu. 18Ka Firawuna daa boli Ibram na nti bɔh’ o, “Bɔ n-niŋ ka a niŋ ma lala? Bɔ n-niŋ ka a bi yɛli ma ni o nyɛla a paɣa? 19Bɔ n-niŋ ka a yɛli ni o nyɛla a tizɔpaɣa, ka n zaŋ o niŋ m-paɣa? Dinzuɣu n-nyɛ a paɣa! Zaŋm’ o chaŋ.” 20Ka Firawuna daa bah’ o niriba noli, ka bɛ zaŋ Ibram min’ o paɣa ni o ni mali binshɛlikam zaa yihi soli.
Iliyochaguliwa sasa
Piligu 12: RLDB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Red Letter Dagbani Bible © Bible Society of Ghana, 2011